Советот на Град Скопје го изгласа ребалансот на буџетот, со кој основниот буџет на градот се зголемува за 61,76 милиони денари и достигнува 5.324.649.755 денари, информира градоначалникот на Скопје, Орце Ѓорѓиевски.

Според Ѓорѓиевски, дополнителните средства се резултат на остварени заштеди, финансиска дисциплина и намалување на непродуктивните трошоци.

– Повеќе капитални инвестиции, поголема поддршка за граѓаните и историско намалување на обврските, тоа се резултатите од одговорното и домаќинско управување со Град Скопје – наведе Ѓорѓиевски.

Како еден од најголемите инфраструктурни проекти што се предвидуваат со ребалансот, тој го издвојува изградбата на нов мост и улица што ќе ги поврзат Ѓорче Петров и Сарај.

За овој проект, според градоначалникот, во Развојната програма се предвидени 420 милиони денари. Целта е со новата инфраструктура да се создаде и нов влез во Скопје.

Дополнителни 61 милион денари се предвидени за проектите поврзани со Европската престолнина на културата – Скопје 2028.

Средства се обезбедени и за поддршка на онколошките пациенти. Ѓорѓиевски наведува дека до почетокот на август пристигнале 1.265 уредни барања и сите биле исплатени.

– Средства ќе има и за секој пациент што ќе поднесе барање до крајот на годината. Никој нема да биде изоставен! – порача градоначалникот.

Со ребалансот се предвидуваат и средства за скопските средни училишта и младите. Ќе се набавуваат нови клупи и столчиња, ИТ-опрема и опрема за училишни кабинети, а ќе се финансираат и игралишта и фитнес-зони.

Предвидени се и средства за ски-викенд за средношколците, откако, како што наведува Ѓорѓиевски, успешно бил реализиран бесплатниот летен камп.

За реконструкција на помалите улици во скопските општини се обезбедуваат дополнителни 25 милиони денари, а уште 10 милиони денари се предвидени за чистење на депониите.

Покрај новите инвестиции, Ѓорѓиевски во објавата посочува дека Град Скопје ги намалува и наследените обврски.

Според неговите податоци, за само девет месеци вкупните обврски на Град Скопје, јавните претпријатија, културните установи и средните училишта биле намалени за 60,2 милиони евра.

Заклучно со 27 август 2026 година, тековните обврски на Град Скопје, според Ѓорѓиевски, биле намалени за 322,1 милион денари, додека дополнително биле намалени обврски во износ од 743 милиони денари, по основ на кредити, неисплатени експропријации, изгубени судски постапки со камати и судски трошоци, неисплатени субвенции и преземени програмски активности.

Намалување на обврските, според градоначалникот, има и кај јавните претпријатија.

Кај ЈП „Водовод и канализација“ обврските биле намалени за 1,66 милијарди денари, кај ЈСП „Скопје“ за 634,9 милиони денари, а кај „Комунална хигиена“ за 122 милиони денари.

Кај „Паркови и зеленило“ намалувањето изнесува 113,9 милиони денари, кај „Градски паркинг“ 52,9 милиони, а кај „Улици и патишта“ 31,9 милиони денари.

Ѓорѓиевски наведува дека половина од културните установи на Град Скопје целосно ги расчистиле своите обврски, додека кај останатите тие биле значително намалени.

Според него, Музејот на Град Скопје, кој минатата година имал обврски и проблеми со снабдувањето со електрична енергија, сега нема обврски.

За КИЦ градоначалникот наведува дека до крајот на септември се очекува да нема обврски, додека ДКЦ и Културниот дом „Кочо Рацин“ веќе биле целосно раздолжени.

Кај МКЦ обврските биле намалени за 7,6 милиони денари, а обезбедени се и средства за Планетариумот, киното „Милениум“ и е-спорт центарот.

Зоолошката градина, според Ѓорѓиевски, ги намалила обврските за околу пет милиони денари, додека Градската библиотека за 2,5 милиони денари, со дополнително намалување од уште 2,5 милиони денари до крајот на годината.

Градоначалникот посочува и дека Град Скопје бележи висока реализација на капиталните проекти.

Според него, капиталната реализација во вториот квартал изнесувала 706,3 милиони денари.

Ѓорѓиевски ја споредува оваа сума со вкупната реализација во првите три квартали во првите години од мандатите на неговите претходници Петре Шилегов и Данела Арсовска, која, според неговата објава, изнесувала 330,3 милиони, односно 368,4 милиони денари.

– Не создаваме нови долгови, ги враќаме старите. Не ги кратиме капиталните инвестиции, ги зголемуваме – порача Ѓорѓиевски.

Тој најави дека, според резултатите од јули и август, очекува и третиот квартал да биде најуспешен во историјата на Град Скопје.

– Секој денар го насочуваме кон граѓаните и развојот на Скопје – наведува градоначалникот.

Ребалансот сега треба да овозможи реализација на дел од најавените дополнителни проекти и мерки, меѓу кои инфраструктурните зафати, реконструкцијата на улиците, поддршката за онколошките пациенти, инвестициите во училиштата и дополнителните средства за културата.

The post ИЗГЛАСАН РЕБАЛАНСОТ НА БУЏЕТОТ НА СКОПЈЕ Нов мост меѓу Ѓорче Петров и Сарај, нов влез во градот и милиони за улици и култура appeared first on plusinfo.mk.