Уставниот суд на денешната седница ја отфрли иницијативата поднесена од Социјалдемократскиот сојуз на Македонија (СДСМ) за оценување на уставноста на Резолуцијата за осуда на манипулациите на опозицијата и за потврда на политиките против нелегалната миграција.

Како што соопшти Судот, иницијативата е отфрлена затоа што оспорената резолуција не содржи правни норми што би можеле да бидат предмет на уставно-судска контрола, туку исклучиво декларации од политички карактер кои не уредуваат општествени односи.

Според оценката на уставните судии, Резолуцијата не претставува акт што може да биде предмет на оценување на уставноста и законитоста. Поради тоа, Судот утврдил дека не е надлежен да одлучува по поднесената иницијатива, повикувајќи се на член 38 алинеја 1 од Актот на Уставниот суд.а

The post ОТФРЛЕНА ИНИЦИЈАТИВАТА НА СДСМ ЗА ПОЛИТИКИТЕ КОН НЕЛЕГАЛНАТА МИГРАЦИЈА Уставниот суд не најде основа да ја разгледува appeared first on plusinfo.mk.

Во бродолом во близина на брегот на Џибути во Аденскиот Залив загинаа најмалку 109 мигранти, а повеќе од 116 се водат како исчезнати, соопшти Меѓународната организација за миграции на Обединетите нации (ИОМ).

Меѓу загинатите во бродоломот што се случил ноќта меѓу 8 и 9 октомври во близина на брегот на Џибути има и 15 деца, пренесува БФМТВ.

Според преживеаните, бродот кој превезувал 350 луѓе од Џибути кон Јемен се превртел во близина на местото Гухере, северно од градот Обок во Џибути, се наведува во соопштението на ИОМ чии тимови се на терен заедно со локалните власти за да пружат итна помош.

The post ВО БРОДОЛОМ ЗАГИНАА 109 ЛУЃЕ, 116 СЕ ВОДАТ КАКО ИСЧЕЗНАТИ Бродот се превртел во близина на брегот на Џибути appeared first on plusinfo.mk.

Министрите за внатрешни работи на Европската Унија постигнаа договор за построги правила за враќање на мигрантите. Целта на новите мерки е миграциската политика да се насочи од административните постапки кон поефикасно спроведување на одлуките за враќање. Договорот е постигнат на состанокот на Советот за внатрешни работи во Луксембург на 1 октомври, пренесува Еуроњуз.

Според новите одредби, лицата кои немаат право на престој во Европската Унија ќе мора да соработуваат со властите при постапката за враќање. Во случај на одбивање соработка, тие може да бидат санкционирани со намалување на социјалните надоместоци, парични казни или кривични пријави.

Се воведува и нова европска одлука за враќање, која на земјите членки ќе им овозможи меѓусебно да ги признаваат одлуките за депортација донесени од други членки.

Системот ќе биде преиспитан по три години. За лицата кои се сметаат за безбедносна закана, земјите ќе можат да воведат трајни забрани за влез и да определат притвор подолг од 24 месеци.

Новите правила ќе овозможат и воспоставување центри за враќање во земји надвор од ЕУ. Мерките не се однесуваат на малолетници без придружба, а се очекува да стапат во сила во наредните недели.

Промената на политиката доаѓа откако на состанокот во Минхен на 26 септември, еврокомесарот за миграција Магнус Брунер изнесе податок дека бројот на нерегуларните пристигнувања во последните две години е намален за 55 отсто.

Сепак, бројот на лицата кои навистина биле вратени во нивните матични земји и натаму е низок. Во текот на 2025 година, властите во ЕУ наложиле враќање на речиси 492.000 лица, но Унијата ја напуштиле само 135.000 од нив.

Грчкиот министер за миграција Танос Плеврис најави дека првиот центар за враќање би можел да биде отворен во втората половина на 2027 година во една од африканските држави, но не прецизираше за која земја станува збор.

Од друга страна, Канцеларијата на Обединетите нации за човекови права изрази загриженост поради новите мерки. Оттаму предупредија дека на новото законодавство му недостигаат јасни одредби за надзор, правото на жалба и условите во земјите кои би ги прифатиле вратените мигранти.

The post ЕУ ГО ЗАОСТРУВА ВРАЌАЊЕТО НА МИГРАНТИТЕ Можно е притвор подолг од 24 месеци и трајна забрана за влез appeared first on plusinfo.mk.

Грција побара од Европската Унија да им овозможи на земјите членки привремено да ги суспендираат барањата за азил во услови на голем и ненадеен прилив на мигранти, со образложение дека сегашните европски правила не се доволни за справување со вакви кризни ситуации. Предлогот го претстави грчкиот министер за миграција и азил Танос Плеврис на состанокот на министрите за внатрешни работи на ЕУ во Луксембург.

Предлогот доаѓа по масовниот прилив во шпанската енклава Сеута во јули, кога според шпанските проценки повеќе од 72.000 мигранти влегоа на територијата на енклавата од Мароко. Поголемиот дел подоцна се вратија во Мароко, но околу 10.000 останаа во Сеута.

Плеврис смета дека во вакви ситуации треба да се зајакне контролата на границите и привремено да се запре приемот на барања за азил. Холандскиот министер за миграција Барт ван ден Бринк го поддржа размислувањето дека ситуации како онаа во Сеута треба да се третираат првенствено како прашање на управување со границата, а не како редовна азилантска постапка.

Сепак, Европската комисија нагласува дека секоја нова мерка мора да биде во согласност со меѓународното право и основните права. Европскиот комесар за миграција Магнус Брунер порача дека ЕУ мора да има средства за заштита на надворешните граници, но дека и во услови на криза мора да се почитуваат основните права.

Предлогот на Грција се надоврзува на поширокото заострување на европската миграциска политика. Министрите за внатрешни работи на ЕУ во четвртокот дадоа и конечно зелено светло за новите правила за враќање на лица кои немаат право да останат во Унијата. Тие овозможуваат земјите членки да воспоставуваат центри за враќање и надвор од територијата на ЕУ.

Ова доаѓа во момент кога повторно се актуелизира тнр. Балканска мигрантска рута. Иако бројот на мигранти што минуваат низ Западен Балкан значително е намален во однос на годините на миграциската криза, рутата и понатаму функционира.

Меѓународната организација за миграција во првиот квартал од 2026 година интервјуирала 1.814 мигранти во Албанија, Босна и Херцеговина, Црна Гора, Северна Македонија, Србија и Косово, следејќи ги нивните рути, потекло и намери за продолжување на патувањето.

Според истражување на Авганистанската аналитичка мрежа (Afghanistan Analysts Network) „Авганистанците на возраст од 14 до 23 години во изминатата деценија станале најголемата поединечна група мигранти што минуваат низ Западен Балкан“. Истражувањето проценува дека од 2015 година низ регионот кон Западна Европа поминале повеќе од 2,5 милиони луѓе, од кои околу една петтина биле Авганистанци.

Според истражувањето за авганистанските мрежи, за разлика од претходниот период, денес миграцијата низ Балканот сè повеќе зависи од организирани мрежи на криумчари. Авторите забележуваат дека мрежите станале транснационални и попрофесионализирани, а во некои места се регистрирани и вооружени судири меѓу ривалски групи.

The post ГРЦИЈА БАРА ПОСТРОГИ ПРАВИЛА ЗА МИГРАЦИЈАТА Атина предлага привремено суспендирање на барањата за азил при масовен прилив appeared first on plusinfo.mk.

Царински службеници во еден ден открија 12 илегални мигранти со потекло од Египет и Судан, при контрола на стока пријавена за увозно царинење во две различни испостави.

Во царински терминал во Тетово, царинските службеници уште пред да извршат контрола на камионот се посомневале за можно присуство на илегални мигранти, поради што повикале асистенција од МВР по што во товарниот дел се откриени пет илегални мигранти.

По само два часа, во царинскиот терминал Скопје 3 при контрола на стоката пријавена за увозно царинење откриени се седум илегални мигранти.

Мигрантите се предадени на Министерството за внатрешни работи.

– Согласно последните податоци на Фронтекс, илегалната миграција преку западнобалканската рута забележува пад од 42 проценти. Овие бројки покажуваат дека соработката дава резултати, но наша одговорност е да останеме будни и да бидеме подготвени за новите предизвици – велат од Царинската управа.

The post ЦАРИНСКИ СЛУЖБЕНИЦИ ОТКРИЈА 12 МИГРАНТИ ВО ЕДЕН ДЕН Се криеле во камиони за царинење appeared first on plusinfo.mk.

Работниците со мигрантско потекло имаат значајно учество на германскиот пазар на трудот, а во повеќе професии тие сочинуваат и мнозинство. Според првите резултати од Микропописот за 2025 година, 27 отсто од вработените во Германија имаат мигрантско потекло.

Податоците на германскиот Сојузен завод за статистика (Destatis) покажуваат дека работниците со мигрантско потекло имаат особено големо учество во повеќе сектори, меѓу кои здравството, угостителството и градежништвото.

Според дефиницијата што ја користи германската статистика, лице има мигрантско потекло ако тоа или неговите родители се доселиле во Германија по 1950 година.

Во одредени професии, работниците со мигрантско потекло сочинуваат повеќе од половина од вработените.

Најголем удел е регистриран кај готвачите, каде што изнесува 56 отсто. Во производството на храна работниците со мигрантско потекло учествуваат со 55 отсто, кај поставувањето подни облоги со 54 отсто, а кај поставувањето скелиња и преработката на месо со по 51 отсто.

Нивното учество е високо и во професии за кои во Германија постои недостиг од работна сила.

Кај професионалните возачи 41 отсто од работниците имаат мигрантско потекло, во хотелските услуги нивниот удел е 40 отсто, а кај негата и грижата за стари лица 33 отсто.

Од друга страна, меѓу професиите со недостиг од работна сила, најмал удел на работници со мигрантско потекло е регистриран во службите за итна помош – седум отсто.

Германскиот Микропопис е годишно репрезентативно статистичко истражување во кое се опфаќа околу еден отсто од населението. Податоците за 2025 година се први резултати, а официјалниот статистички извештај опфаќа и податоци за вработеноста, образованието, животните услови и други демографски и социјални карактеристики.

Според „Destatis“, во Германија во 2025 година живееле околу 25,8 милиони луѓе со мигрантско потекло.

The post ГЕРМАНСКАТА ЕКОНОМИЈА НЕ МОЖЕ БЕЗ МИГРАНТИТЕ Статистиката откри во кои сектори има најмногу странци appeared first on plusinfo.mk.

Шпанската полиција за разбивање демонстрации денеска истрела гумени куршуми во воздух и тепаше луѓе со палки во операција за чистење на плажите во шпанската северноафриканска енклава Сеута од илјадниците мигранти и нивно преместување во привремено сместување.

Операцијата за отстранување на мигрантите од плажите започна утрово, непосредно пред 7:00 часот по локално време, а во неа учествуваше и полицијата за разбивање на демонстрациите и шпанската армија, објавија британските медиуми.

Мигрантите, кои ја поминале ноќта чекајќи на плажата со надеж дека ќе добијат место во привремено засолниште, првично аплаудираа кога конвојот се движеше, но подоцна имаше врева и туркање додека се бореа за ограничениот број достапни места.

Снимките од државниот радиодифузер TVE покажуваат толпи и турканици додека луѓето се обидуваа да влезат по предвидената траса за движење.

Полицијата испука гумени куршуми во воздух и удри неколку мигранти со палки пред ситуацијата да се смири и операцијата да продолжи.

Подоцнежните снимки покажуваат претежно возрасни мажи како ги носат своите работи и одат во мали групи, под полициска придружба, по патека долга нешто повеќе од еден километар, од плажата Ел Трамполин до пристаништето.

Повеќето од мигрантите се мажи и момчиња. Привремените сместувачки капацитети се изградени исклучиво за возрасни мажи, па малолетниците се одвоени и сместени на посебни локации.

Претставници на три невладини организации изјавија за Ројтерс дека властите биле премногу бавни во обезбедувањето минимален сместувачки капацитет за мигрантите, што е обврска според Европскиот пакт за миграција, и дека прифатните центри отворени досега не можат да ги сместат сите оние кои сè уште спијат на улиците.

Една невладина организација процени дека околу 4.000 мигранти сè уште живеат на отворено, на плажите и тротоарите на Сеута. Шпанија проценува дека 10.000 мигранти сè уште живеат на оваа мала територија.

Повеќе од 72.000 луѓе влегоа во енклавата од Мароко кон крајот на јули во невиден пораст, иако повеќето оттогаш заминаа.

Властите изградија нов привремен сместувачки капацитет во пристаништето на енклавата, со капацитет за 1.700 луѓе.

Невладините организации известуваат дека илјадници луѓе сè уште немаат сместување и спијат на отворено, во кампови.

The post 🎥📷 ХАОС ВО СЕУТА, ГУМЕНИ КУРШУМИ, ТЕПАЊЕ СО ПАЛКИ, ЧОВЕЧКО СТАМПЕДО… Полицијата реши да ги премести мигрантите appeared first on plusinfo.mk.

Накратко

• Маскирани активисти го блокираа Довер.
• Слични групи се шират во Холандија.
• Маската штити идентитет, но и заплашува.

Стотици мажи облечени во црно и со лица скриени зад качулки во саботата ги блокираа патиштата кон пристаништето Довер, претворајќи го најфреквентното британско траектно пристаниште во сцена што повеќе потсетуваше на организирана формација отколку на класичен политички протест. Демонстрантите ги поврзаа рацете и извикуваа „Запрете ги бродовите”, барајќи запирање на нелегалната миграција преку Ламанш. Сообраќајот беше сериозно нарушен неколку часа, а пристапот кон пристаништето беше обновен околу пладне.

Зад акцијата стои новата антимиграциска група Patriot Platform, поврзана со Даниел Томас, познат како Дени Томо, соработник на десничарскиот активист Томи Робинсон. Според британските медиуми, на блокадата учествувале неколку стотици луѓе, а дел од нив користеле радиостаници и дејствувале координирано. Томас ја претстави акцијата како предупредување до властите, додека полицијата во Кент соопшти дека протестот бил спонтан. Немало апсења.

Луѓето во црно испраќаат заканувачка порака

Но, Довер е интересен и поради нешто друго. Речиси униформниот изглед на демонстрантите – црна облека и качулки – станува препознатлива естетика на дел од новите радикални антимиграциски групи. Маската има практична функција, бидејќи го отежнува идентификувањето преку полициски и безбедносни камери, новинарски снимки и видеа објавени на социјалните мрежи. Но, таа има и психолошка функција: неколку стотици луѓе со скриени лица визуелно оставаат многу помоќен и позаканувачки впечаток од исто толкава група обични демонстранти.

Феноменот не е ограничен на Британија. Во Холандија во последната година се појавија десетици локални групи со имиња како Defend Netherlands и различни локални варијанти на „Defend“. Анализа на KRO-NCRV Pointer и Stichting Justice for Prosperity, пренесена од NOS, утврди дека по големиот антимиграциски протест во Хаг во септември 2025 година биле активирани најмалку 35 нови „Defend“ групи. Нивните членови особено се појавуваат на протести против отворањето центри за баратели на азил.

Тоа создава впечаток на многубројни спонтани локални бунтови, иако зад дел од нив стои значително помала и мобилна активистичка сцена. Групите се поврзуваат преку социјалните мрежи и апликациите за комуникација, а активисти патуваат од место во место за да им се приклучуваат на локалните протести. Не значи дека сите граѓани кои протестираат против миграциската политика припаѓаат на овие организации. Напротив, радикалните групи се обидуваат да се вградат во многу поширокото незадоволство околу азилот, миграцијата и сместувањето мигранти.

Тактика за ефикасно криење на идентитот на демонстрантите

Црната качулка (се нарекува ј балаклава) во таквата средина решава неколку проблеми одеднаш. Го штити демонстрантот од полициско идентификување доколку протестот премине во прекршување на законот, но го штити и од препознавање од работодавци, соседи или од семејството. Во време кога практично секој учесник во протест може да биде снимен со мобилен телефон, а фотографијата за неколку минути да заврши на интернет, анонимноста станува важна за активистите кои не сакаат нивното политичко дејствување да биде поврзано со нивниот секојдневен идентитет.

Постои и втора, намерно театрална функција. Црната облека ја брише индивидуалноста, а балаклавата го претвора лицето во дел од масата. Така се создава слика на дисциплинирана, анонимна и потенцијално опасна група.

Методот не е нов. Слична естетика со децении користи таканаречениот „black bloc“, тактика најчесто поврзувана со анархистички и радикално леви демонстранти. Новината е што делови од радикалната десница и антимиграциската сцена преземаат слични визуелни и организациски техники.

Воведено ново кривично дело за намерно криење на идентитетот на протест

Британската држава веќе реагира на проблемот. Со Crime and Policing Act 2026 е воведено ново кривично дело за намерно криење на идентитетот на протест во област што полицијата претходно ја прогласила за таква зона. Полициски инспектор може да ја воведе мерката кога постои основано сомнение дека на протестот ќе се вршат или веќе се вршеле кривични дела. За прекршување е предвидена казна до еден месец затвор или парична казна до 1.000 фунти, со исклучоци за здравствени, верски и професионални причини.

Појавата затоа не треба автоматски да се толкува како доказ дека сите антимиграциски протести во Европа стануваат насилни или екстремистички. Во повеќе европски земји постои широко политичко незадоволство од миграциските политики, а најголемиот дел од граѓаните што протестираат не настапуваат маскирани. Она што се издвојува е создавањето помали, мобилни и дигитално организирани групи кои настапуваат внатре во пошироките протести и намерно избираат поагресивна визуелна презентација.

Довер затоа може да биде повеќе од изолиран британски инцидент. Маската, црната облека, брзото мобилизирање преку интернет и ненадејното блокирање критична инфраструктура создаваат нов модел на политички активизам во антимиграциската сцена. Истиот визуелен јазик што некогаш беше карактеристичен за радикалната левица сега се појавува кај нејзините идеолошки противници. Битката околу миграцијата така сè почесто не се води само со избори, митинзи и транспаренти, туку и со внимателно режирани слики создадени за телевизиските камери и социјалните мрежи.

The post МАСКИТЕ СТАНУВААТ НОВО ЛИЦЕ НА АНТИМИГРАНТСКИТЕ ПРОТЕСТИ Во Британија и Холандија се појавуваат организирани групи во црно appeared first on plusinfo.mk.

Маскирани антимигрантски демонстранти денеска го блокираа сообраќајот кон и од пристаништето во Довер, предизвикувајќи сериозни проблеми за патниците и товарниот сообраќај кон Франција.

Демонстрантите, главно облечени во црно и со фантомки на лицата, застанале на пристапните патишта и со споени раце го блокирале движењето на возилата. Во текот на протестот извикувале „Stop the boats“, односно „Стопирајте ги чамците“, во знак на протест против пристигнувањето мигранти преку Ла Манш.

Поради блокадата се создала колона долга околу четири милји, односно околу 6,5 километри, а пристапот до пристаништето бил сериозно отежнат. Дел од траектниот сообраќај бил погоден од доцнењата.

Right-wing activists in black clothing and balaclavas blocked roads leading to Dover port, protesting illegal immigration

They chanted “Stop the boats” and blocked traffic into and out of the port for several hours. A traffic jam around 6.5 km long formed.

Dover is the UK’s… pic.twitter.com/8ozGTbTmFc

— NEXTA (@nexta_tv) September 5, 2026

Според британските медиуми, во протестот учествувале околу 300 лица, а демонстрацијата се поврзува со десничарската антимигрантска група Patriot Platform. Дел од демонстрантите на социјалните мрежи најавувале дека протестите би можеле да продолжат и во наредните денови, во смени, но засега блокадата била прекината.

Полицијата пристигнала на местото за да ја следи состојбата и да спречи дополнително нарушување на редот. Засега нема информации за апсења, а сообраќајот постепено бил воспоставен откако демонстрантите се разотишле околу пладне.

Британската Влада го осуди протестот, оценувајќи дека блокирањето на пристапот до пристаништето предизвикало непотребно нарушување на патувањето и ги загрозило патниците и работниците.

Пратеникот од Довер, Мајк Тап, исто така го критикуваше протестот и оцени дека демонстрантите со своите постапки ги заплашуваат локалните жители и ги нарушуваат секојдневните активности во градот.

Довер е едно од главните места во Велика Британија за траектна врска со Франција и важен пункт во дебатата за миграцијата преку Англискиот Канал. Токму затоа градот често е место на антимигрантски демонстрации поврзани со пристигнувањето мигранти со мали чамци.

Протестот заврши без пријавени сериозни инциденти, но утринската блокада остави километарски колони и предизвика значителни доцнења за луѓето кои патувале кон и од Франција.

The post 📽️ „СТОПИРАЈТЕ ГИ ЧАМЦИТЕ“ ОДЕКНУВАШЕ ВО ДОВЕР Маскирани демонстранти ги блокираа патиштата кон пристаништето appeared first on plusinfo.mk.

Данска очекува во текот на 2027 година да може да ги префрли првите лица без законски престој во центар за враќање во земја надвор од Европската Унија, најави данскиот министер за имиграција и интеграција Мортен Бедсков.

На состанокот во Копенхаген, Данска, Германија, Австрија, Холандија и Грција се договорија за основните принципи според кои би функционирале ваквите центри.

– Од данска перспектива, очекуваме во текот на 2027 година да бидеме подготвени да ги испратиме првите лица без законски престој во партнерска земја надвор од ЕУ – изјави Бедсков.

Германскиот министер за внатрешни работи Александер Добриндт, пак, очекува договор со партнерска земја надвор од ЕУ да биде постигнат до крајот на оваа година. Тој состанокот во данската престолнина го опиша како исклучително важен.

– Сакаме да постигнеме договор со трети земји пред крајот на оваа година, што потоа ќе овозможи воспоставување центри за враќање – рече Добриндт.

Центрите би биле наменети за лица кои имаат конечна одлука за враќање, но поради различни причини не можат веднаш да бидат вратени во земјите на потекло. Меѓу можните причини е и одбивањето на нивната матична земја да ги прими назад.

Данска, Германија, Австрија, Холандија и Грција веќе извесно време работат на воспоставување ваков модел надвор од територијата на ЕУ.

Петте земји сега се договорија дека центрите треба да претставуваат заеднички европски проект, да бидат во согласност со правото на ЕУ и меѓународните обврски и да се воспоставуваат преку партнерства со земји надвор од Унијата.

Според Бедсков, моделот треба да има и мерлив ефект врз намалувањето на бројот на лица кои нерегуларно влегуваат во ЕУ, како и да придонесе за сузбивање на шверцот со мигранти.

Засега не е официјално соопштено со која земја ќе биде постигнат првиот договор. Како можни партнери во досегашните дискусии се споменуваат земји како Руанда и Уганда.

Планот, сепак, е проследен со сериозни критики од организации за човекови права.

Амнести Интернешнл предупреди дека ваквите центри би можеле да доведат до сериозни прекршувања на човековите права, вклучително и произволно задржување, тортура, нечовечко постапување и присилно враќање во земји каде што лицата би можеле да бидат изложени на опасност. Организацијата особено ја критикува можноста за воспоставување центри во Руанда и Уганда.

И Комесарот за човекови права на Советот на Европа побара воспоставувањето на вакви центри да биде проследено со строги механизми за заштита на човековите права, независен надзор и правно обврзувачки гаранции.

Петте европски земји, сепак, продолжуваат со планот, а целта е до крајот на 2026 година да биде идентификувана најмалку една партнерска земја и првиот проект да започне во 2027 година.

The post ЕВРОПА ОТВОРА НОВ ФРОНТ ВО МИГРАНТСКАТА ПОЛИТИКА Данска најави центри за враќање надвор од ЕУ appeared first on plusinfo.mk.