Најголемата исплатена сума за штета од каско изнесува 94.000 евра, а за покритие од зелен картон е платено обештетување од 221.000 евра. Најголемата исплатена бруто штета од осигурување лани е 382.000 евра. Штетата е исплатена на правно лице за имот што бил осигуруван во осигурителната компанија за неживот „Осигурување Македонија“.

Од најголемите поединечни исплатени штети (за секоја од 11 компании за осигурување неживот) лани пет се за исплата на задолжителна автомобилска одговорност, четири се за осигурување имот, а по една штета за каско осигурување моторно возило и зелен картон.

Втор највисок износ за обештетување, во конкуренција на осигурителните друштва кои покриваат ризици од неживот, е исплатен за осигурување имот од пожар. Станува збор за правно лице кое имало осигурување во „Уника“ за чие покритие оваа компанија исплатила 282.000 евра.

Најголем износ за штета која произлегува од задолжителната автомобилска одговорност лани исплатила „Сава Осигурување“ и износот е 219.500 евра. Речиси ист износ исплатила осигурителната компанија „Триглав осигурување“ за штета што е покриена со зелен картон. Најголемата штета што лани ја исплатил „Еуролинк“ изнесува 150.000 евра и се однесува на обештетување по основ на пожар на имот. „Винер“ пак за покривање на штета врз имот лани на клиент платил 149.000 евра.

Во сегментот каско осигурување најголема штета лани исплатила „Кроација осигурување“ и таа изнесува 94.000 евра.

Најголеми поединечни штети во сегментот задолжителна автомобилска одговорност лани исплатиле и „Осигурителна полиса“ 124.000 евра, „Халк Осигурување“ 68.000 евра, „Евроинс осигурување“ 61.000 евра и „Граве неживот“ 38.000 евра.

Граѓани, компании и институции од пријавени штети лани наплатиле вкупно 65,1 милиони евра што е на исто ниво како и во 2019 година. Од тоа за штети по полиси за неживотно осигурување компаниите на осигурениците исплатиле 58.000.000 евра. Исплатите на штети по основ на осигурување живот изнесуваат 7,1 милиони евра.

Агенцијата за супервизија на осигурувањето е независно регулаторно тело кое го регулира пазарот за осигурување, врши надзор над работата на осигурителните друштва, се грижи за заштита на правата на осигурениците и придонесува за финансиска едукација на населението.

The post Компанија лани добила 382.000 евра штета за осигурен имот appeared first on plusinfo.mk.