Лукас Жал е кинематографер во филмот „Татковина“, копродукциски полско-италијански, германски и француски филм, кој се фокусира на односот меѓу писателот и добитник на Нобеловата награда Томас Ман и неговата ќерка Ерика, актерка, писателка и возачка на рели кои во 1949 година во екот на Студената војна тргнуваат на предизвикувачко патување низ разурнатата Германија.

Во видео обраќање, годинешниот лауреат се заблагодари на жирито предводено од оскаровецот Воли Фостер, своето отсуство го образложи со професионални ангажмани, најави скорешна посета на Битола и честиташе на останатите добитници, односно на кинематограферот Жонџијанг Лианг од Кина кој доби сребрена „Камера 300“ и на данскиот кинематографер Паул Шпенгеман кој доби бронзена „Камера 300“.

Спред востановената традиција на ИФФК „Браќа Манаки“ вечерва во Битола се доделија железна „Камера 300“ која им припадна на кинематограферите Максим Катари за филмот „Магарешка убавина“ и на Бенџамин Ечазарета за филмот „Кракатоа“, а со фестивалско одличје се стекнаа и Хулијам Амару кинематографер во филмот „Таму на небото“ кој доби мала „Камера 300“ и Милда Јоудвалките од Литванија која доби кристална „Камера 300“ за камерата во филмот „Покрај ридот на Наполеоновиот шешир“.

Директорот на ИФФК „Браќа Манаки“ Димитрија Доксевски упати јавна благодарност до тимот и до сите што го помогнаа фестивалот и потсети дека годинешното издание беше со рекордна понуда.

– Имавме одлична конкуренција, квалитетни филмови, имавме публика, а меѓу нив најмладите, децата кои треба да ги учиме да го сакаат филмот, да ја сакаат кинематографијата. Имавме рекорден број на мастер класови и работилници со кинематографери и автори од филмската индустрија со кои можевме да разговараме со часови во само седум дена и јас сум горд на тоа – рече Доксевски.

The post „ЗЛАТНА КАМЕРА 300“ ЗА ПОЛСКИОТ КИНЕМАТОГРАФЕР ЛУКАС ЖАЛ Фестивалот „Браќа Манаки“ го прогласи лауреатот appeared first on plusinfo.mk.

Медицинската драма „The Pitt“ ја освои наградата за најдобра драмска серија на 78. доделување на „Еми“, кое се одржа синоќа (14 септември) во Лос Анџелес. Серијата, која минатата година исто така беше прогласена за најдобра во драмската категорија, го повтори успехот и во 2026 година. Нејзиниот главен актер, Ноа Вајл, освои награда за најдобар актер во драмска серија.

Меѓу останатите добитници во драмските категории се најдоа Риа Сихорн, која го освои својот прв „Еми“ за главна женска улога за „Pluribus“, и Том Пелфри, награден за споредна машка улога во серијата „Task“. Алисoн Џени, пак, ја освои наградата за споредна женска улога за „The Diplomat“.

Најголемото изненадување на вечерта беше серијата „Widow’s Bay“, која ја освои наградата за најдобра комедиска серија. Продукцијата на „Apple TV“ освои шест награди во главната церемонија, со што се издвои како еден од најголемите победници на годинешните „Еми“.

Метју Рис ја освои наградата за најдобар актер во „Widow’s Bay“, додека Кејт О’Флин и Стивен Рут беа наградени за споредни улоги. Серијата освои и признанија за сценарио и режија.

Џин Смарт освои „Еми“ за најдобра актерка во серија од жанрот комедии за улогата на Дебора Венс во „Hacks“. Ова е нејзина петта последователна победа во истата категорија за оваа улога, што претставува историски успех. Со ова признание, серијата ја заврши својата приказна со значајно достигнување за главната актерка.

74-годишната Смарт сега има вкупно осум награди „Еми“ за актерски достигнувања, со што се изедначи со Џулија Луис-Драјфус и Клорис Личман. Нејзината победа беше еден од најемотивните моменти на церемонијата.

Метју Рис оствари исклучително достигнување, освојувајќи награди во две главни актерски категории во текот на истата вечер. Покрај наградата за комедијата „Widow’s Bay“, тој беше награден и за главна машка улога во ограничената серија „The Beast in Me“.

Со тоа Рис стана првиот кој во една иста година освоил „Еми“ за главна актерска улога и во комедија и во ограничена серија. Неговиот двоен успех беше еден од највпечатливите моменти на 78. церемонија.

Други значајни награди

Ограничената серија „DTF St. Louis“ ја освои наградата за најдобра ограничена серија, додека „The Traitors“ беше прогласена за најдобра реалити натпреварувачка програма. „The Late Show with Stephen Colbert“ ја освои наградата за најдобра емисија од разновиден карактер.

Церемонијата ја водеше Маришка Харгитеј, а меѓу посебните признанија беше и хуманитарната награда „Боб Хоуп“, која му беше доделена на Мајкл Џ. Фокс.

The post ДОДЕЛЕНИ НАГРАДИТЕ ЕМИ 2026 Метју Рис стана првиот што освоил две награди за главна актерска улога во иста вечер appeared first on plusinfo.mk.

Долгометражниот игран филм „17″, во режија на Косара Митиќ и во продукција на „Црна Мачка Продукција”, е избран за македонски кандидат за наградата Оскар, во категоријата најдобар меѓународен долгометражен филм.

Одлуката ја донесе Комисијата за избор на национален кандидат за Оскар при Друштвото на филмските работници на Македонија, чиј состав е прифатен и одобрен од Американската академија за филмски уметности и науки: Марија Димитрова – претседател на Комисијата и продуцент, Антонио Митриќески – режисер, Дејан Димески – директор на фотографија, Иван Бартлинг – сценограф, Георги Унковски – режисер, Теута Ајдини Јегени – актерка и Сара Ферро – продуцент.

Во изборот оваа година беа пријавени два долгометражни играни филма: „Скејтбордингот не е за девојчиња” на Дина Дума и „17″ на Косара Митиќ.

„17″ ја имаше својата светска премиера во програмата „Перспективи” на 76. Берлински филмски фестивал, а до сега има освоено 11 меѓународни награди. Меѓу нив се наградата за најдобар филм на Меѓународниот филмски фестивал во Уругвај; наградата за дистрибуција на Филмскиот фестивал во Болцано; Наградата од публиката и Специјалното признание за Ева Костиќ на Меѓународниот филмски фестивал во Лас Палмас; наградата за најдобра актерка за Ева Костиќ на Bella Tofifest во Полска; наградата GWFF за најдобар меѓународен дебитантски филм на Филмскиот фестивал во Ерусалим; Срцето на Сараево за најдобра актерка за Ева Костиќ, Специјална награда за промовирање родова еднаквост, наградата Cineuropa и Наградата од публиката за најдобар игран филм на Сараевскиот филмски фестивал; како и „Златна мимоза” за најдобра режија за Косара Митиќ на Филмскиот фестивал во Херцег Нови.

Во филмот играат Ева Костиќ, Мартина Даниловска, Ева Стојчевска, Петар Маниќ, Ирена Димеска, Луна Бејков, Христијан Ристески, Алина Христовска, Даме Јовески, Јован Тодоров, Мина Јелушиќ, Тодор Стојковски, Иво Јездиќ, Ана Стојановска, Жаклина Стевковска, Сашко Коцев и Оливер Митковски.

Сценариото е на Косара Митиќ и Огњен Свиличиќ, продуценти се Томи Салковски и Кристијан Буровски, директор на фотографија е Наум Доксевски, сценографи се Дејан Ѓоршевски и Александра Чевреска, костимите се на Жаклина Крстевска, шминката и фризурата се на Карла Лазиќ (Србија), снимател на звук е Аљаж Лукан (Словенија), а монтажер е Владимир Павловски. Филмот е продукција на „Црна Мачка Продукција”, во копродукција со „Арт&Попкорн” од Србија и „Децембер” од Словенија, а меѓународен продажен агент е „Тотем”.

Свеченото доделување на 99. награди на Американската академија за филмски уметности и науки ќе се одржи на 14 март 2027 година во Лос Анџелес. Листата на филмови кои ќе влезат во потесниот избор за Оскар ќе биде објавена на 15 декември 2026 година, додека номинациите за 99. Оскари ќе бидат објавени на 21 јануари 2027 година.

The post ФИЛМОТ „17″ НА КОСАРА МИТИЌ Е МАКЕДОНСКИ КАНДИДАТ ЗА ОСКАР Ќе конкурира за најдобар меѓународен долгометражен игран филм appeared first on plusinfo.mk.

Легендарната американска пејачка и авторка Доли Партон почина на 80-годишна возраст, соопшти нејзиното семејство. Веста беше објавена денеска на социјалните мрежи, а ја потврдија повеќе американски и британски медиуми, како и Ројтерс. Засега не е објавена официјална причина за смртта.

Партон во последниот период имаше здравствени проблеми поради кои откажа и одложи повеќе јавни настапи. Само неколку дена пред смртта таа зборуваше за својата здравствена состојба и за тешкиот период по смртта на нејзиниот сопруг Карл Дин во март 2025 година, со кого беше во брак речиси шест децении.

Родена во 1946 година во Тенеси во сиромашно семејство со 12 деца, Партон почнала да пишува песни уште како дете. На 13 години веќе настапувала во легендарното „Grand Ole Opry“, а по преселбата во Нешвил започнала кариера која ќе трае повеќе од шест децении.

Нејзините песни „Jolene“, „9 to 5“, „Coat of Many Colors“ и „I Will Always Love You“ станаа дел од американската музичка историја. Последната подоцна доби нова светска популарност во изведба на Витни Хјустон. Партон во текот на животот напишала околу 3.000 песни, а повеќе од 100 милиони нејзини плочи и албуми биле продадени низ светот.

Освои 11 Греми награди, меѓу кои и награда за животно дело, а во 2022 година беше примена во Rock and Roll Hall of Fame. Имаше и успешна актерска кариера, со улоги во филмовите „9 to 5“, „Steel Magnolias“ и „The Best Little Whorehouse in Texas“.

Покрај музиката, Партон беше позната и по хуманитарната работа. Нејзината фондација преку програмата „Imagination Library“ со години обезбедуваше бесплатни книги за деца, а во 2020 година таа донираше еден милион долари за истражувањето што помогна во развојот на вакцината на Moderna против ковид-19.

Доли Партон зад себе остава една од највлијателните кариери во американската популарна музика, како авторка, пејачка, актерка и една од личностите кои кантри музиката ја претворија во глобален феномен.

The post 🎥 ПОЧИНА ЛЕГЕНДАРНАТА ДОЛИ ПАРТОН Кралицата на кантри-музиката имаше 80 години appeared first on plusinfo.mk.

Американскиот актер и активист Дени Гловер, најпознат по улогата на харизматичниот полицаец во серијата „Смртоносно оружје“, откри дека боледува од Алцхајмерова болест. Овој 80-годишен актер четири пати е номиниран за наградата Еми.

– Пред три години ми беше дијагностицирана прогресивната болест која ја уништува меморијата. Сè уште не можам да го прифатам тоа. Има моменти на кои сè уште се сеќавам, што ми потврдува дека можам да памтам, и има спомени што никогаш нема да ги заборавам, изјави Гловер за списанието Пипл.

Според направената статистика, повеќе од шест милиони луѓе во САД, како и уште милиони ширум светот, боледуваат од Алцхајмерова болест, која претставува најраспространета форма на деменција.

Дени Гловер (Danny Glover) спаѓа во најпрепознатливите американски актери, со долга и разновидна кариера во филмот и телевизијата, особено познат по улогите во акциони и драмски продукции. Неговиот опус опфаќа силни и влијателни улоги, а меѓу најважните филмови се издвојуваат: „Бојата на пурпурот“ (The Color Purple, 1985) каде игра во силна драмска приказна на Стивен Спилберг, „Сведок“ (Witness, 1985) каде е дел од оскаровскиот криминалистички трилер, и „Смртоносно оружје“ (Lethal Weapon, 1987) кој му ја носи најголемата популарност преку улогата на детективот Мерто. Во истиот серијал продолжува и со „Смртоносно оружје 2“ (Lethal Weapon 2, 1989), а меѓу значајните наслови се вбројува и „Предатор 2“ (Predator 2, 1990), каде ја проширува својата кариера и во научно-фантастичниот акционен жанр.

Гловер е добитник на почесен Оскар во 2022 година. Добивал признанија од Националната асоцијација за унапредување на обоените луѓе (НААЦП) и од телевизијата Блек Ентертејнмент, а бил номиниран и за наградите на Здружението на филмски актери (Скрин екторс гилд).

Од 1998 до 2004 година, Гловер, исто така, бил и амбасадор на добра волја на програмата за развој на Обединетите нации.

The post 🎥 АКТЕРОТ ДЕНИ ГЛОВЕР ОТКРИ ДЕКА ИМА АЛЦХАЈМЕРОВА БОЛЕСТ Му ја дијагностицирале пред 3 години appeared first on plusinfo.mk.

Со 21 нова награда освоени на три престижни меѓународни вински натпревари – Balkans International Wine Competition 2026, Vinarium International Wine Contest 2026 и Concours Mondial de Bruxelles 2026 – Винарската визба „Тиквеш“ уште еднаш ја потврди својата позиција како најнаградувана винарница во Југоисточна Европа и еден од најуспешните амбасадори на македонското вино на светската сцена.
На годинешното издание на Balkans International Wine Competition, најзначајниот вински натпревар посветен на вината од Балканот, „Тиквеш“ освои вкупно 11 награди, меѓу кои два двојни златни медали за вината „Bela Voda Red 2022“ и „Barovo Red 2022“, како и четири златни и пет сребрени медали. Овој резултат е уште една потврда за лидерската позиција на „Тиквеш“ во регионот.
Особено значаен успех „Тиквеш“ оствари и на Vinarium International Wine Contest 2026, еден од најреномираните вински натпревари во Централна и Источна Европа што се одржува во Романија, каде учествуваше што за првпат. На натпреварот, кој се организира под покровителство на Меѓународната организација за лозарство и винарство (OIV), „Тиквеш“ освои шест медали, меѓу кои и највисокото признание – Голем златен медал, за виното „Babuna Red 2023“, како и четири златни и еден сребрен медал. Впечатлив е и фактот што, покрај „Тиквеш“, само уште едно македонско вино беше наградено на овој натпревар.
Нови значајни признанија пристигнаа и од Concours Mondial de Bruxelles 2026, еден од највлијателните и најреспектирани светски вински натпревари, познат по исклучително строгите критериуми за оценување и интернационалното жири составено од врвни вински експерти. На ова натпреварување „Тиквеш“ освои четири медали, и тоа два златни и два сребрени, потврдувајќи ја конкурентноста на своите вина и на најпребирливите меѓународни пазари.
Меѓу најнаградуваните вина на „Тиквеш“ на овие три натпревари се „Bela Voda Red 2022“, „Barovo Red 2022“, „Domaine Lepovo Grand Cuvée 2023“, „Babuna Red“ од бербите во 2022 и 2023 година, „Babuna White 2025“ и „Luda Mara Vranec 2023“, кои уште еднаш ја потврдија својата препознатливост и конзистентен квалитет пред меѓународните вински експерти.

– Освоените признанија на три исклучително реномирани меѓународни натпревари претставуваат силна потврда за континуитетот на квалитетот што го создаваме и за успешноста на нашата стратегија за развој на врвни вина со јасен идентитет, како рефлексија на тероарот. Овие награди имаат особено значење за нашето позиционирање на странските пазари, бидејќи претставуваат независна и релевантна потврда за квалитетот на нашите вина. Воедно, секое вакво признание придонесува и за зајакнување на имиџот на Македонија како земја што создава вина со светски квалитет и има сѐ поголема препознатливост на меѓународната винска сцена – велат од „Тиквеш“.
Со преку 100 меѓународни награди годишно, освоени на најзначајните светски вински натпревари, и со присуство на бројни странски пазари, „Тиквеш“ продолжува да ја зацврстува својата позиција како најнаградувана винарница во Југоисточна Европа и еден од најзначајните промотори на македонското вино во светот.
Новите 21 меѓународна награда претставуваат уште една потврда дека преку континуирани инвестиции во лозарството, современите производствени практики и бескомпромисната посветеност на квалитетот, „Тиквеш“ успешно го позиционира македонското вино меѓу вината од најценетите вински региони во светот.

The post НОВИ МЕЃУНАРОДНИ ПРИЗНАНИЈА ЗА „ТИКВЕШ“ Освоени 21 награда на три престижни вински натпревари appeared first on plusinfo.mk.

The post 🎥 ТЕЈЛОР СВИФТ ТРИУМФИРАШЕ НА МУЗИЧКИТЕ НАГРАДИ АЈ ХАРТ РЕЈДИО Поп ѕвездата постави нов рекорд со седум признанија во една вечер appeared first on plusinfo.mk.

За време на доделувањето на Actor Awards 2026-та, во Лос Анџелес на 1 март, актерот од „Војна на ѕвездите“, Харисон Форд, беше награден од неговите колеги членови на SAG-AFTRA со наградата за животно дело. Тој изгледаше видливо трогнат од таквата чест додека се сеќаваше како неговите рани лични борби го инспирирале да се занимава со  глума.

– Во третата година на колеџ, бев малку изгубен – рече тој за време на церемонијата што ја водеше Кристен Бел.

– Не ми одеше на училиште. Се чувствував изолиран, сам, а потоа најдов друштво на луѓе што поставуваат претстави, раскажувачи, луѓе за кои некогаш мислев дека се неприлагодени и бубалици, а излезе дека се мои луѓе.

Задржувајќи ги солзите, Харисон ги препозна своите соработници и пред камерата и зад сцената, забележувајќи: „Работата што ја работам со други актери е една од најголемите радости во мојот живот“.

Тој, исто така, одвои еден момент да им оддаде посебен поздрав на своите најблиски – вклучувајќи ја и неговата „извонредна, прекрасна сопруга“ Калиста Флокхарт, која го придружуваше на настанот – истакнувајќи: „тие ми дадоа љубов и храброст низ сето тоа“.

Но, срдечниот говор имаше и моменти на лежерност, бидејќи 83-годишникот се пошегува дека се чувствувал „малку чудно“ што ја добива престижната награда „на половина од својата кариера“.

– Малку е рано, нели. Сè уште сум активен актер – се пошегува тој.

Оваа сезона на награди е голема за Харисон по здравствената борба минатата година. Иако мораше да ги прескокне своите водителски должности на Оскарите во 2025 година по дијагнозата на херпес зостер, тој и Калиста – кои се родители на 25-годишниот Лиам – излегоа појавувајќи се на Еми наградите во 2025 година, во септември.

Сепак, и покрај малиот застој, Харисон – исто така татко на возрасни деца, Бенџамин (59), Вилијард (56), Малколм (36) и Џорџија (35) од претходните врски – сподели дека нема планови да забави.

– Благодарен сум, но ќе го направев она што го направив – и ќе го правам она што го правам – без оглед на тоа дали се смета за достојно за споменување или не – рече тој во интервју за Variety во јули.

– Затоа што тоа е она што го правам. Тоа е она што го сакам да го правам. Обожавам да раскажувам приказни. Обожавам да се преправам дека сум некој друг. Тоа е едно од нештата што ги сметав за привлечни кај работата на актерите – рече тој додавајќи дека е тобро тоа што им се потребни и стари луѓе за да ги играат улогите на старите луѓе.

The post 🎥 ХАРИСОН ФОРД НА РАБОТ ОД СОЛЗИ Актерот ја прими наградата за животно дело на доделувањето на наградите за актери 2026 appeared first on plusinfo.mk.

Розалија повторно воодушеви со својот последен албум, Lux, а исто така и со своите настапи во живо. Каталонската пејачка ја доби британската награда за меѓународен изведувач на годината во Манчестер во саботата вечерта, на гала каде што англиската пејачка Оливија Дин се етаблираше како ѕвезда во подем на актуелната музичка сцена со четири награди, две во главните категории – британска жена изведувач и албум на годината.

Но, покрај тоа, Розалија ја освои публиката со импресивен настап, преработка на Berghain со изненадувачко појавување на исландската музичарка Бјорк. Тоа беше прв пат Розалија да ја изведе оваа песна во живо, и тоа го стори со верзија за целата публика, отстранувајќи го „Fuck you“ од последните стихови што ги отпеа Ив Тумор.

Berghain е песната што го инспирираше првото музичко видео од новиот албум, објавен дури и пред самиот албум. Досега, Розалија ја имаше изведено само „The pearl Live“.

Со оваа награда таа ја започнува турнејата која од Франција на 16 март, ќе продолжи во Барселона во април, а потоа во Мајами во јуни, со застанување во Лондон, Амстердам, Берлин, Лисабон и Мадрид.

Розалија го имаше своето деби на најпрестижните награди во Велика Британија, освојувајќи ја наградата Брит откако победи имиња како порториканскиот уметник Бед Бани и Американките Тејлор Свифт и Лејди Гага.

Пејачката рече дека ѝ е чест што може да ја сподели својата музика во странство, им се заблагодари на колегите во индустријата кои „прават музика на шпански“ и побара континуирано славење на „различните култури и разновидноста на јазиците“.

Со својот карактеристичен шарм, таа му призна на водителот, комичарот Џек Вајтхол, дека не може да се сети колку јазици има на албумот: „Тоа е прашањето од милион долари. Тринаесет или четиринаесет, веќе не знам“.

Апсолутна победничка на вечерта во Манчестер, родното место на бритпопот, беше Оливија Дин, која ги освои сите награди во категориите во кои беше номинирана – изведувач на годината, песна на годината, најдобар поп-изведувач и албум на годината за „The Art Of Loving“. Со четири статуетки, таа ја одбележа вечерта како најуспешен артист.

Ноел Галагер ја освои наградата за текстописец на годината и доби видео порака од менаџерот на својот тим, Пеп Гвардиола.

Ноќта започна со враќањето на Хари Стајлс по тригодишна пауза.

The post 🎥 РОЗАЛИЈА И БЈОРГ СО ИМПРЕСИВЕН НАСТАП НА БРИТАНСКИТЕ МУЗИЧКИ НАГРАДИ Оливија Дин со четири статуетки ја одбележа вечерта како најуспешен артист appeared first on plusinfo.mk.

Со неколку стотини маскирани од земјава и странство во Прилеп по 25-ти пат денеска се одржа карневалот „Прочка“. Дефилето на маските низ центарот на Прилеп традиционално го предводеа прилепските мечкари кои се заштитена маска на карневалот, но и како нематеријално културно наследство.

Со дефилето и обредниот ритуал на бркањето на злите духови, прилепските мечкари ја потврдија стогодишната традиција, која, велат ќе продолжи да живее и преку подмладокот што го имааат.

– Навистина е голема традицијата и цврсто се одржува. Радосен сум што карневалот го вративме на меѓународната сцена. Ни пристигнаа и учесниците од повеќе градови од Македонија, но и од Србија, Бугарија, нагласува Ванчо Ѓеорѓиев, претседател на здружението „Прилепски мечкари“ кое е организатор на прилепскиот карневал.

Според прилепскиот градоначалник, Дејан Проданоски, се враќа сјајот на Карневалот и празнувањето на Прочка во Прилеп што во себе го носи простувањето.

– Маските се одраз на сето она што се случувало во текот на годината. Да се избрише лошото, да се остави простор за доброто. И да се простува. Прилепскиот карневал го враќа сјајот на меѓународната сцена и ќе се потрудиме уште повеќе да го збогатуваме, рече Проданоски.

Жири комисија ги прогласи најдобрите маски, и на централното карневаско дефиле, и од детскиот карневал.

Наградата „Гран при“ отиде кај маската „Весела фарма“ од ООУ „Добре Јованоски“.

На Детскиот карневал првонаградена беше маската „Од цветот на знаењето се раѓа медот на успехот“ од ООУ „Кочо Рацин“, а од возрасните групни маски маската „Пепелашка на карневал“ од групата Зодијак. Меѓу поединечните детски маски наградена беше маската „Готик грл“ на Мидеа, како и маската „Пикселстар“ на Мила Спироска во конкуренција на возрасни.

Прилепските мечкари ги поканија учесниците утре, на чисти понеделник, на традиционален посен ручек- посен грав во манастирот „Свети Ѓорѓија“ кај Прилеп со што ќе се означат и Велигденските пости.

The post НЕКОЛКУ СТОТИНИ МАСКИ ГИ РАЗВЕСЕЛИЈА ПРИЛЕПЧАНИ Традиционално, парадата ја предводеа Мечкарите appeared first on plusinfo.mk.