Прашањето се наметна откако денеска не е постигнат никаков договор за плаќање на долгот на средбата на приватните превозници со претставници на Град Скопје. Средбата се случи откако и вториот приватен превозник „Слобода превоз“ одлучи да не ги пушти автобусите на договорените линии со образложение дека поради долгот на ЈСП кон нив нема пари да набавува нафта за нормално работење. Претходно и превозникот „Макексперс“ поради истите причини престана да сообраќа во Скопје, по што Градот му го раскина договорот, а не го исплати ниту долгот кон приватниот превозник.

Познавачите на состојбите велат дека без приватните превозници јавниот превоз во Скопје тешко ќе може да се реализира, без да има хаос, застои и турканици.

– На ЈСП ќе му требат дополнителен број автобуси, веројатно уште околу 200, за да може да ги одржува сите линии. Според тоа, нема шанси со сегашниот број автобуси ЈСП сам да одговори на задачата, бидејќи во секое време треба да одговори на задачата. Тоа подразбира да ги има потребните автобуси во шпицовите, а тоа нема да го има со сегашниот број возила со кои располага. Тоа ќе биде голем проблем за градот бидејќи ќе има секојдневни реакции од граѓаните и турканици во шпицовите. Не знам кои се причините зошто не се намируваат обврските кон приватните превозници, но може да се сведе на две работи. Едната е дека нема пари за намирување на долгот и втората дека приватните превозници не ги исполниле своите обврски од договорот. Кој и да е, претстаува проблем за јавниот превоз во Скопје – вели поранешниот директор на ЈСП Игор Јанушев.

Според него, ако сите ги почитуваат договорените обврски нема да има вакви проблеми.

– ЈСП треба редовно да ги исплаќа договорените износи, а приватните превозници да не фактурираат нешто што не сработеле. Ние поставивме систем кој може да го следи целиот сообраќај и доколку се користи нема да има обвинувања ниту од една страна – додава Јанушев.

Двата приватни превозника тврдат дека ЈСП односно Град Скопје им должи близу 2 милиони евра за реализираниот превоз и не го почитува договорот за авансно плаќање на договорената сума пресметана по изминат километар. Тоа, тврдат тие, ги довело во ситуација да не можат да исплатат плати на вработените и да обезбедат гориво за нормално работење.

Претставници на двете компании денеска имаат одделни средби со претставници на Градот. Ленин Јовановски од „Слобода превоз“ по состанокот изјави дека нема никаков договор за начинот на исплата на долгот и најверојатно ќе се чека новиот буџет на Градот за да се реши проблемот.

– Ништо не се договоривме. Само се информиравме за состојбата, а од Градот не ветија ништо. Мој заклучок е дека ќе се чека следниот буџет па нешто да почне да се реализира. Ние имаме неплатен долг и очекуваме да се намири. Градот ни должи над 1,36 милиони евра, што е голема сума и нема објаснување зошто ЈСП не ги плаќа парите иако само од ученичките слободни карти има сигурна наплата од државата. Не ни беше кажано и зошто воопшто се доцни со наплатата и како се планира да се реши проблемот. Ние не фактурираме нешто што не сме го изработиле и нема причина градот и ЈСП да не го завршат својот дел. Досега нема ниту забелешки на нашето работење и затоа е чудно зошто и покрај тоа што се наплаќаат пари од билети нема пари за нас, приватните превозници – изјави Јовановски за Плусинфо.

Тој додава дека дополнително денеска превозниците ќе се состанат и ќе решат како ќе реагираат понатаму.

Милорад Димитриевски од „Макекспрес“ пред средбата изјави дека очекува објаснување за две прашања поврзани со работењето на овој превозник.

– Имаме две прашања за кои ќе разговараме – начин на исплата на долгот и за раскинатиот договор. Од тоа што ќе се договориме ќе зависи дали ќе продолжиме да возиме низ градот – вели Димитриевски.

Тој додава дека ЈСП на „Макекспрес“ му должи 500.000 евра.

Од Градот, пак, не коментираат за долгот на ЈСП кон превозниците, туку главно се фокусираат кон обврските кои приватните превозници ги презеле со договорот, а не ги исполнуваат. Оттаму, соопштија дека линиите денеска ги одржува ЈСП со свои автобуси и дека моментално се врши процена на работењето на приватните превозници согласно индикаторите за квалитет на работењето (редовност, хигиена, валидација на билети).

Една од причините за раскинување на договорот со „Макекспрес“ беше токму непочитување на договорот за обнова на возниот парк и нереализирањето на договорените линии.

Молчи и ЈСП од каде што нема одговор за причините поради кои нема пари за приватните превозници иако во касата на претпријатието се слеваат пари од билетите. Инаку, ЈСП со години има финансиски проблеми но до пред некое време редовно ги намируваше обврските кон јавните превозници. Градот пред еден месец му одобри 2 милиони евра со цел да се намират платите на вработените кои штрајкуваа, но дел од парите веројатно требаше да се искористат и за намалување на долгот кон приватните превозници.

Претседателот на Советот на Градот Трајко Славески вели дека Советот нема ингеренции за приватните превозници, но може да реагира ако има потреба да се помогне ЈСП. Досега нема добиено никаква информација дека претпријатието е во финансиски проблеми.

– Доколку градоначалничката Данела Арсовска достави некаков предлог за разрешување на финансиските проблеми на ЈСП, Советот секако ќе расправа за него. Но ние немаме ингеренции за решавање на проблемот на приватните превозници. Советот пред еден месец донесе одлука за префрлање на 2 милиони евра на ЈСП кога протестираа вработените бидејќи не добиле плата и тие пари се доволни за 3 плати на вработените. Зошто ЈСП не ги плаќа редовно парите на приватните превозници ние не сме информирани – вели Славески.

Превозниците на почетокот на годината потпишаа нов договор со градоначалничката Арсовска со рок на важење од 2 години со кој треба да одржуваат одреден пакет линии за кои добија и дозволи за линиски превоз на патници во град Скопје. Обврска на Градот е преку ЈСП да им исплаќа пари за реализиран сообраќај по километар.

Приватните превозници беа вклучени во јавниот градски превоз, официјално со потпишување договор во времето кога Коце Трајановски беше градоначалник на Скопје.

The post АРСОВСКА И ПРИВАТНИТЕ ПРЕВОЗНИЦИ ВО ЌОРСОКАК Може ли Скопје да издржи без приватниот превоз? appeared first on plusinfo.mk.

Милорад Димитриевски, еден од сопствениците на компанијата која учествува во реализацијата на јавниот автобуски превоз во Скопје, вели дека прво ќе се жалат на одлуката на Градот, а потоа ќе поднесат тужба до надлежниот суд.
– Нема основа за раскинување на договорот од страна на Град Скопје. Ние намерно и самоиницијативно не го прекинавме одржувањето на линиите, туку бевме принудени на тоа бидејќи Градот и ЈСП навреме не ги плаќаа договорените суми пари од реализираниот превоз. Поради големиот долг и ненавремената исплата бевме доведени во ситуација да не можеме да набавуваме гориво, да исплатиме плати и да регистрираме дел од автобусите за кои беше дојден периодот на пререгистрација. Тоа беше и причина што нашите автобуси не ги реализираа линиите – вели Димитриевски.
Градот му должи на „Макекспрес“ 500.000 евра, но како што вели Димитриевски, тие никогаш не барале долгот да се плати одеднаш. Сега Градот ќе треба да го исплати.
– Со оглед на моменталната состојба не очекувавме наеднаш да ни биде платен долгот. Бевме договорени тоа да се направи на рати, но неделните аванси да се исплаќаат навреме за да можеме да возиме. Но тоа не се случи и западнавме во криза – додава Димитриевски.
Според него, во договорот со Градот не е предвидена обнова на возниот парк како што тврди Градот.
– Нема клаузула во договорот дека ние треба возилата да ги обновиме во одреден рок. Да, нашите возила се од постара генерација, ама сите ги исполнуваат условите за добивање лиценца, и ги поседуваме лиценците, кои патем да кажам, ги издава Град Скопје. Значи и тука нема основа за раскинување на договорот – вели Димитриевски.
Тој се согласува дека во последен период не се реализирале целосно линиите бидејќи немале пари за гориво.
– Тврдат дека не сме реализирале 80 отсто од една линија, но како да ја реализираме, ако не ги исплаќаат парите кои ги користиме за набавка на гориво? Кога редовно ги плаќа неделните аванси нашата реализација се движеше од 96 до 99 отсто. Според договорот ЈСП требаше да ни исплаќа аванс за 70 отсто од реализираната километража во претходната недела и на крајот на месецот со фактурата да доплати уште 30 отсто. Но тоа со месеци не се случува – вели Димитриевски.
Тој се надева дека проблемот има шанса да се реши, но ако не се случи тоа ќе бидат принудени да тужат.
„Макекспрес“ возеше на линиите 19, 20, 22, 52 и 54 каде што врши превоз со 77 автобуси во три смени.
Од Град Скопје соопштија дека на овие линии сега ќе вози ЈСП.

The post „МАКЕКСПРЕС“ ЌЕ ГО ТУЖИ ГРАДОТ СКОПЈЕ Арсовска нема основа да го раскине договорот, тврдат приватните превозници appeared first on plusinfo.mk.

ЈСП на „Слобода превоз“ ѝ должи 65 милиони денари заклучно со септември, додека долгот кон „Макекспрес превоз“ за 2,5 месеци изнесува 28 милиони денари, суми кои според договорот треба редовно да се исплаќаат на неделна и месечна основа.

– Договорено е до петок да ја добиеме половината од долгот за изминатите два месеца кој за нашата фирма е 43 милиони денари, а потоа да се воспостави редовна неделна исплата на авансите од 70 отсто од сработеното, исплата на месечните фактури и дополнителна сума на пари од дел од долгот за да може целиот процес да заврши до крајот на годината и во следната година да влеземе со нула долг – вели Ленин Јовановски од „Слобода превоз“.

Доколку ова не се испочитува, вели тој, проблемот кај приватните превозници дополнително ќе се искомпликува. Тие ќе бидат принудени да го намалат бројот на автобуси на линиите во Скопје.

– Во тој случај долгот само кон нас ќе порасне на 65 милиони денари бидејќи и септември ќе биде веќе пресметан. Дел од нашите возачи нема да можат да платат гориво, бидејќи веќе должат за гориво, а имаат и рати за кредити за набавени автобуси. За нас како компанија се доведува во прашање и редовната исплата на платите на возачите. Тоа за нас како компанија е проблем бидејќи ќе мора да се намали бројот на автобуси кои ќе сообраќаат на линиите кои ги држиме. Во услови на криза ние веќе имаме и барања за зголемување на платите, а сме ставени во ситуација да не можеме да ги исплатиме сегашните – вели Јовановски.

Милорад Димитриевски од „Макекспрес превоз“ вели дека компанијата сѐ помалку има пари за нормално работење.

– ЈСП ги нема исплатено обврските кон нас за јули, август и веќе за септември. Досега ни должат 28 милиони денари, а ако се додаде и септември долгот се зголемува. Немаме пари за нормална работа. Цените на горивата, резервните делови, гумите се зголемени за 50 до 80 отсто. Доведени сме во состојба да не можеме да ги исплатиме платите и да наточиме гориво во автобусите – вели Димитриевски.

Јовановски и Димитриевски очекуваат ЈСП и Градот во наредниот период да го реализираат договореното.

– Ние не сме должни да го финансираме ЈСП. Имаме договор кој треба да се почитува иако и според него ние работиме под економската цена. Неделно треба да ни се исплаќа аванс од 70 отсто од остварената работа, а потоа остатокот да се регулира преку фактура. Во меѓувреме, ЈСП треба да ги засили контролите бидејќи граѓаните одбегнуваат да ги користат валидаторите, односно не плаќаат билети за превоз – вели Јовановски.

Приватните превозници очекуваат да се промени и пресметката на надоместокот за извршен линиски превоз, бидејќи сите влезни трошоци се зголемени неколкукратно.

– Со градоначалничката договоривме посебна комисија од одделот за сообраќај да го анализира проблемот и да направи пресметки во кои ќе влезат новите цени на горивата и другите репроматеријали. Ако се вклопуваат во следниот буџет да бидат и прифатени – вели Јовановски.

Моментално, според одлуката на Град Скопје, надоместокот за извршени услуги во линискиот превоз на патници, по критериумот – остварен километар изнесува едно евро по километар.

The post ЈСП ГИ ОСТАВИ БЕЗ ПАРИ ПРИВАТНИТЕ ПРЕВОЗНИЦИ Половина од долгот треба да го плати до петок appeared first on plusinfo.mk.

– Вчера направивме напор да обезбедиме гориво за дел од автобусите кои сообраќаат на линиите 19 и 20 и од денеска најголемиот дел од автобусите веќе сообраќаат за да нема застој во превозот и за овие граѓани – вели Милорад Димитровски директор на „Макекспрес“.

Вчера претставници на двата приватни превозника имале средба во Град Скопје каде што им било ветено дека денеска ќе им биде исплатен дел од долгот за месец март, додека од следната недела ќе почне редовната исплата на авансите за гориво.

– Очекуваме денеска по 12 часот да имаме дел од парите, а колку тие ќе бидат ќе зависи од тоа колку ќе реши Градот. Ни беше ветено и дека од следната недела редовно ќе се врши авансната исплата за гориво, но ќе видиме како ќе течат работите – вели Димитриевски.

Ленин Јовановски од „Слобода превоз“ се надева дека половина од фактурата за март која изнесува 25 милиони денари ќе биде платена денеска.

– Според она што го договоривме вчера, остатокот од фактурите за март, април и за мај ќе се исплаќаат според финансиските можности на Градот, а целосно ќе се покријат со ребалансот на буџетот кој треба да се донесе на крајот на месецов – вели Јовановски.

Долгот на Град Скопје кон двете претпријатие изнесува 85 милиони денари од кои кон „Слобода превоз“ се 55 милиони денари за три месеци и кон „Макекспрес“ вкупно 30 милиони денари.

Освен редовното исплатување на фактурите, двете претпријатија вчера побарале и ревидирање на појдовните цени во пресметката за поминат километар.

– Веќе подолг период имаме проблем со зголемените трошоци кои влегуваат во основните пресметки за поминат километар. Бараме редовно да се ревидираат цените на параметрите кои влегуваат во тој километар, бидејќи сега само промената на цената на горивото се менува, а цените на останатите параметри се останати на нивото од 2017 година кога е потпишан првиот договор со приватните превозници. Само за пример, моторното масло како еден од параметрите тогаш е прифатено со цена од 90 денари, а денешната цена е 230 денари. Промена на цените од 50 до 100 отсто има и кај другите параметри, па логично е и тие трошоци да се пресметуваат по реална цена, а не по цена од 2017 година. Дополнително, треба да се направи и разлика во пресметките кај полесните и потешките линии каде што трошоците за амортизација и за гориво се различни – вели Јовановски.

Според договорот од 2017 година, приватните јавни превозници добиваат по 1 евро за поминат километар.

Превозниците се надеваат и на субвенции за да можат да инвестираат во нови превозни средства и да ги активираат веќе набавените 20 еколошки автобуси. Тие очекуваат постепено да се решат и проблемите со преоптоварените линии, но сето тоа треба да се направи со нови разговори со Градот.

Моментално, велат немаат проблем со кадарот, но се свесни дека поради ниските плати мал е бројот на млади кои сакаат да бидат возачи во јавен превоз.

– Проблемот со недостиг на возачи го премостуваме со возачите кои ги имаме на располагање, но факт е дека младите не сакаат да работат за ниски плати олку одговорна работа, а дел од сегашниот кадар размислува за заминување во странство – додава Јовановски.

The post ДЕНЕСКА ЌЕ ЛЕГНЕ ДЕЛ ОД ДОЛГОТ НА ГРАДОТ Автобусите се вратија на линиите 19 и 20 appeared first on plusinfo.mk.