Двете признанија за најуспешни спортисти во младинска и во сениорска конкуренција годинава ги добија кик-боксерите Силвио Мировски и Бобан Илиоски. Во овој спорт оди и наградата за најуспешен тренер што ја доби Дејан Митровски. Наградата за најуспешна спортска екипа од Скопје ја добија спортистите од Специјална олимпијада. Најуспешен македонски спортист од Скопје е пливачот Андреј Стојаноски. Како куриозитет во изборот на најуспешните спортисти за 2023 во изборот на Град Скопје, годинава нема добитник на наградата најуспешен спортист-странец со образложение од организаторот дека наградата е изоставена „поради немање високи резултати од странските играчи, кои настапуваат за скопски клубови“.

Најуспешните беа наградени согласно различните утврдени категории во склоп на донесената одлука од страна на Комисијата за избор на најуспешни спортистки и спортисти, тренер и спортска екипа на град Скопје и доделување на награди и признанија за 2023 година.

Во категоријата Најуспешни 10 спортисти во младинска категорија (мажи и жени), наградени се 1. Силвио Мировски (Кик бокс клуб Гладијатор – 2.место Европско првенство Кик бокс), 2. Витомир Трајковски (Карате клуб Макпетрол – 3.место Балканијада 3.место Европско првенство, 1.место Универзијада), 3. Калин Ивановски (Тениски клуб Југ пласман во 1/4 на АТП челинџер 100 Иаси, Романија), 4. Стефан Стојановиќ (Карате клуб Макпетрол – 3.место Балканијада), 5. Бесир Алили (Боречки клуб Лирија – 5.место Европско Првенство), 6. Ива Богдановска (Џудо клуб Миоки – 3.место Балканијада, 9.место Европско Првенство), 7. Георгина Блажеска (Џудо клуб Миоки – 3.место Балканијада), 8. Јована Мицовска (Карате клуб Макпетрол – 3. место Балканијада), 9.Иван Галевски (Ракометен клуб Алкалоид), 10. Никола Ѓуретановиќ (Пливачки клуб Вардар 2018 – 6. место на Централно Европски Игри).

Во категоријата Најуспешни 10 спортисти во сениорска категорија (мажи и жени), наградени се 1. Бобан Илиоски (Кик Бокс клуб Шампион – Светски Шампион во кик бокс – Лоу кик до 86 кг), 2. Мери Акиевска (Бодибилдинг/фитнес клуб Магнус – Светска Шампионка во Бодибилдинг – Велнес до 158 цм), 3. Игор Стефановски – Иџе (Авто Мото клуб АКК Стефановски – Европски Шампион во ридски патеки), 4. Дејан Георгиевски (Таеквондо клуб Бутел – 3.место, Европски Олимписки Игри Полска.  Во Опен Г-1 има освоено 2 златни, 3 сребрени и 1бронзен медал), 5. Ахмад Магомедов (Боречки клуб Студеничани – 3. место Европско првенство во Борење слободен стил категорија до 79 кг), 6. Дарио Ивановски (Маратон клуб Корранерс – Нов рекорд во Маратон Валенсија, Балкански шампион во полумаратон), 7. Лина Ѓорчевска (Тениски клуб ЈУГ – 1.место W40), 8. Андреас Трајковски (Атлетски клуб Работнички – Скок во далечина- нов рекорд  7.91 метар, 3.местo на Балканско првенство во скок во далечина одржан во Краљево, Србија), 9. Патар Заборски (Карате клуб Макпетрол – 3.место екипно Медитеранско првенство, 3.место Балканијада, прво место Универзијада, 3.место светска лига), 10. Петар Спасеновски (Карате клуб Макпетрол – 3. место Универзијада, прво место екипно, 5.место на Медитерански).

Во категоријата Најуспешна спортска екипа од Скопје наградата е доделена на Специјална Олимпијада (за високи резултати освоени во Бадминтон, Пливање и Атлетика со повеќе спортисти, Јане Никодиновски, Стефан Трпковски, Марио Мицовски и Јулијана Петровска на Летни светски олимписки игри во Берлин 17-25.06.2023 година).

Во категоријата Најуспешен тренер награден е Дејан Митровски (Кикбокс клуб Шампион, Фитнес Клуб Магнус за двајца светски шампиони во два спорта).

Оваа година, во категоријата, Најуспешен спортист – странец кој настапува во екипа од Скопје, поради немање високи резултати од странските играчи, кои настапуваат за скопски клубови, не е доделена награда.

Од македонските спортисти, за Најуспешен спортист со награда се здоби пливачот Андреј Стојаноски (Сојуз за спорт и рекреација на инвалиди на Кисела Вода – 6.место на Светско првенство 50 м градно и 6.место на Светско првенство 400 м мешано во Буенос Аирес).

Покрај признанијата, на добитниците, спортистите и тренерот, им беше доделена и парична награда со вкупен фонд од 185.000 денари.

The post КИКБОКСЕРИТЕ СОБРАА НАЈМНОГУ НАГРАДИ Град Скопје ги прогласи најуспешните во спортот во 2023 година appeared first on plusinfo.mk.