Сигурно сте забележале дека во едно друштво едни луѓе постојано кукаат дека ги искасале комарци и се враќаат дома прекриени со убоди, додека другите се чудат и велат дека воопшто немало комарци.

За оваа селективност на комарците со години кружат различни објаснувања – од „слатка крв“ и крвна група до храната што ја јадеме. Но, научниците сега имаат многу посложено објаснување: комарците нè избираат според мирисот на нашата кожа, а во тоа важна улога имаат и бактериите што живеат на неа.

Ново истражување, објавено во научното списание „iScience“, испитувало речиси 120 доброволци во Мајами. На секој од нив раката му била ставена во посебна комора за мирис, наречена унипорт олфактометар, додека научниците анализирале какви мирисни сигнали испушта кожата. Потоа ги споредувале реакциите на три различни видови комарци: Aedes aegypti, познат и како комарец на жолта треска, азискиот тигрест комарец Aedes albopictus и Culex quinquefasciatus, познат како јужен куќен комарец.

Резултатите покажале нешто особено интересно – не постои еден универзален „комарец-магнет“. Различните видови комарци различно реагираат на мирисот на луѓето. Aedes aegypti покажал мала наклонетост кон мажите, додека кај другите два вида не била забележана разлика според полот. Азискиот тигрест комарец, пак, бил привлечен од специфични мирисни соединенија, меѓу кои и кетони.

Клучна улога имаат и бактериите на кожата. Тие ги разградуваат потта и природните масла на кожата и при тој процес создаваат различни мириси кои комарците можат да ги регистрираат. Кај испитаниците научниците идентификувале дури 246 различни видови микроорганизми на кожата, а комбинацијата на бактерии и хемиски соединенија се разликувала од човек до човек. Токму тоа може да објасни зошто еден човек е вистински „магнет за комарци“, додека неговиот пријател кој седи до него речиси и не е допрен.

Ова се надоврзува на претходни истражувања кои покажале дека луѓето не се подеднакво привлечни за комарците. Една студија објавена во „Cell“ во 2022 година открила дека луѓето кои комарците особено ги претпочитаат произведуваат поголеми количества одредени карбоксилни киселини преку кожата. Разликите во привлечноста биле изненадувачки стабилни со месеци, а кај некои испитаници комарците покажувале огромно поголема заинтересираност во споредба со луѓето кои биле најмалку привлечни за инсектите.

Научниците сметаат дека овие сознанија би можеле еден ден да помогнат во создавањето нова генерација репеленти. Наместо само да се обидуваат да ги маскираат мирисите што ги привлекуваат комарците, идните препарати би можеле да користат одредени микроорганизми или соединенија што создаваат непријатни мириси за инсектите или ги намалуваат сигналите по кои тие го пронаоѓаат човекот.

Сепак, комарците не го наоѓаат човекот само преку мирисот на кожата. При барањето домаќин важни се и јаглеродниот диоксид што го издишуваме, телесната температура и други хемиски сигнали. Затоа, тоа што комарците некого го „сакаат“ повеќе од друг не е едноставно прашање на крвна група или на тоа што јадел тој ден. Се работи за сложена комбинација од мириси и сигнали што комарецот ги користи за да го пронајде својот домаќин.

The post ЗОШТО НЕКОИ ЛУЃЕ СЕ МАГНЕТ ЗА КОМАРЦИ Научниците открија зошто овие мали напасти некого касаат, а некого не appeared first on plusinfo.mk.