Сојузот на синдикатите денеска организираше нов протест со барање за минимална плата од 600 евра и линеарно зголемување на сите за 100 евра, бидејќи, како што беше речено на протестот, работниците не се за законското зголемување на минималецот од 1.600 денари туку за достојни плати кои ги заработиле.

Претседателот на ССМ Слободан Трендафилот на протестот кој почна од пред работничкиот дом и заврши пред зградата на владата, рече дека 160.000 работници во земјава примаат плата под прагот на сиромаштија, а тоа е добра основа за потребата од зголемување на нивните плати.

Тој рече дека зголемувањето на минималната плата е неопходно во услови кога трошоците за живот постојано растат, а голем број работници едвај ги покриваат основните потреби.

– Сметаме дека во месец март мора да се зголеми минималната плата, затоа што тие не ја даваат, туку затоа што ние како работници ја заработуваме и затоа што им заработуваме многу повеќе од тоа што тие не плаќаат – рече Трендафилов.

ССМ, рече тој, го отфрла законското усогласување од 1.667 денари со конкретен аргументот дека само во последните два месеца вредноста на синдикалната минимална кошница пораснала за 2.000 денари – усогласувањето не го покрива ни растот на трошоците за живот.

Тој рече дека денеска работниците биле спречени да дојдат на протестот поради закани.

– Не ви се плашиме. Дојдовме за зголемување на платите и ќе дојдеме пак. Покажавме и дека 21 човек на улица вршат работа да прават нервоза кај газдите. Покажавме дека можеме и многу повеќе. Денес им покажуваме дека можеме и највеќе затоа што без работници нема држава, а нема ниту власт- изјави  Трeндафилов пред почетокот на протестот.

По протестот, ССМ останува на најавата за 24-часовен генерален штрајк кој овој пат ќе го опфати и приватниот сектор.

Претставници на владата во текот на изминатите месеци редовно изјавуваа дека владата ќе ја прифати висината на минималната плата што ќе ја договорат синдикатите и работодавачите.

Работодавачите кои велат се во лоша состојба, не ја исклучија можноста за повисока минимална плата под услов владата да ги помогне кај придонесите, но тоа не беше поддржано од владата.

Последната седница на Економски-социјалниот совет заврши без одлука за висината на минималната  плата бидејќи претставниците на ССМ ја напуштија седницата со образложение дека немаат мандат од работниците да прифатат пониска минимална од 600 евра.

Од владата велат дека сега останува да се донесе одлука за законско зголемување на минималната плата кое треба да изнесува 1.667 денари.

The post ССМ НА НОВ ПРОТЕСТ ПОБАРА 600 ЕВРА МИНИМАЛНА ПЛАТА Владата најави дека ќе донесе одлука за законско зголемување од 1.667 денари appeared first on plusinfo.mk.

Сојузот на синдикати (ССМ) ја блокираше Владата и побара таа да предложи измени на Законот за минимална плата со кои ќе се зголеми минималната плата на 600 евра, а сите останати плати за 100 евра.

Претседателот на ССМ Слободан Трендафилов рече дека има време за договор до крајот на февруари, но потоа ќе следат генерален штрајк и работнички протест, а не ја исклучува и можноста за таргетирани блокади и во други градови.

– Бараме многу сериозно да размислуваат и да разговараат, или да ги ослободат работодавачите или да подадат рака и на бизнисот  за ослободување на придонесите за задолжително социјално осигурување. Ги потсетуваме дека пред една година, кога бевме на преговори, тие тоа еднострано го одбија, иако ССМ и работодавачите беа договорени за најмалку 6.000 денари да се зголемат платите на сите работници во државата – рече Трендафилов.

Тој даде и ветување дека нема да се појавува во јавност, ако Владата одговори позитивно на барањата.

– Донесете ја одлуката денеска и нема повеќе блокади и протести, нема да ме видите никаде, ни на протест, ни на медиуми, ни на социјални мрежи или каде било во јавен настап – рече Трендафилов.

Тој најави дека поради притисоците врз работниците наредниот протест, кој очекува да биде масовен, ќе се одржи во неработен ден.

– Така ќе овозможиме работниците да го покажат своето незадоволство. Поканети се сите кои сметаат дека платите им се мали – рече Трендафилов.

Според него, работодавачите имаат можност до крајот на февруари да кажат за колку се подготвени да ги зголемат работничките плати.

The post СИНДИКАТОТ НАЈАВИ ПРОТЕСТ ВО НЕРАБОТЕН ДЕН ЗА ДА ИМ ДОЈДАТ ПОВЕЌЕ ЛУЃЕ До крајот на февруари ќе чека одговори на барањата appeared first on plusinfo.mk.

Секој има право да протестира – рече премиерот Христијан Мицкоски прашан за коментар во врска со протестот што утре попладне ќе го организира Сојузот на синдикатите на Македонија (ССМ) за покачување на минималната плата на 600 евра.

Тој посочи дека минималната плата законски се зголемува во март, а владата ќе поддржи повисок износ, ако синдикатите и работодавачите се договорат.

– Во согласност со законот, минималната плата ќе биде зголемена во март, односно платите што ќе ги добијат работниците во април за март ќе бидат зголемени. Ние рековме дека ќе го поддржиме секое решение што синдикатите ќе го постигнат со работодавците во дипартитен дијалог – рече Мицкоски одговарајќи на новинарски прашања при работната посета на Гази Баба.

Сојузот на синдикатите на Македонија за утре најави протест на кој ќе бара минимална плата од 600 евра, зголемување на сите други плати за сто евра и достоинствен живот на работниците.

The post МИНИМАЛНАТА ПЛАТА ЗАКОНСКИ ЌЕ СЕ ЗГОЛЕМИ ВО МАРТ Мицкоски не го спори правото на протест на синдикатите appeared first on plusinfo.mk.