Ушуаја, најјужниот град во Аргентина познат како „крајот на светот“, се најде во центарот на сомнежите дека токму таму започнала епидемијата на хантавирус на холандскиот крузер MV Hondius, но локалните власти остро го негираат тоа.

Бродот, кој сега е закотвен во Тенерифе на Канарските Острови, го почнал патувањето на 1 април токму од Ушуаја, оддалечена повеќе од 9.000 километри. На бродот имало 114 патници и 61 член на екипажот од 22 држави.

Сомнежите се појавија по теоријата дека некој од патниците можеби се заразил на депонија во предградието на Ушуаја, место кое туристите често го посетуваат за набљудување птици, а каде има и голем број стаорци и глувци.

„Немаме ниту еден случај во историјата“

Аргентинските здравствени власти тврдат дека Ушуаја не може да биде изворот на заразата.

– Во Огнена Земја немаме евиденција за случаи на хантавирус во нашата историја. Од 1996 година, кога болеста стана задолжителна за пријавување, немаме ниту еден случај – изјави Хуан Факундо Петрина, директор за епидемиологија и здравје на животната средина во покраината.

Тој нагласи дека регионот нема климатски услови за развој на вирусот, ниту го има глушецот со долга опашка кој најчесто ја пренесува болеста, пренесува Би-Би-Си.

– Ние сме остров. Дури и ако глодарите се движат, тие би морале да го минат Магеланскиот Проток за да стигнат до локалните видови – рече Петрина.

„Нултиот пациент“ останува мистерија

И покрај негирањата, аргентинската влада најави дека испраќа тим експерти во регионот за да провери дали има траги од вирусот.

Експертите треба да фаќаат и тестираат глодари од депонијата во Ушуаја, но според Би-Би-Си, два дена по најавата истрагата сè уште не започнала.

Здравствените власти веруваат дека холандски брачен пар, кој подоцна починал, веројатно бил „нултиот пациент“ на бродот.

Службениците сега се обидуваат да го реконструираат нивното патување низ Аргентина, Чиле и Уругвај пред да се качат на бродот MV Hondius.

„Туризмот не смее да биде уништен“

Во Ушуаја расте стравот дека приказната за вирусот може силно да ја погоди локалната економија.

Повеќе од 95 проценти од крстарењата за Антарктикот тргнуваат токму од тоа пристаниште, а туризмот е еден од главните извори на приходи во регионот.

– Работевме напорно на нашите главни пазари и не сакаме нешто вакво да го засени сè што е направено – изјави Хуан Мануел Павлов од Туристичкиот институт Фуегија.

Туристите, сепак, засега не покажуваат паника. Дел од посетителите за Би-Би-Си изјавиле дека продолжиле со патувањата бидејќи во покраината нема потврдени случаи.

Нултиот пар не се заразил во Јужна Америка?

Властите и натаму не можат точно да утврдат каде започнала заразата на MV Hondius.

Чиле и Уругвај веќе соопштија дека холандскиот пар најверојатно не се заразил кај нив, а аргентинските епидемиолози претпоставуваат дека инфекцијата можеби потекнува од друг дел на Патагонија.

И покрај големата истрага, епидемијата и понатаму остава повеќе прашања отколку одговори.

The post ДАЛИ ХАНТАВИРУСОТ ДОЈДЕ ОД „КРАЈОТ НА СВЕТОТ“? Во Ушуаја нема такви глодари, ниту таква клима appeared first on plusinfo.mk.

Американка и Французинка од крузерот MV Hondius се заразесни хантавирус. Уште еден патник од САД покажува „благи симптоми“, соопшти Американското Министерство за здравство.

Сепак, висок американски здравствен службеник претходно изјавил дека американските патници нема задолжително да бидат ставени во карантин, но ќе бидат под надзор уште неколку недели.

Запрашан за оваа разлика во споредба со другите земји, шефот на Светската здравствена оганизација рече дека таа „може да претставува ризик“.

Американските патници ќе бидат префрлени во специјализиран центар во Омаха, каде секој ќе помине клиничка евалуација и здравствен надзор.

Повеќе од 100 луѓе од 23 држави треба да бидат евакуирани за помалку од 48 часа. Шпанските власти операцијата ја опишаа како „сложена“ и „невидена“.

Шпанците први го напуштиле бродот под строг надзор, облечени во заштитни одела и со маски FFP2. Потоа следеле Французите и патници од други држави.

Сите 14 евакуирани шпански државјани веќе се сместени во изолација во воената болница „Гомез Ула“ во Мадрид.

Француските власти потврдија дека состојбата на една жена се влошила во текот на ноќта, по што тестовите биле позитивни. Во Франција веќе биле идентификувани 22 лица кои имале контакт со заразените.

Светската здравствена организација досега потврдила 6 случаи на инфекција меѓу 8 сомнителни случаи. Три лица починале.

Организацијата препорачала карантин од 42 дена за сите патници кои биле во контакт со вирусот.

Запрашан за оваа разлика во однос на другите држави, шефот на СЗО предупредил дека тоа „може да претставува ризик“.

Протоколот за евакуација го надгледувал и шефот на СЗО. Патниците со чамци биле пренесувани до копното, а потоа со автобуси на шпанската армија транспортирани до аеродромот Тенерифе-Југ.

Варијантата откриена на крузерот е Андите хантавирус, редок сој кој може да се пренесува од човек на човек.

Периодот на инкубација може да трае и до шест недели. Вирусот вообичаено се пренесува преку заразени глодари, најчесто преку урина, измет и плунка.

Кризата на MV Hondius предизвика силна загриженост и повторно ги оживеа сеќавањата на ковид-пандемијата.

Сепак, СЗО пред неколку дена објави дека не се работи ниту за епидемија, ниту за пандемија.

The post ЗАРАЗЕНИТЕ АМЕРИКАНЦИ ОД КРУЗЕРОТ НЕМА ДА ОДАТ ВО КАРАНТИН Шпанија ја опиша евакуацијата како „невидена мисија“ appeared first on plusinfo.mk.

Драмата со хантавирусот на крузерот „MV Hondius“ продолжува. Три лица починаа, бројот на заразени расте, а патници од бродот веќе се следат во повеќе држави. Во исто време, научници од Универзитетот во Бат во Англија развиваат вакцина против опасниот вирус.

И покрај драматичните сцени, експертите предупредуваат дека ситуацијата не треба да се споредува со пандемијата на коронавирус.

– Ова не е Ковид. Ова навистина не е Ковид – изјави докторката Лусил Блумберг, специјалист за заразни болести од Јужна Африка.

Светската здравствена организација СЗО засега проценува дека ризикот за пошироката јавност останува низок.

Развојот на вакцината го потврди професорката Асел Сарбаева.

– Во моментов, не постои ефикасна вакцина против хантавирус, што ги остава големите популации во Југоисточна Азија, Африка и Јужна Америка ранливи на болести што ги пренесуваат глодари – изјави таа.

Тимот работи на нов антиген против групата хантавируси.

Од мало село во Аргентина, па до Атлантикот

Експертите сега повторно се навраќаат на епидемијата од 2018 година во аргентинското село Епујен. Тогаш 36 лица се разболеа, а 11 починаа. Истражувачите утврдија дека станувало збор за истиот андески сој на хантавирус.

Микробиологот Густаво Паласиос, кој учествувал во истрагата, изјави дека во светот историски има многу малку случаи на пренос од човек на човек.

– Веројатно имаме помалку од 300 историски случаи на пренос од човек на човек – рече Паласиос.

Истражувачите откриле и нешто необично, вирусот најсилно се пренесувал токму кога заразените добивале треска. Во еден случај, човек заразил друго лице по само краток контакт додека поминувал покрај него на пат кон тоалет.

Што всушност е хантавирусот?

Хантавирусите најчесто се пренесуваат преку урина, измет или плунка од заразени глодари. Луѓето обично се заразуваат кога честичките ќе се рашират во воздухот, најчесто при чистење затворени простории или контакт со контаминирана прашина.

Во повеќето случаи вирусот не се пренесува меѓу луѓе.

Но сојот од Андите, за кој постои сомнења дека стои зад епидемијата на „MV Hondius“, е редок исклучок. Тој може да се пренесува и од човек на човек преку близок контакт.

Светската здравствена организација проценува дека смртноста кај овој сој може да достигне и до 40 проценти.

Симптомите личат на грип, но…

Симптомите прво изгледаат како обичен грип.

Пациентите развиваат треска, болки во мускулите, кашлица и замор. Кај потешките случаи следуваат проблеми со дишењето, воспаление на белите дробови и срцеви компликации.

Токму затоа дел од заразените пациенти завршуваат на интензивна нега.

Како вирусот стигна до крузерот?

Сè уште нема конечен одговор.

Се претпоставува дека првите заразени лица вирусот го добиле уште во Аргентина, каде што бродот тргнал на 1 април.Во Аргентина вирусот го пренесуваат долгоопашести глодари кои често живеат околу населени места и депонии.

Потоа, според експертите, можно е вирусот да се проширил меѓу патниците во затворените простории на бродот.

Тројца мртви, заразени во повеќе држави

Епидемијата на „MV Hondius“ досега однесе три животи. Починаа холандска брачна двојка и германски државјанин.

Мажот од Холандија починал на островот Света Елена. Неговата сопруга подоцна починала на аеродромот во Јоханесбург во Јужна Африка, додека третата жртва, Германец, починал на бродот на 2 мај.

Швајцарија потврди дека нивен државјанин е заразен и хоспитализиран во Цирих.

Во Велика Британија двајца патници се во домашна изолација, а американските власти следат лица во Џорџија, Аризона, Тексас и Вирџинија.

Канарските Острови под посебен режим

Бродот моментално плови кон Канарските Острови.

Шпанските власти најавија строги мерки. Бродот нема директно да влезе во пристаниште, а патниците ќе бидат префрлени во изолирана зона пред да  бидат однесени до аеродром.

Властите на Тенерифе бараат максимална претпазливост.

The post НЕ Е КОВИД, НИТУ ЕПИДЕМИЈА, НИТУ ПАНДЕМИЈА Што знаеме за хантавирусот кој од Андите стигна во Атлантикот? appeared first on plusinfo.mk.