28-годишен жител на кумановското село Романовце е приведен откако со автомобил удрил полициски службеник, одбил да застане на полициска наредба и се обидел да побегне.

Инцидентот се случил синоќа околу 22:30 часот во селото Отља, во општина Липково, кога полицијата се обидела да запре возило „ауди А3“ со скопски регистарски таблички. Наместо да застане, возачот продолжил со движење и со возилото удрил во еден од полицајците, по што избегал од местото.

Потерата завршила во близина на селото Романовце, каде што осомничениот го оставил автомобилот и се дал во бегство пеш. За да го запре, еден од полициските службеници испукал два предупредувачки куршуми во воздух.

Набргу по тоа, бегалецот бил стигнат и совладан, но и тогаш пружал отпор и физички нападнал полициски службеник. Станува збор за С.Ч. (28) од Романовце, кој е приведен и задржан во полициска станица.

Од полицијата информираат дека по целосно документирање на случајот против него ќе биде поднесена соодветна кривична пријава.

The post ПРЕДУПРЕДУВАЧКИ КУРШУМИ ВО ВОЗДУХ Фатен возач што удрил полицаец и побегнал appeared first on plusinfo.mk.