Во кругот на Клиничката болница во Тетово денес беше претставен план за изградба на Меморијален парк за жртвите од пожарот во Модуларната болница. Министрите Азир Алиу и Арбен Фетаи, повеќе пратеници заедно со семејствата на настраданите во пожарот во модуларната болница, денеска положија цвеќе на местото предвидено за изградба.

– Денеска не започнуваме само со изградба на парк. Започнуваме изградба на колективна меморија. Задоцнета, но неопходна. Пред 4 години на ова место се случи трагедија која не смее да се заборави, но институциите 4 години молчеа. Не презедоа ништо, избраа да не гледаат, а тоа молчење беше неправда за оние што ги изгубија животите и за сите тие што секојдневно ја бараат правдата. Овој проект не е за сликање. Овој парк не е украс. Денес конечно започнуваме и започнуваме поинаку – истакна министерот за здравство Азир Алиу.

Тој образложи дека овој проект е почнат само неколку недели по неговото преземање на функцијата министер за здравство во насока на одговорност. Потенцираше дека Меморијалниот парк нема да има прави патеки, бидејќи ни животот не бил правичен за овие луѓе.

– Архитектурата ја следи филозофијата на прекината рамка, свиени патеки, дрвја што создава сенка за размислување и рефлексија, симболичен центар за да се памети и да се вети дека ова нема да се повтори. Немаме луксуз да заборавиме и немаме веќе право да доцниме. Овој парк е повеќе од простор. Тој е културен пресврт, јасна одлука против молчењето, покана за размислување и ветување дека институциите мора да бидат блиску до граѓаните. Не само по трагедиите, туку и пред нив. Ние се сеќаваме дејствуваме и градини систем што не заборава – истакна Алиу.

На новинарско прашање Алиу рече дека при крај е Националната стратегија која ќе ги насочува институциите за постапки за големиот број трагедии коишто се случија во државата.

The post ЌЕ СЕ ГРАДИ ПАРК ЗА ЖРТВИТЕ ОД МОДУЛАРНАТА БОЛНИЦА ВО ТЕТОВО Тоа е ветување дека институциите мора да бидат блиску до граѓаните appeared first on plusinfo.mk.