Владата планира 10 милијарди евра капитални инвестиции во патната и железничката инфраструктура во следната деценија, додека годинава се достигнати рекордни 1,255 милијарди во поновата историја, вели ВМРО-ДПМНЕ во соопштение до јавноста.

Додека СДСМ и ДУИ оставаа кризи, долгови и блокади, ВМРО-ДПМНЕ донесе стабилност, развој и конкретни резултати кои денес ги чувствуваат граѓаните, се наведува во соопштението.

ВМРО-ДПМНЕ споменува дека до крајот на 2027 година треба да бидат завршени 6 нови автопатски делници. Партијата исто така истканува дека биле доделени 55.000 ваучери за електронски уреди во вредност од 250 евра, 10 илјади евра за отпочнување на сопствен бизнис со Оперативниот план за 2025 година, а тоа ќе продолжи и оваа година.

„Доделени беа 10 илјади евра за млади земјоделци, се прошири опсегот за субвенционираниот студентски оброк. Ова се показателите дека Владата се грижи за младите да можат да градат иднина дома“.

Во соопштението се вели и дека во изминатиот период се зголемија платите и пензиите, дека Владата ја зајакнува економијата и дека економијата седум квартали по ред бележи економски раст над 3 проценти.

„Истовремено градиме нови градинки, училишта, здравствени установи, спортски сали и патишта, додека враќаме наследени долгови во просек од над 2 милијарди евра годишно.

ВМРО-ДПМНЕ докажа дека знае како да работи за државата и граѓаните. Докажа дека националните интереси немаат цена и дека Македонија може да има власт која не капитулира кога се во прашање достоинството, идентитетот и интересите на народот.

Денес Македонија не стои во место. Македонија се движи напред. Македонија забрзува“, велат од партијата порачувајќи дека разликата со претходната власт е очигледна.

The post ПЛАНОТ Е 10 МИЛИЈАРДИ ЗА 10 ГОДИНИ И 6 НОВИ АВТОПАТИ ДО 2027 Годинава во инвестиции се вложени рекордни 1,255 милијарди евра appeared first on plusinfo.mk.

Во ЕУ само околу 12% од земјоделските стопанства се водени од млади луѓе. Сличен е процентот и кај нас. Ова станува се поголем предизвик поради што е во фокусот и на новата визија на Унијата за иднината на агро секторот до 2040 година. Целта е да се поттикне поуспешен трансфер на новите генерации во земјоделството, беше речено на денешната 13. сесија на Работната група 1 – Земјоделство и рурален развој.

Како што посочија учесниците, 57 години е старосниот просек на „младите” фармери кои раководат со земјоделските стопанства.

Земјоделството е недоволно атрактивно поради неизвесноста на приходите, сложените бирократски процедури и регулаторните барања, а претприемништвото, иновациите, дигитализацијата и новите алатки, се само некои од начините за подобрување на состојбата.

– Се соочуваме со слични предизвици како оние во ЕУ. И кај нас  околу 12 отсто од земјоделските стопанства се водени од млади луѓе. Неизвесната перспектива за одржливи приходи, сложените регулаторни барања и бирократските оптоварувања, ниската профитабилност што ги попречува инвестициите, родовиот јаз, недостигот на пристап до основни услуги во руралните области и други тешкотии во професијата, се факторите кои го прават земјоделството се понепривлечно за младите генерации – напомена професорката од Факултетот за земјоделски науки и храна Александра Мартиновска Стојческа.

Таа потенцира дека визијата на ЕУ е креирање привлечен агро-сектор за младите.

– Темата за младите е многу емотивна. Каков е тој сектор или иднина без младите во неа? – рече професорката.

Според словачката амбасадорка Ивета Хрицова, земјоделството е многу важно за македонската економија и култура.

– Земјоделството е многу добра можност за развој на земјата и поголема конкурентност. Словачка дава голема поддршка тука, не само финансиска, туку и стручна. Помагаме земјата да ги исполни условите, особено во агро секторот – нагласи Хрицова, укажувајќи на важноста на младите луѓе кои, рече, се локомотивата на државата.

Професорката од Филозофскиот факултет и национален координатор на НКЕУ-МК Милева Ѓуровска нагласи дека земјоделството е примарен сектор кон кој државата треба да се однесува многу внимателно.

-Не може денес да се очекува дека новите генерации ќе го прифатат селскиот живот како судбина, како што било порано, и ќе продолжат со земјоделството како економија на преживување. Тоа е веќе минато. Уште во седумдесетите години се истакнуваше дека земјоделецот во Европа не постои како традиционален пример, туку дека е земјоделски производител, а селото престанува да биде затворена заедница. Демографските трендови особено во последната декада се загрижувачки. Анкетите покажуваат дека младите не се гледаат во средина во која би споделувале само несигурност и затоа бараат алтернативи, а денес алтернативи постојат многу. И во многу европски држави има слични проблеми, но не со таков обем и интензитет за да не може да се репродуцира земјоделството како економска гранка – подвлече Ѓуровска.

Ставовите на младите земјоделци од земјава се поделени, едни сметаат дека интересот за земјоделство кај младите се намалува, а други дека во последните години бележи раст.

– Се намалува интересот за занимавање со земјоделство поради стереотипите – дека е тешка работа, дека е ниско профитабилна. Сепак, најголема причина е недостигот на знаење, едукација, експертиза и информации. Решенијата ги гледам во поддршка на младите и руралните средини. Потребна е поддршка која младите „ќе ги застане на нозе“ и ќе им овозможи услови да почнат бизниси во земјоделството. Но, не е доволна само финансиска поддршка, потребни се и знаење, маркетинг и пазарен пристап – изјави Горан Балески, претседател на Прва органска задруга Валандово.

Иван Додевски кој е професионален пчелар, вели дека има се поголем интерес кај младите за пчеларење,

– Предизвик е да се биде пчелар, но треба да се подобри едукацијата на производителите и на потрошувачите, да се даде поголема поддршка во однос на опремата за да ги зголемиме производните капацитети. Во последно време, зголемен е интересот кај младите за пчеларството – рече Додевски.

На денешната дебата учествуваат македонски и словачки експерти по земјоделство, како и претставници на младински организации, земјоделски здруженија, млади фармери, академската заедница, граѓанскиот сектор и други меѓународни партнери. Се очекува преку инклузивен дијалог да се изградат заеднички идеи и препораки за создавање подобра средина за младинско претприемништво во руралните средини и за зајакнување на улогата на младите како лидери и иноватори во своите заедници.

The post САМО 12% ОД ЗЕМЈОДЕЛСКИТЕ СТОПАНСТВА ГИ ВОДАТ МЛАДИ Ниските приходи и бирократијата го прават неинтересен секторот appeared first on plusinfo.mk.

Во рамки на денешната трибина ,„Како станавме увозно зависни за храна“, министерот за земјоделство, шумарство и водостопанство, Цветан Трипуновски, истакна дека за да се задржат младите во Македонија, важно е да се обезбеди поддршка за нив во земјоделството. Во таа насока, најави кофинансирање на инвестиции во земјоделски задруги и грантови за млади земјоделци, кои ќе ги мотивираат да влезат во процесот на производство.

Исто така, Владата ќе продолжи со спроведување на ИПАРТ мерки, кои обезбедуваат финансиска поддршка за модернизација на земјоделството и зголемување на конкурентноста. Овие мерки се клучни за враќање на довербата во институциите и стимулирање на земјоделското производство.

– Имаме земјоделци кои се над 55 години старост, премногу малку или воопшто нема влез на свежа енергија, работна сила, млади земјоделци кои ќе го продолжат процесот на производство на земјоделски производи. Во системот кој го води министерството, имаме некаде околу 65.000 земјоделци, иако таа бројка пред 10 години беше двојно поголема од ова што е денеска, затоа што овие негативни политики, задоцнети мерки и негрижа на институциите доведоа до тоа да се занимаваат со земјоделство само тие кои едноставно мораат или се по традиција земјоделци, меѓутоа нема и свежа работна сила. Имаме празни села, сериозна миграција на младите луѓе, не само во поголемите градови, туку и надвор од државата, затоа што гледаат дека нивното семејство кое ги одгледало од земјоделство, нема просперитет, нема економска оправданост, и тука настанува тој процес на прекинување на алката во делот на продолжување на оваа традиција – изјави Трипуновски.

Трипуновски нагласи дека ако Македонија не обезбеди нова работна сила во земјоделството, ќе го прекине производствениот процес. Тој истакна дека за Македонија да стане повторно аграрна држава, потребна е поголема поддршка од институциите и Владата. Тој додаде дека во последните седум месеци, ВМРО-ДПМНЕ постигна историски највисока цена за земјоделците, покажувајќи дека со заеднички напори може да се постигнат резултати и да се врати довербата во институциите.

– Во програмата за финансиска поддршка за 2025 година и програмата за рурален развој за 2025 година, имаме акцент на битните земјоделски култури кои се важни за Македонија, како што се тутунопроизводството, лозарството, градинарството, млекопродукцијата. Исто така, земјоделците ќе добијат дополнителна поддршка, што ќе значи сериозна помош во овие тешки моменти, за да се врати довербата во институциите и да се спречи негативниот тренд на падот на земјоделското производство. Во делот на програмата за рурален развој ќе се осврнеме на два елементи: грантови за млади луѓе кои ќе влезат во процесот на земјоделско производство и кофинансирање на проекти за кои ќе аплицираат. Вториот сегмент е во делот на задругарството, бидејќи сметаме дека задругите се еден од клучевите во решавањето на проблемот со конкурентноста на македонските земјоделци – заклучи Трипуновски.

The post „КАКО СТАНАВМЕ УВОЗНО ЗАВИСНИ ЗА ХРАНА?“ Трипуновски најави грантови за младите земјоделци appeared first on plusinfo.mk.