Просто е неверојатно како кај нас сѐ може да се постави наопаку, наглава, дури и најнормалните нешта што инаку функционираат кај сите други – да не речам нормални – кај нас одамна тиштат како здодевна забоболка. Дури и нормалноста на насловот на колумната на Виктор Грозданов дека „Индустријата носи пари, а политикантството ’трачарење’“ кај нас е обратна: „трачарењето“ носи пари а индустријата никој не ја ферма! Очигледно ние не сме ни свесни какви пари „се вртат“ во државава кога толкава полуписмена толпа самонаречени интелектуалци може удобно да живее токму од – „трачарење“.

Само треба да добијат шлагворт, актуелен рефрен, и хорот на трачерите да започне да завива. Еднаш тоа се евроинтеграциите, па „Safe City“ (уште од кога се спомна како можност), па екстрадицијата на пребегон од Будимпешта, па (нормално) Делчев, сега вриежот на границите кон Грција… Ако пак почнете да бележите што ни помина прекуглава во изминативе две години, ќе треба поприлично простор. И нерви.

Но, интересно е како темите само се отвораат, се „пумпаат“, и потоа – штама. Нема завршница зашто биле токму напумпани – на пример онаа со бајатите изјави на земјоделецон од Виена на кои се налепи цела „опозиција“, а веднаш ја „заборавија“ кога нештата ги појасни самиот Вајц.

Впрочем, како прилог кон сето ова го гледам и енормниот наплив на онлајн медиуми, поткасти и др., од коишто најголемиот број служат токму за – „трачарење“. А тоа, трачарењето, во најголем процент се сведува на непријатни, непристојни, неточни или полувистинити… напади врз актуелната власт. Иако останува ноторниот факт дека најголемиот дел од нив – ако не баш сите – зрачат со завист завиткана во светликавата хартија на тенденциите за „високоумно“, а најчесто високопарно и тесноумно (да не речам малоумно!) политичко – поточно политикантско! – мудрување. Или „трачарење“, како сакате.

На пример, и по којзнае кој пат настрвени да го дефамираат „безбеден град“ бидејќи тие од крадење не стигнаа ништо да направат, опозицискана секта сега сака да нѐ убеди дека добивањето лажни пораки за наводни прекршоци како „нова голема измама преку системот што владата го промовираше како ’безбеден’“ е нешто невидено. И, демек, поентираат дека власта не може да ги заштити податоците и системот од надворешни напади и измами. Типично трачарење од група слепци кои не успеаа да го заштитат ни својот премиер од хакерски упад на двајцана украинци кои го направија резил пред светот! Најзаштитените системи во светот, меѓу нив на нато (малите букви се…), на тајни служби, на огромни корпорации и банки… биле пробивани низ такви упади, та сега „безбеден град“ бил некаков страшен исклучок! Примитивни блефери.

Како што впрочем е и користењето на актуелната состојба со почетокот на летните метежи на границите кон туристичките дестинации благодарејќи на „мудрата“ (EES) политика на еу за, како што вели еден „трачер“, „контрола на сопствените граници“! И можеби тоа е навистина (и) тоа – „контрола на сопствените граници“ – но замислете сега и ние да воведеме сличен систем па сите патници од земјите од еу на нашите граници да минуваат низ таков систем на „контрола на сопствените граници“. Можете да претпоставите што би пишувале овие и вакви трачери, како би врескале по власта и со какви имиња би ги нарекувале?

А сепак, зарем тоа не би била некаква форма на доследност кон еу политките и, како што вели трачерот, борба за „европската реалност“ и „владеење на правото“?! А оној од сектана му терцира дека повикот за летување дома е повик за изолација а не е причина системот што им го воведува љубимата еу. Или слепциве навистина ли мислат дека EES е наметнат од Мицковски и Вучиќ?!

За жал, тие и такви зборови, како впрочем и поимањето на демократијата, кај нас (им) служат само за „премерување на дворот“ на другиот. Зашто, на пример, како е можно ниеден, ниту еден од силниве демократи и оние „загрижени“ универзитетски „професори“ стегнати во идеолошкото менгеме на глупоста да не кажат ни збор за начинот на избор на старо-новата ректорка на уким (малите букви, особено после тоа, се реален одраз на академската свест на таа фела таму!)? Во изминативе три децении повеќе од половина универзитет се тркалаше низ највисоките функции во државава продавајќи ни некакво слово за демократијата, ама кај нив дома тие прават избори со некакви математички формули! И не победува оној со најмногу гласови туку со – најмногу поени. Собирани којзнае каде, можеби низ ходниците на факултетите? А после цела држава се чуди зошто ваквите шапшали ги нема на Шангајската листа!

Впрочем, нивната свест за демократија е еднаква како и онаа за автократија, која што ја гледаат само кај другиот, но не и во нивното идеолошко трло. Токму овие заробени трачерски умови ниту еднаш не напишале збор за партиската суроица во рацете на нивниот врховен газда, за власта што тој ја има и дебело ја практикува во сите пори на нивната партија. Меѓу другото, кога веќе говорат за тенденцијата за автократско владеење кај сите други во државава, навистина ли забораваат на султанскиот тип на хиерархија во нивното идеолошко трло, каде „лидеро“ дури именува и разрешува претседатели на општинските организации и претседател на градската организација на Град Скопје? Ама сепак, во интерес на „демократската“ маска, распишуваат отворен повик за самокандидирање за претседатели на општински организации?

Или, како истиот „лидер“ и неговите пулени експерсно разрешуваат членови кои отворено се спротивставуваат на актуелните ступидни и недемократски политики на сектата, но скандалозно молчат за мизерноно „мудрување“ за Делчев на член на нивниот Извршен одбор? Или и тие така мислат?

Па поголема фарса од тоа има ли?! И не ли ги здоболува тој идеолошки јарем околу главата?

The post Заробени до болка умови appeared first on plusinfo.mk.

Им упатувам јавна поддршка на медиумските работници од Телевизија Алфа, а посебно на младиот колега Матеја Петровски, кој мораше да ги прими и да ги пренесе непристојните и заканувачки зборови на Венко Филипче, искажани на последната прес-конференција на СДСМ.

Многу добро знам како е да си таргет на голема политичка партија и на нејзината пропагандна машинерија. Сум го искусил тоа повеќе пати во мојата новинарска кариера. Не е пријатно, дури и кога човек тоа ќе го доживее на возраст кога е свесен дека влијанието во јавноста и новинарската слава имаат своја цена. Висока цена, која мора беспоговорно да се плати.

Последно такво непријатно искуство пред неколку месеци имав имено со Венко Филипче и со неговиот штаб за комуникации со јавноста. Влегов во таа битка со бруталните атаци на камарилата на СДСМ и ја добив, иако никогаш не посакував од другата страна на нишанот да ми биде токму докторот Филипче. За кого сè уште можеби негувам презумција на пристојност и надеж дека во последен момент ќе одлучи да се скурдепса.

Иако, за жал …

Поради причини кои сè уште не ми се јасни – за разлика од неговите претходници во СДСМ, но и за разлика од некои други политички лидери кои во минатото оркестрирале напади и кампањи врз новинари и врз медиуми, користејќи главно услуги на „подизведувачи“ на валканите работи – Венко Филипче лично ги води тие атаци.

Ама најлично што може.

И се чини дека ужива во тоа. Ужива да се умаца во алето на највалканата пропаганда. Тоа може да се забележи и од неговите гестикулации и од тоа како ја менува бојата на тонот, како инфантилно ја оддава својата чудна злоба.

Како и да е, мислам дека е разумен и конструктивен предлогот на Македонската асоцијација на новинари, што ќе го поддржам во малку видоизменета форма – државниот јавен обвинител да си го повика Венкота Филипче на еден пријателски службен разговор. Нека го послужи со кафе, нека го праша кои се намерите на Венковиот глас што допира до органите на прогонот, нека му објасни на лидерот кои одредби од нашето кривично законодавство не дозволуваат вакво поведение и ваков третман на седмата сила и нека го предупреди на последиците во иднина.

Накусо, нека му објасни шчо напраил и шчо треба да напраи за однапред …

И нека се заврши на тој муабет. Ништо повеќе и ништо помалку од тоа.

Луѓе сме, ќе ја разбереме еуфоријата на еден октроиран политички лидер кој никако не може самиот да победи на избори, па кутриот се радува на победата на Петер Маѓар во Унгарија, додека неговата партиска аналитика нема елементарни информации за значењето и за дострелите на таа политичка промена во Будимпешта.

Нема да му се налутиме многу, но не можеме да ги прифатиме ваквите груби цензорски таргетирања и атаци врз медиуми и врз новинари, тие никулци на еден автократски дух и на диктаторски манир на човек кој уште не стасал вистински да „помириса“ власт.

Македонија е млада, но веќе консолидирана демократија. Ваквите испади нема да поминат. Па макар утре Филипче „победил“ во Србија, во Русија, во Америка и Енглеска, биќе земља пролетерска … Вака овде дома не може да победи ни на избори за претседател на куќен совет.

Јасно ли е ова, другарчиња од Бихаќка?

The post Време е државниот јавен обвинител на Венко Филипче да му каже да се скурдепса appeared first on plusinfo.mk.

Здружението на новинари на Македонија и Самостојниот синдикат на новинари и медиумски работници реагираат по денешната јавна изјава на претседателот на СДСМ, Венко Филипче, упатена кон новинар од ТВ Алфа.

„Сметаме дека е недозволиво и непримерно за претседател на политичка партија јавно да упатува тешки обвинувања за корупција проследена со реторика на дискредитирање кон новинари и медиуми. Oва не е изолиран случај, туку загрижувачка пракса во која политички субјекти сè почесто се обидуваат да поттикнат кампањи и наративи за оцрнување кон поединечни новинари и редакции.

Медиумите не смеат да се користат како средство во партиска политичка пресметка. Префрлањето вина кон новинари и редакции, како и нивно јавно етикетирање, не е демократски однос кон слободата на изразување и улогата на медиумите во општеството.

Доколку било кој чинител во општеството има сериозни сомнежи за незаконитости пропусти за работењето на поедини медиуми, тие треба да се адресираат пред надлежните институции и преку законски процедури, а не преку јавни политички кампањи против конкретни новинари и медиуми.

Во спротивно, политичките чинители ја намалуваат довербата кон медиумите преку своите вакви постапки, а тоа не е во духот на вредностите за кои треба да се залагаат. Ги повикуваме сите политички партии во иднина да се воздржат од јавни изјави што можат да поттикнат притисок, дискредитација или недоверба кон новинарите и медиумските работници.

Меѓународните стандарди јасно укажуваат дека политичарите и јавните функционери треба да покажат повисоко ниво на толеранција кон медиумско известување и да не користат понижувачки јазик кон новинарите“- се вели во заедничката реакција на ЗНМ и ССНМ.

Новинарските здруженија најавуваат дека ќе продолжат внимателно да ги следат ваквите случаи и јавно да реагираат секогаш кога новинари и медиуми ќе бидат изложени на политички притисок или јавно таргетирање.

ФИЛИПЧЕ ПРЕТЕРА СО НАПАДИ ВРЗ МЕДИУМИ, НА УДАР ТЕЛЕВИЗИЈА АЛФА Новинари бараат да реагира јавниот обвинител

The post НЕДОЗВОЛИВО ТАРГЕТИРАЊЕ МЕДИУМИ И НОВИНАРИ Новинарските здруженија со остра реакција на пресот на Филипче appeared first on plusinfo.mk.

Вонреден надзор на Агенцијата за аудио и аудиовизуелни медиумски услуги утврдил дека Македонската радио-телевизија, односно Вториот програмски сервис МРТ2, го прекршил член 48 од Законот за аудио и аудиовизуелни медиумски услуги, откако во својата програма емитувал содржина што поттикнува етничка нетрпеливост. Надзорот бил спроведен по службена должност и се однесувал на емитување од 28 март, во рамки на музичката програма „Билбилите на Кораб“.

„Надзорот покажа дека спротивно на член 48 став 2 од ЗААВМУ, емитуваната содржина на МРТ2, во рамки на музичката програма „Фестивал на детска песна – Билбилите на Кораб“, поттикнува и шири нетрпеливост врз основа на национална и етничка припадност преку иредентистички симболи и експлицитни политички пораки за промовирање на моноетнички, иредентистички „аманет“ за обединување на територии“ – се вели во заклучокот на Извештајот на ААВМУ.

Предмет на анализата била изведбата на песната „Албански територии (Trojet Shqiptare)“, дел од детски фестивал снимен во 2023 година, а емитуван три години подоцна. Регулаторот оценил дека токму овој временски јаз дополнително ја засилува одговорноста на јавниот сервис, бидејќи уредничкиот тим имал доволно време да ја прегледа и евентуално да ја отстрани спорната содржина пред да ја пласира пред јавноста.

Во извештајот се наведува дека прекршувањето се однесува на законската забрана за емитување содржини што поттикнуваат дискриминација, омраза или нетрпеливост врз етничка и национална основа. Оценката е дека прикажаната програма не останала во рамките на уметнички израз, туку содржела јасни политички пораки со иредентистички карактер.

Карта на „Голема Албанија“ и територијални претензии

Клучен дел од наодите се однесува на визуелните елементи на настапот. Детето кое ја изведувало песната било облечено во маица со карта на т.н. „Голема Албанија“, а на сцената биле користени и симболи како двоглавиот орел. Според регулаторот, ваквите симболи, иако можат да имаат историски или културен контекст, во конкретниот случај биле употребени за промоција на идеја за територијално обединување.

Дополнителна тежина, според извештајот, носи и самиот текст на песната, кој содржел пораки за обединување на територии од повеќе држави во регионот, вклучително и делови од Северна Македонија. Овие пораки биле оценети како експлицитни и како директно поврзани со концепт што може да предизвика меѓуетнички тензии.

Регулаторот нагласува дека контекстот во кој е емитувана содржината е исклучително чувствителен, имајќи ги предвид регионалните прашања поврзани со идентитетот и територијалниот интегритет. Фактот што програмата била емитувана на јавен сервис со национална покриеност дополнително го зголемува нејзиното влијание врз јавноста.

Уредничкиот тим да биде земен на одговорност

Посебно е истакната одговорноста на уредничкиот тим на МРТ2, кој има крајна контрола врз програмата што се емитува. Во извештајот се вели дека пропустот не може да се смета за случаен, туку укажува на системски недостатоци во уредничката политика и во механизмите за контрола на содржината.

Анализата опфаќа и прашањето за намерата, при што се наведува дека таа може да биде директна или да произлегува од професионална небрежност. Во секој случај, емитувањето на ваква содржина се толкува како давање легитимитет на идеи што се спротивни на принципите на соживот и мултиетничка кохезија.

Во извештајот се оценува и потенцијалното влијание врз публиката, особено врз малолетниците. Се предупредува дека ваквите пораки можат да предизвикаат страв, револт или дополнително радикализирање, а користењето деца за нивно пренесување се квалификува како сериозна злоупотреба.

Говорот на омраза не е слобода на говор

Агенцијата се повикува и на праксата на Европскиот суд за човекови права, нагласувајќи дека слободата на изразување не е апсолутна и може да биде ограничена кога станува збор за говор што поттикнува омраза или ја загрозува јавната безбедност. Во конкретниот случај, се оценува дека се исполнети сите услови за такво ограничување.

Прекршен е законот за медиумиски услуги 

Заклучокот на регулаторот е дека МРТ2 со емитувањето на спорната содржина го прекршил член 48 од Законот, бидејќи поттикнал и ширел нетрпеливост врз етничка основа. Како мерка се предлага јавна опомена и обврска медиумот да го усогласи своето работење со законските одредби, по што ќе следи и контролен надзор.

Што се пее во пасната за орелот?

Во извештајот на АААВМУ се цитира и превод на песната која ја изведува 13-годишното девојче во спорната емисија:

Летај ти орел, летај, и над нашето знаме застани,
над Албанија, Косово, Улцињ и Тетово гордо исправи се ти.
Ќе дојде ден кога сите ќе бидеме заедно,
зашто нè врзува еден народ, еден јазик, една крв.
Земјата и небото ќе се обојат црвено и црно,
а ние ќе славиме во слобода.
Оваа слобода што денес ја уживаме,
нашите херои не смееме да ги заборавиме.
Тие ни оставија аманет
нашите земји да ги обединиме.
Ќе дојде ден кога сите ќе бидеме заедно,
зашто нè врзува еден народ, еден јазик, една крв.
Земјата и небото ќе се обојат црвено и црно,
а ние ќе славиме во слобода.

Целиот извештај на ААВМУ може да го прочитате на следниот ЛИНК.

МРТ ЌЕ ГО РАСЧИСТУВА СКАНДАЛОТ СО ПЕСНАТА ЗА „ГОЛЕМА АЛБАНИЈА“ Ќе се лоцира уредничката одговорност

The post ЕМИТУВАНАТА СОДРЖИНА ШИРИ ОМРАЗА И ЕТНИЧКА НЕТРПЕЛИВОСТ Агенцијата за медиуми со остра осуда за националистичката провокација со „Голема Албанија“ на МРТ2 appeared first on plusinfo.mk.

Холивудската глумица Хали Бери проговори за својот однос со медиумите и причините поради кои избегнувала интервјуа речиси 10 години. Таа појасни дека медиумскиот притисок станал особено интензивен по нејзиниот трет развод, па јавноста сè повеќе коментирала за нејзиниот љубовен живот, а не за нејзината актерска кариера.

– По мојот трет развод, луѓето почнаа да велат: „Што не е во ред со неа? Таа е луда. Не може да задржи маж“… Практично престанав да давам интервјуа пред 10 години затоа што ми здодеа истата стара приказна. Секогаш некој ќе речеше: „Кутрата Хали, таа повторно нема среќа во љубовта“ – вели оскаровката за „Кат“ (The Cut).

Годинава таа е актуелна со криминалистичкиот трилер „Злосторство 101“ (Crime 101), каде што глуми заедно со Крис Хемсворт и Марк Рафало.

The post КУТРАТА ХАЛИ, ТАА ПОВТОРНО НЕМА СРЕЌА ВО ЉУБОВТА! Оскаровката објасни зошто 10 години избегнувала интервјуа  appeared first on plusinfo.mk.

Во рамките на пошироките кратења, што произлегуваат од намалувањето на финансирањето од државниот буџет, „Дојче веле“ целосно ќе ја укине и затвори грчката програма од 1 јануари 2027 година, соопштија од „Дојче веле на грчки јазик“.

Како што јави дописничката на МИА од Атина, во соопштението се наведува дека ќе биде укината грчката редакција што „обезбедуваше независно информирање на публиката во Грција, дури и за време на воената диктатура“.

– Функционира како значаен канал за дијалог за време на должничката криза во еврозоната пренесувајќи ги германските ставови во грчката јавност. Грција долго време е членка на Европската Унија и е стабилна демократија со разновиден медиумски пејзаж, па затоа „Дојче веле“ треба да пристапи кон кратења во овој сегмент – се наведува во соопштението.

Дополнително, во текстот објавен на „Дојче веле на грчки јазик“ пишува дека грчката програма е единствената што целосно ќе биде укината, грчкиот јазик е единствениот од вкупно 32 јазици на Дојче веле што ќе престане да постои од 1 јануари 2027 година, но и дека кратења има и во други програми, меѓутоа ниту еден друг јазик не се укинува целосно.

Генералната директорка на Дојче Веле, Барбара Масинг истакна дека „заштедите што се неопходни поради државните кратења и недостигот од компензација за договорените колективни зголемувања на платите се исклучително болни“ и дека ја ослабуваат конкурентноста во време кога силното германско и европско присуство добива сè поголемо геополитичко значење.

The post ЌЕ СЕ УКИНЕ ГРЧКАТА РЕДАКЦИЈА НА ДОЈЧЕ ВЕЛЕ Медиумот ќе работи до крајот на годинава appeared first on plusinfo.mk.

Советот за етика во медиумите на Македонија (СЕММ) лани разгледал 96 од добиени 244 жалби и поплаки за известувањето на медиумите. По погребот на жртвите од пожарот во кочанската дискотека „Пулс“ Советот примил 140 жалби за начинот на кој известувале медиумите, информираше извршната директорка Билјана Георгиевска денеска на прес конференција.

– Ако во 2024 година тренд беше поднесувањето лажни жалби во името на големи институции, лани имавме друга појава, поврзана со трагедијата во Кочани. Во еден ден по трагедијата, непосредно по погребот на жртвите, добивме преку 140 жалби. Тоа беше еден вид оркестриран напад не само врз СЕММ, туку и врз медиумите. Огромен дел се однесуваше на медиуми кои не се од Македонија, туку од регионот, но и телевизии од Индија кои го покриваа погребот. Голем дел од овие жалби беа испратени или од е-пошта за една употреба или од непостоечки телефонски броеви, на кои никој не одговараше на нашиот повик – рече Георгиевска.

Најчесто бил прекршен првиот член од Кодексот, односно имало недостиг на извори и „втора страна“. Следувале прекршувања на третиот член од Кодексот, кога медиумите не ги корегирале грешките и прекршувања на десеттиот член кој се однесува на дискриминација по разни основи.

Од овие жалби, 78 биле за интернет сајтови, 11 за печатени медиуми, шест за веб-страници на телевизии и една за телевизија, а најчести подносители биле политичари и јавни функционери. За 58 жалби биле донесени одлуки дека постои прекршување на Кодексот, а за 32 дека не постои. Шест жалби биле решени со медијација.

The post ДЕН ПО ПОГРЕБОТ НА ЖРТВИТЕ ОД „ПУЛС“ СОВЕТОТ ЗА ЕТИКА ВО МЕДИУМИТЕ ДОБИЛ 140 ПОПЛАКИ Голем дел биле испратени од лажни мејлови appeared first on plusinfo.mk.

Тишина наместо паника. Смирен тон наместо наслови што трчаат пред фактите. Српскиот пејач Здравко Чолиќ првпат јавно проговори откако експлозија го потресе дворот на неговата семејна куќа на Дедиње.

Пејачот соопшти дека не е во Белград, туку дека престојувал во Загреб, каде што работел на последните песни за нов албум. Ова е спротивно на написите во речиси сите српски и регионални медиуми кои пренесоа дека во времето на нападот Чолиќ бил во вилата.

– Го разбирам интересот, но некои изјави беа протолкувани погрешно. Важно е информациите да се споделуваат одговорно и врз основа на проверени факти. Истрагата е во тек и го чекаме полицискиот извештај – рече Чолиќ.

Во Белград, нагласи Чолиќ, состојбата е стабилна и сите се добро.

Рано изутрина, околу 5 часот, експлозивна направа била фрлена во дворот на вилата.

Во јавноста се појавија тврдења дека нападот можеби бил грешка и дека вистинската цел бил соседот и поранешен менаџер на Чолиќ, Адис Гојак.

The post ВО ЗАГРЕБ СУМ Чолиќ се јави по инцидентот со фрлената бомба врз неговата куќа appeared first on plusinfo.mk.

Здружението Онлајнмедиа.мк најостро ја осудува денешната прес-конференција на СДСМ, на која се напаѓаат и клеветат одредени медиуми, од кои дел се членови на здружението Онлајнмедиa.

Ниту една политичка партија во Македонија не смее јавно политички да се пресметува и не смее јавно да дискредитира, ниту еден медиум, ниту пак новинар, соопшти здружението.

„Кај СДСМ се нотира загрижувачки континуитет на јавна политичка пресметка, јавно дискредитирање, јавно етикетирање и јавно навредување на медиуми, на цели новнарски редакции, и на повеќе новинари.

СДСМ мора да се надмине и да разбере дека критиката до нив како политички субјект, а упатен од медиумите и новинарите е сосем легитимно нешто и всушност треба да ја разберат позитивно, како забелешка за нивната работа и дејствување како политичка партија.

Со своите досегашни јавни напади врз медиуми и новинари СДСМ всушност покажува дека засега нема доволен капацитет за демократско политичко дејствување“.

The post ОНЛАЈНМЕДИА ОСТРО ЈА ОСУДУВА ПРЕС-КОНФЕРЕНЦИЈАТА НА СДСМ Партијата мора да се надмине, а не да се пресметува со цели редакции appeared first on plusinfo.mk.

Кога новинарите ја повикуваат политиката на одговорност сè повеќе создаваат непријатели на моќните. Изгледа нашите политички лидери, тешко се ослободуваат од навиката да бидат цензори на слободното говорење и се обидуваат низ својата нетолерантност да ја моделираат културата што го наоружува правото против слободно изразениот став. Џорџ Вашингтон бил во прво кога ја препознал слободата на говорот како клучна за успешна демократија: „Ако слободата на говорот се одземе, тогаш немите и тивките може да бидат одведени како овци на колење“. Не секоја сака да биде „овца за колење“ на политиката во Македонија. Особено не критички настроените новинари. Гледам како новинарот Героски влезе во јавна полемика со социјал-демократско рециклираните комунисти, одбивајќи да го дезинфицира својот говор и отфрлајќи го концептот на цивилизираност како пречка за медиумска комуникација со политиката.

Изгледа Волтер не живее повеќе во Македонија. Особено не живее во политиката на социјал-демократите, кои отсекогаш знаеле како да ја релативизираат и урнисаат неговата позната максима дека: „можеби не се согласувам со она што имате да го кажете, но до смрт ќе го бранам вашето право да го кажете тоа“, како и неговата констатација дека: „правото на слободен говор е поважно од содржината на таквиот говор“. Напротив, нивниот авторитарен ДНК оди дотаму да слободниот говор што не им се допаѓа го пријават во полиција како „загрозување на сигурноста преку јавна закана“. Овие вербални напади на новинари се симптоматски за авторитарните тенденции на лидер чија визија за политиката станува сè пополаризирана и параноична. Исто така, ова е пример за тоа како правото и политичката моќ се користи да се замолчи слободниот печат и да се спречи отворена јавна дебата со политиката. Секако, постојат причини за загриженост кога одреден вид заплашување и малтретирање станува дел од нормалниот јазик на политиката во јавната полемика со новинарите. Но, кој да се секира за тоа кога тонеш – политички.

Изгледа дека во случајот на новинарот Героски вс СДСМ, неславниот вербален деликт повторно се враќа во политиката на апсурдите на рециклираните комунисти. Извиците за негова вербална инквизиција наликуваат на оние од времето на комунистичкиот тоталитаризам и веројатно будат пријатни чувства и сеќавања кај членовите на партијата, негов наследник во демократска Македонија. Вербалниот деликт како симбол од долгите децении на црвената диктатура повторно го заговараат истите оние за кои оваа држава е само протеза на Македонија пред деведесетите, во целофанска варијанта. Не дека оваа партија нема долга историја на заплашување и демонизирање на новинари кои не се хранети со нивните „фекалии“, градејќи срамна историја на гушење на слободното и информирано општество. Тоа е таа тоталитарно заробена свест на рециклираните комунисти, кои во критиките од јавноста и медиумите гледаат „напад“, наместо знак за здрава демократија. Како можат новинарите да функционираат нормално ако политиката што треба да ја гарантира нивната безбедност е предводена од лица кои ги презираат, ги демонизираат и им се закануваат, отворајќи пат за злоупотреби против медиумите што остануваат неказнети.

Независните новинари и политичарите не се природни пријатели. Тие веројатно не се предодредени да бидат пријатели. Отсекогаш било така во демократијата. Но, закани кон новинарите кои се случуваат денес се израз на политичка разгаленост и нерезистеност на арогатни политичари да се поднесе критика. Низ примерот на закани, омаловажување и оцрнување на новинарот Героски, СДСМ ги охрабрува своите поддржувачи да не им веруваат на медиумите со кои не се согласуваат, свесно поттикнувајќи анимозитет и отворено непријателство кон секој оној кој се обидува да ја оствари својата мисија за барање вистина и известување за неа. Тоа што го прави новинарот Героски во полемиката со опозиционата политичка партија всушност е одбрана на професијата која, повторно како многупати досега, останува молчалива. Никогаш не е „доста“ од одбрана на слободниот говор, или, за некои негови колеги, одбраната е „доста“ само во одреден политички контекст на кој ги научија да служат. Очигледно, во Македонија премногу се накотија печурките потхранувани со политичките фекалии на социјал-демократите, за да може да изрти семето на слободниот говор во медиумите. Секако, гледаме, има исклучоци.

За некој да не помисли дека овој напис е во одбрана на новинарот Героски. Нема потреба од тоа, научен е сам да ги води своите битки – за себе и за фелата на која припаѓа. Овој текст е само потсетување дека политичките закани за новинарството често се дел од пошироки, систематски, одржливи напори за ослабување, поткопување, па дури и демонтирање на формалните и неформалните институции на демократијата. Не сакам нашите медиуми и медиумски организации најтечно да зборуваат во тишината. Ми треба нивниот глас да се прекине со континуираните вербални напади кои ги ставаат во опасност критички настроените индивидуални новинари и слободата на печатот пошироко. Сакам Волтер да го вратам во медиумите во Македонија. Иако сигурно не промовирам провокативен јазик, верувам дека каналите за комуникација во медиумите треба да останат неограничени од товарите и ограничувањата на политичката коректност која ја посакува политиката. Сепак, политиката не е за луѓе со „меки стомаци“. Ако не можат да се носат со јавна критика најдобро за нив е да везат гоблени барем да бидат корисни во нешто, кога веќе не можат да понудат ништо корисно во политиката.

(Преземено од порталот Нетпрес)

The post Политика на „меки стомаци“ – да го вратиме Волтер во Македонија appeared first on plusinfo.mk.