Министерот за труд и социјална политика Фатмир Лимани денеска изјави дека веќе извесно време не е министер на партијата Вреди, која го номинира на тоа место во владата на Христијан Мицкоски, чиј член беше како дел од Движењето Беса на Билал Касами.

– Веќе некое време завршивме јас и Вреди – рече Лимани.

Пред неколку недели Касами рече дека Лимани не е веќе дел од комбинаториките на Вреди.

– Господинот Фатмир Лимани многу одамна ги прекина комуникациите со Движењето Беса и не гледам дека во нашето патување во рамките на Вреди тој ќе биде дел од политичките комбинаторики – рече Касами во гостување на ТВ Алсат.

Вреди в сабота на 9 мај треба и официјално да се претопи во една единствена политичка партија. Според најавите, партијата ќе има колидери – Изет Меџити и Билал Касами, двајца заменик-претседатели – Мимоза Муса и Беким Ќоку, како и секретар – Беким Сали.

Односите на Фатмир Лиман со Вреди се нарушени веќе неколку месеци, откако се забележа дека тој се зближува со претседателот на ДУИ, Али Ахмети, со кого е во родбинска врска. Лимани учествуваше во Тирана заедно со Ахмети во две различни прилики во последните месеци.

– За предвремени избори сум и нема веќе да бидам дел од Вреди – одговори денеска министерот Лимани на прашање да ја коментира неговата објава на Фејсбук во која вели: „Сакавте војна со Фатмир Лимани, сега покажете колку вредите! Наскоро ќе ви овозможам да се покажете“.

– Тоа беше споделување на објава од еден портал кој го објавил тоа, а јас само потврдив дека исто така сум за предвремени избори. Сите сме за предвремени избори, освен Вреди. Колку побрзо се случат, толку подобро ќе биде за земјата, за нејзиниот економски развој и во исто време за освежување и во рамките на Вреди и во рамките на било кој друг политички субјект или структура – рече Лимани.

На прашање дали со која политичка структура ќе учествува на следните избори, рече само дека нема да биде дел од Вреди.

– Во „Вреди“ нема да бидам. Ќе видиме каде ќе бидам – рече министерот Лимани.

На прашање дали е министер на Вреди или на ВМРО-ДПМНЕ Лимани одговори дека тој е „министер на сите граѓани“.

Лидерот на ДУИ Али Ахмети вчера изјави дека неговата партија е подготвена за предвремени парламентарни избори.

– Јас уште од првиот ден барав предвремени избори. Утре да има избори ние сме подготвени, изјави Ахмети.

Избори побара и Арбен Таравари од Алијанса за Албанците, бидејќи според него, тоа било спас од владеењето на Вреди.

The post МИНИСТЕРОТ ФАТМИР ЛИМАНИ ЈА РАСТУРИ КАЛИМЕРАТА СО ВРЕДИ Не сум нивни министер, ги чекам на предвремени избори appeared first on plusinfo.mk.

Фатмир Лимани денеска ја презеде функцијата министер за социјална политика, демографија и млади од Фљакрон Беџети, државниот секретар во Министерството за труд и социјална политика кое со реорганизацијата на државната управа е преименувано во Министерство за социјална политика, демографија и млади. Од поранешното Министерство за труд и социјална политика, надлежностите за труд ги доби Министерството за економија.

Лимани во новата Влада влегува како кадар од Движењето Беса, кое е дел од коалицијата „Вреди“.

Фатмир Лимани е роден во Кичево на 14 јануари 1973 година, со моментално живеалиште во Општина Петровец, Скопје. Дипломирал на Филозофскиот факултет во Универзитетот во Тетово, каде се стекнал со звање дипломиран професор по историја. Неговото работно искуство почнува во 2005 година, како управител на бензиската пумпа „Голден оил“ во Кичево, по што во 2007 година станува претседател на Движењето „НДРИШЕ“, како и член на Надзорниот одбор на АД „МЕПСО“. Во 2011 година, Лимани станува заменик генерален директор и член на Управниот одбор на АД „ЕСМ“, каде поминува десет години. Лимани беше независен кандидат за градоначалник на Општина Кичево во 2021 година, додека во 2022 стана потпретседател на Движењето „Беса“. Во 2024 година добива мандат за пратеник во Собранието на Република Северна Македонија од редовите на Движењето „Беса“.

Во биографијата приложена до Собранието стои дека мајчин јазик на Лимани е албанскиот, додека има познавање од македонскиот, англискиот и германскиот јазик. Како што е наведено, тој поседува компјутерски вештини од „Microsoft Оffice – Word“, „Excel“, „Power Point“, „Internet Explorer“, „Windows“, „Outlook Express“ и други.

The post ЛИМАНИ ЌЕ ГО ВОДИ НОВОТО МИНИСТЕРСТВО ЗА МЛАДИ Ќе биде одговорен и за социјална политика и за демографија appeared first on plusinfo.mk.