Град Скопје и инспекциските служби на Министерството за животна средина започнаа итна истрага откако била пријавена непозната материја која од реката Лепенец се влевала во Вардар. На терен веднаш биле испратени инспектори, а во акцијата е вклучен и дрон за да се открие изворот на загадувањето.

Фотографиите од местото на настанот покажуваат дека површината на реката е покриена со голема количина бела пенлива материја, која се движи по течението. Засега не е познато за каква супстанција станува збор, а тоа треба да го утврдат лабораториските анализи на примероците што ги земаа надлежните служби.

Градоначалникот на Скопје, Орце Ѓорѓиевски, информираше дека пријавата до Градот пристигнала пред околу час и половина, по што веднаш биле активирани сите надлежни служби.

– Нашите инспекциски служби веднаш излегоа на терен, а дополнително ги контактиравме и инспекциските служби на Министерството за животна средина, кои исто така веднаш излегоа на терен – вели Ѓорѓиевски.

Тој посочи дека инспекциските служби на Град Скопје ангажирале и дрон за детектирање на можниот загадувач, додека екипи на ЈП „Водовод и канализација“ земале примероци од водата за лабораториска анализа со цел да се утврди за каква материја станува збор.

– Во комуникација сме со Министерството за животна средина и министерот и верувам дека за брзо време ќе биде откриен причинителот на оваа појава и соодветно санкциониран. Толеранција нема да има за никого! – порача градоначалникот.

Тој најави дека јавноста ќе биде дополнително информирана веднаш штом надлежното Министерство ги утврди околностите и причините за загадувањето.

The post 📷 БЕЛА ПЕНА ГО ПОКРИ ЛЕПЕНЕЦ Непозната материја се влева во Вардар, инспекциите на терен appeared first on plusinfo.mk.

Во тек е најсеопфатниот мониторинг на квалитетот и количеството на водите во сливот на реката Вардар, кој опфаќа повеќе од 80 отсто од водните тела во државата. Стручни тимови од Управата за хидрометеоролошки работи вршат теренски мерења, земаат примероци од површински и подземни води и спроведуваат лабораториски анализи на вкупно 170 локации.

Мониторингот се реализира според нова национална програма за следење на водите, која ги утврдува мерните места, параметрите и методологијата за анализа на квалитетот и количеството на водните ресурси.

Програмата е изработена од Швајцарската програма за управување, користење и заштита на води, во соработка со УХМР и меѓународни експерти. Таа е дел од поширока Стратегија за мониторинг на води, чија цел е зајакнување на институционалните и техничките капацитети на УХМР за долгорочно следење и управување со водните ресурси.

Станува збор за важен чекор кон воспоставување модерен систем за управување со водите, заснован на научни податоци и усогласен со Законот за води и Рамковната директива за води на Европската Унија.

– Квалитетниот и сеопфатен мониторинг на водите во државата е главен предуслов за ефикасно и одржливо управување со водните ресурси, чија вредност е непроценлива за луѓето, земјоделството, економијата и целокупниот екосистем. Нашите тимови во овој период работат на терен, каде што земаат примероци од вода од различни локации низ државата. Резултатите ќе покажат каква е состојбата на водите, кои се главните предизвици и кои мерки се потребни за нивна заштита – изјави директорот на УХМР, Игор Лазаровски.

Надзорниот мониторинг треба целосно да заврши до крајот на годината. Ќе бидат опфатени 80 локации од кои ќе се земаат примероци од површински води, како и 90 мониторинг станици за подземни води во сливот на Вардар.

За поефикасно спроведување на активностите, Програмата за води ѝ донираше на УХМР 14 пиезометри – мерни инструменти наменети за следење на состојбата на подземните води.

Дополнително, капацитетите на УХМР се зајакнати со модерна лабораториска опрема и две возила, во вкупна вредност од околу 250.000 швајцарски франци.

– Една од главните цели на Програмата за води е унапредување на капацитетите на клучните институции кои се грижат за заштитата на водните ресурси, но и придонес кон одржливо управување со водите во согласност со стандардите на Европската Унија – изјави Јан Квиатковски, тим лидер на Програмата за води.

Собраните податоци ќе овозможат детална анализа на состојбата на водните ресурси, идентификување на проблематичните подрачја, како што се загадувањето и недостигот на вода, како и подготовка на конкретни мерки за нивна заштита.

Резултатите од мониторингот ќе бидат основа и за изработка на првиот План за управување со сливот на реката Вардар, стратешки документ што ќе ги дефинира идните политики и мерки за управување со водите во согласност со барањата на Рамковната директива за води на Европската Унија.

Спроведувањето на мониторингот е овозможено со национално кофинансирање од околу 440.000 швајцарски франци, обезбедено од Владата преку Министерството за животна средина и просторно планирање и Министерството за земјоделство, шумарство и водостопанство. Дополнителните средства се обезбедени од Швајцарија преку Програмата за управување, користење и заштита на води.

The post ГОЛЕМА ПРОВЕРКА НА ВОДИТЕ ВО МАКЕДОНИЈА Експертите мерат квалитет на 170 места низ државата appeared first on plusinfo.mk.

Премиерот Христијан Мицкоски денеска ја посети Општина Сарај, каде што изврши увид во почетокот на активностите за уредување на коритото на Сува Река – проект вреден повеќе од шест милиони евра, чија цел е трајно да се реши проблемот со поплавите во овој дел од Скопје.

Проектот, кој се реализира со средства обезбедени преку Министерството за животна средина и просторно планирање, опфаќа уредување на речното корито во должина од 12 километри, од селото Бојане до Глумово, каде што Сува Река се влева во Треска. Реализацијата ќе се одвива по фази и треба да заврши во 2029 година.

При посетата, Мицкоски порача дека Владата останува фокусирана на исполнување на преземените обврски и реализација на капиталните проекти.

– Оваа Влада останува посветена на реализирањето на проектите и на ветувањата што ги презедовме како обврска. Не е лесно, предизвици има многу, но нема да се откажеме, бидејќи проблемите што се таложеле со децении не можат да се решат преку ноќ. Сепак, бараме начин и можност приоритетите на граѓаните да бидат завршени – изјави Мицкоски.

Тој им се заблагодари на жителите на Сарај за трпението и разбирањето додека проектите започнуваат да се реализираат.

– Им благодарам на граѓаните на Општина Сарај што беа толерантни и трпеливи овие проекти полека, но сигурно да почнат да се реализираат. Благодарност и до сите колеги од Владата кои покажуваат како се работи во интерес на граѓаните и на Македонија – рече премиерот.

Градоначалникот на Сарај, Илијас Весели, оцени дека станува збор за една од најголемите инвестиции што некогаш ги добила општината.

– Денес не го одбележуваме само почетокот на еден инфраструктурен проект. Ги поставуваме темелите на една од најзначајните историски инвестиции што досега ги имала Општина Сарај. Со години жителите на населените места покрај Сува Река живееја во страв од поплави, а денес тоа поглавје почнува да се затвора – изјави Весели.

Тој посочи дека градежните работи официјално започнале на 7 јули и дека проектот ќе се реализира во периодот од 2026 до 2029 година.

– Станува збор за инвестиција што директно ќе го подобри животот на илјадници граѓани. Министерството за животна средина обезбеди повеќе од шест милиони евра, што ја покажува сериозноста на овој проект. Ова не е само инфраструктурен зафат, туку инвестиција во безбедноста, мирот и достоинството на секое семејство кое живее покрај ова речно корито – нагласи Весели.

Според најавите, со уредувањето на Сува Река трајно треба да се намали ризикот од поплави, да се подобри заштитата на земјоделските површини и да се создадат подобри услови за живот на жителите во општината.

The post ПОЧНА ПРОЕКТ ОД НАД 6 МИЛИОНИ ЕВРА Мицкоски најави крај на долгогодишниот проблем во Сарај appeared first on plusinfo.mk.

Компанијата ТИТАН Усје соопшти дека останува посветена на примена на највисоките еколошки стандарди и целосно почитување на законската регулатива, откако во март годинава до Министерството за животна средина и просторно планирање поднесе апликација за продолжување на А-интегрираната еколошка дозвола.

Од компанијата посочуваат дека постапката е спроведена согласно важечките законски и подзаконски акти и дека целокупната документација е јавно достапна за увид на сите заинтересирани страни.

„Како прва компанија во Скопје што доби А-интегрирана еколошка дозвола и една од првите во државата, ТИТАН Усје уште тогаш ја потврди својата определба за примена на највисоки стандарди во индустријата. Компанијата е во постојан инвестициски циклус за модернизација и унапредување на процесите“, наведуваат од ТИТАН Усје.

Оттаму истакнуваат дека строго ги почитуваат сите обврски што произлегуваат од важечката регулатива и дека внимателно ги следат сите законски измени, како во домашното така и во меѓународното законодавство.

„ТИТАН Усје строго ги почитува сите обврски што произлегуваат од важечката регулатива и останува целосно посветена на усогласување со сите идни законски решенија што ќе стапат во сила. Компанијата со големо внимание ги следи сите законски промени и континуирано инвестира во нова технологија за да може да се усогласи со регулаторните барања“, соопштија од компанијата.

Во соопштението се наведува дека во изминатите 15 години се инвестирани 29 милиони евра во модернизација на производството и мерки за заштита на животната средина.

Од ТИТАН Усје нагласуваат дека јавноста има право да биде информирана за сите прашања поврзани со животната средина и дека компанијата останува отворена за дијалог заснован на факти и стручни аргументи.

„Транспарентноста, почитувањето на законите, процедурите и конструктивната комуникација се најдобриот начин за градење доверба и заеднички придонес кон подобра животна средина“, велат од компанијата.

Според ТИТАН Усје, во изминатите години биле реализирани значителни инвестиции во современи технологии и опрема за заштита на животната средина, вклучително и најсовремени системи за филтрација и независен систем за континуирано следење на емисиите.

„Резултатите од редовните и контролните мерења потврдуваат дека сите параметри се во рамки на законски пропишаните вредности, при што дел од нив континуирано се повеќекратно пониски од максимално дозволените лимити“, наведуваат од компанијата.

Оттаму додаваат дека преку континуирани инвестиции во технологија и управување со процесите се применуваат најдобрите достапни техники и стандарди во индустријата, со цел дополнително намалување на влијанието врз животната средина.

Компанијата истакнува дека се придржува и до меѓународно признатите „ESG“ стандарди, со што, како што велат, ја потврдува долгорочната посветеност кон заштитата на животната средина, вклучувањето на заедницата и современото корпоративно управување.

The post ТИТАН УСЈЕ ПОБАРА ПРОДОЛЖУВАЊЕ НА ЕКОЛОШКАТА ДОЗВОЛА Инвестирани 29 милиони евра во заштита на животната средина appeared first on plusinfo.mk.

Борбата против загадувањето на воздухот ќе се води преку сеопфатен пристап кој ќе опфаќа контрола на загадувањето од индустријата, институциите и од домаќинствата, како и преку меѓуинституционална соработка во врска со сообраќајот и со нулта толеранција кон загадувачите, најави министерот за животна средина и просторно планирање, Муамет Хоџа.

Тој информираше дека Министерството има краткорочен план за акција и долгорочна програма усвоена од Владата, како и новиот Закон за контрола на емисиите, усвоен во септември 2025 година, кој стапува во сила во септември 2027 година.

– Законот предвидува значително построги правила за издавање и надзор на еколошките дозволи од категорија А и Б, задолжување на индустријата за користење на најдобрата достапна технологија, како и финансиска одговорност во случај на прекршување. Законот е целосно усогласен со директивите на Европската Унија и е усвоен преку сеопфатен процес со јавна дебата, со учество на граѓанското општество, Стопанската комора, факултети и други релевантни страни – рече Хоџа на денешниот брифинг.

Тој најави дека од следната недела ќе почнат средби со претставници на индустриите кои поседуваат еколошки дозволи од категорија А, со цел периодот на адаптација да се искористи на најефективен начин. Сите нови еколошки дозволи ќе се издаваат според новите построги стандарди, со построги услови и пониски прагови на емисии, особено за индустриските капацитети сместени во урбаните зони.

Во рамките на новите мерки е предвидено зајакнување на лабораториските капацитети на Министерството преку акредитација на нови методи за независни контроли кон индустријата, поставување јавни екрани кои ќе ги прикажуваат просечните емисии што ги испушта објектот, како и примена на принципот „Загадувачот плаќа“, според кој индустријата ќе ги покрива трошоците за отстранување на ризикот, санација и за праведна компензација за причинетата штета на животната средина.

Министерот Хоџа потенцира дека со овие мерки се менува системски пристапот на Министерството кон контролата на индустриските капацитети поврзани со загадувањето на воздухот, со воведување силни механизми за контрола и одговорност.

The post НА ЕКРАНИ ПРЕД ФАБРИКИТЕ ЌЕ СЕ ОБЈАВУВААТ ЕМИСИИТЕ ВО ВОЗДУХОТ Хоџа најави построга борба против аерозагадувањето appeared first on plusinfo.mk.

Концентрациите на ПМ10 честичките во Скопје и во Струмица се под прагот од 150 милиграми на кубен метар со што престануваат да важат мерките и препораките, информира Министерството за животна средина и просторно планирање.

„Согласно податоците од Државниот автоматски мониторинг систем на ден 22.12.2025, среднодневните концентрации на РМ10 се под дефинираниот праг на алармирање од 150 mg/m3 и епизодата со надминување на прагот на алармирање за РМ10 честички е прекината во Скопје и Струмица“, соопшти министерството.

Со тоа мерките и препораките за надминат праг на алармирање се прекинуваат.

The post КОНЦЕНТРАЦИИТЕ НА ПМ10 ВО СКОПЈЕ И ВО СТРУМИЦА ПОД АЛАРМАНТНИОТ ПРАГ Се укинуваат мерките и препораките appeared first on plusinfo.mk.

Министерството за животна средина и просторно планирање соопшти дека во изминатите два дена, на мерните станици во Скопје – Центар, Гази Баба, Карпош, Лисиче и кај Ректоратот, се регистрирани концентрации на ПМ10 честички над дозволените 150 микрограми на кубен метар, што е законскиот праг за алармирање.

Според податоците, највисоки вредности се измерени во Лисиче, каде концентрациите достигнале дури 266 микрограми на кубен метар, додека во Центар, Карпош и Гази Баба вредностите континуирано се движеле далеку над дозволеното ниво.

Поради ваквата состојба, автоматски стапуваат на сила низа мерки за заштита на здравјето на граѓаните и намалување на загадувањето. Ќе се засилат вонредните инспекциски контроли кај индустриските капацитети со еколошки дозволи, како и контролите на терен кај помалите инсталации и градилиштата.

Дополнително, ќе се вршат интензивни контроли на возилата, со посебен фокус на дизел автомобилите и нерегистрираните возила, а строго е забрането и секое горење на отворено.

Министерството препорачува работодавците да ги ослободат од работни обврски бремените жени, лицата над 60 години и граѓаните со хронични заболувања, како и да го прилагодат работното време за оние што работат на отворено – од 11 до 17 часот. Воедно, се апелира да не се организираат спортски и културни настани на отворено додека трае алармантната состојба со воздухот.

Властите апелираат граѓаните да го ограничат движењето на отворено, особено во утринските и вечерните часови, кога загадувањето е најизразено.

The post ОПАСЕН ВОЗДУХ ВО ГЛАВНИОТ ГРАД Надминат прагот за алармирање, државата воведе итни ограничувања appeared first on plusinfo.mk.

На јавниот повик распишан од Јавното претпријатие за водостопанство „Лисиче“ за механичко отстранување на наслаги и органска материја од Велешкото Езеро нема пријавени фирми. Повикот, кој заврши на 13 октомври, бараше фирма која ќе ја отстрани органската маса од изумрени алги и трски која плива по површината, ќе ги отстрани исушените дрвја и ќе ја исече трската по крајбрежјето, за што има дозвола од Министерството за животна средина.

Состојбата на Велешкото Езеро е алармантна. Според извештај на Хидробилошки завод Охрид, водата во акумулацијата е со „лош квалитет“ и квалификувана како четврта и петта класа — присуство на колиформни бактерии и фекално загадување укажуваат дека системот е во сериозна состојба. Покрај тоа, езерото е контаминирано со амонијак и други токсични материи, што дополнително ја влошува еколошката ситуација. Минатата година, невладини организации и некои советници организираа акција за чистење на езерото и успеаја да отстранат над 120 кубни метри отпад.

За да се подобри состојбата на езерото, потребно е да се спроведат системски мерки, вклучувајќи редовно механичко чистење на наслагите, контрола на изворите на загадување и воспоставување на ефективни системи за третман на отпадни води. Вклучувањето на локалната заедница, невладините организации и стручните институции е клучно за успешно справување со овој еколошки предизвик.

The post НЕМА КОЈ ДА ЗАСУКА РАКАВИ ЗА ВЕЛЕШКОТО ЕЗЕРО Волонтерите се изморија, фирми не се пријавуваат appeared first on plusinfo.mk.

Првиот вицепремиер и министер за животна средина и просторно планирање, Изет Меџити, попладнево на прес-конференција соопшти дека Владата еднострано го раскинала договорот за концесија за експлоатација на варовникот на локалитетот Лавинчеви, во атарот на селото Страчинци, Општина Гази Баба, склучен со компанијата „Мелкам Инжинеринг“ од Скопје.

Одлуката, како што објасни Меџити, е донесена поради сериозни пропусти на концесионерот во исполнувањето на договорените обврски.

– Концесионерот не обезбедил минимална експлоатација од 20 отсто, односно 25.000 тони годишно. Во 2022 година биле ископани само 277 тони, во 2023 година нема активност, а во 2024 година само 187 тони. Активностите биле често прекинувани и не се почитувани законските обврски. Исто така, концесионерот не платил концесиски надоместок за ископаните количества во последните три години – рече Меџити.

Вонредниот инспекциски надзор на Државниот инспекторат за енергетика, рударство и минерални суровини потврдил дека концесионерот не го исполнил договорот и дека имало долгогодишен прекин на активностите.

– Со оваа одлука престанува да важи доделувањето на концесијата, а сите надлежни институции се известени за понатамошни мерки. Ова е јасна порака дека Владата и Министерството за животна средина нема да толерираат несовесно користење на природните ресурси. Ќе продолжиме да обезбедуваме одговорно и одржливо управување со нив, во интерес на граѓаните и јавниот интерес. Здравјето и безбедноста на граѓаните се и ќе бидат на прво место – додаде Меџити.

The post ВАРОВНИКОТ ВО СТРАЧИНЦИ ПОД НАДЗОР Концесијата раскината поради долгогодишни пропусти appeared first on plusinfo.mk.

Просечната концентрација на суспендирани цврсти честички (PM10) во Трубарево, измерена во периодот од 21 септември во 08:30 часот до 22 септември во 08:30 часот, изнесувала 14.2 µg/m³, соопшти Министерството за животна средина.

Највисоката вредност регистрирана во истиот период е 44.1 µg/m³, додека тековното ниво на мерење изнесува 11.9 µg/m³.

Од Министерството нагласуваат дека овие резултати се во рамки на дозволените и не ја надминуваат 24-часовната гранична вредност пропишана за заштита на здравјето на граѓаните, согласно Уредбата за квалитет на амбиентниот воздух.

„Податоците од мерењата потврдуваат дека состојбата со квалитетот на воздухот во Трубарево во наведениот период е стабилна и не претставува ризик по здравјето на населението“, велат од Министерството.

The post ВОЗДУХОТ ВО ТРУБАРЕВО НЕ Е ОПАСЕН Новите мерења не го загрозуваат здравјето на граѓаните appeared first on plusinfo.mk.