Кремљ ја презеде контролата врз руските бизниси на швајцарскиот прехранбен гигант „Нестле“ и францускиот трговски синџир „Ошан“, отворајќи ја вратата и за евентуално преземање на нивниот имот.

Засега не станува збор за формална промена на сопственоста, туку за привремена администрација.

Претседателот на Русија Владимир Путин го потпишал декретот во четвртокот, а управувањето со компаниите ѝ е доверено на московската „L.E.V. Management“.

Механизмот ѝ овозможува на државата да ја преземе контролата без веднаш да стане сопственик.

Песков ги посочи „непријателските земји“

Портпаролот на Кремљ Дмитриј Песков ja истакна политичката заднина на одлуката.

– Станува збор за европски компании од непријателски земји – рече Песков, посочувајќи го односот на тие држави кон Русија како еден од факторите за одлуката.

„Нестле“ веќе соопшти дека ги разгледува можностите за одговор и дека ќе ги преземе потребните чекори за заштита на своите права и работењето. Акциите на компанијата паднаа за повеќе од 2% по објавувањето на веста.

Швајцарскиот гигант работи во Русија од 1990-тите и таму има 6 фабрики во кои се произведуваат кафе, храна за домашни миленици и храна за бебиња. Вработува околу 7.000 луѓе.

Истиот механизам ги зафати „Данон“ и „Карлсберг“

Русија го воведе механизмот за привремена администрација во 2023 година за имотот на компании од држави што ги смета за „непријателски“. Оттогаш под руска контрола се најдоа и бизнисите на „Данон“, „Карлсберг“ и „Фортум“.

Привремената администрација во повеќе претходни случаи била вовед во продажба на имотот на руски купувачи. Според проценка од 2025 година што ја пренесува Ројтерс, руската држава од почетокот на војната презела приватен имот вреден повеќе од 50 милијарди долари.

„Ошан“, пак, е присутен во Русија од 2002 година. На крајот од 2025 година имал 24.236 вработени и 229 продавници, а само во првата половина од 2026 година остварил продажба од 127 милијарди рубљи, односно околу 1,5 милијарди долари.

The post КРЕМЉ УДРИ ПО „НЕСТЛЕ“ Путин стави под управа бизнис со 6 фабрики appeared first on plusinfo.mk.