Денеска имавме многу успешни и инспиративни средби, со голем број мултинационални компании, за теми кои што беа опфатени од областа на енергетиката, здравството и високата технологија – рече премиерот Христијан Мицкоски во своето видео обраќање од Давос, по првиот ден на Светскиот економски форум, каде учествува со делегација од Македонија.

– Се разбира, од нашата страна беа претставени можностите за инвестиции во Македонија, во македонската економија, нешто што ќе значи додадена вредност за македонските граѓани.

Но, тоа на кое што би сакал посебно да се задржам е вториот дел од денот, односно панелот за енергетика, каде што бев активен учесник и говорник, заедно со секретарот за енергетика на САД, г. Рајт. Панел, каде учество имаше буквално целото светско водство во енергетскиот бизнис, компании кои што доаѓаат од сите континенти, компании чии што обрти се движат во рамките на илјадници милијарди. Таму разговаравме за очекувањата и плановите за развој на енергетиката во годините кои што следат, пред се енергетиката од областа на производство на електрична енергија.

– Зошто токму областа на производство на електрична енергија? Тоа што можам да го заклучам како резултат на овој панел за енергетика се три работи:

– Првата работа е дека во годините кои што следат, потребата од енергија во светот ќе расте, но два ипол пати побргу ќе расте потребата од електрична енергија. И тука, ние како Македонија, како држава, не смееме да бидеме нем набљудувач, туку треба да бидеме активен чинител и активен учесник и тука повторно треба да ги рестартираме сите оние можеби заборавени енергетски проекти од минатото, како што се Чебрен и Галиште, Бошков Мост и останатите. И да го понудиме потенцијалот за инвестиции во обновливи извори на енергија на голем број од инвеститорите кои покажаа несомнен интерес во дискусиите по завршувањето на панелот.

– Втора работа која што исто така е значајна е дека во следните десет години производните капацитети кои што треба да бидат изградени, кои што треба да произведуваат електрична енергија во светот, ќе треба да произведат вкупно 40 000 терават часови електрична енергија. Колкава е таа количина електрична енергија? Тоа е пет ипол илјади пати повеќе отколку што денес Македонија троши електрична енергија и некаде отприлика толку колку што денеска САД, Канада, ЕУ и Јапонија заедно трошат. Зошто е ова потребно? Затоа што во годините кои што следат развојот на човештвото ќе опфаќа развој на вештачка интелигенција, а со тоа и развој на центрите за податоци или т.н. дата центри, кои што работат, не на енергија, туку на електрична енергија.

– Тоа се трите факти кои што се многу важни и ние како држава тој чекор треба да го следиме и во таа насока да ја развиваме нашата економија. Од економија која што се темелеше на развој на автомобилската индустрија, да го диверзифицираме своето портфолио и да бидеме значаен чинител, имајќи ги предвид перформансите и потенцијалот што го нудиме во делот и секторот на енергетика. Јас сум убеден дека тоа како држава можеме да го направиме. Јас сум убеден дека ние како држава ќе успееме во таа намера – вели Мицкоски во своето видео-обраќање.

The post 🎥 ОД АВТОМОБИЛСКАТА ИНДУСТРИЈА МАКЕДОНИЈА ГО СЕЛИ ФОКУСОТ НА ЕНЕРГЕТИКАТА Мицкоски вели дека земјава нема да биде нем набљудувач на светските процеси appeared first on plusinfo.mk.

Со протести на улиците и тензии на агендата, во Давос стартува Светскиот економски форум под мотото „Духот на дијалогот“. Но дијалогот почнува во сенка на криза – Доналд Трамп ја предводи најголемата американска делегација досега, додека Данска целосно го бојкотира форумот.

Светската елита се собира во швајцарските Алпи, во момент на најдлабоки трансатлантски тензии во последните децении, а Гренланд се искачи високо на агендата. Европските лидери во Давос ќе ја имаат и првата можност за директен, тет-а-тет разговор со американскиот претседател, по изјавите за суверенитетот на Гренланд, царините и иднината на НАТО.

А Трамп ја предводи до сега најголемата американска делегација во Давос. Го придружуваат пет министри и други високи функционери како државниот секретар Марко Рубио, специјалниот пратеник Стив Виткоф и зетот на Трамп, Џеред Кушнер. Се очекува средба Трамп – Зеленски, но покрај Украина се најавуваат дискусии и за Венецуела, Газа и Иран.

И додека светските лидери ги прекројуваат агендите за следните денови, стотици луѓе протестираат на улиците против доаѓањето на Трамп, критикувајки ги швајцарските власти.

– Сметам дека од една страна е подобро да се зборува, но од друга страна тој ( Трамп ) не е дојден тука за дијалог, туку е дојден да направи уште еден договор. И навистина не му верувам – вели еден од демонстрантите.

Друг демонстрант нагласува дека Трамп започна војна во Венецуела и затоа Швајцарија не би требало да го пушта да дојде, ниту пак да биде прифатен како учесник на Светскиот Економски Форум.

На Швајцарските Алпи денеска пристигнаа повеќе од 60 шефови на држави и влади, вклучително и германскиот канцелар Фридрих Мерц, кој веќе најави дека ќе направи обид за средба со Трамп, за деескалација на трговските тензии. На исто место ќе бидат и канадскиот премиер, аргентинскиот претседател, претседателката на Европската комисија Урсула фон дер Лајен, кинескиот вицепремиер, водечките технолошки лидери на Мајкрософт и Гугл АИ.

На Светскиот економски форум присуствува и македонскиот премиерот Христијан Мицкоски со делегација.

МИЦКОСКИ НА СВЕТСКИОТ ЕКОНОМСКИ ФОРУМ ВО ДАВОС Предвидени се билатерални средби и затворени сесии со светски лидери

The post ТРАМП СО НАЈГОЛЕМА ДЕЛЕГАЦИЈА, ДАНСКА БОЈКОТИРА Светскиот економски форум во Давос во сенка на тензиите за Гренланд appeared first on plusinfo.mk.