Во последното деноноќие, полициските службеници во неколку градови низ земјата лишиле од слобода пет лица, постапувајќи по вкупно шест пријави за семејно насилство.

Од Министерството за внатрешни работи информираат дека интервенции имало во Скопје, Тетово, Прилеп, Куманово, Велес и Кавадарци, при што дел од случаите се однесуваат на физички и психичко насилство, закани и агресивно однесување во семејни домови.

Во Скопје, 39-годишна жена пријавила дека била физички нападната од својот партнер во Шуто Оризари, по што се преземаат мерки за расчистување на случајот.

Во Тетово, полицијата го лишила од слобода 59-годишен маж, откако неговата сопруга пријавила обид за физички напад по кратка расправија. При проверка било утврдено дека бил под дејство на алкохол со 2,03 промили.

Во Прилеп, 58-годишна жена пријавила вербално малтретирање и навреди од сопругот, по што тој бил приведен.

Во Куманово е приведен 24-годишен маж, по пријава дека психички и физички ја малтретирал својата поранешна партнерка.

Во Велес, 50-годишник е лишен од слобода откако бил пријавен за закани и агресивно однесување кон сопругата, додека во Кавадарци е приведен 31-годишен маж кој физички ја нападнал својата мајка во семејниот дом.

Од МВР информираат дека по целосно документирање на сите случаи ќе бидат поднесени соодветни пријави против сторителите.

The post ПЕТ ЛИЦА ПРИВЕДЕНИ ЗА СЕМЕЈНО НАСИЛСТВO Полицијата постапува по шест пријави во Скопје, Тетово, Прилеп, Куманово, Велес и во Кавадарци appeared first on plusinfo.mk.