Развиените економии се најголемите виновници за буџетските нерамнотежи во светот, изјави директорката на Меѓународниот монетарен фонд (ММФ) Кристалина Георгиева по минатонеделните состаноци на Меѓународниот монетарен фонд (ММФ) и Светската банка (СБ).

Според неа, нивото на долг на земјите во развој се намалило во последните неколку години, но поради наглото зголемување на приносите од обврзници на другите пазари, нивните трошоци за позајмување се зголемиле повеќе од двојно.

– Просечните трошоци за сервисирање на долгот таму се зголемиле повеќе од двојно во однос на нивото од пред 10 години, достигнувајќи 14% од државните приходи и истиснувајќи ги средствата наменети за образование, здравство и други клучни области – рече таа.

Георгиева по средбите на ММФ и Светска банка, исто така, изјави дека многу прашања останале нерешени, особено на темата – вештачка интелигенција.

– Се наоѓаме во ситуација каде што имаме многу повеќе прашања отколку одговори. Затоа ги предупредувам сите: не наседнувајте на оние кои се преправаат дека имаат одговори. Тие ве лажат – рече таа.

The post ПОСКАПУВААТ КРЕДИТИТЕ ЗА ЗЕМЈИТЕ ВО РАЗВОЈ Директорката на ММФ причината ја гледа во растот на приносите на обврзниците на развиените земји appeared first on plusinfo.mk.

Меѓународниот монетарен фонд (ММФ) предупредува дека разочарувачките резултати од инвестициите во вештачката интелигенција би можеле да предизвикаат корекција на финансиските пазари и да ја загрозат глобалната финансиска стабилност. Во најновиот Извештај за глобална финансиска стабилност, презентиран на годишните состаноци на ММФ во Бангкок, фондот ги издвојува корекцијата на пазарот поврзана со вештачката интелигенција, растот на приносите од обврзниците и сајбер-заканите како три клучни ризици за светските финансии- пишува Ројтерс.

Според ММФ, вреднувањето на акциите на технолошките компании и задолжувањето поврзано со развојот на вештачката интелигенција во голема мера се потпираат на очекувањата за високи идни приходи. Доколку тие очекувања не се остварат, акциите би можеле нагло да поевтинат, а компаниите би можеле да се соочат со потешкотии при отплатата на долговите.

– Доколку се појават прашања за тоа како да се заработи од вештачката интелигенција, инвестициите во акции ќе изгубат вредност, долгот може да биде потешко да се отплати, а очекуваните идни приходи можеби нема да се остварат – предупреди Џејсон Ву, заменик-директор на Одделот за анализа на глобалните пазари на ММФ.

Атанасиос Вамвакидис од ММФ оцени дека последиците од евентуалниот колапс не би останале ограничени само на финансиските пазари, туку би можела да се прелее и во реалната економија, преку пад на цените на активата и намалување на вкупната побарувачка.

Изложеноста на пазарите е зголемена поради растечката концентрација на вредноста во најголемите технолошки компании. Тие сега сочинуваат повеќе од 35 проценти од пазарната капитализација на индексот S&P 500, наспроти околу 12 проценти пред десет години. ММФ предупредува и на ризикот од циркуларно финансирање, при кое големите компании за вештачка интелигенција се финансиски поврзани со партнери кои можеби имаат послаби деловни резултати. Таквите врски би можеле дополнително да ги засилат последиците од евентуален пад.

Според анализата на фондот, развиените азиски берзи се меѓу најчувствителните на можен крах, додека еврозоната и Велика Британија се помалку директно изложени. Сепак, европските инвеститори во периодот од 2022 до 2026 година значително ги зголемиле вложувањата во американски акции, што претставува канал преку кој евентуалните загуби би можеле да се пренесат и во Европа.

Последиците би можеле да се почувствуваат и надвор од берзите, преку пад на цените на недвижностите, намалување на потрошувачката и забавување на меѓународната трговија. ММФ, сепак, проценува дека банкарскиот сектор во целина би останал отпорен дури и во сценарио на сериозен финансиски стрес.

И покрај предупредувањата за ризиците, ММФ ја зголеми прогнозата за глобалниот економски раст во 2026 година на 3,1 процент, од претходно проектираните 3 проценти во јули. Како една од причините се наведуваат силните инвестиции во инфраструктурата за вештачка интелигенција, кои ги надоместиле дел од негативните ефекти од повисоките цени на нафтата поради војната на Блискиот Исток.

The post ПОСТОИ РИЗИК ДА ПУКНЕ ФИНАНСИСКИОТ МЕУР ОКОЛУ ВЕШТАЧКАТА ИНТЕЛИГЕНЦИЈА Според ММФ, кризата ќе се прелее на целата економија appeared first on plusinfo.mk.

Меѓународниот монетарен фонд (ММФ) ја зголеми прогнозата за раст на македонската економија на 3,5% за годинава, од претходно очекуваните 3,1%. За следната година, пак, предвидува раст од 3,2%.

Според најновите проекции, Македонија годинава ќе биде меѓу земјите со повисок очекуван економски раст во регионот, заедно со Албанија и Косово, за кои исто така се прогнозира раст од 3,5%. За Србија се очекува раст од 3,2%, за Црна Гора 3%, за Бугарија 2,6, за Босна и Херцеговина 2,3, за Хрватска 2,2, а за Грција 1,8%.

Позитивна ревизија на прогнозата за македонската економија неодамна направи и Светската банка, која ги зголеми очекувањата за растот во 2026 година од 2,9 на 3,2%. Банката ги базира предвидувањата на инфраструктурните проекти.

За 2027 и 2028 година, Светската банка очекува раст од по 3 проценти.

Во октомврискиот извештај за глобалните економски перспективи, ММФ ја зголеми и прогнозата за раст на светската економија во 2026 година на 3,1%, наспроти претходно предвидените 3%.

Сепак, Фондот предупредува дека глобалниот раст и натаму ќе биде релативно слаб, особено поради неизвесноста на енергетските пазари и промените во светската економија.

ММФ очекува значително поскапување на нафтата, со просечна цена од 96 долари за барел во текот на годинава, што би можело да придонесе за зголемување на глобалната инфлација на 4,7%, во споредба со 4,1% во 2025 година.

Извештајот се осврнува и на влијанието на вештачката интелигенција врз економијата и пазарот на трудот. Според ММФ, развојот на оваа технологија може да ги ублажи дел од негативните последици од повисоките цени на енергенсите, но придобивките нема да бидат еднакви во сите земји и сектори.

Фондот предупредува дека промените на пазарот на трудот ќе се одвиваат постепено, но со значителни последици.

The post ММФ ГИ ЗГОЛЕМИ ОЧЕКУВАЊАТА ЗА РАСТОТ НА МАКЕДОНСКАТА ЕКОНОМИЈА Годинава ќе ја завршиме со 3,5% раст, а следната година со раст од 3,2% appeared first on plusinfo.mk.

Црна Гора се подготвува за еден од најрадикалните зафати во пензиското финансирање во Европа – целосно укинување на придонесите за пензиско и инвалидско осигурување и преминување кон финансирање на пензиите од општите приходи на државата.

Владата предлага од јануари преостанатиот придонес за ПИО од 10 проценти да се намали на нула. Тоа е продолжение на програмата „Европа сега 2“, со која во октомври 2024 година придонесот што го плаќа работникот беше намален од 15 на 10 проценти, а придонесот на работодавачот од 5,5 проценти беше целосно укинат.

Сега придонесите не покриваат ни половина од сметката за пензиите

Практичната последица е едноставна: парите што сега од бруто-платата се одвојуваат за пензиско осигурување ќе останат во нето-платата, додека државата ќе мора пензиите да ги обезбедува од ДДВ, данокот на доход, данокот на добивка, акцизите и од другите буџетски приходи. Владата истовремено предлага значително зголемување на минималните плати – на 1.000 евра за најниските квалификации, 1.250 евра за работни места со средно образование и 1.400 евра за високо образование. Економската логика е поголемите плати и пониското оптоварување на трудот да ја зголемат формалната вработеност и потрошувачката, а со тоа и приходите од другите даноци.

Но, Црна Гора всушност веќе во голема мера ги плаќа пензиите од буџетот. Во 2025 година од пензиски придонеси биле собрани околу 353 милиони евра, а за пензии биле исплатени околу 796 милиони евра. Тоа значи дека придонесите покривале само 44,3 проценти од пензиските расходи, додека разликата од околу 443 милиони евра морала да се обезбеди од други приходи. Во првата половина на 2026 година од придонеси биле собрани околу 183 милиони евра, а за пензии биле потребни околу 411 милиони. Новата реформа, според тоа, не воведува буџетско финансирање од нула, туку го доведува до крај процесот во кој буџетот веќе го покрива поголемиот дел од пензиите.

Главната економска предност е силното намалување на даночното оптоварување на трудот. За иста бруто-плата работникот добива повисока нето-плата, а работодавачот нема дополнителен пензиски придонес. Тоа може да го намали мотивот дел од платата да се исплаќа „на рака“, да ја зголеми формалната вработеност и да ја подобри конкурентноста на економијата. Искуството од претходните реформи покажува силен раст на платите и регистрираната вработеност, иако ММФ предупредува дека силната домашна потрошувачка носи и ризици – поголем увоз, надворешен дефицит и инфлаторни притисоци.

А на другата страна на равенката?

Најголемиот ризик е на другата страна на равенката: трошокот за пензиите не исчезнува со исчезнувањето на придонесот. Пензиите ќе конкурираат за истиот буџетски денар со здравството, образованието, социјалната заштита, инфраструктурата и со отплатата на јавниот долг. Ако економијата расте, вработеноста се зголемува и државата собира повеќе ДДВ и други даноци, системот може да функционира. Во рецесија или при сериозен пад на туризмот, Црна Гора би можела истовремено да има помали даночни приходи и непроменета обврска за исплата на пензиите.

Колку може да биде голем тој ризик покажува една пресметка на ММФ која денес заслужува посебно внимание. Во анализата за Црна Гора од 2024 година, Фондот направил алтернативно сценарио, во кое се претпоставува целосно укинување на пензиските придонеси и исполнување на тогашното ветување за зголемување на минималната нето-плата. Според таа симулација, буџетскиот дефицит би скокнал на 10,7 проценти од БДП во 2025 година, а потоа би се зголемил на 13,3 проценти во 2029 година. Јавниот долг, кој во 2023 година изнесувал 61,5 проценти од БДП, во ова сценарио би достигнал 102,5 проценти во 2029 година.

Овие бројки, сепак, не смеат да се читаат како актуелна прогноза дека тоа сега ќе ѝ се случи на Црна Гора. Станува збор за стрес-сценарио на ММФ направено во 2024 година, со тогашни претпоставки и без сегашниот пакет компензациски даночни мерки. Но, пресметката ја покажува големината на фискалниот предизвик: ММФ тогаш проценил дека делумното или целосното укинување на пензиските придонеси може да одземе приходи до 7,5 проценти од БДП. Дури и зголемување на стапката на ДДВ за огромни шест процентни поени, пресметал Фондот, би донело дополнителни приходи од само околу 4 проценти од БДП. Затоа клучното прашање не е дали пензиите можат технички да се плаќаат од буџетот, туку дали државата може трајно да создава доволно други приходи без прекумерно задолжување или драстично зголемување на други даноци.

Примерите на Австралија и на Нов Зеланд

Моделот сепак не е без преседан. Најчистиот пример е Нов Зеланд. Таму нема класичен јавен пензиски систем финансиран со придонеси од плата. Државната New Zealand Superannuation е универзална пензија финансирана од општите даночни приходи, а правото главно зависи од возраста и исполнувањето на условите за престој, а не од тоа колку придонеси некој уплатил во текот на работниот век. ОЕЦД ги издвојува Нов Зеланд и Австралија како земји без класичен јавен пензиски систем со придонеси.

Австралискиот модел е поинаков. Државната Age Pension исто така се финансира од општите даночни приходи, а правото зависи и од приходот и од имотот. Но, паралелно постои задолжително приватно пензиско штедење – superannuation – во кое работодавачите уплаќаат средства на индивидуалните сметки на работниците. Затоа Австралија не е пример во кој целиот пензиски приход го обезбедува буџетот. Нов Зеланд е поблиску до идејата за даночно финансирана основна јавна пензија, но и таму постои доброволно приватно пензиско штедење.

Црногорскиот експеримент е уникатен

Црногорскиот експеримент поради тоа е невообичаен за Европа. Во многу европски држави буџетот веќе ја покрива разликата кога пензиските придонеси не се доволни, но целосното укинување на придонесите е сосема друга конструкција. Црна Гора фактички се обидува да го префрли даночниот товар од трудот кон потрошувачката, добивката и другите извори на буџетски приходи. Ако тоа донесе повеќе формални работни места, повисоки плати, поголема економска активност и поширока даночна база, дел од изгубените приходи може да се вратат по друг пат. Ако тоа не се случи во доволен обем, разликата ќе мора да се покрива со повисоки даноци, намалување на други расходи или со задолжување.

Токму затоа Црна Гора станува интересен европски тест за прашањето дали јавниот пензиски систем може да ја прекине директната врска со придонесите од платите, а сепак да остане долгорочно финансиски одржлив.

The post ЦРНА ГОРА ГИ УКИНУВА ПЕНЗИСКИТЕ ПРИДОНЕСИ Може ли пензиите да се плаќаат само од даноци? appeared first on plusinfo.mk.

Директорката на ММФ, Кристалина Георгиева, изјави дека проширувањето на ЕУ е повторно на агендата, што ќе биде од корист за ММФ, како и за постојните и идните членки на Унијата.

Таа додаде дека наскоро во Рим ќе биде отворен центар за земјите од Западен Балкан и Молдавија – Центарот за техничка помош на Југоисточна Европа (SEETAC) на кој е планирано да се приклучи и Украина.

-Во ММФ видовме огромни придобивки од проширувањето, и за новите и за постојните членки на ЕУ. Всушност, можеме да кажеме дека проширувањето го активира моторот на конвергенција (усогласување), што, според мене, е најважниот изум на 20 век. Доколку добро се спроведе, проширувањето на ЕУ може да обезбеди многу потребен поттик за растот во Европа – и за кандидатите и за постојните членки- рече Георгиева во Центарот за студии за европска политика (CEPS) во Брисел

Таа  го презентираше новиот извештај посветен на пристапувањето во ЕУ и Западен Балкан, во кој се наведува дека членството во ЕУ нуди единствена можност за забрзување на растот и зголемување на животниот стандард за земјите кандидати.

Според неа, за проширувањето да го зголеми животниот стандард, тоа навистина мора да се направи добро – земјите кандидати мора да спроведат смели домашни реформи, а ЕУ мора да обезбеди разумна поддршка.

Земјите кандидати имаат корист од приклучувањето кон ЕУ, бидејќи одговорот лежи главно во поголемата продуктивност. Продуктивноста сочинува околу две третини од вкупното зголемување на приходите од пристапувањето, рече таа.

– Но, продуктивноста не доаѓа магично со членството во ЕУ. Таа мора да се заработи. Таа се јавува кога локалните и странските инвеститори и компании гледаат нови можности во земјите во процесот на пристапување. Таа се јавува кога компаниите иновираат, инвестираат и се натпреваруваат – додаде директорката на ММФ.

Георгиева нагласи дека земјите кандидати треба ефикасно да го спроведат acquis на ЕУ и да избегнуваат празнини и непотребно прилагодување или претерување, бидејќи тоа ги намалува придобивките од интеграцијата.

-Но, ЕУ има и многу работа да направи. Придобивките од пристапувањето ќе бидат поголеми – за сите – ако единствениот пазар стане подлабок и понепречен. Проширувањето и продлабочувањето на единствениот пазар треба да се гледаат како надополнувања – поголема Европа може да биде посилна Европа – но многу повеќе ако е поинтегрирана Европа – рече Георгиева.

Во извештајот со наслов „Премостување на границите: Максимално искористување на пристапувањето во ЕУ“ (Bridging Borders: Making the Max of EU Accession), се наведува дека бруто домашниот производ (БДП) по глава на жител во земјите од Западен Балкан би можел да се зголеми за околу една третина во рок од една деценија под одредени услови.

Остварувањето на овој потенцијал ќе бара три меѓусебно зајакнувачки сили: домашни структурни реформи засновани на acquis на ЕУ, подлабока интеграција во единствениот пазар и ефикасно користење на фондовите на ЕУ, што во голема мера би придонело за вкупните придобивки, се наведува во извештајот.

Во него се додава дека патот кон просперитет е раст на продуктивноста, кој сочинува две третини од растот на приходите, поттикнат од посилни институции, подобро управување и подинамичен приватен сектор.

Според ММФ, пристапувањето може да го забрза усогласувањето преку неколку меѓусебно зајакнувачки канали.

Интеграцијата во единствен пазар – преку слободно движење на стоки, услуги, капитал и работна сила – ја проширува големината на пазарите на производи и фактори, ја зајакнува конкуренцијата и го олеснува трансферот на технологија.

Усвојувањето на acquis на ЕУ го подобрува управувањето, квалитетот на регулативата и кредибилитетот на политиката, намалувајќи ја неизвесноста и намалувајќи ги премиите за ризик, што пак може да ги поддржи приливите на капитал.

Пристапот до финансирање од ЕУ за инфраструктура и институционален развој го зголемува јавниот капитал и привлекува приватни инвестиции.

Посилните инвестиции и усвојувањето на технологијата ја зголемуваат продуктивноста на трудот и растот на платите, подобрувајќи ги резултатите на пазарот на трудот и помагајќи во ублажување на миграцијата преку правење на домашните можности попривлечни, се додава во обемниот извештај.

Тековните рамки за монетарна политика и девизен курс, особено релевантни за управувањето со динамиката на транзиција, во голема мера ги одразуваат оние од претходните рунди на пристапување. Меѓу сегашните кандидати, Албанија, Молдавија, Северна Македонија и Србија одржуваат режими на девизен курс кои се движат од флуктуирачки до де факто стабилизирани, додека Босна и Херцеговина, Косово и Црна Гора немаат независни монетарни политики.

Сличен јаз ги карактеризираше претходните рунди на пристапување: некои земји ја задржаа монетарната независност дури и по пристапувањето во ЕУ (на пример, Чешка, Унгарија, Полска и Романија), додека други се откажаа од неа пред пристапувањето (на пример, балтичките земји и Бугарија), се додава во извештајот на ММФ.

The post ММФ ОТВОРА ЦЕНТАР ЗА ТЕХНИЧКА ПОМОШ НА ЗАПАДЕН БАЛКАН И МОЛДАВИЈА Георгиева оцени дека пристапувањето кон ЕУ ќе го забрза растот на економиите од регионот appeared first on plusinfo.mk.

Македонија се очекува да биде меѓу европските земји со највисок економски раст во наредните години, покажуваат најновите долгорочни прогнози на Меѓународниот монетарен фонд (ММФ), кои ги пренесува „Еуроњуз“.

Според проекциите за периодот од 2027 до 2031 година, македонската економија би требало да бележи просечен годишен раст од 3 проценти, со што земјата се рангира на седмото место во Европа според очекуваното темпо на економски развој.

Прогнозите покажуваат дека земјите од Западен Балкан ќе продолжат да остваруваат стабилен економски раст, кој во повеќето случаи е блиску или над светскиот просек од 3,15 проценти.

Во регионот, највисок просечен раст се прогнозира за Србија – 3,52 проценти, додека Албанија би требало да оствари 3,19 проценти. На европско ниво, првите две позиции им припаѓаат на Малта со 3,96 проценти и Косово со 3,95 проценти.

Од друга страна, ММФ очекува значително понизок раст кај најголемите европски економии. Германија би бележела просечен раст од 0,92 проценти, Италија 0,7 проценти, додека за Европската Унија се прогнозира раст од 1,44 проценти, а за еврозоната 1,21 процент.

Според овие проекции, македонската економија во следниот петгодишен период би растела со темпо повеќе од двојно повисоко од просекот на еврозоната, што, според анализите, претставува позитивен сигнал за долгорочните економски перспективи и конкурентноста на регионот.

The post ЕУРОЊУЗ ПРОЦЕНУВА ДЕКА МАКЕДОНИЈА ЌЕ БИДЕ СЕДМА ПО ЕКОНОМСКИ РАСТ ВО ЕВРОПА Долгорочни прогнози на Меѓународниот монетарен фонд appeared first on plusinfo.mk.

Воените судири на Блискиот Исток доведоа до драстично поскапување на два метала на светско ниво – бакарот и алуминиумот. Ова го покажува анализа на Меѓународниот монетарен фонд (ММФ), според која прекините во снабдувањето ги зголемиле цените на овие основни метали на пазарите, кои пак и онака се под притисок поради силната побарувачка и ограничената понуда. Засега е неизвесно дали Македонија ќе ја искористи шансата да профитира, со оглед на големите наоѓалишта на бакар во земјава. Додека единствениот рудник за бакар, „Бучим-Боров дол“ ги исцрпува капацитетите, ресурсите кои ги поседува регионот на Иловица и Штука остануваат неискористени.

Инвестицијата продолжува да биде во застој, иако според проценките од геолошките истражувања компанијата би можела да произведува околу 16 илјади тони бакар на годишно ниво. Постојат и други локации на кои сега се истражува присуството на бакар, а една од нив е во близина на Крива Паланка, каде се испитува и антимонот. Претходно, нереализирани останаа неколку инвестиции во рудник за бакар, како што е Казандол и во моментов државата нема големи количини кои може да ги понуди на светските пазари, иако еден тон бакар на

Лондонската берза искачи вредност од над 13 илјади американски долари.

Од локалната иницијатива „И здравје и работа“, која го поддржува проектот во Иловица, истакнаа дека се залагаат за економски развој, преку почитување на високи еко-стандарди и ги повикаа институциите доследно да ги почитуваат судските одлуки, да ги спроведат законските процедури и да носат одлуки врз основа на законите, фактите и стручните анализи.

– Никој не бара проектот да биде одобрен по секоја цена. Ако не ги исполнува сите законски, технички и еколошки услови, институциите имаат обврска да не дадат дозвола. Но, ако ги исполнува сите пропишани критериуми, тогаш државата има иста таква обврска да постапува согласно законот, а не под притисок на поединци или интересни групи – наведоа неодамна од иницијативата.

Додека кај нас проектите за ископ на бакар се соочуваат со низа пречки да го видат светлото на крајот на тунелот, ММФ оценува дека прекините во синџирот на снабдување извршиле сериозен притисок врз цените на основните метали. Кризата како онаа во Блискиот Исток предизвикала најмногу да поскапат бакарот, за 29,5 проценти, како и алуминиумот, за 29,8 проценти.

– Прекините во снабдувањето доведоа до зголемување на цената на основните метали… Цените на Фјучерс-пазарите за основни метали сугерираат понатамошно зголемување на цените во 2026 година, што укажува на отпорна побарувачка во услови на сè уште кревка понуда – се наведува во анализата „Глобалната економија во сенка на војната“.

Покрај овие два критични минерала, од ММФ нагласуваат дека големи предизвици има и со ретките земни елементи, па ги повикуваат владите да промовираат комплементарни структурни реформи што би ги поедноставиле дозволите за рударство и би поттикнале инвестиции во металургијата.

The post ММФ ПОТВРДИ ДЕКА БАКАРОТ НАЈМНОГУ ПОСКАПУВА ВО КРИЗИ Нашите ресурси во Иловица остануваат под земја appeared first on plusinfo.mk.

Македонија би можела да стане седма најбрзорастечка економија во Европа до 2031 година, односно во периодот од 2027 до 2031 година, покажуваат најновите прогнози на Меѓународниот монетарен фонд. Со просечен годишен раст од 3 отсто, земјата би растела повеќе од двојно побрзо од еврозоната и би се нашла меѓу европските економии со најдобри перформанси.

Според анализата на ММФ, додека еврозоната се очекува да има раст нешто повеќе од 1% годишно до 2031 година, помалите економии меѓу кои и шестката од Западен Балкан – Македонија, Косово, Србија, Албанија, Црна Гора и Босна и Херцеговина се очекува да ја надмиат еврозоната со повеќе од два спрема еден и да остварат раст од околу 3% како што е светскиот просек.

Најбрзорастечка економија во Европа според прогнозата на ММФ е Малта со очекуван раст од 3,96% до 2031 година, додека најслаб раст ќе имаат најголемите економии – Италија од 0,7% и Германија од 0,92%. Економиите од Европската Унија, според прогнозата на ММФ се очекува да имаат раст од 1,44%, додека еврозоната 1,21%.

Високиот јавен долг, стареењето на населението, слабата продуктивност, долготрајните трошоци за енергија и постојаната геополитичка неизвесност се очекува да го одржат растот далеку под историските норми во остатокот од деценијата за големите европски економии. Според најновите економски перспективи на Меѓународниот монетарен фонд, се предвидува дека еврозоната ќе се прошири за само 1,2% годишно во просек помеѓу 2027 и 2031 година, при што нејзината најсилна година, 2028 година, ќе достигне само 1,4%. Пошироката Европска Унија се справува малку подобро со 1,4% годишно, повторно достигнувајќи врв во 2028 година од 1,6%.

Истовремено, според прогнозата на ММФ се предвидува дека глобалното производство ќе расте за околу 3,2% годишно во истиот период. Се очекува растото на Азија да продолжи и биде 4,6% годишно, а Индија за 6,5%, додека дури и субсахарска Африка е на добар пат да порасне за 4,6%.

Двојно побрзо темпо на раст од еврозоната во следните пет години се очекува да имаат многу помали европски нации, кои се протегаат од Медитеранот до Западен Балкан и Источна Европа. 

The post ПРОГНОЗА НА ММФ Македонија до 2031 година ќе биде седма најбрзорастечка економија во Европа appeared first on plusinfo.mk.

Се потврди дека се невистина тврдењата на СДСМ, затоа што нема мигранти во државава,  но ќе има брза пруга, рече денеска премиерот Христијан Мицкоски, на новинарско прашање до каде се проектите за финансирање со Договорот за стратешко партнерство со Обединетото Кралство.

Студиите за брзата пруга  на Коридор 10, како што рече, треба да бидат готови најдоцна до јули, по што следува постапка за закон во Собранието и од есен и на терен да се почне со принципот „жолт фидик“.

–  Ако мислите на Коридорот 10, беа нашите партнери од Велика Британија, беше и потенцијалниот заемодавател, беа претставници од UK Export Finance*. Разговаравме и во Владата, и во Министерството за транспорт и во Министерството за финансии. Физибилити студијата  што ја прави Министерството за транспорт и студијата за оценка на влијанието врз животната средина треба да бидат завршени отприлика овој месец, а најдоцна да речеме во јули. Ако биде сè како што треба, потоа одиме со закон во Парламентот и, здравје Боже, таму од есен можеме и на терен да отпочнеме по принципот на „жолт фидик“. И нема мигранти, и нема неуспешни баратели на азил како што гледате, и повторно се потврдија невистините коишто доаѓаат од СДСМ дека се невистини, и нема да има. Сакам ова да биде јасно кажано, јасно прецизирано бидејќи требаше во април да имаме бран на такви лица, еве средина на јуни е, нема, и нема ниту да има, а ќе има брза пруга којашто ќе биде Коридорот 10 и којашто ќе ги поврзе нашата северна граница и нашата јужна граница – изјави Мицкоски откако присуствуваше на пуштање во употреба на Дом за стари лица во општина Илинден.

Во коментар на обвинувањата од пратеникот од СДСМ и поранешен вицепремиер за економски прашања Фатмир Битиќи дека Владата манипулира со податоците за БДП, Мицкоски  рече дека е факт оти според Меѓународниот монетарен фонд (ММФ) номиналната вредност на бруто домашниот производ во изминатите две години на актуелната Влада е за 560 милиони  долари поголема отколку номиналната вредност на бруто домашниот производ за седум години на претходната Влада.

Таа додадена вредност на номиналниот бруто домашен производ, потенцира Мицкоски, е остварена со задолжување трипати помало од тоа во минатото.

– СДСМ грубо манипулира со тие податоци, но се навикнавме на невистините што доаѓаат од таму. Што е факт? И тој факт повторно не го кажува ниту Христијан Мицкоски, ниту Владата, туку тој факт го зборува Меѓународниот монетарен фонд. Ако се спореди номиналната вредност на бруто домашниот производ во овие две години на оваа Влада, ќе забележите дека таа е за 560 милиони евра долари поголем отколку номиналната вредност на бруто домашниот производ за седум години на претходната Влада. Ако го погледнете и должничкиот дел, односно јавниот и државниот долг, ќе забележите дека оваа додадена вредност на номиналниот бруто домашен производ е остварена со задолжување трипати помало отколку тоа што го направи претходната Влада.  Тоа е статистика, тоа се бројки. Ако тоа го гледате како шведска маса и го извадите само тоа што ви одговара тогаш има и такви кои ќе поверуваат на невистините кои доаѓаат од СДСМ. Но, ова се бројки кои апсолутно ги потврдува и Меѓународниот монетарен фонд, вклучително и во последниот извештај којшто е историски најдобар којшто некогаш го добила Македонија откако е независна – изјави Мицкоски.

The post НЕМА МИГРАНТИ, НО ЌЕ ИМА БРЗА ПРУГА Се потврди дека СДСМ лаже, вели Мицкоски appeared first on plusinfo.mk.

The post ММФ ПОТВРДИ, МАКЕДОНСКАТА ЕКОНОМИЈА Е СТАБИЛНА Стопанството расте, долгот полека се намалува appeared first on plusinfo.mk.