Шефот на иранското правосудство, Голам-Хосеин Мохсени Еџеи, денеска изјави дека е неопходно да се заштитат легитимните права на иранскиот народ преку меѓународни правни и судски механизми, нагласувајќи дека САД и Израел мора да бидат одговорни за злосторствата извршени за време на неодамнешната војна против Иран.

Зборувајќи на состанок со високи судски функционери и претседатели на покраински судови, Еџеи ги посочи правните основи за осудата на САД и Израел за она што го нарече заедничка и неиспровоцирана агресивна војна против Иран, која започна на 28 февруари и траеше 40 дена по ред, објави Прес ТВ.

– Агресорските режими на САД и Израел намерно извршија бројни воени злосторства за време на нападот врз Иран, од убивање деца и цивили до напади врз објекти како што се болници, училишта, универзитети и станбени згради – рече Еџеи.

Тој ја повтори потребата од решавање на ова прашање преку правни средства и ги повика сите надлежни институции да преземат координирани активности за заштита на правата на Иран на меѓународно ниво.

– Главниот обвинител, заменик-шефот на правосудството за меѓународни работи, секретарот на кабинетот за човекови права и Центарот на судски адвокати, во координација со други релевантни институции на извршната и законодавната власт, треба да вложат максимални напори за да ги обезбедат легитимните права на иранскиот народ пред меѓународните правни и судски институции – рече Еџеи.

Повикувајќи се на Женевската конвенција од 1949 година и обичајните правила што ги регулираат вооружените конфликти, тој рече дека САД и Израел ги прекршиле меѓународните правни норми.

– За време на агресијата против Иран, американските и ционистичките агресори не само што ја прекршиле Женевската конвенција и нејзините дополнителни протоколи, туку ги занемариле и обичајните правила што важат во вооружените конфликти – рече тој.

Еџеи додаде дека САД и Израел мора да сносат меѓународна одговорност.

– САД и ционистичкиот режим, покрај тоа што започнаа војна и агресија против иранскиот народ и ги прекршија материјалните и моралните права на нашиот народ, во тој период извршија и секакви видови воени злосторства. Затоа тие мора да бидат гонети пред надлежните меѓународни институции за обештетување, надомест на штета и казна за извршените воени злосторства – рече тој.

The post САД И ИЗРАЕЛ ЌЕ ОДГОВАРААТ ЗА ВОЕНИ ЗЛОСТОРСТВА Техеран подготвува тужби против Вашингтон и Тел Авив appeared first on plusinfo.mk.

Иран и Оман треба заеднички да одлучуваат за управувањето со Ормускиот Теснец, еден од најважните поморски коридори во светот, изјави министерот за надворешни работи на Иран, Абас Арагчи.

Според него, двете земји имаат природно право да ги носат клучните одлуки бидејќи единствени граничат со Теснецот низ кој минува голем дел од светската трговија со нафта.

„Конечниот збор е наш“

Арагчи изјави дека Техеран ќе продолжи да разговара со другите земји од Персискиот Залив за прашањата поврзани сот Теснецот.

Сепак, нагласи дека конечните одлуки за неговото управување треба да ги носат Иран и Оман.

– Како држави што граничат со Ормускиот Теснец, имаме природно право да ги координираме и носиме одлуките поврзани со неговото управување – порача Арагчи.

Фокусот е на безбедноста на пловидбата

Шефот на иранската дипломатија рече дека двете земји работат на обезбедување безбедно движење на бродовите низ теснецот.

Тој нагласи дека тоа треба да се прави во согласност со меѓународното право и правилата за поморски сообраќај.

Ормускиот Теснец е клучна поморска рута што ги поврзува Персискиот Залив и Оманскиот Залив. Низ него секојдневно минува значителен дел од глобалниот извоз на нафта и течен природен гас.

Порака и за внатрешната политика

Во истото интервју Арагчи се осврна и на состојбите во Иран.

Тој изјави дека комуникацијата со врховниот лидер Моџтаба Хамнеи се одвива непречено и дека неговите насоки навреме се пренесуваат до државните институции.

Според Арагчи, постои широк национален консензус околу државното раководство и работите се движат во добра насока.

The post ЕМ ИРАН, ЕМ ОМАН ВО ТЕСНЕЦОТ Со Ормуз ќе раководат две држави, вели Арагчи appeared first on plusinfo.mk.

Портпаролот на иранското Министерство за надворешни работи Есмаил Багаи, денеска изјави дека Техеран ја предупреди Романија дека политички и правно ќе реагира доколку Букурешт им дозволи на САД да користат бази на нејзина територија за операции против Иран.

Бегај ги повика државите да не се вмешуваат во војната.

– Доколку Романија ги стави своите бази на располагање на САД, тоа би било еднакво на учество во воена агресија против Иран – истакна Багаи.

Според него, таков потег би бил неприфатлив според меѓународното право и би довел до меѓународна одговорност за Романија.

– Тоа би било црна дамка во историјата на односите помеѓу Иран и Романија. Иран ќе реагира соодветно, и правно и политички – посочи Багаи.

Парламентот на Романија на 11 март го одобри барањето на САД за привремено распоредување воени сили и опрема во земјата поради војната во Иран. Претседателот на Романија, Никушор Дан, изјави дека опремата е строго одбранбена и ќе биде распоредена врз основа на стратешкото партнерство.

– Романците не треба да се грижат, земјата е побезбедна благодарение на зголеменото американско воено присуство – изјави тогаш Дан.

The post ИРАН ЌЕ ЈА ТУЖИ РОМАНИЈА АКО ИМ ДОЗВОЛИ НА САД КОРИСТЕЊЕ НА СВОИТЕ БАЗИ Тоа ќе го смета за учество во воена агресија appeared first on plusinfo.mk.

Италијанската премиерка Џорџа Мелони остро го осуди американско-израелскиот напад врз Иран, опишувајќи го како дел од растечки и опасен тренд на интервенции „надвор од рамките на меѓународното право“.

Нејзината изјава дојде по обвинувањата од опозицијата дека нејзината централно-десничарска влада е премногу попустлива кон сојузниците. Повеќето европски земји, со исклучок на Шпанија, се воздржаа од директна критика и најчесто повикаа на смирување на тензиите.

Мелони, која е блиска со американскиот претседател Доналд Трамп, истакна дека Иран не смее да се здобие со нуклеарно оружје, предупредувајќи дека тоа би значело крај на меѓународниот договор за неширење на нуклеарно оружје со „драматични последици за глобалната безбедност“.

Премиерката ја спореди актуелната војна на Блискиот Исток со руската инвазија на Украина во 2022 година, предупредувајќи дека едностраните интервенции надвор од меѓународното право стануваат сè почести и закануваат на глобалната стабилност.

Таа додаде дека Рим испорачува противракетни системи на земјите од Заливот за заштита од ирански контранапади.

– Ова не го правиме само затоа што тие се пријателски земји и стратешки партнери на Италија, туку и за да ги заштитиме десетици илјади италијански граѓани и околу 2.000 италијански војници кои се таму – нагласи Мелони.

The post МЕЛОНИ ГИ ОСУДИ НАСИЛНИТЕ АМЕРИКАНСКО-ИЗРАЕЛСКИ НАПАДИ Италијанската премиерка ја критикува интервенцијата во Иран appeared first on plusinfo.mk.

Европската Унија и Советот на земјите од Персискиот Залив (ГЦЦ) денеска повикаа на дијалог и дипломатија за решавање на кризата на Блискиот Исток, повторувајќи дека земјите од Персискиот Залив имаат право да се бранат од Иран.

„Министрите ја потврдија својата посветеност на регионалната стабилност и повикаа на заштита на цивилите и целосно почитување на меѓународното право“, се вели во заедничката изјава на ЕУ и ГЦЦ по видеоконференцијата на министрите за надворешни работи на Европската Унија и земјите од Персискиот Залив.

Во соопштението се вели дека министрите ја потврдиле својата непоколеблива посветеност на дијалогот и дипломатијата како средство за решавање на кризата, истакнувајќи дека се согласиле за „заеднички дипломатски напори за постигнување трајно решение“ за да се спречи Иран да се стекне со нуклеарно оружје и да му се овозможи на иранскиот народ сам да ја одреди својата иднина.

Нападите на САД и Израел врз цели во Иран, вклучувајќи го и Техеран, почнаа на 28 февруари и предизвикаа цивилни жртви, додека Иран возвраќа со напади врз израелска територија и американски воени цели во регионот на Блискиот Исток.

The post ЕУ И ЗЕМЈИТЕ ОД ПЕРСИСКИОТ ЗАЛИВ ПОВИКА НА ДИЈАЛОГ Во Заедничка изјава ги осудија нападите од Иран appeared first on plusinfo.mk.

Дваесет и седумте земји-членки на Европската Унија упатија повик за „максимална воздржаност“ и целосно почитување на меѓународното право во контекст на ескалацијата со Иран и пошироко на Блискиот Исток.

Како што соопшти шефицата за надворешна политика на ЕУ, Каја Калас, Унијата инсистира на заштита на цивилното население и придржување кон меѓународните норми.

„Повикуваме на максимална воздржаност, заштита на цивилите и целосно почитување на меѓународното право, вклучувајќи ги принципите на Повелбата на Обединетите нации и меѓународното хуманитарно право“, се наведува во соопштението издадено во име на сите земји-членки.

Од Брисел нагласуваат дека внимателно ја следат состојбата и апелираат на дипломатски напори за намалување на тензиите во регионот.

The post ЕУ СО ИТЕН ПОВИК ДО СТРАНИТЕ Унијата бара максимална воздржаност на Блискиот Исток appeared first on plusinfo.mk.

Министерот за надворешни работи и надворешна трговија, Тимчо Муцунски, оствари телефонски разговор со заменик-премиерот и министер за надворешни работи на Обединетите Арапски Емирати, шеикот Абдула бин Зајед Ал Нахјан.

Во разговорот, Муцунски изрази цврста солидарност и целосна поддршка кон ОАЕ, упатувајќи најдлабоко сочувство за жртвите од нападите. Тој остро ги осуди нападите извршени од Иран врз Обединетите Арапски Емирати, оценувајќи ги како сериозна повреда на принципите на меѓународното право, вклучително и почитувањето на државниот суверенитет и територијалниот интегритет.

Министерот Муцунски нагласи дека во услови на зголемени регионални тензии неопходни се воздржаност, одговорност и дипломатски ангажман, со цел спречување понатамошна ескалација и зачувување на стабилноста и мирот во регионот.

The post ОСУДА НА НАПАДИТЕ И ПОВИК ЗА МИР Муцунски во разговор со шеикот Бин Зајед упати поддршка до ОАЕ appeared first on plusinfo.mk.

Советот за безбедност на ОН свика итна седница по американските и израелските напади врз Иран и одмаздничките напади од страна на Техеран врз американскитте бази во повеќе држави на Блискиот Исток.

Седницата, која треба да почне во 21 часот, ќе биде посветена на „ситуацијата на Блискиот Исток“, соопштија Обединетите нации.

Средбата беше побарана од Франција и од Бахреин.

Францускиот претседател Емануел Макрон повика на итен состанок на Советот за безбедност.

„Тековната ескалација е опасна за сите. Мора да престане“, објави Макрон на Икс.

Тој предупреди дека избувнување војна меѓу САД, Израел и Иран носи „тешки последици за меѓународниот мир и безбедност“.

Генералниот секретар на ОН, Антонио Гутереш ја осуди ескалацијата на непријателствата ширум Блискиот Исток и ги повика сите земји-членки да ги почитуваат своите обврски според меѓународното право.

– Повикувам на итен прекин на непријателствата и деескалација. Неуспехот да се стори тоа носи ризик од поширок регионален конфликт со тешки последици за цивилите и за регионалната стабилност. Силно ги охрабрувам сите страни веднаш да се вратат на преговарачката маса. Не постои одржлива алтернатива на мирното решавање на меѓународните спорови, во целосна согласност со меѓународното право, вклучително и Повелбата на ОН – рече тој.

Британскиот премиер Кир Стармер изјави дека британски авиони „денеска се на небото“ над Блискиот Исток.

– Тоа е дел од координираните регионални одбранбени операции за заштита на нашите луѓе, нашите интереси и нашите вредности -рече тој.

Стармер истакна дека Обединетото Кралство поседува низа одбранбени капацитети во регионот, кои неодамна беа засилени. Тој исто така нагласи дека Британија го подигна нивото на заштита за своите бази и персонал на највисоко можно ниво.

– Исто така, стапуваме во контакт со државјаните на Обединетото Кралство во регионот и правиме сè што можеме за да ги поддржиме – додаде Стармер.

Британскиот премиер потврди дека разговарал со лидерите на Германија и на Франција, како и со регионалните лидери, во напорите да се смират тензиите. Негова примарна цел е „мирот и безбедноста, како и заштитата на цивилните животи“.

Обраќајќи му се директно на Иран, Стармер порача дека Техеран „може веднаш да го прекине ова“. Тој го повика Иран „да се воздржи од понатамошни напади, да се откаже од својата програма за вооружување и да ги прекине застрашувачкото насилство и репресијата врз иранскиот народ“. Тој изрази верување дека тоа е „патот назад кон преговарачката маса“.

И Катар и Саудиска Арабија повикуваат на „итен прекин“ на ескалациите.

Емирот на Катар, Тамим бин Хамад Ал Тани, разговараше со принцот на Саудиска Арабија, Мохамед бин Салман, при што разменија мислења за тековните случувања и нивните влијанија врз регионалната и меѓународната безбедност.

Катар и Саудиска Арабија ја нагласиле потребата од „итен прекин“ на секакви ескалации и враќање на преговарачката маса, пренесе Ал Џезира.

Салман ја потврди „целосната солидарност и поддршка на неговата земја за државата Катар, нејзината силна осуда за нападите на катарската територија со ирански балистички ракети и нејзината посветеност да ја обезбеди сета можна поддршка на Катар во сите мерки што ги презема за зачувување на нејзиниот суверенитет, безбедност и стабилност“.

Емирот на Катар изрази „длабока благодарност и почит за цврстите ставови на сестринското Кралство Саудиска Арабија и за нејзината искрена братска солидарност и непоколеблива поддршка“.

Шефицата за надворешна политика на Европската Унија, Каја Калас, изјави дека „најновите случувања низ Блискиот Исток се опасни“ и дека блокот разгледува дипломатски решенија во координација со арапските партнери. Калас, исто така, рече дека разговарала со израелскиот министер за надворешни работи, Гидеон Саар, и дека европската конзуларна мрежа им помага на граѓаните на ЕУ да го напуштат регионот.

– Несуштинскиот персонал на ЕУ се повлекува од регионот – додаде таа.

Поранешниот претседател и сегашен заменик-секретар на Рускиот совет за безбедност, Дмитриј Медведев, верува дека САД го покажале своето „вистинско лице“ со нападите.

– Сите преговори со Иран беа само фасада. Никој не се сомневаше во тоа. Никој не сакаше да преговара за ништо – објави Медведев.

Премиерот на Либан, Наваф Салам, рече дека земјата нема да биде „вовлечена“ во конфликт со Иран, а властите стравуваат од можна вмешаност на проиранската милиција Хезболах.

„Повторувам дека нема да прифатиме некој да ја влече земјата во авантури што ја загрозуваат нејзината безбедност и единство“, објави Салам на социјалната платформа Икс.

Австралија ги поддржува напорите на САД да го спречат Иран да се здобие со нуклеарно оружје, рече премиерот Ентони Албанезе.

„Одамна е познато дека нуклеарната програма на Иран претставува закана за глобалниот мир и безбедност“, напиша Албанезе на Икс.

Британската влада соопшти дека не сака „да види како ситуацијата се влошува и се претвора во поширок регионален конфликт“, рече нејзиниот портпарол во соопштението.

Франција соопшти дека приоритет на земјата е да ги заштити своите граѓани и војници на Блискиот Исток, изјави висок функционер на француското Министерство за одбрана.

„За нас, очигледно, заштитата на нашите граѓани и заштитата на нашите сили во регионот е приоритет во овие ситуации. Јасно е дека сме во ситуација на воена ескалација. Мора да видиме што ќе се случи во наредните часови“, рече Алис Руфо.

Министерот за надворешни работи на Норвешка изрази жалење што разговорите меѓу Техеран и Вашингтон „не доведоа до дипломатско решение“ на конфликтот, нагласувајќи ја важноста од спречување на Иран да развива нуклеарно оружје.

„Длабоко сум загрижен сега што имаме уште една голема војна на Блискиот Исток“, изјави Еспен Барт Ајде.

Холандија ги повикжа сите страни да покажат воздржаност за да спречат понатамошна ескалација.

„Стабилноста во регионот е клучна“, објави холандскиот министер за надворешни работи Том Берендсен на Икс.

Словенечкиот премиер Роберт Голоб ја изрази својата непоколеблива поддршка за храброста на иранскиот народ во нивната борба за подобра иднина и почитување на нивните права. Тој ги повика сите страни да се воздржат од напади врз невини цивили.

„На светот не му се потребни нови војни“, објави кабинетот на премиерот.

Голоб, кој со голема загриженост ја следи ескалацијата на ситуацијата во Иран, нагласи дека дипломатијата мора да има приоритет.

„Храброста на иранскиот народ во неговата борба за права и подобра иднина секогаш ќе ја има нашата непоколеблива поддршка“, објави неговиот кабинет.

The post ИТНА СЕДНИЦА НА СОВЕТОТ ЗА БЕЗБЕДНОСТ НА ОН ПО ЕСКАЛАЦИЈАТА НА БЛИСКИОТ ИСТОК Светот повикува на мир и на разум appeared first on plusinfo.mk.

Данскиот министер за надворешни работи Ларс Леке Расмусен во Вашингтон изјави дека разговорите со американските претставници за идниот статус на Гренланд биле „отворени, но без промена на американската позиција“.

– Јасно е дека претседателот има желба да го „освои“ Гренланд, но ние многу јасно ставивме до знаење дека тоа не е во интерес на Кралството Данска – рече Расмусен на заедничката конференција со министерката од Гренланд Вивиан Моцфелт.

„Нема закани од Русија и од Кина“

Тој истакна дека „нема закани од Русија и од Кина кои Данска и Гренланд не можат сами да ги менаџираат“, нагласувајќи дека секое идно решение мора да ги почитува „црвените линии“ на Копенхаген за територијален суверенитет.

– Сакаме соработка со американските пријатели и сојузници, но тоа мора да биде соработка со почит – додаде Расмусен.

„Новата безбедносна реалност во Арктикот“

Расмусен призна дека ситуацијата на север се променила. Според него времето на мр е завршено но нагласи дека тоа не значи дека САД треба да ја „преземат“ Гренланд.

– Разликата е во тоа дали треба да дојде до ситуација каде што Америка го „поседува“ Гренланд, а тоа е апсолутно непотребно – рече тој.

Министерот додаде дека Данска сака „конструктивен дијалог“ и дека создавање сензации преку медиуми „само ги влошува недоразбирањата“.

Моцфелт од своја страна потврди дека Гренланд е отворен за соработка со САД, но „тоа не подразбира американска сопственост“.

Европа зад Данска

Европскиот парламент издаде соопштение со „цврста поддршка“ за Данска и Гренланд, остро осудувајќи ги американските амбиции.

„Секој обид да се поткопа суверенитетот и територијалниот интегритет на Данска и Гренланд е спротивен на меѓународното право и Повелбата на Обединетите нации“, стои во изјавата на европратениците.

Во меѓувреме, Доналд Трамп преку својата мрежа Икс ја зголеми тензијата, објавувајќи:

„НАТО: Кажете ѝ на Данска да ги тргне Русите и Кинезите оттаму! Две санки со кучиња нема да ja завршат работата! Само САД можат!!!“

The post НЕ УСПЕАВМЕ ДА ГИ ПРЕМИСЛИМЕ АМЕРИКАНЦИТЕ ЗА ГРЕНЛАНД Данска бара почит, не гледа ниту руска, ниту кинеска закана appeared first on plusinfo.mk.

Премиерот Христијан Мицкоски денеска го коментираше ставот на Македонија во однос на апсењето на венецуелскиот претседател Николас Мадуро од страна на САД.

Тој истакна дека Владата апсолутно стои до аргументите и потезите на нашиот стратешки партнер и предупреди дека критиките од европските земји треба да се гледаат во контекст на нивната тишина во минатото кога меѓународното право се кршеше на грбот на Македонија.

– Таквиот коментар би им го оставил на експертите по меѓународно право. И како тогаш сите тие се оглувеа и никој не го коментираше сето тоа, а сега одеднаш сите имаат мнение. Јас тоа би им го оставил на експертите. Но еднаш кога во животот ќе направите исклучок, тој потоа станува пракса и е прашање на време кога ќе се удри од вашиот грб – рече Мицкоски.

Премиерот потсети на искуството на Македонија при менувањето на уставното име и блокадата за членство во НАТО и ЕУ како примери на „преседан“ од кој европските лидери тогаш молчеа.

– Кога се менуваше Уставот и знамето, ни се ветуваше членство во ЕУ и НАТО за неколку години, а потоа бевме блокирани. Имаше и Хашка пресуда дека Македонија не треба да биде блокирана, но се случи токму спротивното. Громогласната тишина од оние што денеска коментираат зборува сè. А дали ова е преседан или не е, ние како Влада апсолутно стоиме до аргументите и потезите на нашиот стратешки партнер – Соединетите Американски Држави – додаде Мицкоски.

Според него, светот се наоѓа во нова геополитичка динамика и Македонија, како членка на ОН и НАТО, треба легитимно и проактивно да ги следи своите интереси.

The post МАКЕДОНИЈА СТОИ ДО САД Мицкоски за апсењето на Мадуро и европската дволичност appeared first on plusinfo.mk.