Кандидатот за градоначалник на општина Центар, Мирослав Лабудовиќ, му ја честита победата на актуелниот градоначалник Горан Герасимовски, по завршувањето на изборниот процес во оваа општина.

– Му посакувам успех во вршењето на функцијата и искрено се надевам дека во наредниот период Центар ќе добие конкретни резултати за граѓаните – напиша Лабудовиќ на својот Фејсбук профил.

Тој им се заблагодари на сите кои му ја дале довербата и стоеле зад него во изборната трка.

– На сите кои ми ја дадоа довербата, од срце ви благодарам. Благодарност до сите членови, симпатизери и поддржувачи на Движењето ЗНАМ за Наша Македонија, кои со искрена енергија и верба во промените застанаа зад оваа визија. Голема благодарност и до нашите коалициски партнери од ВМРО-ДПМНЕ и ВЛЕН, за поддршката и соработката – напиша тој.

Во продолжение, Лабудовиќ се заблагодари и на неговиот изборен тим, нагласувајќи дека за него било чест да биде кандидат кој ја почувствувал поддршката од граѓаните.

– Ви благодарам што бевме заедно во оваа приказна. Честа беше моја да бидам ваш кандидат и да ја почувствувам силата на вистинската поддршка – порача Лабудовиќ.

The post „МУ ЧЕСТИТАМ НА ГЕРАСИМОВСКИ, НО ЦЕНТАР ЗАСЛУЖУВА РЕЗУЛТАТИ“ Лабудовиќ ги прифати резултатите и се заблагодари на поддржувачите appeared first on plusinfo.mk.

Актуелниот градоначалник на општина Центар, Горан Герасимовски од СДСМ, вечерва прогласи победа и преземање втор мандат, откако го победи противкандидатот Мирослав Лабудовиќ од Движењето ЗНАМ. Победата, како што истакна Герасимовски, е резултат на четиригодишна посветена работа и континуирана комуникација со граѓаните.

– Денеска победи прогресивното, слободното, модерното, чесното работење на фер демократски и слободни избори. Да те изберат двапати за мене е најголема чест, а воедно и огромна обврска. Победивме зошто работевме 4 години, а не само 30 дена. Комунициравме со граѓаните, обединувавме, имавме јасен пат и се водевме од принципи, а не од дневни политики – рече Герасимовски.

Според Државната изборна комисија (ДИК), со обработени 94,87% од гласовите (74 од 78 избирачки места), Герасимовски освои 52,72% или 10.429 гласа, додека Лабудовиќ доби 38,31% или 7.578 гласа.

Герасимовски потенцира дека неговата цел останува општината да биде сервис за граѓаните, да се продолжи со модернизација, дигитализација и создавање поволни услови за секојдневниот живот во Центар.

Оваа победа ја потврдува довербата на граѓаните во неговото раководство и го означува почетокот на нови четири години посветени на транспарентно и чесно работење во општината.

The post ГЕРАСИМОВСКИ ЈА ПОТВРДИ ДОВЕРБАТА Втор мандат за градоначалникот на Центар appeared first on plusinfo.mk.

Независната кандидатка за градоначалничка на Општина Центар од првиот изборен круг, Билјана Ивановска, јавно демантираше дека дава поддршка за вториот круг на изборите за било кој кандидат, откако дел од медиумите објавија монтирани фотографии од неа и кандидатот Мирослав Лабудовиќ. Со кратка, но јасна објава на Фејсбук, Ивановска појасни дека не стои зад ниту еден кандидат, ниту учествува во политички пазари: „Да бидам јасна, ниту со партии пазар правам, ниту повикувам гласачи. Секој нека си гласа по свое убедување и одговорност“, напиша таа.

Лабудовиќ во неколку настапи изјави дека со Ивановска имале „слични ставови и визија за Центар“ и дека очекува нејзините гласачи да застанат зад него во недела.

Слична ситуација имаше и на почетокот на кампањата. Тогаш Лабудовиќ тврдеше дека добил поддршка од Здружението на пензионери на Општина Центар – тврдење што веднаш го негираше претседателот на здружението, Злате Стефановски, со појаснување дека „ниту имало средба, ниту е дадена било каква поддршка“.

В недела, Центар повторно гласа. Во вториот круг ќе се соочат актуелниот градоначалник Горан Герасимовски и кандидатот на ЗНАМ Мирослав Лабудовиќ. Во првиот круг Герасимовски освои 8.535 гласови, а Лабудовиќ 5.707.

The post БИЛЈАНА ИВАНОВСКА ДЕМАНТИРА ДЕКА ГО ПОДДРЖУВА ЛАБУДОВИЌ „Ниту пазар со партии, ниту повикувам гласачи“ appeared first on plusinfo.mk.

Угледни лекари, познати спортисти и спортски тренери, угостители и други јавни личности искажаа јавна поддршка на кандидатурата на Мирослав Лабудовиќ за градоначалник на Центар, спроти гласањето во вториот круг што ќе се одржи в недела на 2 ноември. Неподелено сите, го оквалификуваа како вистински човек за позицијата – градоначалник на централната скопска општина.

– Центарци знаат. Потребни се системски решенија и јасна визија. Миро е човекот што ќе донесе промени – рече универзитетската професорка од Клиниката за психијатрија Славица Арсова – Хаџи Анѓелковска.

Нејзиниот колега, хирург ортопед, професорот Јасмин Циривири додаде: Како доктор знам дека секоја промена бара дисциплина и посветеност, а Мирослав ги има и двете.

Угостителот Мире Јанев, познат како Миро Плеј, го окарактеризира Лабудовиќ како човек со карактер и збор.

– Таквите луѓе денеска ретко се наоѓаат. Да ги поддржиме и да бидеме дел од убавите промени во Центар – рече тој.

Селекторот на најуспешната генерација на македонската кошаркарска репрезентација Марин Докузовски во свој стил вели:

– Во спортот е најважно да се игра фер. Затоа го поддржувам Миро – чесен, истраен и човек што игра за тимот, а не за себе.

Со него се согласува и друг познат поранешен спортист, кошаркарот Ѓорѓи Чековски, кој беше дел од таа репрезентација што во 2011 го освои четвртото место на Европското првенство, а што ја предводеше токму Докузовски.

– Во животот, како и во спортот победуваат тие што играат чесно и со срце. И, токму затоа е мојат поддршка за Лабудовиќ – вели тој.

Време е, велат сите, во Центар да дојде човек што работи за сите, а не само за одбрани кругови. Човек кој има чисти намери и јасни цели. И, токму затоа нивната поддршка не е само за личност, туку за подобра, поуредена, порганизирана и посреќна општина Центар.

Кон ваквите пораки со подршка се приклучуваат секојдневно и сѐ поголем број граѓани. Сакаат, како што велат, Центар да биде нивна гордост, да биде пример за општина во државата. А, за тоа треба да се преземе и одговорност, не само да се биде нем набљудувач. Одговорноста, додаваат ќе ја преземат со тоа што на 2 ноември ќе се излезат што помасовно и ќе го заокружат бројот 2 за Центар каков сите го заслужуваат.

The post 🎥 ПОЗНАТИ ЛИЦА ГО ПОДДРЖАА ЛАБУДОВИЌ Ги повикаа граѓаните да бидат дел од промените во Центар appeared first on plusinfo.mk.

Билјана Ивановска, кандидатка за градоначалник на општина Центар која испадна во првиот круг од изборите, заедно со Јана Белчева од Независни заедно, на социјалните мрежи изразуваат кампања против кандидатот на СДСМ, Горан Герасимовски.

Ивановска неодамна изјави дека нема да ги повикува граѓаните да гласаат за еден или за друг кандидат, бидејќи смета дека секој граѓанин е здраворазумен и има одговорност кому ќе го даде својот глас.

Кандидатот на ЗНАМ – За наша Македонија, Мирослав Лабудовиќ, во интервју изјави дека ја очекува поддршката од гласачите на Ивановска, зашто смета дека со неа имале иста визија за Центар.

– Со Билјана Ивановска практично имаме ист концепт и визија за Центар. Тоа го тврдам со целосна одговорност. Како показател ќе наведам дека на неколку предизборни дебати за најголемиот дел од прашањата и проблемите се надополнувавме со нашите ставови. Уште повеќе, по влегувањето во Општината, ќе бидат заедно советниците од сите партии и независни листи. Сите имаме заеднички делови од нашите програми, од што можеме да направиме еден сублимат, а тоа ќе бидат практично првите проекти што ќе се реализираат од новата општинска управа. Бидејќи, само сложна општина, надвор од партиските интереси и делби може да дојде до визијата која ја имам за Центар. А, таа не онаа што денес ја гледаме и тоа што ни се случува – рече Лабудовиќ.

Ивановска во првиот круг освои 4.465 гласа, а Лабудовиќ 5.707 гласа. Герасимовски во првиот круг освои 8.535 гласа.

Мирослав Лабудовиќ ја има поддршката од ВМРО-ДПМНЕ за кандидатурата во Центар.

The post ИВАНОВСКА И БЕЛЧЕВА ВО ОТВОРЕНА КАМПАЊА ПРОТИВ ГЕРАСИМОВСКИ Лабудовиќ ги очекува гласовите од Билјана Ивановска appeared first on plusinfo.mk.

Кандидатот за градоначалник на општина Центар од Движењето ЗНАМ поддржан од ВМРО-ДПМНЕ Мирослав Лабудовиќ и вицепремиерот и министер за транспорт и врски Александар Николоски денеска остварија средба со жителите на Маџир Маало, на кои им ветија дека ќе направат сѐ за набргу да им ги обезбедат сите неопходни услови за живот и развој во 21 век.

– Имаме заеднички став дека новиот детален урбанистички план за Маџир Маало ќе биде квалитетен, за модерен развој на овој дел од Скопје и, се разбира, исклучиво во интерес на граѓаните. Со нив ќе се консултираме како сакаат, каква потреба имаат тие за овој дел од нашата општина. Дополнително планираме изградба на нова градинка на овој потег, како и модернизација на улиците кои долго време не се санирани – рече Лабудовиќ, нагласувајќи дека соработката што ќе ја имаат и со Министерството за транспорт и врски и со Град Скопје ќе биде исклучиво во штитење на јавниот интерес.

Вицепремиерот и министер за транспорт и врски Александар Николоски посочи дека е жално во 21 век луѓето да живеат во субстандардни услови во срцето на Скопје.

– И овде на дело може да видите како изгледа урбанистичкиот хаос и создавање урбанизам во интерес само на поединци. Затоа што, поединци кои се блиски до актуелното раководство на општина Центар не може овде да си го најдат личниот финансиски интерес или да најдат бизнис и токму затоа луѓето живеат во состојба која не личи на 21 век – со уништени улици, без соодветен водовод и канализација и со нерешени имотни прашања. И, ова на најдобар начин покажува како се уништува општината и зошто се неопходни промени во Центар – потенцираше Николоски.

Вицепремиерот Николоски верува дека заедно со Лабудовиќ, кого го нарече иден градоначалник на Центар, ќе работат на изнаоѓање решенија за сите проблеми и предизвици со кои се соочуваат маџирмаалци, за, конечно тие да дојдат до пристојни услови за живот.

The post СО ЛАБУДОВИЌ ЌЕ СЕ НАЈДАТ РЕШЕНИЈА ЗА СИТЕ ПРОБЛЕМИ ВО МАЏИР МААЛО Во 21 век луѓе живеат во субстандардни услови во срцето на Скопје  appeared first on plusinfo.mk.

Поединци блиски до актуелното раководство на општина Центар го гледаат урбанизмот единствено низ призма на личен финансиски интерес, а поради тоа, граѓаните во Маџир Маало живеат во услови кои не доликуваат на 21 век, рече Александар Николоски, потпретседател на ВМРО-ДПМНЕ, кој денеска беше во Маџир Маало заедно со кандидатот за градоначалник на општината, Мирослав Лабудовиќ.

– Денеска ќе се видиме и ќе поразговараме со жителите на Маџир Маало, ова е срцето на главниот град, срцето на Скопје. За жал, луѓето живеат во супстандардни услови и овде можете на дело да видите како изгледа урбанистичкиот хаос и создавање на урбанизам само во интерес на поединци. Затоа што поединци кои што се блиски на актуелното раководство на општина Центар, не можат тука да си го најдат финансискиот интерес и не можат тука да најдат бизнис. Затоа луѓето овде живеат во една ситуација која што не приличи на 21 век – рече Николоски.

Toj укажа и на примерот со новите згради кои се градат во Маџир Маало, каде што тесните улици создаваат проблем и за новите жители, но и за оние кои веќе живеат тука.

– Низ оваа тесна уличка треба да поминуваат сите кои што ќе живеат во овие нови згради кои што се градат тука, а од другата страна зад мене не можат луѓето да си стигнат до куќите. Ова на најдобар начин покажува на кој начин се уништува општина Центар и зошто се потребни промени во општина Центар – истакна Николоски.

Тој потсети дека, откако е министер за транспорт и врски, гласно зборува за урбанистичките проблеми и во општина Центар и во општина Карпош.

– Јас многу гласно и за општина Центар и за општина Карпош зборувам откако сум избран за министер. Им предложив на двете општини и на двата актуелни градоначалника да донесеме специјални закони за општина Центар и за општина Карпош, кои што би дале развој, но би го заштитиле во исто време урбаното живеење. Двајцата не се согласија, и ги гледаме сега причините зошто – рече Николоски.

На крај, Николоски истакна дека заедно со кандидатиот за градоначалник на општина Центар, како иден градоначалник на општина Центар, ќе работат на решавање на проблемите на жителите од Маџир Маало.

– Ќе работиме да ги решиме овие проблеми и луѓето кои тука денеска разговараат со нас, од Маџир Маало конечно да добијат пристојни услови за живот – заклучи Николоски.

The post ВО ЦЕЛ ЦЕНТАР ТРЕБА ДА ИМА ПРИСТОЈНИ УСЛОВИ ЗА ЖИВОТ Николоски и Лабудовиќ порачаа дека ќе се реши урбанистичкиот хаос appeared first on plusinfo.mk.

Еднократна финансиска поддршка од 7.000 денари за сите пензионери во Центар во првата категорија како и 12.000 денари за сите нови корисници на пензија во општината. Кандидатот за градоначалник на Општина Центар, Мирослав Лабудовиќ, ја претстави една од најемотивните и најчовечките мерки во својата програма – финансиска и социјална поддршка за пензионерите како симбол на благодарност, почит и грижа кон генерацијата која со својот труд и знаење го изгради градот каков што го познаваме денес.

– Секој пензионер чија пензија е во првата категорија во државата ќе добие од Општина Центар финансиска поддршка од 7.000 денари, почнувајќи од наредната година. А, секој нов пензионер во Општина Центар ќе добие финансиска поддршка во износ од 12.000 денари. Тоа не е само помош – тоа е порака дека ги цениме луѓето кои целиот свој живот го посветиле на работа, семејство и заедница. Пензионерите се нашите чувари на традицијата, нашата гордост, нашата меморија и нашиот компас за иднината – изјави Лабудовиќ.

Во своето обраќање тој потенцираше дека грижата за повозрасните граѓани ќе биде системски пристап, а не еднократен потег. Планот предвидува воспоставување програма за активно и достоинствено стареење со најширок опфат, во рамки на која пензионерите ќе бидат вклучени во општинскиот живот, со најразлични активности и културни настани.

– Нашата визија е Центар да стане општина што го вреднува искуството и придонесот на секој човек. Затоа, освен финансиската поддршка, подготвивме низа конкретни мерки што ќе го олеснат секојдневието и ќе го збогатат животот на пензионерите – додаде Лабудовиќ.

Во рамки на програмата се предвидува формирање на Здравствен хаб – модерен простор каде секој пензионер ќе може да добие бесплатна здравствена нега, совет, мерење на притисок, шеќер, или разговор со стручно лице; организирани патувања, излети и дружења, со цел поттикнување на социјализацијата и заедништвото меѓу пензионерите; бесплатни обуки за компјутери, странски јазици и креативни вештини, за да останат активни, дигитално писмени и поврзани со своите најблиски; општинска картичка за попусти во аптеки, маркети и културни институции.

Лабудовиќ испраќа силна порака дека човечноста и солидарноста се темел на вистинското управување, дека пензионерите не се бројка – тие се генерацијата што го изгради општеството, а сега е време општеството да возврати со почит, грижа и конкретни дела.

The post ЗА СЕКОЈ НОВ ПЕНЗИОНЕР ВО ЦЕНТАР ПО 12.000 ДЕНАРИ Лабудовиќ вети по 7.000 денари за тие во првата категорија appeared first on plusinfo.mk.

Кандидатот за градоначалник на Општина Центар, Мирослав Лабудовиќ, најави современ проект за нов систем на енергетскo ефикасни згради, кој ќе придонесе за подобрување на условите за живеење, зачувување на животната средина и разубавување на урбаното јадро на Општината.

– Преку грантови од Општината ќе ги реконструираме фасадите на сите згради и ќе ги направиме енергетскo ефикасни. Секоја зграда е дел од идентитетот и имиџот на нашата општина. Затоа, старите фасади ќе добијат автентичен и достоинствен изглед, што не само што ќе го разубави Центар, туку ќе им донесе на граѓаните подобра енергетска заштеда и помали сметки за греење – изјави Лабудовиќ.

Овој систем претставува дел од пошироката стратегија за зелена и одржлива општина, која предвидува не само визуелно унапредување, туку и долгорочна економска корист за жителите. Преку поставување фотоволтаични панели на покривите и модернизација на хидрантските и водоводните системи, ќе се овозможи значителна заштеда на енергија и вода, што е во согласност со најсовремените европски стандарди за енергетска ефикасност.

– Центарци заслужуваат убав, сигурен и достоинствен живот. Со овие реконструкции, ќе го зачуваме духот на нашите згради, ќе го одржиме нивниот архитектонски карактер, а истовремено ќе му дадеме нова енергија на просторот каде живееме – нагласи Лабудовиќ.

Проектот ќе се реализира во повеќе фази, почнувајќи од најстарите и најоштетени фасади, со цел секоја зграда да добие нов и, во исто време, енергетски ефикасен надворешен изглед. Покрај тоа, ќе се воведат и стимулации за управителите на згради и станбените заедници кои активно ќе се вклучат во процесот, со што ќе се поттикне колективната одговорност и партнерството меѓу Општината и граѓаните.

– Нашата цел е Центар да остане автентичен, но обновен, зелен, модерен и енергетски ефикасен. Да создадеме градско јадро што не ја заборава својата историја, туку ја гради својата иднина на одржливи темели – заклучи Лабудовиќ.

The post ЛАБУДОВИЌ ВЕТИ ЕНЕРГЕТСКO ЕФИКАСНИ ФАСАДИ Центар ќе биде обновен и зелен appeared first on plusinfo.mk.

Кандидатот на ЗНАМ за градоначалник на Центар Мирослав Лабудовиќ ги повика жителите да му ја дадат довррбата на 2 ноември да ја води општината во следните 4 години.

– Време е за промена во Центар. Резултатите од гласањето во првиот круг недвосмислено покажаа опозициско расположение во општината. Близу две третини од тие што излегоа на изборните места гласаа против актуелниот градоначалник Горан Герасимовски. Затоа што сакаат промена на нештата, сакаат нешто ново, поинакво, а тоа значи нова визија, нова енергија, непресушна река на идеи и проекти за подобрување на секојдневниот живот на граѓаните. Но, и нивно активно учество во носењето на сите одлуки се што во надлежност на општината, а значат суштинска промена кон подобро за нив – порача Лабудовиќ.

Актуелниот градоначалник, според него, ако имаше што да понуди, ќе го правеше тоа во континуитет за сите претходни 4 години.

– А, не на еден месец пред изборите да поправа реквизити од детски игралишта, на 4 дена пред гласање да се слика со ракавици на рацете како чисти контејнери и други слично популистички активности – допадливи за око, но со кои не се решава ништо – рече Лабудовиќ.

Спротивно на тоа, Лабудовиќ нагласува дека припаѓа на нова генерација политичари кои кога ќе дадат збор – истиот и го исполнуваат. Верува дека искуството од работење во реномирани меѓународни компании ќе биде пресудно во имплементација на вистински системски и одржливи решенија, со кои ќе се надминуваат сите проблеми во Центар. не кампањски, туку долгорочно.

Тој упати повик до поддржувачите на кандидатките кои испаднаа во првиот круг, Билјана Ивановска и Марија Среброва, но и до сите граѓани кои уште се мислат дали да гласаат во вториот круг.

– Ги повикувам граѓаните да излезат што помасовно и да гласаат. Да го заокружат бројот 2. Само така ќе ја донесеме вистинската промена во Центар. Промена која ќе значи Центар да биде целосна спротивност од сегашната слика. Почиста, еколошки ефикасна, побезбедна, урбано и плански средена општина. Општина со светли улици, слободни тротоари, со нови катни гаражи и повеќе паркинг места. Општина која ќе биде шампион во транспарентност, нон-стоп достапна и отворена за граѓаните. Општина во која ќе „царуваат“ културата и спортот, во која од училиштата ќе направиме образовни оази, а на младите ќе им понудиме перспективност – повика Лабудовиќ.

The post СО МАСОВНА ИЗЛЕЗНОСТ ДО ПРОМЕНИ ВО ЦЕНТАР Лабудовиќ ги повика жителите да гласаат за неговата визија за средена општина appeared first on plusinfo.mk.