Премиерот Христијан Мицкоски денеска ги посети гробиштата во Кочани каде се погребани дел од жртвите на пожарот во дискотеката „Пулс“, запали свеќи и им изрази сочуство на родителите.

Посетата на гробиштата беше приватна, за неа нема официјално соопштение од Владата. Мицкоски денеска службено беше во Кочани, каде присуствуваше на отварање на нова хала на компанијата „Амфенол“.

Татко на една од загинатите девојки, Тошо Антов, на својот профил на Фејсбук објави за посетата на премиерот на гробиштата во Кочани.

„Разбрав дека денеска премиерот бил на гробиштата во Кочани и запалил свеќа на гробовите на нашите ангели. Само тивок и достоинствен чин. За нас родителите, секој кој ќе застане со почит пред болката што ја носиме е пред сè, човек. Денес така го доживеав и премиерот, како човек. Ве молам, не ја злоупотребувајте оваа болка за политика и дневни поени. Болката е наша, а гестот беше човечки. Тоа е доволно“, напиша Тошо Антов, татко на трагично загинатата Ивона Антова.

Во пожарот во дискотеката „Пулс“ во Кочани на 16 март загинаа 62 лица, претежно млади.

The post „МИЦКОСКИ ПОСТАПИ ЧОВЕЧКИ, НЕ ПРАВЕТЕ ОД ТОА ПОЛИТИКА“ Премиерот запалил свеќа на гробовите на загинатите во трагедијата во Кочани appeared first on plusinfo.mk.