Министерството за финансии соопшти дека извршило трансфер на 131 милион денари од централниот Буџет кон Развојната банка, средства наменети за реализација на проекти во домашните компании.

Со трансферот, извршен на крајот на минатиот месец, вкупната сума којашто е пласирана во домашната економија за реализација на инвестиции од страна на компаниите изнесува 14,1 милијарда денари или 230 милиони евра, информира Министерството за финансии.

„Ова претставува 92% реализација на кредитната линија што ја обезбеди Владата од Унгарската експорт-импорт банка со цел поддршка на домашната економија. Поддршката се состои од пласман на средства по поволни услови за компаниите во насока на реализација на приватните инвестиции, со што тие ќе обезбедат сопствен развој и поттикнување на економскиот раст. Средствата се пласираат до крајните корисници преку деловните банки, каматната стапка е 1,95% годишно, рокот на отплата е до 15 години и грејс период до 3 години“ – се вели во соопштението на Министерството за финансии.

Министерството информира дека вкупниот буџет за поддршка на домашните компании предвидени во Буџетот изнесува 250 милиони евра, а вредноста на инвестицискиот циклус се проценува на околу 300 милиони евра.

The post ВО СТОПАНСТВОТО ПЛАСИРАНИ 92% ОД УНГАРСКИОТ КРЕДИТ ОД 250 МИЛИОНИ ЕВРА Каматната стапка е 1,95% годишно, рокот на отплата 15 години, со 3 години грејс период appeared first on plusinfo.mk.