Проширувањето веќе не е само технички пристапен процес. Тоа е стратешка инвестиција во безбедноста, стабилноста и конкурентноста на Европа. Безбедна и просперитетна Европа не може да биде целосна без целосна интеграција на Западен Балкан – порача шефот на македонската дипломатија Тимчо Муцунски во обраќањето на состанокот на министрите за надворешни работи на Процесот за соработка на Југоисточна Европа (ПСЈИЕ), што се одржа денска во Софија во рамките на бугарското претседавање со оваа најстара и најзначајна политичка иницијатива за регионална соработка во Југоисточна Европа.

Осврнувајќи се на актуелните геополитички и безбедносни предизвици, тој нагласи дека во услови на војна во Европа, хибридни закани, дезинформации, енергетска несигурност и киберризици, европската интеграција и регионалната соработка добиваат уште поголемо стратешко значење

Притоа тој нагласи дека кредибилитетот на процесот на проширување зависи од доследното почитување на преземените обврски, предвидливоста на процесот и принципот на заслуги.

– Мора да бидеме искрени: кредибилитетот на проширувањето зависи од испораката. Заслугите мора да имаат значење. Обврските мора да се почитуваат. Правилата на процесот мора да бидат предвидливи. На Западен Балкан му е потребен европски пат заснован на резултати, а не на постојано одложување – истакна Муцунски.

Состанокот во Софија е посветен на одбележувањето три децении од формирањето на ПСЈИЕ и се одржа под темата „Заеднички компас за стабилен, безбеден и одржлив регион – 30 години регионална сопственост и европска аспирација“. Во фокусот на дискусиите беа европската перспектива на регионот, унапредувањето на регионалната соработка, зајакнувањето на безбедноста и отпорноста, како и поттикнувањето на економскиот развој и конкурентноста во услови на сложени геополитички и безбедносни предизвици.

Во своето обраќање министерот Муцунски истакна дека ПСЈИЕ останува еден од најзначајните механизми за политички дијалог и соработка во регионот.

– ПСЈИЕ останува една од највредните автентични рамки за регионална соработка. Тоа е платформа создадена од регионот, водена од регионот и одржана од уверувањето дека заедничките предизвици бараат заеднички одговори – истакна Муцунски.

Осврнувајќи се на значењето на регионалната поврзаност и економската интеграција, министерот посочи дека Република Северна Македонија останува посветена на развојот на транспортната, енергетската и дигиталната инфраструктура, како и на понатамошното зајакнување на регионалната поврзаност преку коридорите 8 и 10, кои имаат стратешко значење за регионот и за европската интеграција.

Во овој контекст тој ја нагласи важноста на инвестициите во човечкиот капитал како предуслов за долгорочен развој и конкурентност.

– Човечкиот капитал е нашиот најголем ресурс. Без инвестирање во луѓето, ниеден инфраструктурен проект и ниедна економска реформа не може да го достигнат својот целосен потенцијал – посочи Муцунски.

Тој ја нагласи и важната улога на Советот за регионална соработка во унапредувањето на економската интеграција, поврзаноста и одржливиот развој во регионот.

– Треба да ја препознаеме важната улога на ПСЈИЕ во овој процес, како и вредниот придонес на Советот за регионална соработка во унапредувањето на поврзаноста, економската интеграција, безбедносната соработка и одржливиот развој – истакна Муцунски.

На крајот од обраќањето, министерот порача дека иднината на Југоисточна Европа е неразделно поврзана со иднината на Европа и дека регионот има потенцијал да биде активен придонесувач кон европската безбедност и просперитет.

– Со поддршка од нашите европски партнери и преку нашата сопствена посветеност на реформи и соработка, Југоисточна Европа може да не биде периферија на Европа, туку интегрален придонесувач кон европската безбедност, просперитет и иден развој – порача Муцунски.

Високите претставници на земјите членки на ПСЈИЕ за време на состанокот ја потврдија важноста на регионалната соработка како клучен предуслов за стабилноста и безбедноста во Југоисточна Европа, при што посебен акцент беше ставен на продлабочувањето на економската интеграција, подобрувањето на транспортната, енергетската и дигиталната поврзаност, како и на унапредувањето на заедничкиот регионален пазар како чекор кон постепена интеграција во единствениот пазар на Европската Унија.

Во рамките на состанокот беше усвоена заедничка декларација со која се реафирмираа поддршката за европската интеграција на регионот, добрососедските односи, демократските вредности и заедничките напори за градење поотпорен, поконкурентен и поодржлив регион.

Процесот за соработка на Југоисточна Европа, основан 1996 година токму во Софија, останува автентична регионална платформа за политички дијалог и соработка, која во изминатите три децении даде значаен придонес во зајакнувањето на довербата, стабилноста, поврзаноста и европската перспектива на регионот.

СИЉАНОВСКА-ДАВКОВА НА САМИТ НА ЗЕМЈИТЕ ОД ЈУГОИСТОЧНА ЕВРОПА ВО СОФИЈА Се среќава и со бугарската претседателка Јотова

The post ПРОШИРУВАЊЕТО НА ЕУ Е СТРАТЕШКА ИНВЕСТИЦИЈА ВО БЕЗБЕДНОСТА И СТАБИЛНОСТА НА ЕВРОПА Муцунски од Самитот на Југоисточна Европа во Софија appeared first on plusinfo.mk.

The post НОВО ПОГЛАВЈЕ ВО СОРАБОТКАТА МАКЕДОНИЈА-ГРЦИЈА Муцунски очекува иновациите и ИКТ секторот да станат силен дел од економската агенда со Грција appeared first on plusinfo.mk.

Над 100 претставници од ИКТ-компании и институции од Македонија и Грција денеска во Скопје ги разгледуваат можностите за соработка во областа на дигиталната трансформација, иновациите и развојот на ИКТ-секторот. Се очекуваат конкретни договори и проекти финансирани од европски пари.

Претседателот на Стопанската комора за информатички и комуникациски технологии – МАСИТ, Јордан Димитрoвски, вели дека целта не е само да се разговара, туку да се споделат конкретни искуства и да се овозможи конкретна соработка на компаниите од двете држави.

– Знам дека многу бргу по овој форум веќе ќе имаме конкретни договори и конкретни проекти на кои ќе работат компаниите од двете држави. Многу македонски компании веќе имаат соработка со грчки компании, има отворени проекти, особено во делот на европските финансирања така што очекуваме многу конкретни проекти финансирани од европски пари – изјави Димитровски.

Министерот за надворешни работи и надворешна трговија Тимчо Муцунски кој присуствуваше на отворањето на форумот во изјава за медиумите ја поздрави инцијативата на МАСИТ и грчката Асоцијација на компании за информатички технологии SETPE нагласувајќи дека Владата е целосно посветена на поддршка за вакви настани кои се значајни за меѓусосетската економска соработка.

– Грција е еден од нашите клучни економски и трговски партнери и во таа смисла, кога ги гледаме активностите меѓу коморите како што е МАСИТ и трговските организации од Грција, тоа е од особено значење. Мене ме радува што има повеќе од 100 учесници. Согласно тоа што ми кажа претседателот на МАСИТ, закажани се исто така над 100 B2B, што значи ќе се разговара за конкретна соработка којашто е насочена на прашања поврзани со пренос на знаења, потенцијални заеднички вложувања.. Од таа гледна точка, Владата е максимално фокусирана не само на поддршка на ваквите процеси, туку и на нивна стимулација – рече Муцунски.

Во рамки на форумот ќе биде потпишан и меморандум за разбирање меѓу МАСИТ и грчката Асоцијација на компании за информатички технологии со што ќе се формализира соработката.

The post ПОВЕЌЕ ОД 100 УЧЕСНИЦИ НА ПРВИОТ ИКТ ФОРУМ МАКЕДОНИЈА – ГРЦИЈА Се очекуваат конкретни договори и проекти финансирани од европски пари appeared first on plusinfo.mk.

На маргините на министерскиот состанок на НАТО во Хелсингборг, Шведска, министерот за надворешни работи и надворешна трговија, Тимчо Муцунски, оствари средба со министерката за надворешни работи на Република Бугарија, Велислава Петрова, соопшти Министерството за надворешни работи и надворешна трговија.

„На средбата беа разменети мислења за билатералните односи, регионалната соработка и европската интеграција на државата. Во таа насока министерот Муцунски ја нагласи потребата од изнаоѓање решение за билатералното прашање, кое го кочи процесот на отворање преговори со Европската Унија, потврдувајќи ги позициите на Владата и укажувајќи дека темите поврзани со македонскиот јазик, идентитет, култура и историја не можат да бидат предмет на разговори.

Посебен акцент беше ставен на значењето на Коридор VIII и потребата од забрзување на активностите поврзани со отворањето на граничниот премин „Клепало”, како важен дел од регионалната инфраструктурна и економска поврзаност.

Министерот Муцунски го отвори и прашањето за почитувањето на правата на македонското малцинство во Бугарија, нагласувајќи ја потребата од доследно спроведување на пресудите на Европскиот суд за човекови права“ – се вели во соопштението на МНР.

The post ШТО Е СО ПРАВАТА НА МАКЕДОНСКОТО МАЛЦИНСТВО ВО БУГАРИЈА? Муцунски го отворил ова прашање на средба со бугарската колешка Петрова appeared first on plusinfo.mk.

Министерот за надворешни работи и надворешна трговија Тимчо Муцунски денеска нагласи дека на највисоко ниво, и билатерално и во форматите поврзани со Европската Унија, се водат разговори за Европскиот систем за влез/излез (ЕЕС) и се бара решение, особено за летниот период, при тоа потенцирајќи дека не се точни информациите за индивидуално исклучување на одредени земји од овој систеем.

– Имаме разговори и со институциите на Европската Унија и со земјите членки, за во летниот период, кога ќе настанат најголемите гужви, да постои некаков систем преку кој ќе има олеснувања. Во моментот, бидејќи ништо не ни е официјално потврдено, за жал, и јас ништо не можам официјално да потврдам, но очекуваме како регион, соработувајќи и со земјите членки, кои и самите не сакаат вакви гужви, да има подобри услови од тие што ги имаше во последниот период – рече Муцунски на собраниската седница, посветена на опозициски пратенички прашања, одговарајќи на прашање на пратеничката од СДСМ Сања Лукаревска за тоа каков одговор добиле во врска со одложувањето на EЕС-системот за нашата држава.

Тој посочи дека во текот на претходната недела бил на состанок на министрите за надворешни работи на земјите-членки на ЕУ со земјите од Западен Балкан, при што лично тој го отворил ова прашање.

– Присуствував и на состанок на министрите за надворешни работи во форматот „Пријатели на Западен Балкан“ во Братислава. Лично бев првиот министер од регионот кој го отвори ова прашање. Исто така, разговарам и билатерално со земјите од регионот. Како еден пример, министерот за внатрешни работи Тошковски пред неколку недели исто така беше во Грција, каде што разговаравме и дискутиравме како да се најде решение колективно за целиот регион. Зошто велам колективно? Затоа што веста што излезе дека граѓаните на Србија се исклучени од ЕЕС, е лажна вест, неточна информација. Точно е дека се појави во неколку медиуми, но јас наредниот ден таа информација ја нареков политички естраден настап, затоа што е апсолутно неточна – рече Муцунски.

Тој додаде дека согласно правилата на Европската Унија, таков тип на индивидуален исклучок, прво, не може да се направи, а второ, ако се погледнат условите на граничните премини, таква одлука не може да се имплементира. Додаде дека кога ќе се создаде гужва, не може да се направи една лента со колона само за граѓани на одредена земја.

– Информацијата за индивидуално исклучување на одредени земји е неточна, односно лажна вест, што се пласираше во одредени медиуми. Јас тоа го видов од медиуми во соседна Србија, затоа секогаш треба да бидеме внимателни кога читаме вакви информации и да ги следиме официјалните податоци и информации што доаѓаат од ЕУ, од земјите членки на ЕУ, но и од македонските институции – нагласи Муцунски.

Тој рече дека се согласува со пратеничката дека изминатиот месец, особено во викендите, нашите граѓаните се соочуваат со големи предизвици на граничните премини со земјите-членки на ЕУ и тоа не само во нашата држава, односно на излез или влез од нашата држава, туку и во целиот регион.

– Слична ситуација како што имаше на македонско-грчката граница, имаше и на границите помеѓу Црна Гора и Хрватска, помеѓу Србија и Хрватска и да не ги набројувам другите гранични премини – рече тој и додаде дека овие метежи влијаат и врз граѓаните на земјите-членки кои патуваат во овој период.

The post НИ ЗА СРБИ НИ ЗА НИКОГО НЕМА „ПОШТЕДА“ ОД БИОМЕТРИСКИОТ ШЕНГЕН Муцунски вели дека се шират лажни вести за паузирање на ситемот летово appeared first on plusinfo.mk.

Во овој момент има недостиг на доверба и недостиг на кредибилитет во однос на испораката спрема нас како држава, така што нема услови за уставни измени и Владата не е подготвена да преземе било каков чекор кон уставни измени – изјави министерот за надворешни работи и надворешна трговија Тимчо Муцунски во одговор на новинарски прашања на заедничката прес-конференција со генералниот секретар на Советот на Европа Ален Берсе кој е во прва официјална посета на земјава.

– Дали ние правиме конкретни работи поврзани со нашата европска перспектива, не сакам да бидам репетитивен, бидејќи ова е тема што е многу актуелна во последниот период – да, правиме. Првото е тоа што го правиме во однос на реформската агенда. Второто е тоа што го правиме во делот на заедничката надворешна и безбедносна политика, но многу повеќе е тоа што го правиме за имплементација на европските вредности. И на крајот на денот, слично со тоа што кажа и господинот Берсе – за објективната посветеност на нашата држава кон европските вредности, коишто се некогаш дури и поширок контекст од примената на заедничката надворешна и безбедносна политика – рече Муцунски.

Во однос на тоа дека денеска се очекува да биде врачен мандатот за составување влада на Бугарија на Румен Радев, Муцунски рече дека негова цел не е ниту да рецензира резултат од избори, ниту да рецензира изјави кои што доаѓаат од Софија, бидејќи, како што рече, би навлегол во туѓиот наратив.

– Тоа што можам да ви го кажам е дека ние секогаш сме биле подготвени за дијалог и сега сме подготвени за тоа. Недостиг за волја за таков дијалог имаше од страна на соседна Бугарија при постоење на една претходна политичка влада. Јас се надевам дека има свест во Софија дека европската перспектива за нашата држава е значајна за целиот регион. И да нема таква свест и да не се развие таква свест, тоа не значи дека ние размислуваме за некоја алтернатива, но ние ќе продолжиме на патот на реформите, ќе продолжиме на патот на усогласеност со заедничката надворешна и безбедносна политика и ќе продолжиме да ги споделуваме тие европски вредности во коишто огромно мнозинство на нашите граѓани веруваат. Но, ако е прашањето дали сме подготвени за уставни измени во овој контекст и во оваа состојба – не сме подготвени. И да нема никаква дилема околу тоа прашање – нагласи Муцунски.

The post ВЛАДАТА НЕ Е ПОДГОТВЕНА ДА ПРЕЗЕМЕ БИЛО КАКОВ ЧЕКОР КОН УСТАВНИ ИЗМЕНИ Муцунски вели дека во овој момент има недостиг на доверба appeared first on plusinfo.mk.

Министерот за надворешни работи и надворешна трговија Тимчо Муцунски денеска изрази длабока загриженост по синоќешниот вооружен инцидент што се случи за време на вечерата на Здружението на дописници од Белата куќа во Вашингтон.

Муцунски во објава на мрежата „Х“ истакна дека за насилството нема место во демократските општества, без разлика дали е насочено кон избрани лидери, јавни службеници, новинари или граѓани.

„Ми олесна што претседателот Доналд Трамп, првата дама и останатите присутни се безбедни, и му посакувам брзо закрепнување на повредениот офицер на Тајната служба.“, напиша Муцунски на мрежата „Х“.

Муцунски порача дека Македонија стои заедно со Соединетите Американски Држави во заштита на демократијата, јавната безбедност и принципите на кои се темелат слободните општества.

The post МИНИСТЕРОТ МУЦУНСКИ ГО ОСУДИ НАПАДОТ ВРЗ ТРАМП „Ми олесна што претседателот, првата дама и останатите присутни се безбедни“ appeared first on plusinfo.mk.

Министерот за надворешни работи и надворешна трговија Тимчо Муцунски, во рамки на работната посета на Вашингтон, учествуваше и се обрати на настан организиран од Атлантскиот совет, посветен на трансатлантските приоритети на Република Северна Македонија.

Во своето обраќање, министерот Муцунски ги истакна клучните надворешнополитички приоритети на државата, нагласувајќи ја посветеноста кон зајакнување на стратешкото партнерство со Соединетите Американски Држави, како и активната улога на државата како доверлив безбедносен партнер во рамки на НАТО и регионот.

Тој се осврна и на напорите за унапредување на економската соработка, вклучително и тековните иницијативи за продлабочување на билатералните трговски односи со САД.

Во контекст на европската интеграција, Муцунски ја реафирмираше стратешката определба на Република Северна Македонија за членство во Европската Унија, при што укажа на предизвиците поврзани со билатералните прашања и ја нагласи потребата од кредибилен и предвидлив процес на проширување.

Дополнително, беа потенцирани приоритетите за зајакнување на регионалната соработка и стабилноста на Западен Балкан, како и значењето на трансатлантското партнерство во справувањето со современите безбедносни и геополитички предизвици.

Настанот се одржа во рамки на иницијативата „Balkans Forward“ на Атлантскиот совет, со учество на претставници од политичкиот, академскиот и аналитичкиот сектор.

The post УНАПРЕДУВАЊЕ НА ЕКОНОМСКАТА И ТРГОВСКАТА СОРАБОТКА СО САД Муцунски на форум на Атланскиот совет во Вашингтон appeared first on plusinfo.mk.

Министерот за надворешни работи и надворешна трговија Тимчо Муцунски престојува во работна посета на Вашингтон, Соединетите Американски Држави, каде што ја предводи високата владина делегација на втората сесија од стратешкиот дијалог меѓу двете земји, која ќе се одржи утре.

– Стратешкиот дијалог претставува значајна платформа за продлабочување на билатералната соработка и унапредување на партнерството со САД, со фокус на клучни области од заемен интерес, вклучително одбраната и безбедноста, сајбер-безбедноста и технолошката соработка, економијата, трговијата и енергетиката, како и заедничката борба против транснационалните закани и зајакнувањето на граничната безбедност, стои во соопштението на МНРиНТ.

Оттаму наведуваат дека со одржувањето на втората сесија од Стратешкиот дијалог се потврдува континуитетот на сојузништвото меѓу двете земји и заедничката посветеност кон унапредување на стабилноста, безбедноста и просперитетот во регионот и пошироко.

Во емисија „Еуро Фокус“ на Телма телевизија Муцунски претходно истакна дека ние ќе бидеме прва земја во Европа која во рамки на оваа администрација ќе има сесија на стратешки дијалог во Вашингтон. Тој изрази очекување дека Стратешкиот дијалог ќе отвори сериозни дискусии во областа на одбраната и безбедноста, трговската и економската соработка, како и дека ќе донесе конкретни бенефити за граѓаните.

The post ВИСОКА ВЛАДИНА ДЕЛЕГАЦИЈА ПРЕДВОДЕНА ОД МУЦУНСКИ ВО ВАШИНГТОН Втора сесија од Стратешкиот дијалог меѓу Македонија и САД appeared first on plusinfo.mk.

Министерот за надворешни работи и надворешна трговија, Тимчо Муцунски, оствари телефонски разговор со заменик-премиерот и министер за надворешни работи на Обединетите Арапски Емирати, шеикот Абдула бин Зајед Ал Нахјан.

Во разговорот, Муцунски изрази цврста солидарност и целосна поддршка кон ОАЕ, упатувајќи најдлабоко сочувство за жртвите од нападите. Тој остро ги осуди нападите извршени од Иран врз Обединетите Арапски Емирати, оценувајќи ги како сериозна повреда на принципите на меѓународното право, вклучително и почитувањето на државниот суверенитет и територијалниот интегритет.

Министерот Муцунски нагласи дека во услови на зголемени регионални тензии неопходни се воздржаност, одговорност и дипломатски ангажман, со цел спречување понатамошна ескалација и зачувување на стабилноста и мирот во регионот.

The post ОСУДА НА НАПАДИТЕ И ПОВИК ЗА МИР Муцунски во разговор со шеикот Бин Зајед упати поддршка до ОАЕ appeared first on plusinfo.mk.