Доли Партон и Мајли Сајрус беа поврзани со посебна семејна и музичка врска која траеше повеќе од три децении. Кантри-легендата ѝ беше кума на Мајли, ја следеше уште од нејзиното раѓање, ја поддржуваше во различни периоди од животот и кариерата, а двете соработуваа и на повеќе музички и телевизиски проекти.

Сè започнало благодарение на таткото на Мајли, Били Реј Сајрус. На почетокот на 90-тите, кога неговиот хит „Achy Breaky Heart“ стана огромен успех, тој ја запознал Доли и заминал со неа на турнеја. Брзо станале блиски пријатели, а кога дознал дека со сопругата Тиш го очекуваат своето прво дете, имал посебна молба до кантри-легендата – да му биде кума на девојчето.

Доли без размислување прифатила. Мајли Реј Сајрус е родена на 23 ноември 1992 година. Партон подоцна повеќе сакала да се нарекува „самовилска кума“ на Мајли, а не обична кума. Таа раскажувала дека ја сакала уште од мала и дека многу рано забележала дека девојчето има нешто посебно.

– Отсекогаш ја сакав, уште кога беше мала, и знаев дека е посебна. Имаше некаква светлина во себе – зборуваше Доли за своето кумче.

Кога Мајли стана ѕвезда на серијата „Hannah Montana“, Доли имала можност одблизу да го следи нејзиниот талент. Таа била воодушевена од нејзиното чувство за комедија и настап и била убедена дека пред себе има идна голема ѕвезда.

Нивната вистинска врска тогаш се преселила и на телевизиските екрани. Доли се појави во „Hannah Montana“ како тетка Доли, блиска членка на семејството на Мајли Стјуарт. Таа гостуваше во три епизоди од серијата, од 2006 до 2010 година, па така ја запозна и целосно нова, помлада генерација гледачи.

Доли никогаш не го криела задоволството од успехот на своето кумче. Но, не сакала да биде личноста која ќе ѝ кажува на Мајли како треба да живее.

– Повеќе би сакала да бидам пример отколку да се обидувам да ѝ кажувам дека мора да направи ова или она. Сите сме различни – објаснила Партон.

Особено важна поддршка ѝ била на Мајли во периодот кога таа се обидувала да избега од имиџот на детската ѕвезда на „Disney“. По завршувањето на „Hannah Montana“, нејзината трансформација стануваше сè порадикална, а во 2013 година со албумот „Bangerz“, провокативните настапи и новиот имиџ предизвика огромни реакции.

Додека многумина ја критикуваа Мајли, Доли беше меѓу оние кои ја разбираа. Сметаше дека јавноста тешко прифаќа дека девојчето кое го запознала како Хана Монтана пораснало и дека Мајли морала да направи нешто драстично за да покаже која е сега.

Наместо да ѝ го наметнува својот пат, Доли сметала дека Мајли има право сама да го изгради својот. Партон својата кариера ја изградила на свој начин, па верувала дека истото право го има и нејзиното кумче.

Со текот на годините нивната блискост стануваше сè повеќе и музичка. Мајли често изведуваше песни на Доли, а особено ја сакаше „Jolene“. Двете повеќепати ја изведувале песната заедно.

Во 2017 година снимија дует „Rainbowland“ за албумот на Мајли „Younger Now“. Песната зборува за прифаќањето, различностите и свет во кој луѓето би можеле да живеат заедно без оглед на тоа што ги разделува.

Три години подоцна повторно соработуваа, овојпат на песната „Christmas Is“, која се најде на божиќниот албум на Доли „A Holly Dolly Christmas“ од 2020 година.

Еден од нивните највпечатливи заеднички настапи се случи во новогодишната телевизиска емисија на Мајли со која заедно ја дочекаа 2023 година. Мајли почна да ја пее својата голема песна „Wrecking Ball“, а изведбата премина во песната на Доли „I Will Always Love You“.

Miley Cyrus & Dolly Parton singing I Will Always Love You x Wrecking Ball. Their last performance together and one of the greatest performances ever. pic.twitter.com/iM3qprfapq

— Miley Official (@MileyCyrusBz) August 26, 2026

Во 2023 година Доли повторно ја вклучи Мајли во свој проект, овојпат за нејзиниот рок-албум „Rockstar“. Двете снимија нова верзија на „Wrecking Ball“, песна која првично е на Мајли.

Нивната последна голема студиска соработка дојде во 2026 година, кога Мајли ѝ се придружи на Доли, Реба Мекинтајр, Лејни Вилсон и Квин Латифа во новата верзија на песната „Light of a Clear Blue Morning“.

Мајли во повеќе наврати зборувала за тоа колку ѝ значи Доли, не само како кума туку и како пример и ментор. Партон, пак, до последните години со гордост ја следеше нејзината кариера.

Уште во 2010 година Доли рекла дека Мајли всушност и нема потреба од нејзини совети.

– Јас сум нејзината самовилска кума. Многу сум горда на неа. Не ѝ треба мојот совет, но често ме прашува за информации и совети, па ѝ го кажувам она што го знам. Мислам дека и без мене ѝ оди сосема добро – рекла тогаш Партон.

Дури и враќањето на „Hannah Montana“ во центарот на вниманието по повод 20-годишнината од серијата годинава на некој начин било поврзано со совет што Мајли го добила од Доли. Сајрус открила дека од неа научила необичен деловен трик – ако нешто многу сакаш да оствариш, почни да го промовираш пред воопшто да постои, па на другите ќе им биде потешко да ти кажат „не“.

Мајли така почнала јавно да зборува за специјалот по повод 20 години „Hannah Montana“ уште пред проектот официјално да биде договорен. На крајот тој навистина бeше реализиран и почна да се прикажува во март годинава. Доли тогаш повторно се присети на времето кога нејзиното мало кумче станало Хана Монтана и кажа колку била горда додека ја гледала во серијата.

Во текот на повеќе од три децении нивниот однос ги поминал речиси сите фази од животот на Мајли – од девојчето кое Доли го следела благодарение на пријателството со Били Реј, преку тинејџерската ѕвезда на Disney и турбулентните години на нејзиното растење пред очите на јавноста, до пејачката наградена со „Греми“ која изградила целосно сопствен идентитет.

Иако Доли немаше свои деца, често зборуваше дека можеби токму затоа можела да биде присутна во животите на многу деца од нејзиното големо семејство. Мајли меѓу нив имала посебно место.

По смртта на Доли на 25 август, обожавателите почнаа да оставаат пораки на профилот на Мајли Сајрус, потсетувајќи на нивната врска која траеше повеќе од 30 години.

The post 🎥 ДОЛИ И МАЈЛИ, ПОСЕБНА ВРСКА ДОЛГА ТРИ ДЕЦЕНИИ Партон ѝ беше кума, ментор и голема поддршка appeared first on plusinfo.mk.