Овогодишниот „Октоберфест“ заврши со рекордни 7,4 милиони посетители, со што беше соборен досегашниот рекорд од 2023 година, кога фестивалот го посетиле 7,2 милиони гости, соопштија властите во Минхен.

Поволните временски услови и умерените температури придонесоа за рекордната посетеност. Во саботата, претпоследниот ден од фестивалот, организаторите беа принудени да го затворат пристапот до фестивалскиот простор „Терезиенвизе“ поради огромниот прилив на луѓе.

Рекордниот број посетители беше проследен и со рекордна потрошувачка на пиво. На годинешниот, 191. „Октоберфест“, биле испиени 6,7 милиони литри пиво, што е зголемување од 2,7 отсто во споредба со минатата година.

Цената на традиционалната кригла од еден литар пиво, исто така, достигна рекордно ниво. Просечната цена годинава изнесуваше 15 евра.

Угостителите пријавија и зголемување на продажбата на храна за 2 до 3 отсто. Особено пораснала продажбата на традиционалната порција половина печено пиле, и покрај просечната цена од 18 евра, без прилози.

Посетителите од САД, Италија и Австрија беа на чело на листата на странски гости.

Градот Минхен го проценува вкупното економско влијание од овогодишниот „Октоберфест“ на 1,59 милијарди евра.

The post 7,4 МИЛИОНИ ЛУЃЕ И 6,7 МИЛИОНИ ЛИТРИ ПИВО „Октоберфест“ собори рекорди и донесе милијарди во Минхен appeared first on plusinfo.mk.

Две лица загинаа, а 26 се повредени, од кои едно лице се бори за живот, откако туристички автобус излетал од автопатот А96 кај германскиот град Бухлое и се превртел.

Несреќата се случила рано утрово, нешто по 6 часот, на делницата меѓу Бухлое-Исток и Ландсберг на Лех-Запад, во правец кон Минхен. Автобусот превезувал туристичка група од Филипините.

Според поновите информации од германските медиуми, групата патувала од Милано кон Минхен, каде што требало да го посети Октоберфест. Првично се говореше дека во автобусот имало меѓу 40 и 50 лица, но подоцна полицијата соопштила дека најверојатно имало околу 35 патници.

Според досегашните сознанија, во несреќата не учествувало друго возило. Автобусот од засега непознати причини излетал од десната страна на коловозот, по што се превртел покрај автопатот и останал настрана од патот.

Силата на ударот предизвикала сериозни оштетувања на автобусот. На местото веднаш пристигнале голем број пожарникари, полицајци и медицински екипи, а во спасувањето бил вклучен и хеликоптер.

Дел од повредените биле транспортирани во болница со хеликоптери, додека други биле пренесени со возила на итната медицинска помош. Според податоците на германските медиуми, има осум потешко повредени, а кај еден од нив состојбата е критична.

Двајцата загинати се државјани на Филипините. Нивните идентитети засега не се соопштени.

Причината поради која автобусот ја напуштил коловозната лента засега не е позната. Германското обвинителство ангажирало вештак кој треба да помогне во утврдувањето на текот на несреќата и причините за излетувањето од патот.

Двајцата возачи на автобусот, според досегашните информации, не биле повредени. Едниот од нив, кој бил зад воланот во моментот на несреќата, е италијански државјанин.

Полицијата предупреди дека податоците за бројот и состојбата на повредените може дополнително да се менуваат бидејќи истрагата и медицинската обработка на патниците сè уште траат.

Поради спасувањето и расчистувањето на местото, А96 е целосно затворен во двата правци на делницата меѓу Бухлое-Исток и Ландсберг на Лех-Запад.

Бухлое се наоѓа на автопатот А96, кој ги поврзува Минхен и Меминген. Според германските информации, сообраќајот бил прекинат поради големата операција на спасувачките служби и работата на местото на несреќата.

The post 📽️ АВТОБУС ЗАВРШИ ВО ЕНДЕК НАМЕСТО НА ОКТОБЕРФЕСТ Двајца загинати и 26 повредени на патот кон Минхен appeared first on plusinfo.mk.

Германската полиција проверува снимки од безбедносните камери на Октоберфест во обид да утврди дали моментот на смртта на 52-годишен државјанин на Србија бил снимен.

Трагедијата се случила во понеделникот вечерта, нешто пред 22 часот, во момент кога забавниот парк бил преполн со посетители.

Според досегашните информации, 52-годишниот Србин, од засега неутврдени причини, влегол во забранетиот простор на атракцијата „Hangover“, токму додека таа била во функција.

Станува збор за кула за слободен пад висока околу 80 метри. Полицијата сега се обидува да утврди каде точно се наоѓал човекот во моментот кога гондолата налетала на него и го удрила, при што најверојатно бил смртно повреден.

Според германските медиуми, загинатиот бил ангажиран како работник во обезбедувањето.

Екипите на итната медицинска помош веднаш го реанимирале на местото на несреќата, но тој им подлегнал на тешките повреди во болница.

Криминалистичката полиција сега се обидува да ја реконструира несреќата и трага по видеоснимки кои би можеле да помогнат во истрагата.

Полицијата ги повикува сите очевидци, особено посетителите кои во понеделникот вечерта се наоѓале во близина на кулата за слободен пад, а виделе или снимиле нешто поврзано со несреќата, да се јават и да ги достават снимките.

Од полицијата соопштиле дека патниците во атракцијата во ниту еден момент не биле во опасност.

На местото на фестивалот, во меѓувреме, свештеници и членови на тимот за кризна интервенција им помагале на очевидците кои биле потресени од трагедијата. Прославата на Октоберфест продолжила во непосредна близина.

Два инцидента уште на првиот ден

Ова не е единствениот инцидент со атракциите на Октоберфест по отворањето на фестивалот во саботата.

На атракцијата „Predator“, која ги врти посетителите наопаку, сензор го запрел системот, по што посетителите останале заглавени во превртена положба меѓу две и пет минути.

Сензорот бил заменет, а атракцијата повторно била проверена од стручно лице. Не бил утврден дефект, па „Predator“ повторно била пуштена во употреба истата вечер.

Во саботата запрела и атракцијата „XXL Racer“. Осум посетители останале заглавени на височина од околу 55 метри.

Според прес-службата на Октоберфест, проблемот бил предизвикан од дефект во сигналот. Во овој инцидент немало повредени.

Октоберфест и претходно бил место на трагедии

Германските медиуми потсетуваат дека ова не е прва смртна несреќа поврзана со атракциите на Октоберфест.

На 16 септември 2024 година, за време на поставувањето на фестивалот, 20-годишен работник бил удрен од гондола на ролеркостер. Тој починал во болница.

Истиот ролеркостер, „Olympia Looping“, претходно бил поврзан со уште една трагедија. Во април 2022 година, 30-годишна работничка загинала додека атракцијата гостувала во забавниот парк „Prater“ во Виена.

На 30 септември 1996 година, пак, два воза на ролеркостерот „Euro Star“ се судриле на Октоберфест. Во несреќата биле повредени повеќе од 25 лица.

Подоцна на инспектор од TÜV му бил издаден казнен налог поради невнимание кое довело до телесни повреди.

The post 📽️ СРБИН ЗАГИНА НА ОКТОБЕРФЕСТ, КАМЕРИ ЈА СНИМИЛЕ ТРАГЕДИЈАТА Вработениот влегол во забранетиот простор, гондола го удрила и усмртила appeared first on plusinfo.mk.

Околу 50 луѓе побарале медицинска помош во текот на првите неколку часа од овогодинешниот Октоберфест во Минхен.

Меѓу пациентите имало неколку лица со посекотини на главите и со повреди на лицата, а лекарите интервенирале и поради конвулзивен напад, соопшти Службата за брза помош.

Првиот повик до службите за итни случаи дошол само 9 минути откако биле отворени влезовите на фестивалскиот простор во 9 часот наутро. Медицинските екипи прво им помогнале на лицето кое имало напад и на посетителите кои добиле рани и други полесни повреди предизвикани од падови за време на традиционалното утринско трчање до шаторите.

W Monachium rozpoczął się Oktoberfest. Tłumy ruszyły do namiotów w takim tempie, jakby na mecie czekało darmowe piwo Zasada jest prosta: kto pierwszy, ten siedzi! Dobra zabawa czy lekka przesada? pic.twitter.com/V6YGjGXRXp

— Ekonomat (@ekonomat_pl) September 19, 2026

Околу 20 минути по официјалното отворање на Октоберфест напладне, лекарите интервенирале поради кардиоваскуларни проблеми кај 50-годишен Германец, кој бил пренесен во болница.

Првиот случај поврзан со алкохол е регистриран во 15:45 часот. Деветнаесетгодишникот од Минхен повеќе не можел да стои, па неговите пријатели побарале помош. Лекарите ги провериле неговите витални функции и му дале инфузија.

На првиот ден од Октоберфест, биле распоредени 150 членови на медицински тимови, вклучувајќи десет лекари. Во текот на целиот фестивал, околу 430 вработени и 36 лекари ќе се грижат за посетителите.

Овогодинешниот 191-ви Октоберфест го отвори новиот градоначалник на Минхен, Доминик Краузе.

Фестивалот на пивото трае до 4 октомври, а се очекуваат повеќе од 6 милиони посетители.

Are you visiting Oktoberfest in Munich? pic.twitter.com/554c1PYP9X

— Aoon The Traveller (@aoonsafdar) September 19, 2026

The post 🎥 50 ПОВРЕДЕНИ ВО ПРВИТЕ ЧАСОВИ ОД ОКТОБЕРФЕСТ На фестивалот во Минхен се очекуваат 6 милиони луѓе appeared first on plusinfo.mk.

Со години, стручњаците ги нагласуваат опасностите од продолжениот сон, предупредувајќи дека надоместувањето на сонот за време на викендот може да го наруши внатрешниот часовник на телото и да предизвика негативни здравствени последици.

По сето тоа, нова анализа дава „поохрабрувачки податоци“: Доколку не претерувате, продолженото спиење за време на викендите може да биде добро за вас. Во совршениот случај, треба да спиете еден час и 27 минути повеќе, што би можело да обезбеди заштита од висок крвен притисок.

Новото истражување покажува дека еден до два часа повеќе сон по „долгата недела“ е поврзана со помал ризик од висок крвен притисок.

На светско ниво, повеќе од 1,3 милијарди луѓе имаат хипертензија. Тие се соочуваат со многу поголема опасност од срцев и мозочен удар, заболување на бубрезите и прерана смрт, пишува „Гардијан“ (The Guardian).

И, додека другите начини за избегнување висок крвен притисок се сè уште клучни – тука спаѓаат физичката активност, одржување здрава тежина и здрава исхрана, новите наоди посочуваат дека луѓето слободно може да остануваат до доцна будни за време на викендот, според стручњаците.

Истражувањето беше претставено во Минхен, Германија, на годишниот Конгрес на Европското кардиолошко здружение – најголемата светска конференција за срце. Авторот на научниот труд, д-р Навон Ли од Корејскиот универзитет во Сеул, истакна дека недоволното спиење му дава дополнителен стрес на телото.

– Тоа го тера срцето и крвните садови да работат понапорно и може да го зголеми крвниот притисок. Дополнителниот сон за време на викендот може да му даде шанса на телото да заздрави и да се ослободи од дел од тој стрес. Луѓето не треба да се чувствуваат мрзливо или виновно што спијат малку подолго за време на викенд. Ако не можеле да спијат доволно во текот на неделата, дополнителниот сон за време на викенди, едноставно, може да биде начинот на телото да заздрави од таа загуба на сон – изјави д-р Ли.

Истражувањето следело 40.000 возрасни лица во Јужна Кореја во период од седум години. Надополнувањето на спиењето за време на викендот е дефинирано како разлика меѓу времетраењето на спиењето за време на викендот и работните денови.

Надополнувањето на спиењето за време на викендот беше поврзано со 6 отсто помал ризик од висок притисок. Малку поголема корист е забележана кај луѓето кои се сметале за физички неактивни. Тие имале 6,9 отсто помала веројатност да имаат хипертензија, ако спиеле подолго за време на викенди. Анализата идентификувала бенчмарк од 1 час и 27 минути како „совршена количина“ на надополнување на изгубениот сон, смета Ли. Оние испитаници кои спиеле толку многу повеќе, имаат 9 отсто помала веројатност да имаат висок крвен притисок.

The post ЗА ВИКЕНД СЛОБОДНО СПИЈТЕ СИ ПОДОЛГО Подолгиот сон по долгата работна недела е поврзан со помал ризик од хипертензија appeared first on plusinfo.mk.

Едно лице е тешко повредено откако товарен воз падна од мост во Минхен, главниот град на германската покраина Баварија, јави ДПА.

Два вагона излетале од шините од мостот, се одвоиле од возот и паднале околу пет метри, соопшти полицијата, додавајќи дека сè уште истражуваат што превезувал возот.

Сепак, товарот, според властите, сигурно не претставува опасност за населението во околината.

Инцидентот се случил на железничка линија што ја користат главно товарни возови, изјави портпаролот на германската железничка компанија Дојче Бан.

Причините за несреќата се истражуваат.

The post ТОВАРЕН ВОЗ ПАДНА ОД МОСТ ВО МИНХЕН Два вагона излетале од шините, едно лице повредено appeared first on plusinfo.mk.

Премиерот Христијан Мицкоски во рамки на престојот во Минхен оствари средба со претседателот на Украина, Володимир Зеленски, на која фокусот бил ставен на безбедносните предизвици во Европа и можностите за праведен и одржлив мир.

Двајцата лидери разговарале за потребата од европско единство и солидарност во услови на војна и глобални турбуленции, како и за продлабочување на билатералната соработка.

– Веруваме дека мирот мора да биде изграден врз правда и почитување на достоинството на народите. Само таков мир носи стабилност и сигурна иднина за Европа. Македонија ќе продолжи да биде глас на разумот, партнер на стабилноста и поддржувач на праведниот мир – изјави Мицкоски по средбата.

На разговорите било отворено и прашањето за економската размена и поддршката во процесите на напредок на државите, при што, како што истакнал премиерот, „напредокот е можен кога има визија, храброст и јасна определба“.

Средба и со Гренел

Претходно, Мицкоски во Минхен се сретна и со Ричард Гренел, специјален пратеник на американскиот претседател Доналд Трамп за специјални мисии.

Премиерот оцени дека станува збор за продуктивна средба со одлична дискусија, при што биле потенцирани стратешките односи со САД како темел на стабилноста и економскиот развој на земјава.

– САД остануваат нашиот најголем поддржувач и стратешки партнер. Во време на глобални предизвици, зајакнувањето на ова партнерство е од клучно значење за нашата национална безбедност и економски напредок – истакна Мицкоски.

Тој додаде дека се гради партнерство засновано на взаемна почит, економска соработка и заедничка посветеност на мирот и стабилноста.

The post 📽️ 📷 МИРОТ МОРА ДА БИДЕ ПРАВЕДЕН ЗА ДА БИДЕ ТРАЕН Мицкоски се сретна со Зеленски во Минхен appeared first on plusinfo.mk.

Додека во германскиот град се одржува престижната Минхенска безбедносна конференција, улиците на Минхен ги преплавија околу 200.000 демонстранти, кои излегоа на протест против властите во Иран.

Според полицијата, собирот поминал мирно, а граѓаните се собрале на плоштад во западниот дел од градот со јасна порака – бараат пад на Исламска Република Иран по крвавото задушување на протестите што започнаа кон крајот на декември.

Дел од демонстрантите носеа знамиња со зелено-бело-црвени ленти и симболот лав и сонце – обележје на монархијата што беше соборена во 1979 година.

Протестите не се ограничени само на Германија. За денеска се најавени митинзи со повик за меѓународна акција против Техеран и во Торонто и Лос Анџелес.

Во меѓувреме, протераниот син на соборениот шах, Реза Пахлави, од егзил упати директен повик до Доналд Трамп да му „помогне“ на иранскиот народ.

– Време е да се стави крај на Исламската Република – порача Пахлави, додавајќи дека граѓаните не бараат реформи, туку целосен крај на режимот.

Масовноста на протестот во Минхен се толкува како силна порака до меѓународната заедница, токму во момент кога светските лидери дебатираат за глобалната безбедност.

The post НАД 200.000 ЛИЦА НА УЛИЦИТЕ ВО МИНХЕН Масовен протест против Исламската Република appeared first on plusinfo.mk.

Германскиот канцелар Фридрих Мерц во Минхен призна дека чувствува „сè поголема непријатност“ затоа што Европската Унија не успева да постигне значаен напредок во пристапните процеси со земјите од Западен Балкан и соседството.

– Мораме да осмислиме нова стратегија за да ги доближиме овие земји до ЕУ. Не сакам да ве изгубам – порачал Мерц откако дебатата ја отвори претседателот на Црна Гора на Минхенската безбедносна конференција. 

Главна кочница, според него, е принципот на едногласност во Унијата, односно правото на вето на земјите членки. Мерц посочи дека постојаното блокирање од страна на Унгарија станало „слон во собата“. Изразил надеж дека тоа ќе се надмине.

– По изборите што ќе се одржат во април, се надеваме дека ќе можеме да ги отвориме следните поглавја и да ви се приближиме уште повеќе кон Европската Унија – заклучил тој.

Процесот на проширување на ЕУ со Западниот Балкан останува под знак прашалник.

Во текот на 2024 и 2025 година, унгарскиот премиер Виктор Орбан повеќепати сигнализирал дека нема автоматски да поддржи забрзано членство на Украина, имплицитно најавувајќи вето. Орбан неодамна изјави дека земјите членки ги поставуваат правилата на игра, велејќи дека членството на Украина би значело безбедносен и финансиски ризик за Унијата.

The post НЕ САКАМ ДА ВЕ ИЗГУБАМ, УНГАРИЈА Е СЛОНОТ ВО СОБАТА На Мерц му е непријатно што Западен Балкан уште не е во ЕУ appeared first on plusinfo.mk.

Сериозен инцидент се случи во северниот дел на Минхен, во кој најмалку едно лице загина, а неколку се повредени.

Според полицијата, имало пукање и експлозии на улицата Лерхенауер. Специјалните сили и екипите за деактивирање бомби се на местото на настанот.

Полицијата го пронашла телото на маж осомничен дека поставил експлозиви во куќата на своите родители, ја запалил, а потоа извршил самоубиство. Друго лице е пронајдено со прострелни рани, објави Билд.

Multiple explosions reported in #Munich, #Germany — #Bild – #Breaking

Large police & fire department presence in the area, gunshots also reportedly heard

A man allegedly rigged his parents’ house with explosives, set it on fire & took his own life pic.twitter.com/pjYQPrQZgd

— Siraj Noorani (@sirajnoorani) October 1, 2025

На фотографиите може да се забележи комбе кое е целосно изгорено, додека полицијата и екипите за деактивирање бомби работат на обезбедување на областа.

Сведоци велат дека детонациите се слушале на километри оддалеченост, а атмосферата на местото на настанот е напната, сирените се вклучени, а граѓаните се во шок.

Голем дел од областа е блокиран, а жителите и возачите се повикани да го избегнуваат. Сведоците велат дека може да се види голем облак чад, додека точните околности сè уште се истражуваат.

Полицијата соопшти дека нема опасност за јавноста и дека инцидентот не е поврзан со Октоберфест.

The post 📷 ЕКСПЛОЗИИ И ПУКАЊЕ ВО МИНХЕН Сè е блокирано, распоредени се специјални единици и експерти за бомби appeared first on plusinfo.mk.