Во шпанската автономна покраина Андалузија активно се работи на дури 73 геолошки истражувања за лоцирање на 27 стратешки минерали што ѝ се потребни на Европската Унија. Регионот сочинува дури 90% од вредноста на шпанското рударство на метали, а локалните власти се стремат да ја зајакнат својата стратешка автономија во рамките на ЕУ, при што производството на метални руди веќе надминува 1,2 милијарда евра годишно, со над 8.000 работни места во секторот.

За разлика од Андалузија, која е најјужната и приморска шпанска покраина, во Македонија рударството е во постојан пад. Нов рудник за метални суровини се нема отворено повеќе од четири децении, а во моментов има само една сериозна најава за инвестиција во рудник за ископ на метал кој е дефиниран како критичен од страна на Европската Унија. Тоа е проектот за експлоатација на бакар во Иловица. Оваа инвестиција беше најавена како најголема гринфилд инвестиција во земјава, со почетен влог од околу 350 милиони евра само во првите две години за изградба на постројката. Дополнително, додека на ниво на држава континуирано паѓа и бројот на вработени во рударството, инвеститорот очекува 1.000 директни вработувања во текот на изградбата и 500 директни вработувања за време на работењето на рудникот, со обврска за давање предност на локалното население. Исто така, се прогнозира дека ќе се отворат 2.700 индиректни вработувања како резултат на работата на рудникот.

Додека кај нас се регистрираат негативни тенденции во рударството, покраинската влада во Андалузија информира дека се проучуваат вкупно 50 минерали, од кои 27 се на листата на критични суровини на ЕУ. Министерот за енергетика, индустрија и иновации, Хорхе Парадела тврди дека Андалузија е клучна рударска сила за иднината на Европа и дека реактивирањето на геолошките истражувања ја покажува посветеноста на властите во Андалузија кон уреден и планиран развој на нејзиното геолошко наследство.

Меѓу рудите коишто се испитуваат се бакарот, магнезиумот, бизмутот и арсенот, кои се неопходни за електрификацијата, електронската, автомобилската, челичната и фармацевтската индустрија. На нив им се придружуваат литиумот, кобалтот и никелот, клучни компоненти во батериите за електрични возила, како и ретките земни елементи, неопходни во ветерниците и електронските уреди. Регионалното министерство соопшти дека тие го усогласуваат регионот со европските политики за критични суровини, за да се намали надворешната зависност на Унијата.

73-те активни дозволи опфаќаат 80 општини и се распределени меѓу осумте провинции. Хуелва води со 38 дозволи, Севиља има дванаесет, Кордоба 8, Алмерија и Хаен по 6, а Кадиз, Гранада и Малага по една дозвола. Како што пишуваат локалните медиуми, оваа распределба ја потврдува важноста на Иберискиот пиритски појас, една од најголемите области во светот со полиметални масивни сулфиди.

Регионот веќе има два проекта класифицирани како стратешки проекти на Европската Унија и поддржани од Регионалното министерство. Едниот е  „Циркулар-Атлантик Бакар“, кој ја позиционира општината Хуелва на чело на ископот на метали со поддршка од 7,6 милиони евра, а вториот проект е постројка за преработка на бакар „Лас Крусес“, со 3,44 милиони евра помош.

Како што додаваат локалните медиуми, рударството во покраината коегзистира со земјоделството и туризмот и придонесува во економијата како еден од најстабилните извори на приход во регионот, а сегашниот потенцијал лежи во откритието на нови резерви на бакар, литиум и ретки земни елементи. Според анализата, прашањето не е дали има недостаток на минерали, туку колку брзо секое откритие се трансформира во стабилен и еколошки здрав проект. Објавата надедува дека усогласувањето со Директивата за критични материјали на ЕУ, претставува за регионот историска можност за намалување на својата зависност од трети страни и да воспостави сопствена развиена индустрија.

The post АНДАЛУЗИЈА БАРА НОВИ РЕЗЕРВИ БАКАР И ИНКАСИРА МИЛИЈАРДА ЕВРА ОД РУДНИЦИТЕ Македонија има докажани резерви на бакар, ама не ги експлоатира appeared first on plusinfo.mk.