Македонката Милена Богојевска (51) е осудена на осум години затвор во Мелбурн за смртта на својата 85-годишна соседка Лолин Вајтхенд, пишува австралискиот Еј-Би-Си Њуз.

Богојевска ја задушила старицата со кујнска крпа, а потоа го ставила телото во автомобил. Се одвезла до реката Марибирнонг и го фрлила во водата.

Телото било пронајдено два дена подоцна, делумно завиткано во пластика.

Австралиската Еј-Би-Си претходно објави дека Богојевска била обвинета за убиство. Подоцна постигнала договор со обвинителството и признала убиство од небрежност.

Влегла кај сосетката и никогаш не се вратила

Судот слушнал дека сосед ја видел Вајтхенд како влегува во домот на Богојевска во Вест Футскреј. Таму 85-годишната жена била нападната и задушена. Петнаесетгодишниот син на Богојевска бил во соседната соба. Носел слушалки и не знаел што се случува.

Обвинителството прифатило дека Богојевска немала намера да ја убие Вајтхенд. Одбраната претходно ја опишала смртта како „несакана последица“ од спонтан напад.

Телото во автомобил, па право кон реката

Богојевска потоа го пренела телото до реката Марибирнонг. Таму го фрлила во водата.

Истрагата подоцна ја одвела полицијата до нејзиниот дом. Таму биле пронајдени предмети што ѝ припаѓале на Вајтхенд.

Според судските наводи, Богојевска потрошила повеќе од 4.000 австралиски долари од парите на жртвата. Купувала, меѓу другото, чевли, таблет и микробранова печка.

Првично пред полицијата тврдела дека е „повеќе од 100 проценти“ сигурна оти не е одговорна.

„Скапувај во пеколот“

Судијката на Врховниот суд на Викторија, Џасинта Форбс, оценила дека Богојевска не покажала каење.

– Вашите дела се необјасниви. Губењето на нејзиниот живот и тагата предизвикана од вашето дело се неизмерни – рекла судијката.

Драматичен момент следувал на крајот од рочиштето.

– Скапувај во пеколот – ѝ рекла на Бојоевска, ќерката на убиената Вајтхенд.

На тоа Богојевска возвратила:

– И ти.

Осумгодишната затворска казна предвидува најмалку шест години зад решетки. Богојевска веќе поминала 755 дена во притвор. Најрано би можела да бара условно ослободување во јули 2030 година.

The post МАКЕДОНКА ОСУДЕНА НА 8 ГОДИНИ ЗАТВОР ВО МЕЛБУРН Ја задушила сосетката, го фрлила телото, ѝ трошела од парите appeared first on plusinfo.mk.

The post МЕГАН МАРКЛ ПРИЗНА ДЕКА СО ГОДИНИ Е МЕТА НА САЈБЕР НАПАДИ Војвотката од Сасекс проговори пред австралиските студенти за онлајн насилството appeared first on plusinfo.mk.

Австралиската полиција ги истражува обвинувањата на актерката Руби Роуз насочени кон поп-ѕвездата Кејти Пери.

40-годишната актерка тврдеше дека 41-годишната Пери сексуално ја нападнала во 2010 година додека биле излезени во ноќниот клуб „Спајс Маркет“ во центарот на Мелбурн.

Пери ги негираше обвинувањата преку нејзиниот претставник, а сега полицијата започна истрага за инцидентот откако Роуз поднесе пријава, пишува „Дејли мејл“.

– Детективите од тимот за истрага на сексуални прекршоци и злоупотреба на деца во Мелбурн (SOCIT) истражуваат сексуален напад што се случил во Мелбурн во 2010 година. На полицијата ѝ е кажано дека инцидентот се случил во лиценциран објект во центарот на Мелбурн. Бидејќи истрагата е во тек, би било несоодветно да се коментира понатаму во оваа фаза – изјавил портпаролот на полицијата на Викторија.

Роуз оттогаш објави пост на Threads во кој вели дека повеќе не може да зборува за инцидентот додека полицијата ги истражува нејзините тврдења.

– Последно ажурирање за ова: Од денес попладне, ги финализирав сите мои извештаи. Ова значи дека повеќе не можам да коментирам, повторно да објавувам или јавно да зборувам за ниту еден од тие случаи или за вклучените лица.

Ќе изгледа како да игнорирам сè, од пораки за поддршка, до искуствата на другите луѓе, но не го правам тоа. Ова е стандардно барање од полицијата и во многу погледи, вистинско олеснување. Можам да го започнам процесот на лекување сега. И привремено да продолжам напред. Ве сакам сите многу – напиша таа.

The post КЕЈТИ ПЕРИ Е ПОД ИСТРАГА НА АВСТРАЛИСКАТА ПОЛИЦИЈА Се истражуваат обвинувањата на актерката Руби Роуз против пејачката appeared first on plusinfo.mk.

Градоначалникот на австралискиот град Мелбурн Николас Рис, како и градскиот Совет, издадоа Директива според која учесниците на градскиот фестивал „Мумба 2026“ може да носат само официјални знамиња на државите од кои потекнуваат.

Со тоа, на македонските играорни групи им бил поставен услов да може да го користат само официјалното државно знаме, но не и знамето со ѕвездата од Кутлеш. Тоа предизвика револт и разочарување меѓу македонското иселеништво кое, во најголем дел, го користи токму знамето од Кутлеш како свој етнички симбол. Поради тоа сите македонски фолклорни и игроорни групи решија да не настапат на традиционална парада која се одржува секоја година во овој град, а на која се слави и етничката разноликост на заедниците на петтиот континент.

– Срцето ни е скршено што не смееме да се самоодредуваме и да го претставуваме нашиот македонски идентитет. За нас, Македонците, учеството без нашето знаме би значело компромитирање на суштинскиот дел од тоа што сме. Културниот израз треба да се слави во целост, а не да се ограничува. Ние во срцата ја носиме ѕвездата од Кутлеш. Поради тоа, одлучивме да не учествуваме на Парадата на Град Мелбурн, „Мумба“. Велиме – „не, фала“, нема да поставиме преседан за себе, нема да ги компромитираме нашите танчари, кореографи или културно-уметнички здруженија – соопшти вчера Федерација на македонски културно-уметнички асоцијации во австралијанската држава Викторија.

На претходните манифестации, црвеното знаме со ѕвездата од Кутлеш беше редовно истакнувано на чело на поворката составена од повеќе игроорни групи облечени во традиционални македонски носии. Нашите сонародници се посебно револтирани од односот на градоначалникот Николас Рис. Тие сметаат дека тој ја донел таквата одлука под влијание на неговата сопруга Фелисити Пантелидис, која е етничка Гркинка. Во реакциите се наведуваат изјавите на градоначалникот Рис, кој изјавувал дека „иако нема грчка крв, тој е Грк во срцето“ и дека „неговите три ќерки растат како горди грчки Австралијки“. Се наведуваат и примери со кои се потпишувал со името Никос, односно, грчка варијанта на неговото име.

Вчера, градоначалникот Рис изјави за австралијанските медиуми дека е разочаран што македонската група не настапила.

– Со нетрпение очекував да ги видам на парадата. „Мумба“ е ден за забава. Тоа е време за семејна забава. Се надевав дека древните караници околу знамиња и други работи ќе можеме да ги оставиме дома и дека само ќе излеземе и ќе уживаме во денот – рече тој.

Македонската заедница во Австралија, во наредниве денови, ќе реши што какви правни средства да употреби по забраната за употребата на знамето. Во наредниве денови ќе следуваат и контакти со градската управа на Мелбурн и со раководството на фестивалот за да биде повлечена директивата.

Ицо Најдовски, македонски активист во Австралија, вели дека австралиските закони го гарантираат правото на секоја етничка заедница да го користи симболот што го чувствуваме како свое обележје.

– Сега, одново ни ја прекршуваат точката 19 од Повелбата на Викторија. Во неа, покрај другото, се предвидуваат правата на поединецот да ги демонстрира своите верувања и идентитет и луѓето со посебно културно потекло не смеат да бидат лишени од правото да уживаат во својата култура или да ги користат својот јазик и симболи. Освен тоа, се забранува и секоја дискриминација врз основа на „раса“, а што во австралиското право вклучува и етничко потекло или националност. Забранет е секаков чин кој вклучува дистинкција, исклучување или рестрикција заснована на раса или етничко потекло, а која има за цел да го загрози еднаквото уживање на човековите права и слободи. Исто така, државните институции (вклучувајќи ги и градските совети) се обврзани да промовираат политики кои им овозможуваат на сите граѓани да го зачуваат и да го негуваат својот културен идентитет – вели Најдовски.

Ова не е првпат Македонците во Австралија да се соочуваат со одлуки на градски и државни власти со кои им се загрозува правото да го негуваат македонскиот идентитет. Во 1994 година беше донесена одлука со која властите се обидоа да ги именуваат Македонците како „Славомакедонци“, а две години подоцна, македонскиот јазик беше именуван како „македонски словенски јазик“. Во 2024 година, во основното училиште Lalor North Primary School, сличен обид за забрана на сонцето од Кутлеш беше поништен по интервенција на Министерството за образование на Викторија. Министерството потврди дека учениците имаат право да се идентификуваат со овој симбол.

The post НА МАКЕДОНЦИТЕ ВО МЕЛБУРН ИМ Е ЗАБРАНЕТО ДА ГО ВЕАТ ЗНАМЕТО ОД КУТЛЕШ! Македонските фолклорни групи го бојкотираа градскот фестивал appeared first on plusinfo.mk.

Еден говор, неколку реченици и треперлив глас го отворија прашањето што со години стоеше потиснато. Кого навистина сакаше тенискиот континент Aвстралија и зошто најголемиот (ГОАТ) никогаш не го прифатија како свој?

Српскиот тениски ас Новак Ѓоковиќ стоеше на Род Лејвер арената и зборуваше по поразот од младиот Шпанец Карлос Алкараз во финалето на Австралија опен.

Но, тој не плачеше за пропуштената 25. гренд слем титула. Гласот му се скрши кога зборуваше за љубовта што конечно ја почувствувал во Мелбурн. Љубов што, како што рече, никогаш порано не ја доживеал во Австралија, иако повеќе од две децении се враќа во јануари на истиот континент.

Говор што ја отвори старата рана

Мелбурн со години беше неговата тврдина по бројки. Десет титули, доминација без преседан, рекорди што ќе траат. Но, атмосферата ретко беше негова. Публиката често беше воздржана, понекогаш и отворено против него. Српските навивачи беа гласни, но изолирани. Останатиот стадион како да чуваше дистанца.

Токму таа дистанца ја препозна и австралиската новинарка Џорџи Паркер во текст објавен во „The Nightly“. Таа напиша јавно извинување во име на земјата, признавајќи дека Австралија го сакала погрешниот човек.

Никогаш доволно сакан

Во текстот Паркер потсетува дека Ѓоковиќ никогаш не бил миленик како асовите Роџер Федерер или Рафаел Надал. Неговата величина постојано морала да се докажува. Кај другите била земена здраво за готово.

„Кога (Ѓоковиќ) рече дека дури сега ја почувствувал таа љубов, тоа беше вознемирувачко“, напиша Паркер, додавајќи дека е срамно што најголемиот морал да чека до крајот на кариерата за да биде прифатен.

Депортацијата што промени сè

Над Австралија како уште да виси сенката од 2022 година, кога Ѓоковиќ беше задржан во имиграциски притвор и депортиран од Австралија пред турнирот поради неговите ставови во врска вакцинирањето против ковид-19. Случајот тогаш ја поларизираше јавноста во Австралија и остави длабока трага.

Новинарката Паркер во текстот признава дека неговите ставови за вакцинацијата одвратиле многумина, но но потенцира и дека несогласувањето со Ѓоковиќ не смее да ја избрише неговата бесмртност како спортист.

Ѓоковиќ, пишува таа, бил толериран, но не и прегрнат од Австралија. Почитуван по бројки, но не и по дух.

Историјата ќе биде пољубезна

Новите ѕвезди доаѓаат на тениското небо. Карлос Алкараз, Јаник Синер и другите веќе ги пишуваат свои приказни. Дебатата за тоа кој е најголемиот ќе продолжи. Но бројките на Ѓоковиќ се неумоливи.
Паркер завршува со едноставна, болна констатација.

„Историјата ќе биде љубезна кон Новак Ѓоковиќ. Само што Австралија можеше да биде љубезна многу порано“.

The post АВСТРАЛИЈА ПРЕДОЦНА СЕ ИЗВИНИ? Новинарка му пиша на Ѓоковиќ откако асот изјави дека „за првпат почувствувал топлина“ appeared first on plusinfo.mk.

Мечот помеѓу Италијанците Јаник Синер и Лучано Дардери на Австралија Опен во Мелбурн беше накратко прекинат поради неочекувано нарушување.

Додека Дардери се подготвуваше да сервира, беше прекинат од гласен плач на бебе. Арената „Маргарет Корт“ инаку беше тивка во тој момент, објавува „Њујорк пост“.

Дардери ја потапка топката на подот неколку пати, ја фрли нагоре за сервис, но мораше да се откаже и да ја фати кога бебето повторно заплака. Тој погледна кон трибините, видливо изненаден, што предизвика смеа и аплауз од навивачите.

Дебата на социјалните медиуми

Видеото од моментот собра повеќе од два милиони прегледи на Тик-Ток и го покрена прашањето дали е во ред да се носат бебиња и мали деца на тениски натпревари, каде што се очекува тишина за време на бодувањето.

Повеќе за ова, како и видеото од овој момент, можете да ги видите на порталот „Мајка и дете“.

The post АХ, ТИЕ БЕБИЊА, ЧОВЕК НЕ МОЖЕ ДА СЕРВИРА! Бебешки плач го прекина мечот на Австралија опен appeared first on plusinfo.mk.

Новак Ѓоковиќ се пласираше во полуфиналето на Австралија опен 2026, откако неговиот противник Лоренцо Мусети го предаде четвртфиналниот меч поради повреда.

Италијанецот одигра одличен старт и ги освои првите два сета со 6:4 и 6:3, ставајќи го Србинот во тешка позиција. Сепак, во третиот сет, при резултат 1:3, Мусети почувствува силна болка во бутниот мускул и беше приморан да се повлече од натпреварот.

Интересно, проблеми имаше и Ѓоковиќ – меѓу вториот и третиот сет побара медицински тајм-аут поради плускавци на десното стапало, но успеа да продолжи и на крајот да профитира од предавањето на ривалот.

– Не знам што да кажам, освен што ми е навистина жал за него. Тој беше многу посилен во овој натпревар, јас веќе бев на пат кон дома. Но, вакви работи се случуваат во спортот. Ми се случило неколку пати. Не знам што да додадам. Му посакувам брзо закрепнување. Дефинитивно требаше да победи денес, рече Србинот по мечот.

Овој меч беше јубилеен за Ѓоковиќ – негов 1.400-ти во професионалната кариера, а победата е 1.168-ма, со што по 13-ти пат ќе игра полуфинале на Австралија опен.

Во борбата за финале, Србинот ќе се соочи со победникот од дуелот меѓу Јаник Синер и Бен Шелтон.

Во првото полуфинале, пак, силите ќе ги одмерат Карлос Алкараз и Александар Зверев.

The post ЃОКОВИЌ ГУБЕШЕ 2:0, НО СТИГНА ДО ПОЛУФИНАЛЕ Италијанецот Мусети се повреди и му го предаде мечот на Ноле appeared first on plusinfo.mk.

Новак Ѓоковиќ без загубен сет и со дополнителен одмор влегува во четвртфиналето на Австралија опен, каде што го чека Италијанецот Лоренцо Мусети – меч кој ветува тенис од највисока класа и сериозен тест за двајцата.

Српскиот ас до оваа фаза стигна без борба во осминафиналето, откако Јакуб Меншик беше принуден да се повлече поради повреда. Тоа му овозможи на 38-годишниот Ѓоковиќ дополнително време за одмор, нешто што може да биде клучно во продолжението на турнирот.

– Се чувствувам одлично, особено физички. Искрено, мислам дека сум во една од најдобрите форми во последно време. Имав доволно време за подготовка и сè се одвиваше природно – изјави Ѓоковиќ во пресрет на дуелот, нагласувајќи дека телото му одговара на напорите во Мелбурн.

Од другата страна на мрежата ќе застане Лоренцо Мусети, тенисер кој веќе покажа дека знае да биде незгоден против фаворитите. Иако статистиката е јасно на страната на Ѓоковиќ (9-1 во меѓусебните дуели), Италијанецот верува дека може да направи чекор повеќе.

– Секој меч против Новак е посебна лекција. Тој е легенда, но чувствувам дека можам да го притиснам и да го тестирам до крај – порача Мусети.

Дополнителна доза на неизвесност носи фактот што ова ќе биде нивна прва пресметка на Грен слем турнир на тврда подлога. Ѓоковиќ, како десеткратен шампион во Мелбурн, влегува како апсолутен фаворит, но Австралија опен и досега знаел да донесе изненадувања.

The post ОДМОРЕН И ОПАСЕН ЃОКОВИЌ Мусети го чека најтешкиот тест во кариерата appeared first on plusinfo.mk.

Младата ѕвезда на тенисот Карлос Алкараз му одговори на српскиот ас Новак Ѓоковиќ по неговата шеговита забелешка за „авторските права“ на неговиот начин на изведување на сервисот.

Во Мелбурн, по победата над Корентин Муте, Алкараз со насмевка кажа дека има „договор во џебот“ за авторските права.

– Новак ми испрати порака и кога ја видов, се изнасмеав. Нашите сервиси се слични, но тоа не значи дека сум го копирал. Едноставно ги менував работите и така излезе – рече Алкараз.

L’évolution du service de Carlos Alcaraz.pic.twitter.com/Md7PzqG49V

— Tennis Legend (@TennisLegende) January 3, 2026

Ѓоковиќ претходно се пошегува дека му побарал пари на Шпанецот.

– Му реков дека мора да разговараме за авторски права. За секој поен да добијам процент – изјави српскиот ас.

Овој симпатичен дијалог меѓу двајцата шампиони ја освежи атмосферата во тенискиот свет и ја покажа меѓусебната почит меѓу генерациите.

The post АЛКАРАЗ СО НАСМЕВКА МУ ОДГОВОРИ НА ЃОКОВИЌ Кој кого копира при сервирање на топката? appeared first on plusinfo.mk.

Руската тенисерка Мира Андреева не престанува да привлекува внимание на Австралија опен, но овојпат не само поради резултатите. По победата над Гркинката Марија Сакари со 6-0 и 6-4 во второто коло, еден момент по последниот поен ја подели тениската јавност.

По завршувањето на мечот, 18-годишната Андреева аплаудираше и мавташе кон трибините, а камерите го уловија моментот кога, според дел од фановите, од нејзините усни се чита пцовката „fuck you all“. Други, пак, тврдат дека таа едноставно рекла „thank you all“, но видеото за кратко време стана вирално и предизвика лавина реакции на социјалните мрежи.

Контекстот дополнително ја вжешти приказната. Сакари имаше силна поддршка од грчките навивачи, што не е изненадување со оглед на бројната грчка заедница во Мелбурн. Атмосферата во текот на мечот беше гласна и напната, а тоа го потврди и самата Андреева по натпреварот.

– Беа навистина гласни и многу ја бодреа Марија. Кога освои неколку гемови по ред, атмосферата уште повеќе се разгоре – изјави младата тенисерка, што кај дел од фановите ја зајакна тезата дека контроверзната реплика била реакција на трибините.

Што ѝ да кажала во тој момент, Андреева продолжува со одличните настапи во Мелбурн. Осмата носителка во следното коло ќе се соочи со Елена-Габриела Русе, а зад себе веќе има импресивни резултати – осминафинале на Австралија опен во 2024 и 2025 година, полуфинале на Ролан Гарос во 2024 и олимписко сребро во женски двојки во Париз.

Did she say what I’m thinking she said???? pic.twitter.com/qH9hxmE0VX

— Lorena Popa (@popalorena) January 21, 2026

The post 📽️ „FUCK YOU ALL“ ИЛИ „THANK YOU ALL“? Гестот на Мира Андреева што одекна низ тенисот appeared first on plusinfo.mk.