Колумбиската поп-ѕвезда Шакира ја објави официјалната песна за претстојното Светско првенство, насловена „Dai, Dai“. Колумбиската пејачка објави дел од новата песна на социјалните мрежи во видео снимено на легендарниот стадион „Маракана“ во Рио де Жанеиро.

Песната на која настапува и нигерискиот пејач Бурна Бој официјално ќе биде објавена на 14 мај.

Во видеото, Шакира е прикажана заедно со група танчари облечени во боите на неколку репрезентации што ќе настапат на претстојниот Мундијал, што ќе се одржи од 11 јуни до 19 јули во Мексико, САД и Канада.

Шакира ја изведе и официјалната песна за Светското првенство во 2010 година во Јужна Африка – Waka Waka (This Time for Africa), а ги изведуваше своите хитови „Hips Don’t Lie“ и „La La La“ за време на церемониите на светските првенства во 2006 година во Германија и во 2014 година во Бразил.

The post 📽️ ШАКИРА ПАК ГО ПАЛИ ФУДБАЛСКИОТ СВЕТ Ја претстави песната за мундијалот снимена на „Маракана“ appeared first on plusinfo.mk.

Режисерот на „Phantom Thread“, Пол Томас Андерсон и Џони Гринвуд од Radiohead побарале дел од музиката од филмот од 2017 година да биде отстранет од контроверзниот документарец „Меланија“. Гринвуд ја напиша музиката за „Phantom Thread“.

– Добивме сознание дека музичко дело од „Phantom Thread“ е употребено во документарецот „Меланија – се вели во соопштението на двајцата, кое Variety го добил од претставникот на Гринвуд.

– Иако Џони Гринвуд не ги поседува авторските права на музиката, од Universal не се консултираа со Џони за оваа употреба од трета страна, што претставува кршење на неговиот договор со композиторите. Како резултат на тоа, Џони и Пол Томас Андерсон побараа таа да биде отстранета од документарецот.

Инаку, документарецот во режија на Брет Ратнер за Првата дама на САД, заработи 13,35 милиони долари на домашно ниво по два викенда од прикажувањето, што е значаен резултат за документарец кој не е за природата или музиката.

Сепак, „Меланија“ чинеше повеќе од кој било друг документарец во историјата.

Amazon MGM потроши неверојатна сума пари, купувајќи го филмот и придружната документарна серија што се емитува директно на стриминг за 40 милиони долари, а потоа издвои 35 милиони долари за трошоци за маркетинг во кино. Тоа се невидени трошоци со оглед на тоа што документарците традиционално не се двигател на големи приходи од кино благајните.

Раскошните трошоци на Amazon MGM ги поттикнаа другите во индустријата да шпекулираат дали документарецот е обид на студиото да се додвори до сегашната администрација. Бидејќи сопствениците на кината задржуваат околу половина од продажбата на билети, ќе биде тешко да се оправда цената на „Меланија“. Меѓутоа, во необичен потег, Amazon MGM објави соопштение за резултатите од вториот викенд.

Во текот на изминатите 25 години, Гринвуд беше поактивен како филмски композитор отколку како рок-музичар, пишувајќи или придонесувајќи за музиката за 12 филмови, меѓудругите, за филмовите „One Battle After Another“, „There Will Be Blood“, „Inherent Vice“ и „Liquorice Pizza“.

Овен Глајберман од „Варајети“ напиша за работата на Гринвуд во „Фантомска нишка“ во својата рецензија од 2017 година: „Сите сме премногу свесни дека нешто злокобно мора да се крие во сенките… а продорната привлечност на музичката партитура на Џони Гринвуд, исполнета со копнеж и вознемиреност, потсетува на непогрешлива вибрација на Хичкок од 50-тите години“.

The post ЏОНИ ГРИНВУД ОД РАДИОХЕД БАРА ДА СЕ ОТСТРАНИ МУЗИКАТА ОД ДОКУМЕНТАРЕЦОТ ЗА МЕЛАНИЈА Никој не го консултирал музичарот за употреба на неговата музика appeared first on plusinfo.mk.

Емили Купер (Лили Колинс) има уште една причина да остане во Европа: „Емили во Париз“ ќе има шеста сезона.

Создавачот на серијата „Емили во Париз“, Дарен Стар, веќе почнал да фантазира за тоа што би можело да ја чека Емили во шестата сезона.

– Има многу места што би сакал да ги посетам. Но, мислам дека серијата природно го следи текот на приказната. Шоуто се вика „Емили во Париз“. Никогаш нема трајно да ја напушти својата база. Но, ако можам да ја однесам публиката на патување некаде на друго место, би сакал… Забавно е да се размислува за тоа – рече Стар на прес-конференција во декември.

Веста доаѓа кратко по успешниот почеток на петтата сезона на „Емили во Париз“. Сезоната од 10 епизоди ја следи Емили додека патува во Рим за работа, но и за задоволство.

Петтата сезона постигна 26,8 милиони прегледи низ целиот свет за само 11 дена, станувајќи ТВ серија број 1 во 24 земји, вклучувајќи ги Франција, Италија, Бразил и Германија.

Петтата сезона, исто така, достигна топ 10 во 91 земја. Приказните за Емили, нејзината најдобра пријателка Минди Чен (Ешли Парк) и нивниот круг пријатели и љубовни партнери се толку сакани што креаторот на серијата Дарен Стар неодамна ја доби највисоката цивилна почест во Франција: витез на Легијата на честа.

The post 📽️ „ЕМИЛИ ВО ПАРИЗ“ СЕ ВРАЌА СО ШЕСТА СЕЗОНА Продуцентот откри детали за иднината на серијата appeared first on plusinfo.mk.

Таа е под општа анестезија, без свест, без чувства и целосно неподвижна, откако ѝ е дадена комбинација од лекови кои предизвикуваат длабок сон, го блокираат памтењето, ја ублажуваат болката и привремено ги парализираат мускулите.

Сепак, среде зуењето на мониторите и работата на хируршкиот тим, таа слуша нежна музика од флејта преку слушалки во ушите.

Дури и додека лековите го смируваат поголемиот дел од нејзиниот мозок, нејзиниот аудитивен систем останува делумно активен.

Кога ќе се разбуди, ќе се освести побрзо и ќе има појасен ум, бидејќи ѝ била потребна помала доза на анестетици, како што се пропофол и опиоидни аналгетици, отколку на пациентите кои не слушале музика.

Барем, така сугерира нова, рецензирана студија од Медицинскиот колеџ Маулана Азад и болницата Лок Најак во Њу Делхи.

Истражувањето, објавено во списанието „Музика и медицина“, дава едни од најсилните докази досега дека музиката што се свири за време на општа анестезија може скромно, но значително да ја намали потребата од лекови и да го подобри закрепнувањето, пишува Би-Би-Си.

Студијата ги опфатила пациентите кои биле подложени на лапароскопска холецистектомија, стандардна операција за отстранување на жолчното кесе.

Постапката е кратка, обично трае помалку од еден час и бара особено брзо закрепнување во однос на менталната бистрина.

За да се разбере зошто истражувачите ги проучувале ефектите од музиката, важно е да се разбере модерната практика на давање анестезија.

– Нашата цел е по операцијата што е можно побрзо да се отпушти пациентот од болница – вели Фарах Хусеин, специјалист за анестезија која учествувала во студијата. Пациентите треба да се разбудат со бистра глава, целосно свесни и ориентирани, и идеално без болка.

– Со подобра контрола на болката, одговорот на телото на стрес е намален – додава Фарах, која е и сертифициран музички терапевт.

За да се постигне ова, потребно е да се создаде внимателно избалансирана мешавина од пет или шест лекови кои заедно го одржуваат пациентот во сон, ја блокираат болката, спречуваат сеќавања на операцијата и ги релаксираат мускулите.

За процедури како што е лапароскопско отстранување на жолчното кесе, анестезиолозите сега често ја дополнуваат оваа комбинација на лекови со регионални „блокади“ – инјекции водени со ултразвук кои ги умртвуваат нервите во абдоминалниот ѕид.

– Општата анестезија плус блокади се стандард – вели Танви Гоел, водечки истражувач и поранешен виш доцент на Медицинскиот колеџ Маулана Азад.

– Го правиме ова на овој начин со децении – додава таа.

Но, телото не ја поднесува операцијата лесно.

Реагира дури и под анестезија: срцевиот ритам се зголемува, нивото на хормони се зголемува, крвниот притисок се зголемува.

Намалувањето и контролирањето на овие реакции е една од клучните цели на модерната периоперативна нега.

Одговорот на телото на стрес може да го забави закрепнувањето и да го влоши воспалението, а тоа ја истакнува важноста од внимателно следење на одговорот на телото- објаснува Хусеин.

Стресот на телото започнува уште пред првата инцизија, со интубацијата – поставување на цевка во душникот.

За оваа постапка, анестезиологот користи ларингоскоп за да го подигне јазикот и меките ткива во грлото на пациентот за да добие јасен поглед на гласните жици и ја вметнува цевката во трахеата.

Тоа е рутински чекор во воведувањето на општа анестезија што осигурува дека дишните патишта се отворени и овозможува прецизна контрола на дишењето на пациентот додека е во несвест.

– Се смета дека ларингоскопијата и интубацијата го предизвикуваат најстресниот одговор на телото за време на општата анестезија – вели Соња Вадаван, професор по анестезиологија и интензивна нега на Медицинскиот колеџ Маулана Азад.

– Иако пациентот е во несвест и не се сеќава на ништо, телото сè уште реагира на стрес со промени во срцевиот ритам, крвниот притисок и нивото на хормоните на стрес – вели Вадаван, кој е исто така и супервизор на студијата.

Секако, лековите, се унапредени.

Старите маски за вдишување етер одамна не се користат.

Наместо тоа, се користат интравенски анестетици, од кои најпознат е пропофол, седатив и хипнотик кој доби на популарност по смртта на Мајкл Џексон, но е многу ценет во операционите сали поради неговото брзо дејство и лесно закрепнување.

– Пропофолот делува во рок од околу 12 секунди. Го користиме за кратки операции како лапароскопска холецистектомија бидејќи не предизвикува „мамурлак“ што го предизвикуваат инхалационите анестетици – забележува Гоел.

Истражувачкиот тим сакал да открие дали музиката може да ја намали количината на пропофол и фентанил (опиоиден аналгетик) потребни за да се успијат пациентите.

Помалку лекови значат побрзи будења, постабилни витални знаци и помалку несакани ефекти.

Затоа ја осмислиле студијата.

По пилот-студија на осум пациенти, следела 11-месечна студија, во која учествувале 56 возрасни лица, на возраст помеѓу околу 20 и 45 години, кои биле случајно распределени во две групи.

Сите добиле иста комбинација од пет лекови: лек против гадење и повраќање, седатив, фентанил, пропофол и мускулен релаксант.

Пациентите во обете групи носеле слушалки со поништување на бучава, но само една група слушала музика.

– Ги замоливме пациентите да изберат помеѓу две смирувачки инструментални композиции – нежна флејта или пијано – вели Хусеин.

– Сè уште има области во потсвеста кои остануваат активни. Дури и ако музиката не се памети свесно, потсвеста може да произведе корисни ефекти.

Резултатите биле извонредни.

На пациентите кои слушале музика им биле потребни пониски дози на пропофол и фентанил.

Тие имале полесно закрепнување, пониски нивоа на хормонот на стрес кортизол и значително подобра контрола на крвниот притисок за време на операцијата.

– Бидејќи телото ја задржува способноста да слуша под општа анестезија, музиката може да ја обликува внатрешната состојба на мозокот – велат истражувачите.

Јасно е дека музиката ја смирила бурата во телото.

– Слушниот систем останува активен дури и кога сте во несвест.

– Можеби не се сеќавате на музиката, но вашиот мозок ја регистрира – вели Вадхаван.

Идејата дека умот под општа анестезија не е целосно мирен долго време ги интригира научниците.

Ретки случаи наприсуство на свест за време на операција под општа анестезија покажале дека пациентите можат да се сетат на делови од разговорите во операционата сала.

Ако мозокот е способен да регистрира и да се сети на стресни искуства за време на операцијата, дури и кога пациентот е во несвест, тогаш можеби е способен да регистрира и позитивни или утешни стимули, како што е музиката, дури и без свесно сеќавање.

– Тукушто почнуваме да истражуваме како несвесниот ум реагира на интервенции кои не се лекови, како што е музиката. Тоа е начин да се направи операционата сала похумана – вели Хусеин.

Музичката терапија долго време се користи во медицината – во психијатријата, закрепнувањето од мозочен удар и палијативната нега.

Но, нејзината примена во анестезиологијата, област доминирана од технологијата и машините, е голем скок напред.

Ако таква едноставна интервенција може, дури и скромно, да ја намали употребата на лекови и да го забрза закрепнувањето, таа би можела да го промени начинот на кој болниците размислуваат за благосостојбата на пациентите за време на операцијата.

Додека истражувачкиот тим се подготвува за својата следна студија за анестезија со музичка помош, која ќе се темели на претходните наоди, податоците веќе сугерираат едно нешто: Дури и кога телото е мирно, а умот спие, неколку нежни ноти се чини дека можат да го поттикнат закрепнувањето.

The post MУЗИКАТА ГИ ОЛЕСНУВА ОПЕРАЦИИТЕ И ГО ЗАБРЗУВА ЗАКРЕПНУВАЊЕТО Ново истражување со најсилни докази досега за ефектите на музиката врз пациентите appeared first on plusinfo.mk.

Претседателот на САД Доналд Трамп танцуваше во ритмот на домородните танцови по пристигнувањето во Куала Лумпур, главниот град на Малезија, започнувајќи ја првата етапа од неговата азиска турнеја.

И покрај 23-часовниот лет од Вашингтон, 79-годишниот Трамп изгледаше свежо додека цупкаше со нозете и мавташе со стиснатите тупаници во ритмот на традиционалните музички точки, кои беа изведувани во негова чест покрај црвениот тепих.

Шарено облечените танчери ги претставувале главните етнички групи во земјата, вклучувајќи ги и домородните народи на Борнео и малајските, кинеските и индиските заедници. Претседателот беше придружуван од малезискиот премиер Анвар Ибрахим, кој исто така го следеше ритамот на музиката. Видеото за кратко време се прошири на социјалните мрежи.

Петдневната турнеја на Трамп во Азија има за цел да го зајакне влијанието на САД и трговските договори во регионот. Планирани се состаноци со новоизбраниот јапонски премиер Санае Такаичи во Токио и со кинескиот претседател Си Ѓинпинг во Јужна Кореја. Во прилог на маршрутата во последен момент, исто така се споменува и можна средба со севернокорејскиот лидер Ким Џонг Ун по должината на демилитаризираната зона.

The post 🎥 ТРАМП ЗАИГРА МАЛЕЗИСКИ ТАНЦ НА ЦРВЕНИОТ ТЕПИХ Го понесоа фолклорните ритми appeared first on plusinfo.mk.

Повеќе од 100.000 луѓе денеска се собраа во Сараево, за последен пат да му оддадат почит на музичката легенда Халид Бешлиќ. Главниот град на Босна и Херцеговина беше обвиен во тага, додека низ улиците одекнуваа неговите најголеми хитови — песни што обединија генерации и ја одбележаа една епоха на балканската музика.

Комеморацијата започна во Народното позориште во Сараево, каде што пријатели, колеги и обожаватели се збогуваа со уметникот кој со својата музика ја претвори секоја песна во емоција. Во салата владееше тишина, прекинувана само од аплаузи и солзи. Секој збор изговорен од сцената беше исполнет со благодарност и почит кон човекот кој со својата топлина и харизма остави неизбришлива трага.

По комеморацијата, ковчегот со телото на Халид беше пренесен во Гази Хусрев-беговата џамија, каде што се одржа молитва за вечен покој. Илјадници верници се помолија за неговата душа, а голем број луѓе стоеја пред џамијата, не успевајќи да најдат место во дворот.

Жалобната поворка потоа тргна низ центарот на Сараево — од Ферхадија, преку улицата Вјечна ватра, сè до градските гробишта „Баре”. Реката од луѓе, со солзи и песни, го испрати својот идол на последниот пат. Многумина носеа фотографии и свеќи, а некои фрлаа цвеќе по ковчегот додека минуваше.

Според проценките на полицијата, ова беше една од најмасовните поворки што Сараево ги видело во последните децении. Ковчегот беше носен од блиски пријатели и колеги на пејачот, меѓу кои и неколкумина негови долгогодишни соработници. Сцената беше длабоко емотивна — градот како да застана за да му каже „благодарам” на својот син.

На гробиштата „Баре”, покрај членовите на семејството, присуствуваа бројни јавни личности, политичари и музичари од целиот регион. Во знак на симболика, на гробот беше положен микрофон — неговиот најверен придружник на сцената, симбол на кариерата и животот што го посвети на публиката.

Во најтешкиот миг, синот Дино, заедно со имамите, го спушти телото на својот татко во гробот. Солзите на семејството, но и на илјадниците луѓе кои стоеја околу, ја покажаа големината на човекот кој зад себе остави повеќе од музика — остави љубов, добрина и сеќавања што нема да избледат.

Сараево вечерва е тивко, но во секој дом, кафуле и автомобил сè уште се слушаат песните на Халид Бешлиќ. Неговата топла интерпретација и човечност ќе продолжат да живеат, а легендата за него ќе се прераскажува со истата емоција со која тој пееше за животот, љубовта и за судбината.

( ВО ЖИВО) ПОСЛЕДНОТО ИСПРАЌАЊЕ НА ХАЛИД БЕШЛИЌ Тажни сцени и солзи на улиците на Сараево

The post ПОВЕЌЕ ОД 100.000 ЛУЃЕ НА ПОГРЕБОТ НА ХАЛИД БЕШЛИЌ Музичката легенда замина во вечноста appeared first on plusinfo.mk.

Во Пантелејмонас, Грција, на 13 септември, Србин од терасата на својата хотелска соба забележал необична сцена – македонска свадба со оро и со традиционални македонски песни.

Станува збор за Братислав Божиќ, кој за време на својот одмор случајно се нашол во близина на прославата и со големо воодушевување го снимил моментот кога се играло оро на песната „Ти донесов млада невеста“.

Видеото потоа го споделил во Фејсбук групата „Грчка инфо“, придружувајќи го со краток, но јасен коментар – „Македонска свадба“.

Божиќ, фасциниран од енергијата и од музиката, не криел колку му се допаѓа нашата традиција.

The post 🎥 МАКЕДОНСКА СВАДБА НА ПЛАЖА ВО ГРЦИЈА Ечи песната „Ти донесов млада невеста“, сватовите се фатија на орото appeared first on plusinfo.mk.

Премиерот на Албанија сака да го забрани албанската музика „талава“ на плажите во земјата, обвинувајќи ги токму домашните туристи дека зад себе оставаат најмногу отпад.

– Не се туристите што зборуваат англиски, шпански или италијански тие што ни ги оставаат плажите во хаос. Туку нашите, тие што се декларираат како најголеми патриоти, а зад себе оставаат најмногу отпад – рече албанскиот премиер Еди Рама вперувајќи го прстот кон туристите кои „сакаат да одат во војна со Србија“.

Еди Рама е познат по контроверзните идеи за закони кои често ги објавува на социјалните мрежи, како министерство управувано од вештачка интелигенција, едногодишна забрана за ТикТок и затвор за инвеститорите кои ќе изградат дивоградба. Во меѓувреме Албанија силно се дигитализира во јавниот сектор, додека во август со динамит беше срушена дивоградба.

Кабинетот на Рама се огласи за идејата за забрана на „талава“ музиката велејќи дека „не станува збор за дискриминација, туку за јасна цел – туристичка култура на повисоко ниво“.

Талава е музички стил кој своите корени ги има во 1980-тите меѓу ромските и ашкалиските заедници во Косово и во Македонија. Подоцна жанрот се проширил низ целиот Балкан, особено меѓу албанската популација. Денес, талавата има двоен статус. Од една страна ја пуштаат на свадби, но често се потценува како „музика без вредност“.

Изјавата на Рама доаѓа во време кога Албанија бележи рекордни бројки на туристи, но и зголемена загриженост за одржливоста на туристичките дестинации.

The post НОВА ИДЕЈА НА ЕДИ РАМА, ЌЕ ЗАБРАНИ „ТАЛАВА“ МУЗИКА НА ПЛАЖИТЕ? За албанскиот премиер проблем се туристите кои „сакаат да се бијат со Србија“ appeared first on plusinfo.mk.

Од 26 до 31 јули, Вела Лука повторно станува музичко светилиште во чест на Оливер Драгојевиќ. Илјадници посетители, бројни уметници и уникатна атмосфера – ова е повеќе од манифестација, ова е завет кон бесмртното дело на еден глас.

Секоја година, на неговото најдраго место – Корчула – се одржува еден од најемотивните настани на хрватската музичка сцена: „Траг у бескрају“, во чест на Оливер Драгојевиќ.

Годинава, од 26 до 31 јули, програмата е збогатена со концерти, изложби, промоции и глумечки вечери – сето тоа како сведоштво за тоа колку длабоко овој музички великан остави трага во срцата на многу генерации.

Како и секогаш, сè започнува емотивно. На 26 јули, вчера, точно во 17:30 часот, од Сплит кон Вела Лука тргна траектот „Корчула“, преполн со патници, љубители на музиката и познати личности, меѓу кои и сопругата на Томпсон – Сандра Перковиќ, актерите Марија Шкариќиќ и Горан Навојец, Јелена Перчин и водителот Марио Петрековиќ со Александра Крамбергер.

Времето не беше на нивна страна, но атмосферата на бродот го победи невремето. Сите пееја во еден глас – водени од Анте Гело со неговиот бенд, Теди Спалато, Бруна Оберан и Стјепан Лач.

Денеска, пак, 27 јули, во дворот на Основното училиште во Вела Лука беше претставен концептот на Меморијалната збирка „Оливер Драгоевиќ“, а утре на 28 јули – истото место ќе се претвори во сцена за промоција на новиот, постхумен албум на Оливер – „Долазиш“.

Врвот на манифестацијата се очекува на 29 јули, кога на понтонот во Вела Лука од 21:30 часот ќе се одржи големиот концерт „Траг у бескрају“. Ќе настапат врвни имиња од хрватската и регионалната музичка сцена: Нина Бадриќ, Теди Спалато, Марко Толја, Ришпет, Петар Драгоевиќ, Марко Шкугор, Дино Јелушиќ, Клапа Каше, Ели Жувела, Антонио Серано, Мирослав Тадиќ, Влатко Стефановски и Ивет Холцварт. Настанот ќе биде пренесуван во живо на ХРТ, а оркестарот ќе го води Алан Бјелински под уметничко раководство на Анте Гело – долгогодишен пријател и соработник на Оливер.

Манифестацијата продолжува и на 30 и 31 јули со џез вечери на плоштадот пред црквата Свети Јосип. Ќе настапат Тадиќ, Стефановски и Холцварт – во амбиент што ветува музичка магија. А токму на 31 јули, по првпат ќе се одржи специјалниот настан на кој ќе настапат: Горан Навојец, Ведран Мликота, Сандра Лончариќ, Лана Барич, Иван Колариќ, Горан Гргиќ, Рената Сабљак, Лана Ујевиќ Телента, Душан Буќан, Рок Јуриќиќ, Марија Шкариќиќ, Матија Качан, Никша Кушељ и Маринко Леш, со музичка поддршка од ансамблот на Гело.

Организатор на манифестацијата е Центарот за култура Вела Лука, со поддршка на Општината, туристичката заедница и партнерството со ХРТ. За визуелниот идентитет и продукцијата петта година по ред се погрижи Real Grupa – една од водечките маркетинг агенции во Хрватска.

И годинава, Вела Лука не е само географска точка на мапата – туку жива сцена исполнета со светлина, емоции и мелодии. Над 40 илјади посетители, илјадници светилки во пристаништето и безброј гласови кои пеат „Cesaricu“ или „Vjeruj u ljubav“ – сето тоа е сведоштво дека Оливер навистина оставил трага која нема крај.

The post 🎥 КОНЦЕРТ НА ТРАЕКТ ВО ЧЕСТ НА ОЛИВЕР ДРАГОЈЕВИЌ „Траг у бескрају“ обединува емоции и спомени appeared first on plusinfo.mk.

45-годишниот О.О. од Прилеп заработи кривична пријави поради основано сомнение дека сторил кривично дело „организирање на отпор“, информираше Министерството за внатрешни работи.

Според полициските наводи, инцидентот се случил на 23 март 2025 година во неговиот семеен дом во Прилеп, кога О.О. пуштал гласна музика и на тој начин ја прекршил одлуката на Владата за прогласување седумдневна жалост по трагедијата што го потресе Кочани.

– Со ваквото однесување пријавениот го прекршил јавниот ред и мир и не ја почитувал официјалната одлука за жалост, со што се стекнал со елементи на кривичното дело организирање на отпор – велат од МВР.

Случајот е пријавен кај надлежното обвинителство, а постапката е во тек.

The post ПУШТАЛ ГЛАСНА МУЗИКА ДОДЕКА ДРЖАВАТА ТАГУВАШЕ ЗА КОЧАНИ За време на жалост прилепчанец се забавувал, заработи кривична appeared first on plusinfo.mk.