Премиерот Виктор Орбан остро ѝ се спротивстави на Европската Унија, порачувајќи дека Унгарија нема да прифати ниту еден мигрант сè додека на власт има патриотска влада.

– Брисел издаде наредба. Миграцискиот пакт се активира. Би сакал еднаш засекогаш да бидам јасен: сè додека Унгарија има патриотска Влада, нема да го примениме пактот за миграција – изјави Орбан во видео порака објавена на Фејсбук, пренесува унгарската новинска агенција МТИ.

Со оваа порака, Орбан повторно ја потврди долгогодишната позиција на Будимпешта против заедничката миграциска политика на ЕУ.

– Ние нема да прифатиме мигранти и нема да дадеме ниту едно евро за тоа – категорично рече тој.

Миграцискиот пакт на Европската Унија, кој треба да почне да се применува во јуни 2026 година, предвидува нови правила за управување со приливот на мигранти, како и праведна распределба на одговорностите меѓу земјите членки. Брисел тврди дека пактот ќе создаде „балансиран систем на солидарност“, но неколку држави, меѓу кои и Унгарија, сметаат дека мерките се наметнати и го поткопуваат националниот суверенитет.

Орбан веќе најави дека неговата влада ќе продолжи да ја брани унгарската граница и дека нема да дозволи европски институции да одлучуваат за тоа кој може да влезе во земјата.

The post ДОДЕКА СУМ ПРЕМИЕР, МИГРАНТИ ВО УНГАРИЈА НЕМА ДА ИМА Жестока порака на Орбан до Брисел appeared first on plusinfo.mk.

Еден од водечките американски политички коментатори, Ден Бонџино, на својата интернет страница објави текст за злоупотребите на програмите на УСАИД за поттикнување на огромниот мигрантски бран во 2015 и 2016 година во Европа, како и за поттикнување на Шарената револуција во Македонија во 2015 година.

Во текстот, кој е потпишан од новинарот Мет Палумбо, се опишува како канцеларијата на УСАИД во Македонија плаќала стотици илјади долари на организации кои лобирале европската граница да остане отворена за милионските маси мигранти од Блискиот Исток и средна Азија.

Во текстот е наведено дека Сорос финансираше невладини организации да им помагаат на илегалните доселеници да ги поминуваат границите.

„За време на мигрантската криза во Европа во 2015 и 2016 година, Македонија беше жешка точка. Крајно левата грчка Влада ги пренесуваше мигрантите кои доаѓаа на нејзините острови од Турција до европското копно, а потоа со воз ги носеше до границата со Македонија. Само во 2015 година низ оваа рута поминаа 600.000 мигранти. Целото време Сорос беше во заднината, и го подготвуваше масовното движење на мигрантите низ државата. УСАИД финансираше програми преку грантови кои беа доделувани на левичарски организации. Една од нив, Македонското здружение за млади правници, доби 370.000 долари во 2016 година да ги брани човековите права на мигрантите и бегалците и да ги задоволува потребите на најранливите меѓу нив“, се наведува во текстот на порталот на Ден Бонџино, кој е еден од најмасовно гледаните десничарски коментатори во САД, ѕвезда на мрежата Рамбл и значаен медиумски поддржувач на политиките на претседателот Доналд Трамп.

Овие пари, се додава, беа користени за логистичка поддршка на мигрантите, да им се помогне да се пополнат скудните документи кои се бараа од нив, и да се врши притисок врз државите да ги сменат своите правила за азил и тие да се применуваат не само на мал број поединци, туку на огромна маса луѓе.

Во текстот се наведува и дека СДСМ и Сорос, со поддршка на УСАИД, ги финансирале групите кои ја почнаа Шарената револуција во 2015 година, „исто како што Сорос стори и во Украина и во многу други држави, при што дипломати од администрацијата на Обама ги поддржуваа нивните протести“. Се наведуваат дел од проектите кои УСАИД ги финансираше во Македонија, но и користењето на активисти од левичарските организации за пропагандни цели. Па така, се спомнува примерот на Јасмина Голубовска, вработена во друга организација за поддршка на масовната миграција во Европа, „Легис“, која беше прогласена за хероина на Шарената револуција, откако беше фотографирана како се шминка користејќи полициски штит како огледало – потег што редовно се користи при обоените револуции ширум светот.

„Протестите доведоа до избори во 2017 година и на жалење на Сорос и друштвото, ВМРО-ДПМНЕ сепак освои најмногу пратенички места, бидејќи партискиот лидер водеше кампања за „десороизација на земјата“. За да го спречат да формира коалиција, имаше притисок врз албанските партии да не коалицираат со нив и наместо тоа да се приклучат на СДСМ. Тогаш владата предводена од СДСМ одобри голем број историски отстапки кон Грција и кон Бугарија кои го блокираа членството на Македонија во НАТО и нејзините први чекори кон членството во ЕУ. Македонскиот народ ја отфрли оваа промена на името, па затоа Сорос мораше да ја присили. За жал на империјата на Сорос, ВМРО-ДПМНЕ ја врати власта во 2024 година“, се наведува во текстот.

Како потврда на поврзаноста на проектите на УСАИД и фондацијата Сорос, во текстот на страницата на Ден Бонџино се претставува користењето на маиците со натпис „Армија на Сорос“ од страна на шарените активисти, вклучително и од новинарот Борјан Јовановски, кој беше дел од крупен медиумски проект финансиран од страна на УСАИД – емисијата „Контравести“. Се споменува и Павле Богојевски, најпрепознатливиот активист на Шарената револуција, кој беше дел од Хелсиншкиот комитет, кој добиваше пари од УСАИД за спроведување на проекти за ЛГБТ прашања.

The post БОНЏИНО ПОТСЕТИ КАКО УСАИД И СОРОС ЈА ФИНАНСИРАА ШАРЕНАТА РЕВОЛУЦИЈА И МИГРАНТСКИОТ БРАН „За жал на империјата на Сорос, ВМРО-ДПМНЕ ја врати власта“ appeared first on plusinfo.mk.

Поранешната германска канцеларка Ангела Меркел доби награда за нејзината улога во начинот на кој нејзината земја прифати над 1,2 милиони бегалци и луѓе кои бараат азил во 2015 и 2016 година.

За ова денеска во Женева информираше агенцијата за бегалци на Обединетите Нации, јави ДПА.

„Д-р Меркел покажа што може да се постигне кога политичарите го преземаат вистинскиот курс на дејствување и работат за да најдат решенија за светските предизвици, наместо само да ја префрлат обврската на други”, соопшти Високиот комесаријат на ОН за бегалци (УНХЦР).

Наградата за бегалци Нансен, што УНХЦР ја доделува секоја година, е во вредност од 150.000 долари. Таа го носи името на Фридјоф Нансен, норвешки поларен истражувач и хуманитарец кој ја добил Нобеловата награда за мир во 1922 година.

The post МЕРКЕЛ ЛАПНА НАГРАДА ОД 150.000 ЕВРА НА ГЛАДНО СРЦЕ Поранешната канцеларка одлично се справувала со мигрантската криза appeared first on plusinfo.mk.

Ако претседателот на Европскиот совет, Шарл Мишел, навистина го мисли тоа што го кажа, имено дека постои правна можност за финансирање на ѕидови и бариери на надворешните граници на ЕУ, тогаш Унијата дефинитивно капитулира пред Полска, која ги крши правилата на ЕУ, како и пред Белорусија и Русија, кои го користат случајот за притисок врз Европа.

Без разлика што портпаролот на Брисел потоа прецизираше дека одлуката да не се финасираат ѕидови или бариери на надворешните граници на ЕУ се темели на политичка одлука, а не правна, Унијата и Комисијата повторно се во грешка и се премногу меки и кон источните суверенистички членки и кон надворешните противници на Унијата.

Луѓе оставени на цедило

Како прво, правно гледано Унијата не смее да финансира ѕидови и бариери, односно, да биде дел од, или пак да толерира, незаконско враќање на луѓе од своите граници. Постојат во европски рамки закони околу раководење со мигрантите и границите и постои експлицитна забрана за масовно одвраќање, нешто што земји како Полска, Унгарија, Летонија, Литванија и Данска не го почитуваат и постојано го прекршуваат.

Полска во случајов не крши само договори како членка на ЕУ, туку ја крши и меѓународната Конвенција за бегалците, што значи дека Варшава крши меѓународни и европски договори коишто самата ги потпишала. Не смее да враќа мигранти кон несигурна земја како Белорусија, особено не луѓе кои се од Сирија, Ирак и Авганистан и кои не мигрираат од економски причини, туку од очигледни безбедносни причини. На границата се забележани и огромен број на авганистански жени и деца, за кои Унијата до вчера велеше дека мора да се спасат по секоја цена, а сега ги остава на цедило. Каде е кохерентноста на ЕУ?!

Вториот аспект е хуманитарен. Овие луѓе се во очајна состојба и ним не им се дозволува ни да се вратат назад во Белорусија. Потоа, Полска не дозволува влез на меѓународни организации како УНХЦР или за невладините, со тоа забранувајќи да стигне хуманитарна помош до луѓето кои таму умираат, страдаат и се смрзнуваат. За тоа се одговорни и во Минск, но уште повеќе во Варшава, зашто Полска е важна членка на ЕУ.

Третиот аспект е политички. Се разбира дека Белорусија поддржана од Москва ги користи мигрантите за да изврши притисок врз ЕУ, исто како што правеше и Ердоган, со цел да изнудат пари или да им се намалат санкциите. Но, тоа не е доволен мотив за овие луѓе да се остават на немилост и да се кршат правилата и законите на Унијата. Бројката на луѓе кои во овој момент се наоѓаат во оваа трагична ситуација на белоруска територија не се повеќе 10-15 илјади. Тоа е бројка која за ЕУ, под услов Варшава навистина да сакаше да соработува и да побара помош од Унијата, не претставува навистина никаков проблем лесно да се прими и редистрибуира меѓу членките.

Полска ја инструментализира кризата

Но, Варшава ја инструментализира кризата со цел да ѝ се одмазди на Унијата за најавените санкции поради нејзиното кршење на правната држава и уништување на независноста на судството. Со други зборови, што и да прават Белорусија и Русија не е пострашно од тоа што го прави Варшава, која ги користи мигрантите како инструмент за закана и одмазда, додека во исто време ја зголемува поделеноста во ЕУ и ги брани интересите на источните суверенистички земји-членки во Унијата. Порано вака се однесуваа Турција или Либија на Гадафи, но денес гледаме како тоа отворено го прави членка на ЕУ.

Со ваквиот развој на настаните, што и да се случува во иднина, Лукашенко и Путин веќе го добија натпреварот и ги примораа Полска и ЕУ да паднат на нивно ниво. Полска во случајов демонстрира комплетно отсуство на солидарност и сочувство во однос на луѓето кои бегаат од мизеријата и војната. Полска на овој начин се изневерува самата себеси, како што ја изневерува и својата христијанска верба која толку често ја пропагира и исповеда. Во исто време, целата Унија станува соучесник во криминалното и незаконско прекршување на должноста да им помогне на мигрантите кои се наоѓаат во очигледна опасност.

Колку повеќе Унијата ги игнорира сопствените хуманитарни и законски обврски, толку повеќе ја зајакнува раката на оние кои сакаат да ја инструментализираат кризата од очигледно политички интереси. Законот треба да служи како светилник, како водилка за политичките прашања, а, наместо тоа, Унијата пропаѓа во правен и политички мрак. ЕУ е унија на држави која се базира на правила и ако тоа се изгуби, се губи сржта и суштината на европскиот проект. Станува збор за прашање кое излегува од негираните права на бегалците и кое има врска со самата природа на Унијата. Оттука, во целата работа сериозно греши и самата Комисија водена од Урсула фон дер Лајен, која преголем акцент става на политичките аспекти, кога доволно е само да се побара и обезбеди почитување на законот и на правилата.

Ѕидовите на ЕУ

Во наредните денови ќе се дискутира во Брисел, но машината која се заканува да ја распарчи Унијата дефинитивно е пуштена во погон. Веќе во октомври 12 земји членки испратија писмо до Брисел, каде бараа европски пари за анти-мигрантски ѕидови и бариери. Пред тој притисок Шарл Мишел веќе попушта, засега во Варшава, утре можеби и во Брисел. Комисијата засега се опира и се обидува да ги заштити конститутивните принципи за прием на бегалци на Унијата и она малку што остана од европскиот пристап кон човековите права. Европарламентот е во шок од позицијата на Мишел и евентуалната промена мора да пројде преку европратениците, нешто за што во моментов нема мнозинство. Но, претседателот на најголемата парламентарна група, Манфред Вебер од ЕПП, веќе се изјасни дека е согласен да се финансираат ѕидови со европски пари.

Тоа што во моментов е очигледно е дека Унијата дозволува овој пинг-понг со мигрантите на полско-белоруската граница да продолжи затоа што сака да избегне креирање на нови конфликтни теми со Варшава и затоа што и Комисијата и Европарламентот знаат дека примањето мигранти не е баш популарна тема меѓу европската јавност.

Но, како што ќе забележи европратеникот Бернард Гета, чувството на срам од постапките на Унијата е огромно. Огромно е затоа што е срамно една диктатура така лесно да ја стави во замка ЕУ, искористувајќи ги нејзините контрадикции. Срамно e полската опозиција да нема ништо да каже околу обидот да се градат ѕидови во срцето на Европа. Срамно е ЕУ да се плаши од мигрантите затоа што во најголем дел се муслимани. Срамно е што Европа не знае како да му објасни на Лукашенко дека неговите валкани игри мора да завршат еднаш засекогаш.

Ние тука само ќе се потсетиме дека истиот тој срам повеќе од една година се случува и на хрватско-босанската граница и дека секојдневно се крши меѓународното право и правата на десетици илјадници луѓе и деца кои се жртви на отворено насилство.

Европа абдицираше пред своите правни и хуманитарни обврски, а со тоа абдицира пред единственото нешто што досега ја држеше обединета. Нејзиниот меѓународен кредибилитет го доживува својот историски минимум и Унијата, која толку жестоко го критикуваше Трамп за неговиот ѕид со Мексико, сега влезе во неговите обувки.

Европа реално се обедини по падот на Берлинскиот ѕид и Железната завеса. Сега ризикува со градење ѕидови во својата внатрешност да го подели она што толку мачно го обедини.

The post Срамната улога на Европа во мигрантската криза appeared first on plusinfo.mk.

Оваа наредба, како што соопштија од кабинетот на Претседателот, е донесена поради завршувањето на кризната состојба  прогласена на јужната и северната граница поради мигрантската криза.

„Имајќи предвид дека кризната состојба прогласена на јужната и северната граница, а поврзана со мигрантската криза, заврши синоќа на полноќ, а Собранието не донесе одлука за нејзино продолжување, престана да постои правниот основ за досегашниот ангажман на Армијата во обезбедувањето на државната граница“, соопштија од кабинетот на претседателот Стево Пендаровски.

Армијата, додаваат оттаму, останува ангажирана на предвидените задачи поврзани со другата прогласена кризна состојба на целата територија на државата поради пандемијата предизвикана од ковид-19.

„Доколку Собранието донесе одлука за продолжување на кризната состојба поврзана со мигрантската криза на јужната и северната државна граница, врховниот командант на вооружените сили повторно ќе и нареди на Армијата да ги извршува досегашните задачи“, стои во соопштението.

The post Пендаровски нареди Армијата да се повлече од јужната и северната граница appeared first on plusinfo.mk.