– Оној што го исклучува Западниот Балкан, ја ослабува Европа. Ние се заложуваме и ќе продолжиме да се заложуваме за тоа уште во декември да почнат преговорите. Тоа е нашето барање и тоа барање го поставуваме пред нашите партнери во Европската Унија и тоа интензивно – порача вчера австрискиот министер за европски и меѓународни работи Михаел Линхарт на заедничката прес-конференција со шефот на дипломатијата Бујар Османи во Скопје.

Министерот Османи, пак, истакна дека земјава се наоѓа во еден исклучително важен период за својата европска интеграција и на целиот регион.

– Му кажав на министерот дека во Северна Македонија и во нашето досие лежи клучот за деблокирање на целиот регион, бидејќи оттука треба да почне деблокирањето на регионот преку започнување преговори со Северна Македонија и Албанија што потоа ќе ги охрабри и другите држави да ги решат споровите со цел регионот да се движи во европски правец и да стане дел од ЕУ –  рече Османи.

Тој додаде дека декември сѐ уште останува добар прозорец за отпочнување на преговорите со ЕУ, што е многу важно, не само за нашата приказна, туку за кредибилитетот на европската иднина, но вели, тоа ќе зависи од тоа дали во Софија ќе биде избрана нова влада.

– Се надевам дека ќе биде декември, но тоа ќе зависи дали Република Бугарија ќе има нова влада и дали тие може да донесат одлука и добра одлука. Како што гледав вчера, 26 земји членки на ЕУ мислат дека токму декември е моментот кога треба да се започнат преговорите за нашата држава. И не само земјите членки, но во институциите на ЕУ го гледав ова, овој став дека декември треба да е токму овој период и дали тоа ќе биде месец дена пред, после тоа, тоа ќе зависи од кога Република Бугарија ќе има нова влада – додаде Османи.

Во однос на дијалогот со Бугарија, шефот на дипломатијата цени дека од Софија по изборите доаѓа најава за еден порационален пристап дека фокусот на односите меѓу двете земји треба да биде на сегашноста и иднината, а помалку на минатото, а тоа е, вели, и решението за разликите.

– Јас не би влегол во толкување на ставот на лидерот на победничката партија во Република Бугарија, меѓутоа мислам дека целиот тон оди во еден порационален пристап, дека сепак фокусот на односите со Република Бугарија треба да биде за сегашноста и за иднината, а помалку за минатото. И мислам дека тоа е решението и на разликите и доколку само го менуваме пристапот во тој правец, леќата да ја свртиме кон сегашноста и иднината ќе видиме дека сите прашања се лесно надминливи и ќе можеме да почнеме заеднички да се движиме кон едно трајно, одржливо добрососедство и заедничка европска перспектива, но и перспектива во Сојузот на НАТО во којшто сме заедно – рече Османи.

И лидерот на опозициската ВМРО-ДПМНЕ, Христијан Мицкоски, смета дека македонскиот народ заслужува датум за почеток на преговори и големо ќе биде разочарувањето ако и во декември нема датум. Според него, барањето за предвремени парламентарни избори и датумот за почеток на преговори со ЕУ не се поврзани, затоа што избори треба да има што поскоро, бидејќи, вели, владата на Заев беше делегитимирана.

– Јас сум оптимист за декември и сакам да се случи датумот, овој народ го заслужува тој почеток на преговори. Не е прашање дали Димитров ќе ги брои неделите или месеците кога ќе се случи тој датум. Во Брисел треба се состане Европскиот совет, да заборави на уцените кои доаѓаат од кај нашиот источен сосед и иднината која што треба заеднички да ја градиме во Европа да ја градиме, а не да се враќаме два века наназад – изјави Мицкоски.

Даниел Лорер од коалицијата „Промената продолжува“, кој се смета за најсериозен кандидат за министер за надворешни работи во новата влада во Софија, смета дека 14 декември не е реалистичен рок за постигнување на целосен договор со Северна Македонија. Како што јави дописникот на МИА од Софија, според Лорер ако биде оставена единствено историјата да ги движи преговорите меѓу Бугарија и Северна Македонија, тоа нема да биде доволно добар резултат и за двете страни и додава, дека ќе бидат отворени и дополнителни дискусии во однос на економскиот напредок меѓу двете земји.

– Почитувањето на правата на македонските Бугари е од првостепено значење, рече тој и посочи дека претстојат преговори врз база на факти, а не на шпекулации доколку тие права биле повредени. А разговорите за историјата ќе се движат напоредно, така што и Софија и Скопје ќе бидат задоволни – додаде Лорер во изјава за „БТВ“ радио.

Тој оцени дека заедничката историска комисија меѓу Скопје и Софија не предлага напредок и двете страни се чувствуваат незадоволни од тоа што се случува и треба да биде пронајдена нова формула. Нејзина функција, вели тој, треба да биде за да помага, но не да биде и единствена во тој процес.

Македонски и бугарски политички аналитичари и познавачи на состојбите на Балканот во анализа за МИА оценуваат дека победничката коалиција на изборите во Бугарија, Промената продолжува (ПП) има капацитет и визија за формирање влада, но ги чекаат тешки преговори со коалициските партнери – Бугарската социјалистичка партија (БСП), Демократска Бугарија (ДБ) и Има таков народ (ИТН). Сепак, оценката е дека новата влада не се очекува пред крајот на декември, што го стеснува просторот за повлекувањето на ветото за страт на преговорите на земјава со ЕУ до крајот на годинава и покрај најавениот нов пристап во разговорите со Скопје.

The post ЌЕ ПРОПАДНЕ И ДЕКЕМВРИ ЗА ПОЧЕТОК НА ПРЕГОВОРИ СО ЕУ Европа притиска, ама на Софија ѝ треба време appeared first on plusinfo.mk.

– Оној што го исклучува Западниот Балкан, ја ослабува Европа. Ние се заложуваме и ќе продолжиме да се заложуваме за тоа уште во декември да почнат преговорите. Тоа е нашето барање и тоа барање го поставуваме пред нашите партнери во Европската Унија и тоа интензивно, порача Линхарт.

Тој оцени дека започнувањето преговори во декември не е важно само за Северна Македонија и за Албанија, туку тоа може да има позитивни влијанија и за целиот регион на Западен Балкан.

Линхарт посочи дека се додека земјите од Западен Балкан не се членки на Европската Унија, се дотогаш ЕУ не го завршила интегрирањето и оти Западниот Балкан е дел од Европа.

– Северна Макеоднија е типичен пример за кандидат во ЕУ. Затоа Австрија и натаму ќе се заложува за почеток на преговорите со Северна Македонија, порача шефот на австриската дипломатија.

Според него, силата и благосостојбата на Западен Балкан, значи сила и благосостојба за цела Европа.

– Сакаме да им дадеме на луѓето во Западен Балкан европска перспектива. За таа цел е неопходно да го поттикнеме процесот на интеграција, а за таа цел треба веднаш уште сега во декември да почнат преговорите со Северна Македонија и со Албанија. Овие земји треба да ги врземе за ЕУ со уште поактивни мерки. Тоа се мерките на Еразмус, институциски мерки со цел земјите на Западен Балкан да бидат слушнати во Брисел уште појасно. Успеавме да зборуваме со земјите од Западен Балкан за иднината на Европа, бидејќи е важна европската перспектива за луѓето од Западен Балкан – дециден е Линхарт.

Министерот Османи, од своја страна, истакна дека Австрија е еден од најсилните поддржувачи на интегрирањето на Западен Балкан во Европската Унија.

– Ставот на Виена е дека Европа не е комплетирана без Западниот Балкан да е дел од Европската Унија и ние сме благодарни за тој став. Се наоѓаме во еден исклучително важен период за европските интеграции на државата и на целиот регион. Му кажав на министерот дека во Северна Македонија и во нашето досие лежи клучот за деблокирање на целиот регион, бидејќи оттука треба да почне деблокирањето на регионот преку започнување преговори со Северна Македонија и Албанија што потоа ќе ги охрабри и другите држави да ги решат споровите со цел регионот да се движи во европски правец и да стане дел од ЕУ, рече Османи.

Тој додаде дека декември сѐ уште останува добар прозорец за отпочнување на преговорите со ЕУ.

– Зборувавме за декември, како еден добар прозорец за можноста и потребата за концентрирање на целокупната домашна, регионална и европска енергија во правец на искористување на оваа можност што е многу важна, не само за нашата приказна, туку за кредибилитетот на европската иднина, рече Османи.

Шефот на дипломатијата оцени дека ова е период кога ќе се детерминира и европската иднина за Македонија.

– Јас се надевам дека ќе биде декември, но тоа ќе зависи дали Република Бугарија ќе има нова влада и дали тие може да донесат одлука и добра одлука. Како што гледав вчера, 26 земји членки на ЕУ мислат дека токму декември е моментот кога треба да се започнат преговорите за нашата држава. И не само земјите членки, но во институциите на ЕУ го гледав ова, овој став дека декември треба да е токму овој период и дали тоа ќе биде месец дена пред, после тоа, тоа ќе зависи од кога Република Бугарија ќе има нова влада, додаде Османи на заедничката прес-конференција со шефот на австриската дипломатија Линхарт, кој е во официјална посета на земјава.

The post ВЕРУВАМЕ ДЕКА ПРЕГОВОРИТЕ ЌЕ ЗАПОЧНАТ ВО ДЕКЕМВРИ Европа е слаба без Западен Балкан appeared first on plusinfo.mk.