Жичарницата што ги превезува скопјани и туристите од Средно Водно до врвот на ридот и Милениумскиот крст веќе повеќе од десет дена е запрена поради голем сервисен зафат. Но, Миќо Стојановски од синдикатот на ЈСП за „Вечер“ откри дека жичарницата во изминатиот период работела без работна дозвола.

– Жичарницата одамна не требаше да превезува патници. Немаше дозвола, а не знам зошто продолжи да функционира – предупредува Стојановски.

Тој вели дека состојбата станала критична и дека поправката сега ќе трае подолго бидејќи се работи за скапа и обемна инвестиција – само едно од тркалата тежи дури 190 килограми.

Жичарницата функционира повеќе од 14 години, а нејзината изградба чинеше 6,7 милиони евра. На крајот од минатата година, Владата најави дека ќе ја продолжи втората фаза од проектот – од Капиштец до Средно Водно. Директорот на Службата за општи и заеднички работи, Ивица Томовски, тогаш истакна дека се прават анализи и пресек на проектот.

Додека институциите најавуваат доградба, јавноста бара одговори како било можно жичарницата да работи без дозвола, со што биле загрозени животите на илјадници патници.

The post ЖИЧАРНИЦАТА НА ВОДНО СО МЕСЕЦИ БИЛА РИЗИЧНА ЗА ПАТНИЦИТЕ Синдикатот на ЈСП тврди дека работела без дозвола appeared first on plusinfo.mk.