Министерот за внатрешни работи Панче Тошковски денеска изјави дека во последните недели е забележан значителен пораст на пријави за семејно насилство, а институциите интензивно работат на системски промени и подобрување на реакцијата кон жртвите.

Тој посочи дека бројките се значајно повисоки од вообичаеното и дека јавноста треба да биде свесна дека дел од растот се должи на зголемена доверба во институциите и охрабреност на жртвите.

– Ако претходно сме имале еден до два случаи неделно, сега имаме по неколку случаи дневно. Само викендов имавме повеќе од 10 пријави за семејно насилство. Тоа говори дека жртвите се охрабрени да го пријават насилството. Тоа говори дека на еден начин имаме побудни институции не само во делот на БЈБ и секторите за внатрешни работи при МВР туку и во рамки на останатите институции – рече Тошковски по настанот со кој беше означен почетокот на кампањата на ОБСЕ за подигнување на јавната свест за ризиците од злоупотреба на мало и лесно оружје.

Министерот додаде дека ваквите бројки бараат итно дејствување од сите надлежни институции, особено во делот на зајакнување на системите за заштита и одговорност на оние кои не постапиле соодветно.

Тошковски најави дека се подготвуваат и итни измени во законската рамка која се однесува на семејното насилство, а процесот ќе се одвива во две фази – брзи законски интервенции и потоа целосна ревизија.

– Тоа е еден процес за кој ќе треба малку повеќе време. Ќе треба експертите од областа суштински да навлеземе не само во законската легислатива, туку и во имплементирањето на веќе добрите законски решенија, бидејќи имаме и добри законски решенија коишто лошо се имплементираат. Секако дека на сето ова ќе треба да следи и одредено зајакнување на финансирањето од страна на државата на дел од процесите. Дополнително зајакнување на финансиски капацитети на одредени институции за да може соодветно да се одговори – рече министерот.

The post РАСТАТ ПРИЈАВИТЕ ЗА СЕМЕЈНО НАСИЛСТВО ЗАШТО ЖРТВИТЕ СЕ ОХРАБРЕНИ Министерот Тошковски вели дека ќе се засилат законските можности за реакција appeared first on plusinfo.mk.

Министерот за внатрешни работи Панче Тошковски информираше дека пријавата за трагедијата во Карпош, каде жена и малолетно дете го загубија животот по пад од балкон, била примена од случаен минувач. Според него, на улицата „Теодосиј Гологанов“ веднаш излегле полициски службеници од Полициската станица Карпош и екипа на Итната медицинска помош, при што била констатирана смрт.

Извршен бил увид од страна на СВР Скопје, а телата се предадени на обдукција. Од местото на настанот биле подигнати материјални траги и мобилен телефон.

Министерот посочи дека настанот имал претходница истиот ден. На 2 март во 12:05 часот била примена пријава за расправија меѓу сопружниците, а полициски службеници пристигнале на адресата во 12:19 часот. Бил извршен разговор со сопругата, која изјавила дека немало физички контакт со сопругот, дека станувало збор за недоразбирање и дека не бара поведување постапка ниту интервенција. Таа навела дека брачните односи ги решава преку бракоразводна постапка и потпишала службена белешка.

По оваа интервенција, жената се упатила кон станот на улицата „Теодосиј Гологанов“, каде подоцна се случил трагичниот исход. Тошковски нагласи дека сите околности детално се документираат.

По усна наредба, уапсен е сопругот, Стојанче Јовановски, поради сомневање за сторено кривично дело. Според податоците што ги изнесе министерот, во изминатите две години против него имало десет кривични пријави поврзани со имотни деликти, насилен криминал и недозволена трговија со дрога. Кај него, тогаш биле пронајдени 20 паковки наркотична супстанција, по што бил уапсен и против него била поднесена кривична пријава. По барање на јавен обвинител му биле изречени мерки на претпазливост, односно обврска за јавување во суд.

Во 2025 и 2026 година биле евидентирани повеќе пријави за нарушени односи меѓу сопружниците. Полицијата постапувала и преземала мерки, но, како што посочи Тошковски, во сите наврати оштетената се повлекувала од поднесените пријави.

The post 🎥 БИЛО ПРИЈАВЕНО НАСИЛСТВО, ПОЛИЦИЈА ДОШЛА, НО ЖЕНАТА НЕГИРАЛА Министерот Тошковски изнесе детали за трагедијата во Карпош appeared first on plusinfo.mk.

Проблемот со македонските превозници поврзан со воведувањето на новиот ЕЕС систем е високо на агендата во Брисел и се очекува решение во најскоро време, рече заменик претседателот на Владата и министер за транспорт Александар Николоски во интервју за „Топ Тема” на ТВ Телма.

Тој нагласи дека Владата води интензивна дипломатска активност и директно лобирање во европските институции, со цел да се заштитат домашните транспортни компании.

Вицепремиерот посочи дека е започнат официјален дијалог со Европска Комисија, во рамки на новата визна стратегија претставена од претседателката на Европската Комисија, при што македонските превозници за првпат се третираат како професионална категорија.

– Контурите се јасни, а тоа е дека со новата визна стратегија, превозниците се признати за прв пат како професионалци, што досега не беа во таа категорија. Сега има неколку опции што се разгледуваат како можни решенија, а тоа е секоја земја членка на Шенген зоната да издава посебни визи, при што деновите би се броеле само во таа земја, понатаму целосно изземање на возачите по примерот на пилотите и машиновозачите и третата опција со третман како прекугранични работници. Помеѓу овие три модалитети сега се изнаоѓаат решенија. Имаше три состаноци до сега, еден беше на политичко ниво, два беа на техничко ниво и очекувам дека ќе се најде решението. Тоа што е знак на добра волја за Македонија, е дека примената на ЕЕС системот ќе се одложи до крајот на септември месец – рече вицепремиерот Николоски.

На прашањето дали до септември ќе се реши проблемот, вицепремиерот смета дека има доволно време.

– Јас мислам дека за Македонија ќе се реши и тука би сакал да замолам да бидеме многу внимателни за она што доаѓа како информација од соседството. Ова е прашање кое не треба да се политизира, ова е прашање кое се однесува на бизнисот, а не на политиката и треба да ја држиме политиката надвор од ова – изјави вицепремиерот.

Тој посочи дека уште минатата година прашањето било разгледувано на седници на Влада, а Министерството за надворешни работи било овластено да комуницира со европските партнери.

– Верувајте додека не се случи блокадата не беа свесни во ЕУ за кои размери зборуваме – изјави Николоски, потсетувајќи на неговата интензивна меѓународна агенда во однос на ова прашање и потенцирајќи дела Владата останува посветена на изнаоѓање одржливо решение што ќе овозможи непречено функционирање на македонските превозници.

The post ПОСВЕТЕНИ СМЕ НА ИЗНАОЃАЊЕ ТРАЈНО РЕШЕНИЕ ЗА МАКЕДОНСКИТЕ ПРЕВОЗНИЦИ Прашањето е високо на агендата на Брисел appeared first on plusinfo.mk.

Министерството за одбрана наскоро ќе објави конкурс за прием на 300 нови војници во Армијата, најави министерот за одбрана Владо Мисајловски. Во гостување на Тема на денот на Сител телевизија, тој информираше дека се очекува огласот да биде објавен по добивањето на потребната документација од Министерството за финансии, со цел приемот да започне веќе во пролетниот рок.

– Кога ќе стигнат од финансиите сите потребни документи, ќе ги објавиме конкурсите, се надевам веќе во пролетниот рок што доаѓа, што повеќе луѓе да влезат, да се натпреваруваат меѓу себе и да бидат дел од Министерството за одбрана, односно од Армијата – рече Мисајловски.

Тој истакна дека интересот кај младите постои и дека офицерскиот кадар и специјалните единици се на високо ниво на обученост. Мисајловски додаде дека со зголемувањето на буџетот за одбрана ќе се создадат услови и за подобрување на статусот и примањата на припадниците на Армијата.

– Минатата година, од јануари, сите вработени во Министерството добија 30 отсто зголемување на нивните плати. Кога ќе се зголемува буџетот на Министерството, се разбира дека ќе гледаме и кадарот да биде подобро платен, и тоа можам да го ветам – рече Мисајловски.

Министерот, исто така, најави дека набрзо ќе има решение со кое би се задржале војниците кои што ќе наполнат 45 години, за да можат да продолжат да го даваат нивниот придонес во Армијата.

– Има иницијативи како да се задржат сите војници што ќе наполнат 45 години. Мислам дека набрзо ќе има решение, со кое ќе бидат сите задоволени, како да ги задржиме сите војници во Армијата, за да можат дополнително да дадат придонес – рече Мисајловски.

The post АРМ ЌЕ ПРИМИ НОВИ 300 ВОЈНИЦИ Наскоро ќе биде објавен конкурс appeared first on plusinfo.mk.

По демонстрациите во поддршка на чешкиот претседател Петр Павел, на кои десетици илјади Чеси првпат излегоа во Прага на 1 февруари, а вчера во речиси 400 градови и села, владејачката коалиција се откажа од номинацијата на контроверзниот инфлуенсер Филип Турек за министер за животна средина.

Премиерот Андреј Бабиш го пофали најмалиот коалициски партнер, евроскептичните конзервативци од партијата „Мотористи“, за тоа што попуштија и повеќе не инсистираат министерот за животна средина да биде нивниот почесен претседател Турек, за кого беше измислена функцијата „владин претставник за Зелениот договор на ЕУ“.

– Кога веќе го видов тој притисок во општеството, сфатив дека е време да се повлечам. Направивме отстапка, логично е бидејќи спорот не беше добар за односот меѓу владата и претседателот. Во ред е Игор Червени да биде назначен. Сакам соработката на владата со претседателот и со Брисел да биде добра – рече Турек на прес-конференцијата по владината седница.

Турек утринава им рече на новинарите дека послушен човек ќе биде назначен за министер за животна средина и дека тој, всушност, неформално ќе го води Министерството.

Демонстрациите на почетокот на февруари беа организирани во Прага поради скандалот од крајот на јануари, кога се дозна дека новиот министер за надворешни работи, Петр Мацинка, лидер на „Мотористи“, му испраќал заканувачки СМС-пораки на советникот на претседателот, во кои го уценувал шефот на државата да го назначи контроверзниот Турек за министер бидејќи во спротивно Мацинка ќе „му забрани на шефот на државата“ да ја претставува Чешка во странство и ќе го остави „само да полага венци“.

Претседателот Павел одби да го назначи Турек за министер бидејќи е познат по своите расистички и ксенофобични коментари на социјалните мрежи, со неколку слики на кои ја крева раката во нацистичкиот поздрав „Зиг Хаил!“.

Тој е познат и по тоа што му се заканувал на вработен во амбасадата на Саудиска Арабија кому му оставил куршум на неговиот автомобил во гаражата, а познат е и по тоа што не го почитувал законот – возел побрзо од 250 километри на час, градел нелегално и друго.

Од тие причини Павел верува дека таков човек не заслужува да биде министер, а за тоа има правна анализа и соодветен член од чешкиот Устав.

Од крајот на јануари, повеќе од 770.000 луѓе ја потпишаа петицијата „Застанувајќи со претседателот“ на невладината иницијатива „Милион моменти за демократија“. Тие масовно реагираат на повиците да ја покажат својата поддршка на улиците бидејќи очекуваат Павел да ги заштити независните демократски институции за Чешка.

The post НЕ САКААТ РАСИСТИЧКИ ИНФЛУЕНСЕР ЗА МИНИСТЕР! Чесите со протести му го сменија планот на премиерот Бабиш appeared first on plusinfo.mk.

Има проблеми во општеството кои не се решаваат со уште една дебата „за“ или „против“, ниту со уште едно морализирање. Пушењето е токму таков проблем, длабоко вкоренета навика на однесување, културна рутина и, најважно, огромен јавно-здравствен товар. Во систем што треба да се грижи за сите, не може да се зборува дека пушењето е „приватна работа“ што завршува со личниот избор. Напротив, завршува во воздухот што го споделуваме и дишеме сите. Затоа новиот Предлог-закон за заштита од пушењето не го гледам како казнен механизам, туку како закон за унапредување на јавното здравје и превенцијата. Неговата цел е цврсто и прецизно поставена, а тоа е да го заштити здравјето на граѓаните, посебно здравјето на децата, младите и непушачите од штетните ефекти на тутунот и никотинот. Овој закон не е „против пушачите“, тој е нормативно моделиран за да биде „за здравјето на сите“. Кај дел од јавноста премногу лесно се создава и прифаќа впечаток дека државата „се бори со луѓето“, наместо со причините што ги разболуваат луѓето. Но, ние не се бориме со граѓаните, ние се бориме со зависноста и со практиките што ја поттикнуваат, со изложеноста што ја трпат непушачите и со нормализацијата на пушењето пред децата.

Кога зборуваме за слобода, треба да бидеме прецизни – слободата на едно лице да пуши не смее да ја поништи слободата на други лице да дише воздух без чад. Во јавни и заеднички простори воздухот не е приватна сопственост. Кога некој пуши во затворен јавен простор, во работна просторија, во јавен превоз или во такси, тој излегува од рамките на својата лична навика и создава здравствени ризици. Изложувањето, не по свој избор, на тутунски чад и аеросоли не е прашање на вкус или став, туку прашање на ризик. Не постои „безбедно“ ниво на изложеност, а пасивното пушење е докажана причина за сериозни болести кај непушачите. Работното место мора да биде безбедно за здравјето на вработените, и тука посебно мислам на угостителските работници, односно никој келнер, шанкер или хигиеничар не треба да избира меѓу работата и своето здравје.

Пушењето кај нас одамна не е само лоша навика на дел од населението, нивото на неговата распространетост е индикатор на јавно-здравствена криза. Со околу 45% стапка на пушачи, ни сме меѓу земјите со највисока стапка во Европа. Во овој контекст на масовно пушење, граѓаните треба да знаат дека тутунот е водечка превентабилна причина за болести и предвремена смрт. Особено загрижува изложеноста на децата и младите, растечката употреба на нови никотински производи и последиците од пасивното пушење врз непушачите. Здравствените последици се едната страна на медалот, на друга негова страна стои огромна економска цена кој ја плаќаме како општество. Болестите поврзани со пушењето носат товар од околу 5% од БДП, односно околу 738 милион евра годишно губиме како последица од пушачки навики кои предизвикуваат здравствени трошоци и намалена продуктивност. Тоа значи оптоварени клиники, повеќе хронични пациенти, повеќе боледувања и повеќе семејства што плаќаат цена со здравје, време, физичка и психичка траума.

Една од клучните причини зошто мораше да се оди кон подготовка на ново законско решение се промените во реалноста. Проблемот на зависноста од тутун, добива нови димензии, ги надминува класичните цигари и како негови извори се појавуваат електронски цигари (со и без никотин), загреани тутунски производи, бездимни никотински производи и производи што го имитираат пушењето. Ако дозволевме законот да остане со дефиниции од минатото, тогаш тој ќе беше слеп за сегашноста. Во ИТ светот тоа е „legacy“ проблем, односно имаш правила што не ја покриваат реалноста, а нормативни дупки стануваат канали за заобиколување. Истото важи и во јавните политики, ако не ги опфатиме новите производи, ќе дозволиме зависноста да се проширува под нови имиња, нови вкусови и нови пакувања.

Затоа законот јасно утврдува забрана за пушење во сите затворени јавни и работни простории за сите тутунски и никотински производи, вклучувајќи електронски цигари и загреани тутунски производи, како и во јавен превоз, вклучително и такси возила. Станува збор за превентивна нормативна определба, а не за идеолошка, односно таму каде што луѓето мора да делат воздух, државата има обврска да го направи тој воздух безбеден.

Угостителството е најчувствителната точка, затоа што таму навиките се највидливи, а интересите силни. Во овој сегмент законот не се води по тоа како изгледа просторот, туку по тоа каков воздух дишат луѓето. Пушењето не е дозволено во затворени делови на угостителските објекти и во полузатворени простори каде разни прегради и поврзувања создаваат ист тип изложеност како затворен простор. По исклучок, пушењето може да биде дозволено само во реално и функционално отворени простори надвор од објектот, со јасни услови, кои подразбираат отвореност од најмалку три страни и без прегради што го задржуваат или насочуваат чадот и овозможуваат негово враќање кон затворени или непушачки делови. Притоа, вентилацијата не го елиминира ризикот, чадот непречено се движи и пренесува, а персоналот нема избор да се тргне и заштити од чадот.

Законот интервенира и на одредени отворени јавни простори каде изложеноста е неизбежна поради голема концентрација на луѓе во даден временски интервал. Треба да бидеме искрени, „отворено“ не значи автоматски безбедно, затоа што кога луѓето се блиску, чадот и аеросолите директно се вдишуваат. Затоа пушењето се ограничува или забранува околу здравствени, образовни и социјални установи, на јавни, спортски и културни настани, на места за деца и семејства и на локации каде луѓето не можат реално да избегнат изложеност. Станува збор за пристап кој не го забранува изборот, туку поставува правило таму каде што изборот на едниот станува ризик за другиот, особено за децата.

Регулирано е и пушењето во моторни возила кога во нив има деца и малолетници, како и во возила што се работно место (службени, комерцијални и сл.). Автомобилот е мал затворен простор со висока концентрација на чад и аеросол, во кој детето нема избор да се оддалечи, а изложеноста е интензивна и непосредна. Овој физички контекст бара заштита на децата бидејќи немаат моќ да се заштитат сами и ова не е навлегување во ничија приватност.

Посебен фокус има и на мерките што превенираат развој на нови зависности. Забраната за ароми и вкусови (овошни, слатки, ментол, билни и други), за сите категории производи, вклучувајќи електронски цигари, претставува силна превентивна мерка затоа што овие вкусовите се дизајнирани да ја олеснат првата нивна употреба и да ја забрзаат развојот на зависноста, особено кај младите. Истовремено, се воведува целосна забрана за рекламирање, промоции и спонзорства од тутунската индустрија – во медиуми, на интернет и социјални мрежи, преку настани, наградни игри, попусти и подароци – маркетингот не е пренесување на информација, тој е влијание, а влијанието најчесто е насочено кон младите. Во делот на продажба и достапност се зајакнува забраната за продажба на малолетници за сите никотински производи, се воведува забрана за јавно изложување на производите на продажни места и се ограничува продажбата во угостителски, спортски и културни објекти и на јавни настани. Намалувањето на видливоста и достапноста е меѓу најефикасните мерки за превенција, а заштитата на децата тука е апсолутен приоритет.

Намерата на овој закон не е да стигматизира или да пониже некого, напротив, тој е фокусиран да помогне. Затоа се предвидува обврска државата да спроведува превентивни програми, да информира и едуцира и да обезбеди поддршка за прекин на зависноста. Превенцијата е поефикасна и поевтина од лекувањето, но и похумана, затоа што подобро е да спречиш, отколку да лекуваш последици што можеле да се избегнат.

И на крај, секој закон вреди онолку колку што се спроведува. Со законот прецизно се утврдуваат институционалните надлежности за негово ефективно спроведување и санкциите за прекршување. Без негова имплементација никој нема да биде заштитен, а селективната примена може да ја уништи довербата. Како инженер знам дека систем без јасни одговорности секогаш завршува со реченицата „не ми е во домен“. Со јавното здравје тоа не смее да се случи – водени од оваа определба при дизајнирањето на законот една од целите кон кои се стремиме е неговото доброволно почитување, а не градење на репресивен механизам, односно создаваме правила што се разбираат и применуваат еднакво, но истовремено се прифаќаат и како стандард. Тежиштето е поставено на вредности кои ќе бидат основа на поттикнување на култура на постојана свесност за опасностите од тутунските производи, додека казнување е крајна инстанца.

Свени сме дека овој закон кај дел од граѓаните ќе наиде на отпор, затоа што менува навики. Но државата не смее да биде заложник на навики што ги разболуваат граѓаните. Јавното здравје не е тема за дневна политика, туку за долгорочна заштита и цивилизациско уредување на заедничкиот простор. Не барам од никого да се чувствува виновен, барам само да бидеме рационални и фер, односно да ги заштитиме децата, да ги заштитиме работниците, да го направиме јавниот простор здрав и да ја намалиме цената што ја плаќаме како систем и како семејства. Во еден добар систем правилата не се за да те казнат, туку за да те заштитат од ризици што не можеш сам да ги контролираш. Чисти правила создаваат чист воздух, а чист воздух создава здравје што не зависи од среќа, од врски или од тоа кој каде седнал. Затоа го предлагаме овој закон како стандард за достоинствен живот и како порака дека превенцијата не е трошок, туку најпаметна инвестиција во иднината.

Авторот е министер за здравство

The post Пушење – здравствена и економска цена што ја плаќаме сите appeared first on plusinfo.mk.

Во Коалицијата Вреди се усогласени новите министерски позиции, по изборот на Изет Меџити за градоначалник во Чаир, посочуваат извори од коалицијата за МИА. Од Владата пак за МИА велат дека до нив Вреди сè уште нема доставено предлог и очекуваат, како што денеска кажа премиерот Христијан Мицкоски, тоа да се случи најдоцна до понеделник.

Според извори во коалицијата Вреди, Беким Сали ќе биде кандидат за функцијата прв вицепремиер и министер за евроинтеграции, Мухамед Хоџа за ресорот животна средина, додека Башким Бакиу ќе биде предложен за нов министер за здравство на местото на Азир Алиу. Алиу, пак, треба да ја преземе директорската позиција во Агенцијата за електронски комуникации.

Актуелниот министер за евроинтеграции Орхан Муртезани е номиниран за амбасадор во Брисел.

Премиерот Христијан Мицкоски денеска во изјава за медиумите кажа дека очекува имињата на новите функционери, Вреди до него да ги достави в понеделник, откако ќе бидат искристализирани, но, дополни дека тоа се оние имиња, кои горе долу циркулираат во јавноста.

– Нема да има нови ресори, ВРЕДИ нема да добие плус човек, еден ист човек ќе биде вицепремиер и министер – изјави Мицкоски.

The post САЛИ ЗА ВИЦЕПРЕМИЕР, БАКИУ ВО ЗДРАВСТВО, АЛИУ СЕ СЕЛИ ВО АЕК? Вреди ги усогласи предлозите, ќе ги достави до понеделник appeared first on plusinfo.mk.

Министерот за надворешни работи Тимчо Муцунски денеска порача дека Владата останува цврсто на браникот на македонскиот јазик, идентитет и историја. Неговата реакција дојде по прашањето на пратеникот Реџеп Исмаил, поврзано со најновите заклучоци на Мешовитата историско-образовна комисија со Бугарија.

Муцунски изненадено прокоментира дека нападите кои изминативе денови доаѓаат од бугарскиот копретседавач Ангел Димитров и од пратеникот Исмаил делуваат „како случајно координиран настап“, но дека тој избира да верува дека станува збор за совпаднување.

– Во рок од неколку дена, прашања и критики за Комисијата дојдоа и од Ангел Димитров и од вас. Некои велат дека во политиката не постојат случајности, но јас ќе изберам добра намера и ќе верувам дека ова е случајно координиран напад – рече министерот.

Тој повтори дека Комисијата треба да работи независно, на основа на научни факти и аргументи, без политички влијанија, и дека секој негов директен политички став би можел да се протолкува како притисок врз процесот.

– Точно е дека има луѓе од другата страна на границата кои сакаат да ја негираат нашата историја, идентитет и јазик. Но затоа веќе повеќе од година и половина државата стои цврсто на позициите – без отстапки по секоја цена – додаде тој.

Муцунски обвини дека Ангел Димитров често го провоцира со цел да го натера да даде политичка изјава, за потоа тоа да се претстави како мешање на македонската влада во работата на Комисијата.

– Владата секогаш ќе стои во заштита на македонскиот идентитет, јазик и историја – истакна министерот, уверувајќи дека ниту учебници, ниту документи не биле испраќани во Софија „на одобрување“.

– Тоа е дезинформација и лажна вест – кажа тој.

Пратеникот Исмаил возврати дека Комисијата не може да се гледа како чисто научно тело, бидејќи нејзините заклучоци имаат политички последици, особено кога се работи за прашања поврзани со суверенитет. Тој го праша министерот и „по кој основ“ учебниците за петто и шесто одделение би биле праќани на проверка во Бугарија, што Муцунски го негираше.

Министерот додаде дека верува во работата на професорот Ѓеоргиев и неговиот тим, нагласувајќи дека Комисијата може да работи со години без конечни договори, но дека важно е процесот да биде заснован на наука, а не политика.

– Би биле најсреќни да докажете дека ВМРО-ДПМНЕ направило отстапка, но наведете една таква од последната година – му порача Муцунски на Исмаил, додавајќи дека не верува дека пратеникот е координиран со историчарите во Софија.

Во завршниот збор, Исмаил рече дека нема никаква координација, дека има поддршка и од други опозициски партии против „агресивните напади врз македонскиот јазик и идентитет“, и предложи Македонија да се повлече од Комисијата.

The post НЕМА ПОПУШТАЊЕ ПРЕД СОФИЈА Македонскиот јазик и историја секогаш ќе ги штитиме, порача Муцунски appeared first on plusinfo.mk.

Приоритет на Министерството за здравство е децентрализација на онколошките услуги во земјава. Започнавме со клиниките и здравствените институции што имаат соодветни кадри и инфраструктура – најави министерот за здравство Азир Алиу

– Имаме веќе функционални одделенија во Битола и во Тетово. Во Градска општа болница „8-ми Септември” сè е средено, значи веќе тој процес, административен за добивање лиценца е завршен и ценам дека за брзо време ќе треба и таму оперативно да имаме онколошки услуги на ниво на амбуланта. Но, еве Тетово и Битола веќе имаат. Штип исто така ќе биде, сè уште е рана фаза таму, ќе треба да се инвестира инфраструктурно. Идејата е на онколошките пациенти да им нудиме онколошка услуга поблиску во регионот во кој живеат – изјави министерот Алиу во емисијата „360 степени” на МРТ

Во однос на информациите во јавноста дека има недостиг на онколошка терапија, министерот Алиу посочи дека станува збор за проблем кој се јавува поради процедурите.

„Терапијата недостига поради тие процеси што се строго дефинирани во законот за отворање постапка до завршување на постапката и често ни се случува да бидат неуспешно завршени, па треба од почеток да се отвори постапка за тип на лек или за некоја друга услуга. И вториот момент е поради увозниците. Често и тоа ни се случува, постапката да е завршена успешно, а тој лек моментално не е увезен во нашата земја и чекаме недела-две, бидејќи и таму има административни процедури, да можат да завршат за да може да се требува и да биде дел од здравствениот систем – рече Алиу.

The post ОНКОЛОШКИТЕ УСЛУГИ ЌЕ СЕ ДЕЦЕНТРАЛИЗИРААТ Центрите во Битола и Тетово функционираат, „8. Септември“ и Штип се подготвуваат appeared first on plusinfo.mk.

Украинската премиерка Јулија Свириденко го суспендираше министерот за правда Герман Галушченко по обемната истрага за корупција во енергетскиот сектор што се води во земјата.

Антикорупциските агенции ја засилија истрагата за голема шема за подмитување и перење пари од 100 милиони долари, во која се вмешани високи функционери од енергетскиот сектор. Украинските власти досега обвинија седум лица за овој случај.

Галушченко, кој порано беше министер за енергетика, рече дека целосно се согласува со одлуката за негова суспензија. Медиумите објавија дека тој имал лична корист од криминалната шема.

Националното биро за борба против корупција (НАБУ) и Специјалното обвинителство за борба против корупција соопштија дека е вмешан и поранешен вицепремиер идентификуван по прекарот Че Гевара, со кого се поврзуваат незаконски трансфери на пари во вредност од над 1,2 милиони долари.

Претходно беше објавено дека шемата била раководена од Тимур Миндич, бизнисмен и соработник на претседателот Володимир Зеленски. Миндич наводно избегал во странство неколку часа пред истражителите да дојдат во неговиот дом во Киев. Миндич е косопственик на „Квартал 95“, продукциската компанија што Зеленски ја основал пред да стане претседател.

Според НАБУ, неколку лица формирале криминална банда и изградиле голема корупциска шема за да влијаат врз стратешките претпријатија од јавниот сектор, особено врз државниот оператор за нуклеарна енергија „Енергоатом“.

Корупцискиот скандал што изби во Украина го коментираше и портпаролот на Кремљ, Дмитриј Песков.

– Веруваме дека европските престолнини го забележаа ова, како и САД. На крајот на краиштата, ова се земјите кои се толку активни донатори на режимот во Киев. Овие земји, се разбира, сè повеќе почнуваат да разбираат дека значителен дел од парите што ги земаат од своите даночни обврзници се проневерени од режимот во Киев. Тоа е апсолутно очигледно. Сè повеќе луѓе го разбираат ова – изјави Песков пред новинарите.

The post КОРУПЦИСКИ СКАНДАЛ ТЕЖОК 100 МИЛИОНИ ДОЛАРИ ЈА ТРЕСЕ УКРАИНА! Паѓаат министри, се апсат функционери, Кремљ ликува appeared first on plusinfo.mk.