Во рамки на подготовките за „Скопје – Европска престолнина на културата 2028“, со поддршка на Програмата за развој на Обединетите нации, се одржа меѓународната конференција „Обликување на иднината на Скопје: Култура, урбани политики и одржливи европски градови“, еден од клучните настани со кој Скопје ја претставува својата визија пред Европа и светот, објави градоначалникот на Скопје, Орце Ѓорѓиевски.

„Денеска Скопје беше вистински европски центар. Место каде што културата, урбаните политики и одржливиот развој се споија во една заедничка платформа за иднината“, објави Ѓорѓиевски на Фејсбук.

Особена чест и тежина на настанот, додаде тој, му дадоа истакнатите гости: шефот на делегацијата на ЕУ, амбасадорот Михалис Рокас, министерот за култура Зоран Љутков, постојаниот претставник на УНДП Армен Григоријан, градоначалникот на Матера Антонио Николети, заменик градоначалничката на Подгорица Наѓа Лиљаник, градоначалникот на Валета Олаф Мекеј, советникот од Торино Франческо Тресо, регионалниот директор на УН Хабитат за Источна Европа Ерфан Али, како и проф.д-р. Огнен Марина, кои ги споделија своите искуства, знаења и визии пред сите присутни.

„Оваа конференција е јасна порака дека Скопје влегува во сериозна, структурирана и европски препознаена траекторија кон 2028 година. Беа потпишани вкупно 5 меморандуми за соработка кои претставуваат силен исчекор кон долгорочен, одржлив и визионерски развој на градот, како и кон успешна имплементација на титулата Европска престолнина на културата“, информира градоначалникот.

• ОТОМАНСКИ МУЗЕЈ И МУЗЕЈ НА ПРАИСТОРИЈАТА ЌЕ СЕ ОТВОРАТ НА КАЛЕТО До 2028 година ќе заживее Аквадуктот, ќе се изгради Универзалната сала

Три меморандуми, додаде, беа потпишани со реномирани европски универзитети од областа на урбанизмот и просторното планирање – Факултетот за урбанизам при Универзитетот во Лунд, Универзитетот во Солун и Политехничкиот универзитет во Торино.

„Овие академски институции, препознаени како центри на врвно знаење, иновации и на современи урбани практики, ќе обезбедат стручна и научна поддршка во креирањето на 20-годишната стратегија за урбан развој на Град Скопје. Со тоа, Скопје се позиционира како град кој својата иднина ја гради врз основа на знаење, визија и европски стандарди“, соопшти Ѓорѓиевски.

Покрај академската соработка, додаде, беа потпишани и два меморандуми со општините Матера (Италија) и Валета (Малта), градови кои во блиското минато ја понесоа титулата Европска престолнина на културата и зад себе оставија успешни, трансформативни културни приказни.

„Овие партнерства отвораат простор за директен пренос на искуства, знаење и добри практики, особено во делот на управување, програмско планирање и реализација на комплексниот процес „Европска културна престолнина“.
Соработката со универзитетите и општините партнери претставува синергија на наука, култура и локално управување, која ќе овозможи Скопје не само успешно да ја реализира 2028 година, туку и трајно да ги вгради културата и креативноста како двигатели на урбаниот, економскиот и општествениот развој“, порача градоначалникот.

Преку оваа платформа, нагласи тој, Скопје ја претстави својата културна визија, програмската рамка и меѓународните амбиции, но уште поважно, отвори суштинска дебата за иднината на европските градови. Дебата во која културата не е периферија, туку двигател на урбаниот развој, институционалната трансформација и на долгорочните општествени промени.

„Скопје, почитувани, е град што многупати бил разурнуван, но никогаш поразен. Град што од трагедиите создавал нова сила. Град што од прекините создавал нов почеток. Затоа со право го носи епитетот град на меѓународната солидарност. Токму затоа, Скопје 2028 мора да биде повеќе од културна програма. Тоа е сеопфатна трансформација. Тоа е урбана, социјална, образовна и развојна програма. Процес во кој културата не е украс, туку темел врз кој се гради иднината на градот“, порача тој.

Ќе работиме, вети Ѓорѓиевски, културата да стане вистинска јавна инфраструктура – стабилна, достапна и рамномерно развиена низ целиот град.

„Не само преку големи институции, туку и преку локални културни центри, квартовски библиотеки, мали сцени, младински хабови и простори за заедничко создавање. Ќе го градиме урбаниот идентитет на Скопје од неговата автентичност – од модернистичкото наследство, од Старата чаршија, од различностите, од живата мултикултурност, од колективната меморија и од креативната енергија на неговите граѓани. Идентитетот не се наметнува. Тој се создава заедно“, вети градоначалникот.

• РОКАС ДАДЕ ПОДДРШКА ЗА ДОСЕГАШНИОТ НАПРЕДОК НА СКОПЈЕ Титулата Европска престолнина на културата е најсилната иницијатива за поврзување

Ќе ја поврземе културата со квалитетот на живеење, нагласи тој, затоа што вистински добар град е оној во кој луѓето сакаат да останат.

„Град во кој јавните простори се живи, безбедни, зелени и креативни. Град во кој културата е дел од секојдневието. Ќе ги поврземе културата и економијата како инвестиција во иднината. Во креативните индустрии, во туризмот, во младите, во новите идеи.Во економија што создава вредност, но и задржува луѓе.
Ќе го разбереме јавниот простор како културен простор. Нашите улици, плоштади, паркови и кејови ќе станат сцени на живот, уметност и заедништво“, вели Ѓорѓиевски.

Европските искуства ни покажуваат дека културата има моќ да менува градови. Скопје има нешто уште поважно, има дух што знае да се обнови и да оди напред, додаде тој.

„Нашата задача е да го прочитаме градот внимателно. Да ги поврземе неговите фрагменти. Да го споиме наследството со современоста. Да ја поврземе локалната приказна со европската перспектива.Скопје 2028 е пресвртница! Трансформација! Момент кога културата ќе ја вратиме во срцето на урбаната политика.
Момент кога ќе покажеме дека идентитетот се гради со визија, работа и со посветеност. Момент кога солидарноста ќе ја претвориме во алатка за иднината. Скопје не е град што само се сеќава. Скопје е град што создава. Да изградиме град што поврзува. Град што создава вредност. Град што инспирира. Тоа е нашата одговорност. Тоа е нашата визија. И тоа е нашето Скопје“, објави скопскиот градоначалник Орце Ѓорѓиевски по меѓународната конференција во пресрет на „Скопје 2028“.

The post СКОПСКИТЕ УЛИЦИ, ПЛОШТАДИ, ПАРКОВИ И КЕЈОВИ ЌЕ СТАНАТ СЦЕНИ НА ЖИВОТ, УМЕТНОСТ И ЗАЕДНИШТВО Потпишани 5 меморандуми во пресрет на „Скопје 2028“ appeared first on plusinfo.mk.

Македонија денеска одбележува една година од најголемата трагедија која се случи во Кочани. Пожарот во кој загинаа 63 млади луѓе и деца , а беа повредени 193, се случи на 16 март во ноќниот клуб Пулс.

Една година по трагедијата во тек е судскиот процес во кој се обвинети 35 лица, но трагедијата отвори низа прашања поврзани со постапувањето на институциите и почитувањето на законите.

Изминатата година беше и година на протести на родителите на загинатите и повредените во кои тие бараа правда за нивните деца.

По трагедијата Македонија повторно беше центар на солидарност. Голем број држави дадоа медицинска помош и преседоа повредени на лекување.

Денеска, по повод годишнината од трагичниот пожар денеска во црквата „Св. великомаченик Георгиј“ во Кочани се одржува литургија за упокоените, а во 9:30 часот – општ парастос за упокоените во пожарот во дискотеката „Пулс“.

Со верските обреди чиноначалствуваат Неговото блаженство архиепископот охридски и македонски г. г. Стефан и Неговото високопреосвештенство митрополитот на Брегалничката епархија г. Иларион.

На државно ниво денеска во Скопје се одржува меѓународна конференција за институционалните и клиничките аспекти и решенија по пожарот во Кочани. На конференцијата ќе учествуваат високи државни претставници, меѓународни експерти и водечки медицински професионалци од регионот и Европа.

Воведните обраќања на премиерот Христијан Мицкоски, министерот за здравство Азир Алиу и министер за надворешни работи и надворешна трговија, Тимчо Муцунски, по што ќе се следува краток комеморативен момент посветен на жртвите и последиците од трагедијата.

Темата на првиот панел насловен „Европскиот механизам за цивилна заштита и меѓународниот одговор“ ќе бидат меѓународните реакции по пожарот, координацијата меѓу државите и активирањето на европските механизми за итни ситуации.

Панелисти се Ивица Томовски, директор на СОЗР, Сиен Ванломел, DG ECHO – ERCC, д-р Игор Мерџановски, директор на ТОАРИЛУЦ, Панче Тошковски, министер за внатрешни работи, Владо Мисајловски, министер за одбрана и Валентина Атанасовска, Државен завод за статистика, одделение за меѓународна соработка.

Вториот панел „Национален и меѓународен здравствен одговор и акутен третман на изгореници“ се фокусира на медицинскиот одговор, тријажата, ургентните постапки и сложените третмани за изгореници.

Панелисти ќе бидат прим. д-р Јасмина Горѓиевска, директор на УК за пластична хирургија, проф. д-р Марија Срцева, анестезиолог, ТОАРИЛУЦ, д-р Елизабета Обочки, пластичен хирург, доц. д-р Марко Јовиќ, Клинички центар Србија, д-р Крисаги Гинаки, интензивист, Болница Папаниколау – Солун и д-р Влатко Захариев, директор на КБ Штип.

Мултидисциплинарниот пристап, рехабилитација и опоравување ќе бидат во фокусот на третата панел дискусија на која ќе учествуваат д-р Катерина Мирчовска, директор на ОБ Кочани, проф. д-р Славица Арсовска, директор на УК за психијатрија, проф. д-р Маја Аргирова, Пирогов, Бугарија, д-р Божидар Поповски, пулмолог, проф. д-р Катерина Дамевска, директор на УК за дерматологија и д-р Симона Јовановска, физијатар, ОБ Кочани.

Панелот „Од искуство до решенија – улогата на заедницата и институциите“ започнува со видео пораки од пациенти и продолжува со дискусија за институционалното учење, хуманитарната поддршка и потребата од системски реформи.

Панелисти се д-р Владко Грозданов, градоначалник на Кочани, Саит Саити, генерален секретар на Црвен крст, д-р Небојша Настов, УК „Наум Охридски“, д-р Бесник Хамити, кабинет на министерот за здравство ид-р Надиа Депетрис, претседател на Европската асоцијација за изгореници (ЕБА).

Конференцијата завршува со презентација на министерот за здравство Азир Алиу за националните решенија, доделување благодарници на здравствените установи и официјално обраќање на претседателката Гордана Сиљановска-Давкова.

The post ЕДНА ГОДИНА ОД ТРАГЕДИЈАТА ВО КОЧАНИ Непребол и тага по 63 млади луѓе appeared first on plusinfo.mk.

Владата ќе организира меѓународна конференција „Институционални и клинички аспекти и решенија по пожарот во Кочани – една година потоа“, која ќе се одржи на 14 март во Скопје.

Конференцијата ќе обедини претставници на институциите, здравствени експерти, меѓународни организации и хуманитарни партнери. Конференцијата има за цел да се направи една сеопфатна анализа на одговорот на трагедијата, од првичната интервенција и спасувањето животи, до долгорочниот третман, рехабилитацијата и системските решенија за иднината.

– Посебна вредност на оваа конференција е присуството на 37 лекари и медицински експерти од странство, кои во најтешките денови по трагедијата во Кочани директно учествуваа во лекувањето на пациенти. На покана од наша страна како држава, во Скопје ќе пристигнат доктори од клиники и здравствени центри од повеќе европски земји, токму оние институции кои ги отворија своите врати кога беше најпотребно на Македонија. Нивното присуство на оваа конференција претставува можност искуствата од заедничката работа да се претворат во знаење, протоколи и системски решенија кои ќе придонесат за подобра подготвеност на здравствените системи во иднина – рече портпаролката на Владата Марија Митева денеска на прес конференција.

Настанот ќе започне со свечено институционално отворање, по кое ќе следува комеморативен момент како потсетник дека зад секоја трагедија стојат човечки приказни.

Во рамки на конференцијата ќе се одржат повеќе тематски панели посветени на повеќе аспекти.

– Ќе зборуваме за европскиот механизам за цивилна заштита и меѓународниот одговор – координација, солидарност и искуства. На овој панел ќе се дискутира за активирањето на европските механизми за помош, меѓународниот медицински одговор и трансферот на пациенти, како и за координацијата меѓу државата, институциите и здравствениот систем. Посебен фокус ќе биде ставен на логистичките, правните и организациските аспекти на ваквите операции, како и на научените лекции. Понатаму, ќе се фокусираме на национален и меѓународен здравствен одговор и акутен третман на изгорениците. Овој панел ќе се фокусира на медицинскиот аспект на кризата, од првичната тријажа и итниот медицински одговор, до комплексниот третман на тешки изгореници. Ќе се разгледуваат хируршките и пулмолошките аспекти на третманот, како и координацијата меѓу различните клиники и здравствени установи во земјата и регионот – најави Митева.

Третиот панел ќе биде посветен на долгорочниот процес на закрепнување на пациентите. Ќе се зборува за мултидисциплинарната соработка во третманот, рехабилитацијата, физикалната медицина и функционалното враќање на пациентите, како и за психолошката и психијатриската поддршка. Посебно внимание ќе биде посветено на долгорочното следење и подобрувањето на квалитетот на живот на преживеаните. Ќе се зборува како од искуство се стигнува до нови решенија, за улогата на заедницата, институциите и научените лекции. Ќе се дискутира за болничките капацитети во услови на криза, европските стандарди, како и за улогата на хуманитарните организации и несебичната поддршката од страна на заедницата.

На завршна сесија ќе се презентираат идните решенија и системски чекори кои ги преземаат институциите.

– Една година по трагедијата, Владата останува доследна на ветувањето дека поддршката за жртвите, повредените, нивните семејства и за здравствениот систем нема да биде еднократна, туку континуирана и системска. Од првиот ден беше преземена обврска дека државата ќе стои зад процесот на лекување, рехабилитација и закрепнување, но и дека трагедијата ќе биде претворена во поттик за подобрување на институционалните капацитети и подготвеноста на системот. Тоа ветување денес се реализира преку конкретни мерки, соработка со домашни и меѓународни партнери и постојано унапредување на здравствените и кризно-менаџерските механизми – додаде таа.

The post ВЛАДАТА ОРГАНИЗИРА МЕЃУНАРОДНА КОНФЕРЕНЦИЈА ЗА ПОЖАРОТ ВО КОЧАНИ Ќе присуствуваат 37 лекари и медицински експерти од странство appeared first on plusinfo.mk.