Јавен обвинител од ОЈО ГОКК донесе наредби за спроведување на истражна постапка против две лица за кои постои основано сомневање дека сториле кривично дело Примање награда за противзаконито влијание.

Осомничените – судски полицаец и доставувач од Основниот кривичен суд Скопје, во периодот од август 2025 година до 07.04.2026 година директно примиле награда во паричен износ од 500 евра и 60.000 денари од сведок, за посредување на судскиот полицаец во повисоките судови со цел да издејствува ослободителна пресуда.

Сведокот, кој поднел жалба против првостепена пресуда со која бил огласен за виновен и осуден на казна затвор во траење од една година, преку сосед стапил во контакт со осомничениот доставувач, кој го упатил кај судскиот полицаец како лице што може да посредува.

Судскиот полицаец кој бил претставен како лице кое долги години работи во судот и има контакти со судиите во сите степени, при што може да ургира пресудата да биде заменета со ослободителна. Убеден во неговото влијание, сведокот во текот на 2025 година на доставувачот му предал 500 евра со цел истите преку судскиот полицаец да бидат предадени на судија од Апелациониот суд Скопје кој би донел ослободителна пресуда.

Во текот на 2026 година, сведокот на осомничениот судски полицаец му исплатил 30 000 денари како награда за посредувањето. Откако Апелациониот суд Скопје ја потврдил првостепената пресуда, сведокот преку својот бранител поднел вонреден правен лек пред Врховниот суд на РСМ. На 07.04.2026 година сведокот на осомничениот полицаец му исплатил уште 30.000 денари како награда за наводно посредување пред судиите на Врховниот суд кои треба да одлучуваат во постапката.

Ценејќи дека се исполнети законските услови за определување на мерка притвор, јавниот обвинител до судијата на претходна постапка достави предлог што беше делумно прифатен. Со решение на судот на осомничениот судски полицаец му е определена мерка притвор во траење од 30 дена, додека на доставувачот му е определен куќен притвор, за што предметниот обвинител незадоволен од одлуката на судијата достави жалба.

ПОТКУП ВО КРИВИЧНИОТ СУД, ДВАЈЦА ВРАБОТЕНИ СЕ ВО ПРИТВОР Едниот зад решетки, другиот дома

The post ЗЕЛЕ 500 ЕВРА И 60.000 ДЕНАРИ ЗА ОСЛОБОДИТЕЛНА ПРЕСУДА Истрагата со детали за полицаецот и за судскиот доставувач осомничени за поткуп appeared first on plusinfo.mk.

Има случаи што не оставаат простор за релативизирање. Случајот со директор фатен со 50.000 евра во автомобил, како дел од договорено мито од 100.000 евра, е токму таков. Ова не е политичка конструкција, не е медиумска шпекулација, туку акција со обележани пари, документирана од институциите.

И токму затоа, проблемот повеќе не е само во поединецот. Проблемот е во реакцијата на институциите на системот. Да, институциите постапиле. Но политиката повторно падна на тестот. Добро и очекувано е што дел од партиите со соопштенија го осудија случајот, но она што најмногу боде очи е односот на партијата чиј член е осомничениот. Наместо јасна, недвосмислена и остра осуда, наместо дистанцирање, наместо барем привремена суспензија од партијата, слушнавме и прочитавме едно мошне бледо соопштение – бенигно и стереотипно до немај каде. И тука веќе не станува збор за правни нијанси, туку за политички интегритет.

Презумпцијата на невиност не значи презумпција на молк. Таа не значи дека партијата треба да стои на страна додека некој нејзин функционер е фатен со неколку десетици илјади евра во кеш. Напротив токму во вакви моменти се покажува дали една партија има капацитет да се прочисти одвнатре. Ова не е прашање на политички напад туку прашање на елементарна доследност. Особено загрижува тоа што станува збор за случај со јасни елементи: барање мито, посредник, договорени рати, фаќање на дело. Ако ни во ваква ситуација нема храбра и принципиелна реакција, тогаш кога?

Токму ваквите „бледи соопштенија“ ја разјадуваат довербата. Не само во партиите, туку во целиот систем. Затоа што граѓаните не ги мерат институциите по зборови, туку по постапки. А постапката тука недостасува.

Проблемот не е само во тоа што некој побарал 100.000 евра. Проблемот е што постои чувство дека можел да го направи тоа. Дека ризикот е управлив и преман. Дека системот е доволно мек за да издржи вакви удари без вистински последици.

И затоа, одговорноста не завршува со апсењето. Таа почнува таму. И продолжува со прашањето: дали партиските структури ќе имаат храброст да кажат јасно „овој арамија повеќе не е наш човек“? Засега, одговорот изостанува. И тоа зборува повеќе од секое соопштение.

Целата шема, со посредник, со однапред договорени рати, со образложение за наводна „забрана“ на стока е конструкција која не делува како импровизација, туку како рутина. Ова не е момент на слабост, ова е ладна, свесна пресметка. Фактот што некој е подготвен да побара 100.000 евра, да организира исплата во неколку чекори и да ја спроведе шемата без очигледен страв од последици, говори за нешто подлабоко, за чувство дека системот може да се контролира, дека ризикот е управлив.

И токму затоа, овој случај не е изолиран. Пред само неколку месеци, слично сценарио се случи и во истиот сектор, со речиси истата сума. Кога корупцијата се повторува со ваква прецизност, тоа веќе не е инцидент, туку тоа е модел. Модел во кој институции што треба да ги штитат земјоделците, стануваат филтер низ кој поминува само оној што ќе плати.

Но, за разлика од многу претходни случаи кога вакви скандали завршуваа без јасен епилог, овојпат има и една важна разлика што не треба да се игнорира.

Институциите постапија брзо, координирано и без очигледна селективност. Апсењето на функционер на ваква позиција, фатен на дело, испраќа порака дека линијата „наши и ваши“ е одамна избришана. Токму во тоа лежи надежта дека системот конечно почнува да функционира независно од партиската припадност. Пораката е кристално јасна, никој не е недопирлив. И ако таа пракса продолжи доследно, тогаш ваквите 100.000 евра нема да бидат само скандал, туку и пресвртница.

Во вакви случаи, повикувањето на морал веќе звучи речиси илузорно. Не затоа што моралот не треба да постои, туку затоа што очигледно не е фактор што ги запира ваквите постапки. Кога некој е подготвен да организира шема со посредници и рати, јасно е дека границата веќе одамна е помината. Токму затоа, единственото што останува е системот и неговата способност да казнува.

Ваквите случаи бараат најригорозни казни. Не како одмазда, туку како порака. Порака дека функцијата не е привилегија за злоупотреба, туку одговорност. Порака дека секој што ќе посегне по јавниот интерес ќе се соочи со реални последици. Ваквите случаи мора да станат пример како завршува функционер кој побарал мито.

На крајот неминовно се наметнува и едно суштинско прашање: дали постојната законска рамка е доволна за да ја спречи корупцијата кај носителите на јавни функции? Ако ваквите скандали се повторуваат со иста шема и со чувство на неказнивост, тогаш очигледно санкциите не се доволно одвраќачки.

Токму затоа, во момент кога се отвора прашањето за нов Кривичен законик, неопходно е да се размислува за построг третман на корупцијата кај функционерите. Не како сосема ново кривично дело, туку како потешка, квалификувана форма на веќе постоечките дела,  кога сторителот е лице со јавна функција. Тоа би значело повисоки казни, задолжителна забрана за вршење функција, целосна конфискација на незаконски стекнатиот имот и приоритетно, брзо судско постапување. Затоа што кога корупцијата доаѓа од позиција на моќ, штетата не е само во парите туку во разградувањето на довербата во државата.

Функцијата не смее да биде олеснителна околност. Таа мора да биде најтешката отежнителна околност кога станува збор за мито и корупција.

The post 100.000 евра мито appeared first on plusinfo.mk.

Голема корупциска афера околу ИПАРД-фондовите заврши со обвинение против повеќе лица, меѓу кои и државни службеници од Агенцијата за финансиска поддршка во земјоделството и руралниот развој. Обвинителството тврди дека биле ветувани и исплатени мито и награди за противзаконито влијание со цел незаконски да се одобри финансиска помош во износ од стотици илјади евра.

Според обвинението поднесено до Основниот кривичен суд Скопје, управител на фирма аплицирал за средства од ИПАРД-програмата, иако компанијата не ги исполнувала потребните услови. Бидејќи апликацијата била лошо рангирана и немала основ за одобрување, тој решил проблемот да го „среди“ со пари.

Обвинителството наведува дека на раководно лице во Агенцијата му бил ветен поткуп од 50.000 евра, додека на уште три лица им биле дадени по 5.000 евра за да извршат притисок и да влијаат врз одлуката. Целта била апликацијата неосновано да биде подигната на листата и целосно да се одобрат бараните средства.

Во истрагата се утврдило дека четворица државни службеници, спротивно на законот и своите обврски, ја „прогледале низ прсти“ документацијата. Тие направиле погрешни пресметки, прифатиле некомплетни документи и подготвиле решение со кое финансиската поддршка била одобрена, иако условите не биле исполнети.

Еден од обвинетите, иако бил свесен за неправилностите, го потпишал решението со намера да го добие ветениот подарок. Поради сериозноста на делото, за дел од обвинетите и натаму остануваат на сила мерките притвор и куќен притвор.

Обвинителството побара и одземање на мобилни телефони, дигитални уреди и парични средства – 35.370 евра, 206.000 денари и 200 швајцарски франци, за кои се сомнева дека се поврзани со делото.

Дополнително, отворена е и предистражна постапка за евентуални злоупотреби со други ИПАРД-средства, што укажува дека аферата може дополнително да се прошири.

The post СКАНДАЛ СО ИПАРД-СРЕДСТВА, 50.000 ЕВРА ЗА ПОТПИС Обвинение за корупција во Агенцијата за земјоделство appeared first on plusinfo.mk.

Бај Тјенхуи, поранешен генерален директор на државната компанија „Хуаронг“ бил погубен во севернокинескиот град Тјенџин. Врховниот народен суд ја потврдил пресудата со која Бај бил осуден за примање мито во вредност од над 156 милиони долари, пренесе државната агенција „Синхуа“.

Според судските документи, Бај меѓу 2014 и 2018 година ја злоупотребувал својата позиција и примал огромни суми пари и подароци за да им овозможи на одредени компании пристап до државни средства и поволни договори.

Во мај 2024 година бил осуден на смрт, со конфискација на имот и трајно одземање на политички права. Жалбата му била одбиена во февруари 2025 година, а потоа одлуката ја потврдил Врховниот суд.

Во последните мигови пред извршувањето на казната, според „Синхуа“, Бај имал право да се сретне со своите најблиски.

Погубувањето е дел од континуираната офанзива на кинеските власти против висока корупција. Веќе во 2021 година беше погубен Лаи Сјаомин, поранешен претседател на истата компанија „Хуаронг“.

Антикорупциската стратегија на Пекинг е симболична порака дека ни еден функционер не е недопирлив, особено во финансискиот сектор кој долги години бил извор на злоупотреби.

Западните медиуми укажуваат дека Кина сè почесто ја користи смртната казна како сигнал за морална дисциплина и за политичка контрола во чувствителни економски сектори. Но, организациите за човекови права остро ја осудуваат практиката, потсетувајќи дека земјата не објавува официјални податоци за бројот на погубувања.

The post ПОГУБЕН ЗА МИТО ОД 156 МИЛИОНИ ВО КИНА Борбата против корупцијата во Пекинг пуштена на најјако appeared first on plusinfo.mk.

Поранешниот министер за земјоделство, Љупчо Николовски, реагирајќи по апсењето на директорот на Агенцијата за поддршка на земјоделството, изрази загриженост дека корупцијата во оваа Агенција може да ја загрози програмата ИПАРД 3, што би значело блокада на сите исплати и нови повици.

– Ако се случи тоа, земјоделците повторно ќе бидат жртви на корупцијата. Македонија не смее да си дозволи да ја изгуби довербата во европските институции поради поединци кои го претворија земјоделството во извор на мито и политички влијанија – порача Николовски.

Според него, денешниот скандал е директна последица на поставувањето на функција луѓе без интегритет и без компетенции. Тој тврди дека во негово време немало проблеми со програмата ИПАРД.

– Колку пати алармирав и предупредував дека во Агенцијата за финансиска поддршка на земјоделството и руралниот развој се создава систем на клиентелизам, влијанија и злоупотреби? Јавно укажував дека ИПАРД 3 ќе крахира, дека со вакви практики се загрозува кредибилитетот на државата пред Европската комисија и се става под ризик целата програма вредна околу 100 милиони евра – пари наменети за развој на македонското земјоделство – изјави Николовски.

The post ВЛАДАТА АПСИ ЗА КОРУПЦИЈА, СДСМ ПИШУВА СООПШТЕНИЈА „Вака може да изгубиме 100 милиони евра“ appeared first on plusinfo.mk.

Обвинителството за гонење организиран криминал и корупција отвори истрага против директорот на Агенцијата за финансиска поддршка во земјоделството и рурален развој, Илија Стоилев и протов 4 други лица, за поткуп и за давање и примање награда за протвзаконско влијание и побара судот на сите петмина да им определи притвор.

„Вчера во попладневните часови под раководство на јавен обвинител од ОЈО ГОКК, истражителите од Истражниот центар на ОЈО ГОКК и полициски службеници реализираа акција во која беа лишени од слобода 5 лица. Поради постоење на основано сомнение дека првосомничениот сторил продолжено кривично дело Давање поткуп и кривично дело Давање награда за противзаконито влијание, 3 лица како посредници сториле кривично дело Примање награда за противзаконито влијание, а едно лице сторило продолжено кривично дело Примање поткуп, јавниот обвинител донесе наредба за спроведување на истражна постапка против сите осомничени“, соопшти Јавното обвинителство.

Првоосомничениот – управител на правно лице, од крајот на февруари годинава до вчера, искористувајќи ист траен однос и исти прилики, во повеќе наврати, директно и преку посредници му ветил подарок, парични средства од значителна вредност на директорот на Агенција за финансиска поддршка во земјоделството, додава Обвинителството.

„Останатите тројца осомничени, од кои еден даночен референт во УЈП Скопје и еден државен службеник вработен во Министерство за земјоделство шумарство и водостопанство, искористувајки го своето реално влијание и службената положба побарале и го потикнаале директорот на Агенцијата да изврши службено дејствие што не смеел да го изврши. Имено, иако правното лице на првоосомничениот не ги исполнувало условите предвидени во Јавниот повик бр.01/24 за доставување на барања за користење на средства од ИПАРД Програмата за мерка 3, директорот по применото ветување за подарок од значителна вредност во износ од 50.000 евра, во текот на вчерашниот ден потпишал договор за користење на финансиски средства со правното лице и притоа примил дел од паричните средства во износ од 400 евра, кои при претрес се пронајдени и одземени“, соопшти Обвинителството.

Ценејќи дека се исполнети условите за определување на мерка притвор, јавниот обвинител му предложи на судијата на претходна постапка при Основниот кривичен суд да им определи притвор на сите осомничени.

УАПСЕН ДИРЕКТОРОТ НА АГЕНЦИЈАТА ЗА ПОДДРШКА НА ЗЕМЈОДЕЛСТВО ЗА ЗЕМАЊЕ МИТО Илија Стоилев е фатен на дело со помош на обележани банкноти

The post МУ БИЛЕ ВЕТЕНИ 50.000 ЕВРА, ЗА ПОЧЕТОК ЗЕЛ 400 ЕВРА Притвор и истрага против директорот на Агенцијата за поддршка на земјоделството и против 4 лица appeared first on plusinfo.mk.

Илија Стоилев, директор на Агенцијата за финансиска поддршка во земјоделството и руралниот развој, е уапсен денеска под сомнение за земање мито, во акција што ја водеше Обвинителството за гонење организиран криминал и корупција (ОЈО ГОКК) – дознава Плусинфо од извори блиски на истрагата.

Под раководство на јавен обвинител од ОЈО ГОКК истражители од Истражниот центар на ОЈО ГОКК и единиците на МВР денеска вршеа претреси на повеќе локации низ земјава поради основано сомневање за сторени кривични дела од коруптивна природа.

Во Агенцијата за финансика поддршка во земјоделството и руралниот развој попладнево беа влезени тимови на Управата за финансиска полиција, екипи на МВР како и истражители, дознава Плусинфо.

Неофицијално, се работи за акција по пријава за земено мито од страна на директорот Стоилев од апликант, за да му се додели договор за финансиска поддршка преку програмата ИПАРД.

Како што дознаваме, барањето за мито апликантот го пријавил во МВР, по што му биле дадени обележани банкноти, со чија помош директорот е фатен „ин флагранте“ при земањето на митото.

Апликантот, кој го пријавил случајот и учестувал во фаќањето на корумпираниот функционер, е поранешен министер во Владата на ВМРО-ДПМНЕ.

Илија Стоилев, роден 1967 година во Свети Николе, е именуван на функцијата директор на Агенција за финансиска поддршка во земјоделството и руралниот развој во јули 2024 година.

По образование е дипломиран земјоделски инжинер, отсек сточарство, а работел како наставник по стручни предмети од областа на земјоделство и ветеринарство во СОУ Кочо Рацин – Свети Николе.

Како политички активен, Илија Стоилев бил претседател на Совет на Општина Свети Николе во два мандата, директор на Народен музеј – Свети Николе, раководител во подрачна единица на Министерството за земјоделство, како и претседател на Комисија за воведување/предавање на владение на договори за закуп на земјоделско земјиште.

The post УАПСЕН ДИРЕКТОРОТ НА АГЕНЦИЈАТА ЗА ПОДДРШКА НА ЗЕМЈОДЕЛСТВО ЗА ЗЕМАЊЕ МИТО Илија Стоилев е фатен на дело со помош на обележани банкноти appeared first on plusinfo.mk.

Европската турнеја на британската музичка ѕвезда Роби Вилијамс се најде во центарот на корупциски скандал во Бугарија. Двајца службеници од сообраќајната контрола се суспендирани и обвинети, откако наводно барале мито од возачите кои пренесувале опрема за концертот на пејачот во Софија.

Според бугарските медиуми, пет камиони биле запрени на контролниот пункт „Црна мачка“ на 25 септември, каде што возачите биле испрашувани за нивните брзиномери. Инспекторите користеле гугл транслејт за да комуницираат со возачите и, како што се тврди, барале незаконски плаќања. Некои од возачите под притисок платиле од 200 до 300 евра, додека други одбиле.

По пријавата, бугарското обвинителство извршило претреси на домовите, канцелариите и автомобилите на вклучените службени лица, при што кај нив биле пронајдени 43.000 евра и над 5.000 лева, дел од нив скриени дури и во пакувања од цигари. Обвинителството во Софија поднело обвиненија за поткуп, а двајцата службеници биле задржани 72 часа пред официјалното поднесување на обвинението.

Министерството за транспорт потврдило дека инспекторите се суспендирани, а според дел од бугарските извори – и отпуштени од работа. Случајот ја отвори темата за корупција во институциите задолжени за контрола на транспортот.

Иако тимот на Роби Вилијамс засега не коментирал јавно, скандалот ја засени турнејата со распродадени концерти низ Европа.

Британскиот пејач настапил во бугарската престолнина Софија во неделата вечер како дел од неговата турнеја „Бритпоп“.

The post УАПСЕНИ ДВАЈЦА БУГАРСКИ ИНСПЕКТОРИ КОИ БАРАЛЕ МИТО ОД ТИМОТ НА РОБИ ВИЛИЈАМС Некои од возачите на ѕвездата платиле 300 евра поткуп appeared first on plusinfo.mk.

Обвинетите во случајот „Геријатрија“ пред Основниот кривичен суд Скопје денеска се изјаснија дека не се чувствуваат виновни за делата што им се ставаат на товар.

Мухсин Арифи, директор на ЈЗУ Специјализирана болница за геријатриска и палијативна медицина, се гони за примање поткуп, додека, Блерим Амити е обвинет за примање награда за противзаконито влијание.

Според обвинителниот акт, Арифи побарал имотна корист од 20.000 евра за да овозможи болнички прием на пациентка во тешка здравствена состојба. Амити, кој претходно го познавал сведокот, се понудил да посредува и ја примил паричната сума, при што бил фатен на самото место од полицијата.

Обвинителката Искра Хаџи Василева во воведните зборови пред судот нагласи дека случајот е пример за длабоко вкоренета корупција во општеството.

– Пропорциите и интензитетот на корупцијата се толку многу длабоки што нѐ потсетуваат дека ја засегаат секоја сфера од нашето живеење – рече таа, додавајќи дека станува збор за директно, грубо барање мито од страна на директорот – износ кој бил предмет на преговори, а на крајот бил прифатен како минимален за да се изврши службено дејствие што инаку морало да се изврши без надомест.

Хаџи Василева посочи дека обвинетите дејствувале од лукративни причини, со цел лично богатење, искористувајќи ја ранливоста на пациентката и нејзината потреба за итна медицинска грижа. Таа истакна дека сведокот, кој е давател на доживотна издршка на пациентката, го пријавил случајот, а доказите кои ќе бидат презентирани пред судот јасно ги документираат коруптивните дејствија низ неколку сукцесивни настани.

Одбраната на обвинетите најави дека во текот на кривичната постапка ќе презентира докази во вид на статут, процедури и законски одредби кои произлегуваат од институцијата што ја застапувал обвинетиот Мухсин Арифи. Преку нив, како што посочија, ќе бидат отворени неколку правни прашања со цел да се докаже дека Арифи, како и Амити, не можеле, односно немале намера да извршат какво било кривично дело.

– Доказите кои ќе бидат изнесени и презентирани во понатамошниот тек од постапката, убедени сме дека ќе упатат на недоразбирање што настанало во овој т.н. кривично правен настан – соопшти одбраната.

Судскиот процес го водат судиите Ленка Давиткова и Илија Трпков.

Судењето продолжува на 16 септември, во 13 часот.

ДИРЕКТОРОТ АРИФИ БАРАЛ 100.000 ЕВРА, А ЗЕЛ 20.000 ЕВРА ЗА ДА СМЕСТИ БОЛНО ЛИЦЕ НА ГЕРИЈАТРИЈА Барал пациентот да си го продаде станот, за да му се плати

The post ФАТЕНИ СО ПАРИТЕ В РАЦЕ, А ВЕЛАТ ДЕКА НЕ СЕ ВИНОВНИ Директорот на Геријатрија не чувствува вина за примање мито appeared first on plusinfo.mk.

Светкав базен, панорамски поглед кон Јадранот, архитектура која го одзема здивот – ова не е сцена од холивудски филм, туку реална вила лоцирана кај селото Куковаљ, недалеку од Макарска. Но, зад раскошот се крие приказна која добива сè поцрни нијанси – бидејќи газдата на ова архитектонско чудо завршил под истрага за мито и корупција!

Веста ја објавија хрватските медиуми, а како што се дознава, сопственикот на вилата е извесен Младен Пекота – градежен претприемач кој не е непознат на јавноста. Против него се води постапка во Сплит поради сомнение дека дал мито од 15.000 евра на службеник во Министерството за култура и медиуми, за да добие позитивно мислење во врска со еден проект во заштитено подрачје.

Според хрватските медиуми, Пекота признал дека му дал пари на државен службеник, но наводно бил изнудуван. Ова сепак не го ослободува од одговорност, па обвинителството сега води паралелна постапка и против него и против службеникот кој ја барал „помошта“.

Што ја прави вилата посебна?

 

View this post on Instagram

 

A post shared by Kuk Oaza boutique resort (@kuk.oaza)

Таа е исклесана директно во карпата, со голема застаклена фасада, базен што делува како да лебди над морето и ентериер што остава без зборови. Но, целата таа убавина сега има црна дамка. Локалците шепотеле долго време за тоа „кој ја гради онаа вила“, но вистината излезе на виделина дури сега – и не им се допаѓа.

 

View this post on Instagram

 

A post shared by Kuk Oaza boutique resort (@kuk.oaza)

Социјалните мрежи вријат од коментари – не за убавината на вилата, туку за фактот дека вакви градежни чуда често се случуваат во сиви зони на законот, особено кога се градат во близина на природно и културно заштитени подрачја. „Со тие пари можел да си купи уште една вила, ама алчноста не знае за граници“, напиша еден корисник на Фејсбук.

Хрватската јавност сега со право прашува – колку вакви „вили во карпа“ никнуваат без да ги фати „радарот на законот“ и дали навистина треба прво некој да заглави за корупција, за институциите да отворат очи?

The post 📷 ДА ИМАШ ВАКВА ВИЛА ВО МАКАРСКА, АМА ПАМЕТ ДА НЕМАШ Газдата заглавил за мито од 15.000 евра appeared first on plusinfo.mk.