Државниот обвинител Ненад Савески за Фокус вели дека од Републичкото јавно обвинителство не било побарано мислење пред да биде затворена истрагата за спорните набавки на мазут за ТЕЦ Неготино, во која беа опфатени Ратко Капушевски, Асмир Јахоски, Васко Ковачевски и уште 11 лица.

Обвинителката Катерина Коларевиќ, која по 14 месеци истрага, вчера ја затвори истрагата за набавките на мазут за ТЕЦ „Неготино“ во периодот на енергетската криза од 2021 до 2023 година,  предмет кој тежи 167 милиони евра, на денешниот брифинг рече дека државата немала никаква штета од набавките на мазут за термоелектраната, туку само корист. Во спротивно, посочи, ќе сме имале големи рестрикции на струја.

Во фокусот на истрагата беше фирмата РКМ која го добила тендерот и нејзините сопственици Ратко Капушевски и Ерџан Сулкоски. Меѓу осомничените беше и сопственикот на Пуцко Петрол, Асмир Јахоски, син на пратеникот Исмаил Јахоски. Во истрагата беше опфатен и екс директорот на ЕСМ, Васко Ковачевски кој е во бегство и се бара со меѓународна потерница за случајот Адитив. Опфатен беше и уште еден поранешен директор на ЕСМ, Адријан Муча, односно, вкупно 13 лица, од кои дел беа и во притвор.

Обвинителката Коларевиќ појасни дека од прибраните докази не се утврдило дека осомничените ги сториле кривичните дела што им се ставаа на товар, ниту е утврдено постоење на друго кривично дело што се гони по службена должност.

– Предметот го затворив јас како надлежен обвинител на истрагата. Лично сметав дека нема доволно докази и решив да ја затворам истрагата – изјави Коларевиќ.

На брифингот беше соопштено и дека Обвинителството истрагата потрошило околу 50.000 евра за потребите за вештачења и за други делови од постапката, а биле собрани 200 докази.

– Според Законот за кривична постапка, за да поднесам обвинение, треба да сметам дека барем половина од доказите би ми донеле осудителна пресуда, па со тие половина докази да ги елиминирам оние што не ми одат во корист, но мене ниту еден поединечно не ми оди во корист – рече таа.

Таа појасни дека државниот обвинител Савески бил дополнително информиран за одлуката, но само телефонски.

– Телефонски го известив вчера државниот обвинител за одлуката дека истрагата е затворена. При истраги и при потреба може да се реферира на колегиум на ОЈО ГОКК или на колегиум на Државното обвинителство. Немаше колегиум за истрагата ниту во Обвинителството за гонење организиран криминал и корупција – рече обвинителката.

Како што кажа на почетокот, сè почнало со предистражна постапка по иницијатива на Државната комисија за спречување на корупцијата (ДКСК) кон поранешниот министер за економија од редовите на ДУИ, Крешник Бектеши, во врска со набавките на мазут за време на енергетската криза.

– Беше наведено дека при спроведување постапки за набавка на мазут за ТЕЦ Неготино била искористена енергетската криза за да се набавува мазут со сомнително потекло, дека мазутот којшто бил испорачуван во ТЕЦ Неготино не бил испорачуван, дека фирмата што го испорачувала мазутот немала лиценца, односно формално имала добиено лиценца, но постоеле сомневања дека процесот на издавање од Регулаторната комисија за енергетика не бил законски. Што значи дека ние, постапувајќи по таа првична иницијатива на ДКСК почнавме да преземаме дејствија. И првично почнавме од таму што побаравме од РКЕ да ни ги издаде листите за тоа кои сè фирми во државата имаат лиценци за трговија со течни горива, особено за мазут, бидејќи само неколку фирми во државата имаат лиценци за трговија со мазут – кажа обвинителката.

• КАДАРОТ НА ФИЛИПЧЕ, ЗАЕВ И НА АХМЕТИ ИСПОРАЧУВА ЗА БАНДАТА Милошоски побара оставка од Ислам Абази по запирањето на истрагата за ТЕЦ Неготино

Наводите во иницијативата на ДКСК, како што кажа Коларевиќ, се покажале како неиздржни и неточни, а во меѓувреме дошла и кривичната пријава од Министерството за внатрешни работи, според која 13 осомничени лица се товарат за злоупотреби при јавни набавки и дел за перење пари.

Коларевиќ рече дека Обвинителството морало да отвори истражна постапка, не само поради тоа што станувало збор за големи количества мазут туку и за наводна голема финансиска штета која тогаш од истражните органи беше пресметана на 167,5 милиони евра.

Во пријавата, како што наведе Коларевиќ, не биле споменати наводите што претходно биле содржани во иницијативата на Антикорупциската комисија.

Таа рече дека предистрагата, која ја работеле истражители во Обвинителството за гоење организиран криминал и корупција, била отворена по пријава на Државната комисија за спречување на корупција. Откако поголемиот дел од нив биле вратени во МВР, предметот се преселил таму. Така обвинителката, како што рече, немала увид во сите детали и имала само рок од 24 часа да отвори истрага, за која се водела од податоците од поднесената кривична пријава од МВР. Таа така одговори и на прашањето како е можно двете институции различно да ги читале законските прописи за спроведување тендери, бидејќи, според кривичната од МВР, но и од соопштението на ОЈО ГОКК за отворена истрага, произлегуваше дека е прекршена постапката за јавен повик и имало фаворизирање на компанија, а сега, според Обвинителството немало ништо незаконско.

– Истрагата утврди дека постапките биле спроведувани транспарентно. ЕСМ имало за цел да ги вклучи сите оператори што имале лиценци за трговија со мазут во интерес на побрзо испорачување на мазутот, при што биле контактирани сите економски оператори кои поседувале лиценца и тоа, во дел од јавните повици со известување биле повикани да учествуваат. Од исказите на претставници на економски оператори произлезе дека дел од компаниите не учествувале во постапките поради деловни и економски проценки, односно поради високите количини, потребните банкарски гаранции и ризиците поврзани со тогашната состојба на енергетските пазари – рече обвинителката.

Фирмата РКМ, додаде, го добила договорот за испорака на мазут за термоелектраната бидејќи била единствената што можела да ги обезбеди количините што се барале во јавната набавка. Единствените услови биле да се испорачуваат 1.200 тони мазут и да се запази динамиката на испораките. Тоа, како што кажа Коларевиќ, според вештачењата и сведоштвата на стручни лица од ЕСМ и од ТЕЦ „Неготино“, било и направено.

Сепак истрагата покажала и дека сопственикот на Пуцко Петрол, Јахоски, е главниот играч за набавката на мазутот, на некој начин ја искористил лиценцата на РКП на Капушевски, која и официјално го добила тендерот. Поточно, лично Јахоски ги дал парите за банкарската гаранција, ја договарал испораката на маузтот и го плаќал мазутот кај грчкиот извозник, а Капушевски го организирал транспортот, но според обвинителството и тука немало простор за кривичен прогон.

За обвинувањата дека цистерните наполенити со нафта чекале и со часови само за да ја испорачаат нафтата во момент кога цената ќе била повисока, обвинителката рече дека се следела динамиката на испорака на мазут, при што вештачењето покажало дека не се чекало поскапа цена, односно се носеле цистерни и кога цената била повтина и поскапаа.

– Во текот на постапката е анализирана обемна материјална документација, финансиски и договорни документи, вешт наод и мислење, како и искази од повеќе сведоци, претставници на АД ЕСМ, ТЕЦ Неготино, како и претставници на економските оператори кои во критичниот период имале лиценца за трговија со течни горива-мазут. Од доказите произлезе дека предметните постапки за набавка на мазут се спроведувани во услови на прогласена енергетска криза од страна на Владата и согласно законските исклучоци предвидени во член 23 од Законот за јавни набавки, со цел обезбедување непречено производство на електрична енергија – рече обвинителката.

На 10 март минатата година Министерство за внатрешни работи поднесе кривична пријава, според која со спорните набавки на мазут била фаворизирана компанијата РКМ, при што врз државниот буџет била предизвикана штета од над 167 милиони евра.

ЈАХОСКИ, КАПУШЕВСКИ И КОВАЧЕВСКИ НЕМА ДА ОДГОВАРААТ ЗА НАБАВКИТЕ НА МАЗУТ Обвинителството ја запре постапката

The post ОБВИНИТЕЛСТВОТО ТВРДИ ДЕКА ДРЖАВАТА НЕМАЛА ШТЕТА ОД НАБАВКИТЕ НА МАЗУТ ЗА ТЕЦ НЕГОТИНО, ТУКУ КОРИСТ За истрагата потроши 50.000 евра и не најде докази за злоупотреби appeared first on plusinfo.mk.