Секој продолжен викенд, празник или летен одмор илјадници граѓани од Македонија се упатуваат кон плажите и продавниците во соседна Грција. Но од 13 септември, нашите туристи треба да бидат особено внимателни. Грција воведува најстрог сообраќаен закон досега, кој се однесува на сите – и домашни, и странски возачи.

Целта на новиот закон е да се пресечат ризичното однесување во сообраќајот, особено користењето мобилен телефон додека се вози, што сè почесто води до тешки несреќи.

Ако досега грчките полицајци ви ја одземаа возачката дозвола на два месеца поради користење мобилен, од есен следува вистински шок.

Досега, овој вид прекршок се казнуваше со двомесечно одземање на возачката дозвола, но новиот закон воведува и казни до 4.000 евра. На пример, првиот пат кога полицијата ќе ве фати со телефон зад воланот, ќе бидете казнети со 350 евра, а вашата возачка дозвола ќе биде одземена еден месец. Втор прекршок носи казна од 1.000 евра и шестмесечна забрана за возење, додека трет носи дури 2.000 евра и забрана за возење од една година.

Ситуацијата станува уште посериозна ако употребата на телефонот доведе до сообраќајна несреќа. Во тој случај, казната може да биде до 4.000 евра, а возачката дозвола ќе биде одземена до 8 години. Доколку несреќата има сериозни последици, законот предвидува и затворски казни – од 10 години за тешка телесна повреда, до 20 години за смрт. Доколку се повредени повеќе од едно лице, можна е дури и доживотна казна затвор.

Овој закон важи и за сите туристи, без исклучок. Македонските граѓани кои често патуваат во Грција треба да бидат внимателни и да избегнуваат какво било користење на телефон додека се зад воланот – дури и ако тоа е „само една порака“.

Бидејќи токму македонските возачи се меѓу најчестите патници кон Халкидики, Солун, Кавала и другите дестинации, се поставува прашањето: Дали доволно се информирани за овие казни?

И покрај тоа што дел од новите правила се најавени и во медиумите, многумина остануваат изненадени на самото место, каде што грчката полиција има право веднаш да го задржи возилото и да го одземе документите.

The post ВНИМАВАЈТЕ, ГРЦИЈА ВОВЕДУВА ДРАСТИЧНИ КАЗНИ ЗА ВОЗАЧИ Нов закон со казни до 4.000 евра и доживотен затвор appeared first on plusinfo.mk.

Во рамки на засилените сообраќајни контроли, спроведени низ целата земја во последните три дена од јули (28, 29 и 30.07.2025), полицијата регистрирала вкупно 1.937 платни налози за различни прекршоци поврзани со безбедноста на сообраќајот. Податоците од Министерството за внатрешни работи покажуваат драматична слика за непочитување на сообраќајните правила од страна на голем број учесници во сообраќајот.

Најчестите казни се однесуваат на неприлагодена брзина на движење, за што биле санкционирани стотици возачи кои ги игнорирале ограничувањата и ги загрозиле другите на патот. Полицијата исто така интервенирала во случаи на неправилно паркирање, кое и понатаму останува хроничен проблем во урбаните средини – стотици возила биле казнети поради непрописно застанување.

Особено загрижувачки е бројот на лица што управувале возило без положен возачки испит – 186 учесници во сообраќајот биле веднаш отстранети од улиците, со што биле спречени потенцијално сериозни последици.

Ситуацијата не е подобра ниту кога станува збор за безбедносните навики. 115 возачи не користеле сигурносен појас, а 117 лица телефонирале додека управувале со возило, што е еден од најчестите причинители за сообраќајни незгоди. Дополнително, 99 мотоциклисти биле затекнати без заштитен шлем, ставајќи го својот живот во сериозна опасност.

Во текот на овие три дена, 19 возачи поминале на црвено светло, а полицијата санкционирала и 21 пешак за различни прекршоци. Алкохолот и натаму останува ризик на патиштата – 19 возачи биле исклучени од сообраќај поради возење под дејство на алкохол.

Според Законот за возила, изречени биле 8 казни за технички неисправни возила, како и 53 за возила кои не биле регистрирани, што укажува на потребата од постојан надзор и контрола.

Од Министерството за внатрешни работи информираат дека засилените контроли ќе продолжат и во наредните денови, со цел зголемување на безбедноста и дисциплината на патиштата.

„Апелираме до сите граѓани да ги почитуваат сообраќајните правила и прописи, бидејќи само така можеме да имаме побезбедни улици и патишта за сите“, порачуваат од МВР.

The post 1.937 ПЛАТНИ НАЛОЗИ ЗА ТРИ ДЕНА Полицијата расчистува со хаосот на патиштата appeared first on plusinfo.mk.