Иранската фудбалска федерација побара од ФИФА да ги премести натпреварите од групната фаза на Светското првенство 2026 од САД во Мексико. Причина е изјавата на американскиот претседател Доналд Трамп дека не може да ја гарантира безбедноста на иранската репрезентација.

– Бидејќи Трамп јасно стави до знаење дека не може да ја гарантира безбедноста на иранската репрезентација, дефинитивно нема да патуваме во САД. Во преговори сме со ФИФА за домаќинство на натпреварите од Светското првенство во Мексико – изјави претседателот на Иранската фудбалска федерација, Мехди Таџ.

Светското првенство 2026 ќе се одржи првпат во три држави. Домаќини се САД, Канада и Мексико. Турнирот ќе трае од 11 јуни до 19 јули.

Според првичниот распоред, сите три натпревари на Иран требаше да се играат во САД. Првиот дуел е планиран на 16 јуни во Инглвуд против Нов Зеланд. Вториот на 21 јуни, исто така во Инглвуд, против Белгија. Третиот е на 27 јуни во Сиетл против Египет.

Претходно американскиот претседател Доналд Трамп изјави дека присуството на иранската репрезентација на турнирот е „несоодветно“ за нивната сопствена безбедност.

По таа изјава реагираше иранската влада. Министерот за спорт Ахмад Донјамали побара од ФИФА да ја преиспита одлуката САД да бидат домаќин на турнирот.

Сепак, од Азиската фудбалска конфедерација испратија помирлива порака.

Генералниот секретар Виндзор Џон изјави дека Иран и натаму планира да учествува на Светското првенство. Според него, разговорите со ФИФА продолжуваат.

The post ИРАН СО ДИПЛОМАТСКИ ДРИБЛИНГ ПРЕД СП 2026 Бара натпреварите да ги игра во Мексико appeared first on plusinfo.mk.

Актуелниот светски шампион Аргентина се соочува со сериозна закана да остане без настап на Светското првенство во 2026 година, откако ФИФА отвори прашање за можна суспензија поради скандал поврзан со раководството на Аргентинската фудбалска асоцијација (АФА).

Како што објавува аргентинскиот весник „Ла Насион“, главната причина за евентуалната забрана е мешањето на државните институции во работата на фудбалската федерација – нешто што е строго забрането со статутите на ФИФА и претставува сериозно прекршување на нејзините правила.

Во рамки на истрагата, неодамна биле извршени нови претреси поврзани со претседателот на АФА, Клаудио Тапија, неговиот близок соработник Пабло Товигињо и заменик-благајникот Лучијано Накис. Тие се осомничени дека преку сложени финансиски шеми стекнале нелегално богатство.

Паралелно се води и истрага против финансиската компанија „Сур Финанзас“, која беше спонзор на аргентинската репрезентација и на неколку фудбалски клубови. Компанијата се доведува во врска со проневера и даночно затајување, а нејзиниот сопственик Ариел Ваљехо важи за близок пријател на Тапија.

Според „Ла Насион“, иднината на аргентинската репрезентација на Светското првенство сега зависи од брзината на судските постапки. ФИФА, наводно, чека аргентинските судови да утврдат дали раководните лица се виновни и дали ќе бидат суспендирани или ослободени од одговорност.

Додека не се заврши овој процес, учеството на актуелниот светски првак на Мундијалот во 2026 година останува под сериозен знак прашалник.

Светското првенство во 2026 ќе се одржи во САД, Канада и Мексико од 11 јуни до 19 јули. Аргентина е сместена во група со Австрија, Алжир и Јордан.

The post СКАНДАЛ ЈА ТРЕСЕ АРГЕНТИНА Шампионот може да биде суспендиран од Мундијалот во 2026 appeared first on plusinfo.mk.