Јавен обвинител од Основното јавно обвинителство Скопје заедно со увидни екипи на МВР денеска извршија увид на лице место по големиот пожар што го зафати Трубарево.

Според обвинителството, проверките се однесуваат како на причините за настанувањето на пожарот, така и на складирањето на отпадот на самата локација.

– Извршено е фотографирање и дронско снимање на местото, со цел да се обезбедат сите потребни докази. Со оглед на тоа што локацијата е затрупана и небезбедна, увидните дејствија се одвиваат со отежнат интензитет – велат од Основното јавно обвинителство.

По нивна наредба, местото на настанот ќе остане обезбедено и во наредниот период, за да се продолжи со истрагата.

– Дополнителни мерења на загадувањето ќе спроведе Министерството за животна средина, а ќе биде ангажирано и вешто лице од областа на екологијата – информираат од ОЈО.

И покрај гаснењето, на терен и понатаму е стационирана противпожарна екипа.

– На делови од локацијата се јавуваат повремени чадења и постои опасност од повторно разгорување на огнот, поради што присуството на пожарникарите е неопходно – рекоа од надлежните служби.

Обвинителството нагласува дека истрагата продолжува и дека ќе бидат преземени и други дејствија со цел целосно расветлување на случајот.

The post „УВИДОТ Е ОТЕЖНАТ, НО ИСТРАГАТА МОРА ДА ПРОДОЛЖИ“ Обвинители фотографираа, снимаа со дрон, се бара вистината за пожарот во Трубарево appeared first on plusinfo.mk.

Седум лица се здобиле со труење од чад во пожар кој денеска околу 16:30 часот избувнал во стан во зграда на улицата Кочо Рацин во центарот на Скопје. Благодарение на брзата интервенција на Противпожарната бригада на град Скопје, огнот бил целосно изгаснат.

Командантот на Бригадата за противпожарна заштита, Ѕвонко Томевски, изјави дека повредените веднаш добиле медицинска помош.

– Има седум лица кои вдишале чад. Веднаш беа повикани медицински екипи и пружена им е помош. Пожарот е локализиран и изгаснат за кратко време – изјави Томевски за медиумите.

Во интервенцијата учествувале две противпожарни возила, а поради проширениот пожар, вклучено било и трето возило.

Во моментов, екипите на Министерството за внатрешни работи работат на терен за да ги утврдат причините за настанување на пожарот.

The post СЕ ЗАПАЛИ СТАН ВО СКОПЈЕ, СЕДУММИНА ВДИШАЛЕ ЧАД Пожарот е изгаснат, спречена поголема трагедија appeared first on plusinfo.mk.