Министерот за надворешни работи и надворешна трговија, Тимчо Муцунски, на собраниската седница за пратенички прашања изјави дека Владата води, како што рече, кредибилна и одговорна надворешна политика насочена кон заштита на националните интереси, достоинството на државата и стратешките цели.

Одговарајќи на прашања за евроинтеграциите, Муцунски порача дека државата повеќе нема да прифаќа отстапки кои не носат конкретни резултати.

– Нема повеќе отстапки и попустливост што не вродуваат со резултати – истакна министерот.

Тој оцени дека барањето за дополнителни гаранции во европскиот процес е оправдано и разумно, посочувајќи дека вакви ставови биле изнесени и од повеќе европски лидери, меѓу кои хрватскиот премиер Андреј Пленковиќ, претседателот на Европскиот совет Антонио Кошта и белгискиот министер за надворешни работи.

Муцунски нагласи дека не е точно дека од државата се бараат исклучиво уставни измени, оценувајќи дека проблемот е подлабок и произлегува од одлуките донесени во 2022 година.

Министерот додаде дека и покрај предизвиците, државата постигнала видливи резултати на меѓународен план, меѓу кои и потпишување на Партнерство за безбедност и одбрана со Европската Унија – прво вакво во регионот.

Тој ги посочи и стратешките договори со Обединетото Кралство, Унгарија и Хрватска, за кои рече дека придонесуваат за зајакнување на меѓународната позиција и економскиот развој на државата.

Муцунски нагласи и дека државата била прва во Европа што воспоставила стратешки дијалог со Соединетите Американски Држави во Вашингтон.

Во делот на европските реформи, тој посочи дека земјата е прва во регионот по искористување на средства од Планот за раст на Европската Унија, што, според него, покажува сериозен реформски капацитет.

– Водиме кредибилна надворешна политика, но и политика што го штити националното достоинство и интереси – порача Муцунски.

The post „НЕМА ПОВЕЌЕ ОТСТАПКИ БЕЗ РЕЗУЛТАТИ“ Муцунски вели дека владата води тврда линија во надворешната политика appeared first on plusinfo.mk.

Американскиот претседател Доналд Трамп повторно ја нападна италијанската премиерка Џорџа Мелони, велејќи дека повеќе не може да има ист однос со неа откако таа одбила да помогне во конфликтот со Иран.

– Таа беше негативна. Кој и да одби да ни помогне во управувањето со ситуацијата со Иран, ние повеќе немаме ист однос со таа земја. Само да знаете, Италија добива многу нафта од Ормутски теснец – изјави Трамп во интервју за Fox News.

– Таа повеќе не е истата личност, а Италија никогаш нема да биде истата земја – додаде тој.

Во телефонско интервју за италијанскиот весник „Corriere della Sera“, Трамп изјави дека е „шокиран“ од Мелони и дека погрешно проценил дека таа ќе има храброст да им помогне на САД во нивната политика кон Иран.

– Мелони не сака да ни помогне, шокиран сум. Дали на луѓето им се допаѓа фактот што вашата премиерка не прави ништо за да обезбеди нафта? Не можам да замислам. Мислев дека има храброст, но грешев – рече Трамп.

The post СЕ РАСИПА КАЛИМЕРАТА МЕЃУ ТРАМП И МЕЛОНИ Шефот на САД разочаран што колешката не му помага околу Иран appeared first on plusinfo.mk.

Набргу очекуваме склучување договор за стратешко партнерство со Хрватска, сличен на тие со Обединетото Кралство и Унгарија, најави министерот за надворешни работи и надворешна трговија, Тимчо Муцунски.

Во гостувањето во емисијата „Само интервју“, во контекст на посетата на хрватскиот министер за надворешни и европски работи, министерот говореше за билатералните односи со Хрватска осврнувајќи се на постојните стратешки договори со Обединетото Кралство и Унгарија, како и на најавата за нов договор за стратешко партнерство со Хрватска.

– Во најава имаме договор за стратешко партнерство со Хрватска. Тоа го најавивме и двајцата на заедничката прес-конференција. Разговараме за билатерален договор меѓу двете држави, кој е сличен на договорите што ги имаме со Унгарија и со Обединетото Кралство – истакна министерот Муцунски.

Шефот на македонската дипломатија информира дека во моментот се водат разговори за финализирање на процесот на создавање стратешко партнерство меѓу двете држави, кое ќе опфати повеќе области, меѓу кои економијата, трговијата, безбедноста и енергетиката. Тој ја посочи Хрватска како „ментор во евроинтегративниот процес“ на државата нагласувајќи ги политичката поддршка и техничката помош.

Во однос на стратешкото партнерство со Обединетото Кралство, министерот посочи дека, во согласност со информациите од надлежните институции, активно се работи на реализација на проектот за брзата пруга, како и на проекти поврзани со системот на јавното здравство.

Осврнувајќи се на договорот со Унгарија, Муцунски нагласи дека преку ова стратешко партнерство се реализираат повеќе проекти, особено во инфраструктурата, при што договорот претставува значајна алатка и во насока на подобрување на јавниот транспорт.

The post ПО ЛОНДОН И БУДИМПЕШТА, СЕ ПОДГОТВУВА ПАРТНЕРСТВО СО ЗАГРЕБ Хрватска ни е ментор и сојузник во евроинтеграциите appeared first on plusinfo.mk.

Министерот за надворешни работи и надворешна тргвија Тимчо Муцунски на Фејсбук објави дека денеска телефонски разговарал со новоименуваната шефица на бугарската дипломатија Надежда Нејнски.

„Упатив искрени честитки по повод нејзиното именување и ѝ посакав успех во извршувањето на функцијата. Во разговорот нагласив дека односите меѓу двете земји треба да се градат врз принципите на добрососедство, пријателство и конструктивна соработка. Воедно, иницирав билатерална средба која би се реализирала во наредниот период“, пишува Муцунски.

The post МУЦУНСКИ ИНИЦИРАШЕ СРЕДБА СО НОВАТА КОЛЕШКА ОД БУГАРИЈА „Ѝ посакав на Надежда Нејнски успех, добрососедство и соработка“ appeared first on plusinfo.mk.

Во изминатите 20 месеци државата донесе неколку одлуки и склучи договори со исклучително значење за нејзиното стратешко позиционирање, истакна министерот за надворешни работи и надворешна трговија, Тимчо Муцунски во изјава за медиумите од Михенската безбедосна конференција.

– Во последните 20 месеци во делот на надворешната политика имаме неколку одлуки и договори кои имаат огромно значење за стратешкото позиционирање на нашата држава. Прво е Партнерството за безбедност и одбрана со Европската Унија – бевме прва земја во регионот што склучи таков договор. Потоа следеше новото стратешко партнерство со Обединетото Кралство, како и завршувањето на постмониторингот од Советот на Европа – нагласи Муцунски.

Тој посочи дека четвртиот клучен документ е Заедничката изјава за реципрочна трговија со Соединетите Американски Држави, која обезбедува јасен пат кон договор за реципрочна трговија.

– Изјавата предвидува задржување на тарифата од 15 проценти, која е пониска во споредба со голем број земји во светот, но и отвора можност за тарифи до нула проценти за специфични гранки и производи значајни за нашиот извоз кон САД. Целта е подобри услови за нашиот бизнис, како и развивање на други стратешки односи со САД во делот на енергетиката и дигиталната трансформација – истакна министерот.

Муцунски оцени дека надворешно-политичката траекторија на државата е јасна и дека во релативно краток период се направени конкретни исчекори.

– Успеавме во дваесет месеци стратешки да позиционираме повеќе клучни области, а сето тоа носи конкретни придобивки за нашите граѓани, за деловната заедница и за државата во целина – посочи тој.

Осврнувајќи се на пораките од Минхенската безбедносна конференција, министерот истакна дека клучната порака од европските и од американските претставници е Европа да се врати кон своите основни вредности.

– Основната порака е дека Европа треба да се врати кон своите основни вредности – не само во безбедносниот, туку и во цивилизацискиот контекст. Потребно е да се зајакне безбедносната архитектура, но и да се направи преиспитување на одредени политики што придонесоа за намалување на економската моќ на континентот – рече Муцунски.

Тој додаде дека Соединетите Американски Држави испраќаат порака на партнерство и заедничка соработка во рамки на трансатлантските односи.

– Постои јасна порака за заедничка соработка, што е важно од аспект на нашата колективна безбедност и иднината на НАТО како алијанса. Истовремено, време е да се препознае дека геополитичката ера на која бевме навикнати во последните децении е променета и дека и ние како држава мораме јасно да се позиционираме во согласност со новите глобални трендови – заклучи министерот.

The post 20 МЕСЕЦИ НАДВОРЕШНА ПОЛИТИКА СО РЕЗУЛТАТИ Муцунски зборуваше за четирите клучни документи со кои Македонија направи исчекор appeared first on plusinfo.mk.

Изјавата на шефот на САД Доналд Трамп дека сојузничките трупи на НАТО „останале зад фронтот“ во Авганистан предизвика политичка бура во Лондон. За време на интервју за „Фокс њуз“, поранешниот американски претседател изјавил дека „не е сигурен“ дека НАТО би им помогнал на САД „ако некогаш ни бидат потребни“.

– Тие ќе кажат дека испратиле некои трупи во Авганистан и го сторија тоа, но останаа малку поназад, малку подалеку од фронтовските линии – изјави Трамп.

Министерот за здравство и социјална грижа на Велика Британија, Стивен Кинок, остро реагираше:

– Коментарите се длабоко разочарувачки и погрешни. Многу британски војници ги дадоа своите животи во поддршка на американските мисии во Авганистан и Ирак – изјавил Кинок за „Скај њуз“ велејќи дека секој што сака да ги омаловажи нивните жртви, очигледно греши.

Лидерката на Конзервативната партија на Велика Британија, Кеми Баденох, ги нарече зборовите на Трамп „апсолутни глупости“, потсетувајќи дека Велика Британија беше меѓу првите што ѝ се приклучија на американската војна против талибанците по нападите од 11 септември 2001 година.

Трупите од земји на НАТО тогаш се приклучија откако САД по нападот го активираше членот 5 за заедничка одбрана на сојузот.

Од 2001 до 2014 година, според податоците на британското Министерство за одбрана, 457 британски војници загинале во конфликтот во Авганистан. За многу семејства во Велика Британија, зборовите на Трамп биле „удар под појас“, пишува Би-Би-Си.

Токму активирањето на членот 5 беше жежок костен во разговор меѓу Трамп и актуелниот шеф на НАТО Марк Руте на Светскиот економски форум во Давос оваа недела. Зборувајќи за безбедноста на Гренланд, Руте го убедуваше Трамп дека сојузниците секогаш стојат позади САД.

The post БЕА ВО АВГАНИСТАН СО НАС, АМА ТАМУ НЕКАДЕ ПОНАЗАД Трамп ги разгневи Британците со изјавите за мисиите на НАТО appeared first on plusinfo.mk.

„Може да се менуваат администрациите и стиловите, но интересите – безбедносни, технолошки, трговски и енергетски – остануваат. Наша обврска е да бидеме држава што знае што сака, држава на која може да ѝ се верува и држава што е дел од решението, а не од проблемот – вели министерот за надворешни работи и надворешна трговија Тимчо Муцунски во интервју за Локално.мк од Давос, каде учествува на Светскиот економски форум.

Во интервју Муцунски говори за актуелните геополитички случувања, односите со Соединетите Американски Држави и со Европската Унија, улогата на Америка на Балканот и во Европа, темелите на македонската надворешна политика и позиционирањето на државата во рамки на „новиот светски поредок”.

Тој порачува дека државата не се движи по инерција, ниту се води од „модни” геополитички трендови.

„Ние сме прогресивни во амбицијата. Сакаме да бидеме модерна европска држава со силни институции и силна економија”, вели министерот Муцунски, додавајќи дека во време кога многу лидери во Давос зборуваат за „рушење на стариот светски поредок”, за нас најважно е да останеме внимателни и со јасен компас.

Министерот се осврнува и на политичките односи со САД и Европската Унија, нагласувајќи дека Европа е нашата природна економска, политичка и институционална дестинација, а САД клучен безбедносен и политички столб за стабилноста на континентот.

„Нашата надворешна политика се темели на три постулати: целосна усогласеност со заедничката надворешна и безбедносна политика на Европската Унија, кредибилно и активно членство во НАТО, и стратешко партнерство со САД. Тоа не е ‘или-или’ или ‘и-и’, туку прашање на принципи, а не на следење на моменталните ветрови”, нагласува Муцунски.

Тој додава дека кога се поставува дилемата „ЕУ–САД или Исток”, одговорот е јасен: „Ние припаѓаме на Западот – по вредности, по безбедносна архитектура и по стратешки интереси. Сè друго може да биде економска релација, во рамки на правилата на меѓународното право, но не и геополитичка ориентација”.

„Вистината е едноставна: без американско присуство и лидерство во НАТО, европската безбедност би била послаба; без европска интеграција, нашиот регион би бил поранлив. Ние работиме да бидеме најдобар сојузник во НАТО и најподготвена кандидатка за членство во ЕУ, затоа што овие две определби се комплементарни”, истакнува министерот.

Одговарајќи на прашањето какви односи треба да градиме во иднина, Муцунски вели дека поуката за нас е да бидеме зрели: „Со големите сили не се гради однос на слепа послушност, туку на јасно дефинирани интереси, меѓусебна почит и договори што носат резултати”.

„Стратешкото партнерство со САД не значи климање со глава, туку значи придонес, јасно изразување согласување или несогласување и барање фер третман, затоа што си коректен и предвидлив сојузник”, додава тој, нагласувајќи дека токму на такви принципи се темелат односите со администрацијата на претседателот Трамп – односи од кои произлегуваат конкретни и видливи резултати, и од кои во иднина се очекува дополнително продлабочување на соработката меѓу двете држави.

Говорејќи за актуелниот светски поредок и позицијата на државата во него, министерот Муцунски е дециден дека нашата безбедност денес е неспоредливо посилна, затоа што сме земја членка на НАТО.

„Тоа е клучната разлика меѓу денес и пред 20 години. Ние сме дел од колективен безбедносен систем, имаме сојузници и располагаме со конкретни механизми. Во исто време, тоа не значи дека треба да бидеме наивни – затоа ја зајакнуваме одбраната, институциите, отпорноста на хибридни закани, како и енергетската и дигиталната безбедност”, додава тој.

На крајот од интервјуто, министерот Муцунски заклучува дека стратешката цел останува јасна – модерна европска држава со силни институции и економија.

„Во време на глобални турбуленции, најголема вредност е кредибилитетот. Ние ќе го градиме токму таму каде што припаѓаме – во европското семејство, во НАТО и преку силно, стабилно и принципиелно партнерство со САД”, заклучува Муцунски.

The post НАТО, САД И ЕУ ОСТАНУВААТ ТРИТЕ СТОЛБА НА НАШАТА НАДВОРЕШНА ПОЛИТИКА Целта ни е да бидеме модерна држава со силни институции и силна економија appeared first on plusinfo.mk.

Ниту еден македонски граѓанин на територија на Иран досега не побарал помош од Министерството за надворешни работи и надворешна трговија (МНР НТ), а шефот на дипломатијата Тимчо Муцунски уверува дека сите ресурси се подготвени доколку има потреба од евакуација и покрај тоа што немаме резидентно дипломатско конзуларно претставништво во таа држава.

– Во моментов од нас не е побарана помош од ниту еден македопнски граѓанин на територија на Иран – изјави денеска министерот за надворешни работи и надворешна трговија Тимчо Муцунски.

Тој потсети дека МНР НТ пред неколку дена објави повик во кој ги информираше граѓаните дека не треба да патуваат во Иран поради влошената безбедносна состојба.

– Таму има навистина тенденција на влошување на безбедносната состојба и објавивме повеќе контакт телефони од МНР и од нашата Амбасада во Анкара, Република Турција кои можат да помогнат да се мобилизира државата доколку постои потреба од евакуација на наши граѓани. Со Иран билатералната соработка не е на највисоко ниво, тоа го знаете, немаме резидентно дипломатско конзуларно претставништво во таа држава, но сите наши ресурси се подготвени да ги ставиме на располагање доколку има потреба од евакуација на наши граѓани – рече Муцунски, на новинарско прашање при посетата на Стопанската комора за информатички и комуникациски технологии МАСИТ.

Поради влошената безбедносна состојба во Исламската Република Иран, МНР НТ завчера упати апел до македонските граѓани, кои се наоѓаат на територијата на оваа држава, да ја напуштат земјата при првите можни и безбедни услови. Истовремено, апелираше и да се одложат сите патувања во Иран, кои не се неопходни.

Како што информираа од Министеството, веќе се ставени на располагање негови капацитети за асистенција на државјаните на Република Северна Македонија преку 24-часовниот СОС-дежурен телефон +389 75 268 736, електронската адреса globalsos@mfa.gov.mk , како и преку дежурниот телефонски број на дипломатско-конзуларното претставништво на Република Северна Македонија во Анкара: +90 539 456 97 10.

The post МАКЕДОНЦИ ВО ИРАН НЕ СЕ ЈАВИЛЕ ЗА ЕВАКУАЦИЈА Муцунски уверува дека ресурсите се подготвени appeared first on plusinfo.mk.

Владимир Путин се чини станува опседнат со идеите на клубот Валдај, елитен тинк-тенк близок на Кремљ, такашто дури редовно им оди на годишните конференции, пишува хрватскиот портал Јутарњи лист во својата анализа на руската надворешна политика и промените во светската геополитичка и идеолошка сцена, од перото на Сњежана Павиќ, реномирана и искусна хрватска новинарка, публицистка и аналитичарка:

Визијата на Владимир Путин за мултиполарен свет е темел на руската надворешна политика уште од неговиот говор во Минхен во 2007 година. Суштината на таа идеја е дека по завршувањето на Студената војна американската доминација постепено слабее, а Русија се обидува да го врати својот изгубен глобален влијателен статус.

Надворешнополитичките потези на Путин во изминатите години, според проруски аналитичари, подобро се објаснуваат преку теоријата на хаосот, отколку преку класичните геополитички модели. Таков став изнесува аналитичарот Антон Барбашин (Anton Barbašin) во анализа објавена за порталот Ридл Русија (Riddle Russia).

Според оваа теорија, „стариот свет“ е неповратно исчезнат. На сцена е неконтролиран хаос, секоја држава функционира како изолиран систем, а војната станува новата нормалност. Барбашин забележува дека ова размислување станало особено популарно меѓу прокремљовските аналитичари по анексијата на Крим и почетокот на војната во источна Украина, пред околу 15 години.

Овие аналитичари се собрани околу клубот Валдаи (Valdai Club) – влијателен тинк-тенк чии годишни конференции редовно ги посетува и самиот Путин. Тие сметаат дека светот повеќе не може да се објасни со концептот на „мека биполарност“, во која Соединетите Американски Држави и Кина се два доминантни пола, а останатите држави се приклонуваат кон едниот или другиот.

Според нивната анализа, во глобалните случувања нема јасен образец или предвидлив ред. Како што пренесува рускиот опозициски портал Медуза (Meduza), новата парадигма најчесто служи како интелектуално оправдување за постојната надворешна политика на Путинова Русија.

Повикување на историјата

Барбашин оценува дека мултиполарноста е идеал, слично како што комунизмот бил идеал за Советскиот Сојуз. Во тој контекст, тој ја толкува и војната во Украина – како обид на Русија да создаде сопствена зона на влијание во свет во кој исчезнале правилата и рамнотежата од времето на Студената војна.

Аналитичарите од клубот Валдаи руската агресија ја прикажуваат како прилагодување кон новиот глобален хаос, за кој веруваат дека не може да се контролира. Дел од ова размислување е и убедувањето дека старите правила веќе не важат и дека единствената гаранција за опстанок и стабилност е воената моќ.

Оттука, според таа логика, станува „разбирливо“ зошто Русија ги прекршува меѓународните договори и меѓународното право и извршува инвазија врз Украина – борејќи се за својот интерес во свет каде, како што сметаат, повеќе не владеат правила, туку сурова сила.

– Нема смисла да се воздржувате од употреба на „било каква неопходна сила“, бидејќи со тоа всушност создавате нови правила и покажувате дали сте способни да бидете голема сила – ја објаснува Барбашин оваа логика. Според неа, само силата ги поставува правилата, а останатите мора да се прилагодат.

Барбашин не гледа противречност меѓу теоријата на хаосот и честото повикување на Путин на руската историја и таканаречените „историски права“ врз туѓи територии. Селективното користење на царската и советската историја, вели тој, создава чувство на континуитет и визија за обнова на некогашната моќ.

Од перспектива на Москва, гледано од 1991 година наваму, токму Западот е тој што ги прекршил старите правила, а не Русија. Според ова толкување, Русија само реагира.

Пораки од Путин

Путин лично ги повтори овие ставови на својата годишна прес-конференција минатиот петок.

– Не се сметаме одговорни за смртта на луѓето во Украина, бидејќи ние не ја започнавме оваа војна – нагласи тој.

Тој додаде дека Русија нема да започнува нови „специјални воени операции“ сè додека Западот, како што рече, „се однесува со почит“ кон Москва.

Путин позитивно се изјасни и за иницијативата на Доналд Трамп за запирање на војната во Украина, истакнувајќи дека Русија е решена да продолжи со разговорите со Соединетите Американски Држави. На прес-конференцијата, тој ги оцени напорите на Трамп како „целосно искрени“ и рече дека „практично се согласил“ со неговите предлози за време на самитот на Алјаска минатото лето.

Европската Унија како пречка

Говорејќи на самит во Киргистан, кон крајот на ноември, Путин предупреди дека Русија е подготвена и понатаму да освојува територии со сила доколку Киев ги одбива условите за прекин на огнот. Овој став го повтори и на состанок со високи воени претставници на 17 декември.

– Целите на специјалната воена операција несомнено ќе бидат постигнати – рече Путин, заканувајќи се дека Русија ќе ги „ослободи своите историски територии“ со воени средства доколку спротивната страна и нејзините странски поддржувачи одбиваат сериозни разговори.

Имајќи предвид дека администрацијата на Трамп сака да „склучи договор“ за Украина и да ги обнови економските врски со Русија, Путин јасно стави до знаење дека Европската Унија сега ја гледа како главна пречка. Сепак, според анализата на Барбашин, Путин верува дека е само прашање на време кога и европската политика ќе се сврти во негова корист. Тој минатата недела изјави дека сегашните европски лидери на крајот ќе ја изгубат власта, по што дијалогот со Русија ќе стане „неизбежен“.

Теоријата на хаосот и внатрешната политика

Кога теоријата на хаосот се применува и на состојбите внатре во Русија, руските аналитичари заклучуваат дека универзални вредности повеќе не постојат и дека моралот нема место во надворешната политика. Според нив, Кремљ е слободен да преземе какви било мерки што ги смета за неопходни за да обезбеди внатрешна стабилност и да спречи глобалните противници да ја искористат наводната слабост на Русија.

Со други зборови, тие ја оправдуваат автократската политика на Путин и го толкуваат светот на начин што најмногу му одговара на рускиот лидер.

The post ЗОШТО ПУТИН Е ОПСЕДНАТ СО ИДЕИТЕ НА КЛУБОТ ВАЛДАЈ? Што носи визијата на Свет во кој силата е единствено правило appeared first on plusinfo.mk.

Главната порака што ја добивме од Брисел е дека геополитичкиот контекс и налага на ЕУ да го интерпретира процесот на проширување како процес на унификација на Европа којшто покрај економско има и безбедносно значење за Унијата. Убеден сум дека доколку државата ги имаше направено уставните измени и овој извештај ќе беше поразличен во начинот на којшто одредени фрази се поставени во неговата содржина, бидејќи техничкиот елемент којшто се оценува има и политички аспект. Но, ние како Влада отворено тоа што го зборуваме пред граѓаните и тоа што чувствуваме дека е став на нашиот народ го пренесуваме и во Брисел. Така се изградени и нашите позиции. Не е само прашањето на уставни измени, прашањето е кои се гаранциите што ќе ги добие државата за предвидливоста на нејзиниот пат напред.

Ова го изјави во Тема на денот на Сител телевизија министерот за надворешни работи и надворешна трговија Тимчо Муцунски, говорејќи за последниот Извештај на ЕК за напредокот на земјава и евроинтеграциите на земјава.

– Веќе година и половина опозицијата и луѓе блиски до неа шират хистерија дека надворешната политика на државата нема концепт, дека не знае каде се движи, дека без идеја се дејствува, следејќи го секое детално гласање во полето на мултилатералната дипломатија за да сега, преку овој извештај добијат демант – надворешната политика и регионалната соработка – тоа што го работи МНРиНТ, беше највисоко оценето во овој извештај, каде што добивме и пофалби за нашата усогласеност со заедничката надворешна и безбедносна политика и за други аспекти како што е историското партнерство во одбраната и безбедноста и низа други елементи, каде што се гледа дека очигледно нашата надворешна политика, во еден сложен геополитички период кога трансатлантските односи не се такви какви што биле, кога имаме конфликти на повеќе места, успева да биде највисоко позиционирано низ призмата на тоа што го цени ЕУ, а сепак да го одржи нашето стратешко партнерство со САД – нагласи Муцунски.

Во однос на критиките на лидерот на СДСМ Венко Филипче за Извештајот, Муцунски кажа дека опозицијата нема кредибилитет да зборува по ова прашање.

– Лидерот на СДСМ тврди дека решението од 2022 е добро решение. Тој тврди дека имаме анти-ЕУ надворешна политика и тоа често го има повторувано без концепт, кога ЕУ вели една од најсилните алки во системот на евроинтеграција е надворешната политика на државата. Мојата поента е – кој е легитимитетот и кој е кредибилитетот на луѓето кои ја доведоа нашата држава во оваа позиција во делот на европските интерации да ценат? Јас немам обврска да им давам политички совет, но тоа што мислам дека е добро е опозицијата да се обедини со Владата и со сите засегнати страни во државата да создадеме консензус по овие прашања, рече тој.

Според него, наместо голи критики што не се реални и не се објективни треба да се види што е она што заедички може да се направи за да се движиме напред.

– Притоа веројатно би било коректно и лидерот на опозицијата наместо да вели дека предлогот од 2022 е добар, да се извини на целата држава за грешките што се направени што не имаат доведено до оваа ситуација. Но тој истовремено излегува со т.н. црвени линии каде никаде не се гледа која е црвената линија и со тоа ги влошува позициите на државата кога настапува надвор од нејзините граници. Така да контрадикторноста на опозицијата и кога беше власт и сега се покажува постојано на дело и немаат кредибилитет да зборуваат по овие прашања, оцени Муцунски.

The post ФИЛИПЧЕ И ОПОЗИЦИЈАТА ТРЕБА ДА СЕ ИЗВИНАТ, А НЕ ДА ШИРАТ ХИСТЕРИЈА Тие ја донесоа државата во оваа позиција и немаат кредибилитет да критикуваат, вели Муцунски appeared first on plusinfo.mk.