Жителите на Битола и на Прилеп неколку денови се соочуваат со необичен проблем – не можат да добијат Извод од матичната книга на родените, затоа што, како што посочуваат, од Управата за водење на матични книги им рекле дека „нема хартија за печатење“.

Граѓаните од двата најголеми града во пелагонискиот регион, револтирани, потенцираат дека ова создава дополнителни бариери, особено во ситуации кога документот мора да биде понов од 6 месеци за завршување на важни административни процедури.

Плусинфо стапи во контакт со Управата за водење на матични книги, од каде што, пак, тврдат дека не станува збор за недостиг на хартија, туку за организациски пропуст во дистрибуцијата, најмногу предизвикан од летните одмори и намалениот број на присутни вработени во овој период.

– Во прашање е мал застој при дистрибуција на специјалната хартија, што се должи на тоа дека е период на летни одмори, а дел од магацинерите не биле присутни за навремено да ги издадат потребните материјали до подрачните одделенија. Точно е дека во петокот снемало хартија, но веднаш било реагирано и прилепчани уште денеска ќе можат да ги вадат своите документи, иако ние инсистираме да го прават тоа по дигитален пат – велат од Управата.

Сепак, зад овој „мал застој“ се крие една посложена ситуација. Имено, како што објаснуваат од Управата, граѓаните имаат избор помеѓу двојазична и еднојазична форма на документот, но очигледно жителите на Битола претежно бараат еднојазичен документ. Тоа создало поголема потрошувачка на специфичната хартија за оваа верзија.

– Граѓаните можат да добијат извод во двојазична верзија, за што има доволно хартија, или да се префрлат на дигитална верзија, која ние ја промовираме бидејќи е брза, ефикасна и не создава вакви застои – велат од Управата за Плусинфо.

Иако Управата упорно промовира дигитализација, очигледно е дека граѓаните сè уште се навикнати и претпочитаат документи испечатени на хартија, што укажува на потребата од поголема информираност, доверба и функционалност на електронските услуги.

Министерот за дигитална трансформација Стефан Андоновски неодамна истакна дека дигитализацијата во Македонија не е проект сам по себе, туку е суштинска трансформација на институциите и на општеството.

– Не дигитализираме поради тоа што е во тренд. Дигитализираме заради функционалност, борба против корупцијата, достоинство и еднаквост. За вработените да не треба да земат слободен ден од работа за да извадат извод. За фирмите што заслужуваат потврди без да платат мито. За сите граѓани кои имаат право на брза, правична и достапна услуга – истакна Андоновски.

The post ЗОШТО БРЗО И ДИГИТАЛНО КОГА МОЖЕ НЕРВОЗНО И НА ХАРТИЈА? Висат по шалтери за документ што можат да го извадат со еден клик appeared first on plusinfo.mk.

Државниот завод за ревизија укажува дека сѐ уште не е завршена дигитализацијата на матичните книги и покрај тоа што започнала пред повеќе од една деценија и во неа се вложени над 520 милиони денари. Скенирани се 52 проценти од записите во матичните книги, а внесени во електронскиот матичен регистар се 49 проценти од записите. Ваквиот степен на реализација, како што соопшти денеска ДЗР, не овозможува поедноставување и забрзување на услугите за граѓаните, ниту пак, доведува до подобрување на квалитетот на податоците што ги користат надлежните институции согласно своите законски надлежности.

Според ДЗР, недостатокот на јасна стратегија, контролни механизми и квалификувани човечки ресурси, спор го оневозможуваат подобрувањето на услугите за граѓаните и го зголемуваат ризикот од злоупотреби на лични податоци и губење на архивскиот материјал од трајна вредност.

– Непостоењето на темелни анализи и јасен акциски план за дигитализацијата на матичните книги довело до зголемување на трошоците, од првично планираните 13,1 милион денари на 157 милиони денари. И покрај ова многукратно зголемување на предвидените трошоци, процесот сè уште не е завршен. Вкупните трошоци за набавка и одржување на електронскиот матичен регистар и дигитализација на матичните книги, од 2012 до денес, изнесуваат 520.952.000 денари, или приближно 8,5 милиони евра. Со цел забрзување на постапките за дигитализација на матичните книги, од 2018 до 2024 година, склучени се 288 договори за дело со 216 лица за „внесување на податоци во електронски матичен регистар во поголем обем“. Утврдено е дека поголемиот дел од ангажираните лица не извршувале активности поврзани со внесување на податоци во електронскиот матичен регистар, туку биле ангажирани во извршување на други работни задачи за што исплатени се средства во износ од 30.578 илјади денари, стои во извештајот на Државниот завод за ревизијаод извршената ревизија на информациски системи како ревизија на успешност на тема „Дигитализација на матичните книги“, со цел да одговори на прашањето Дали со дигитализацијата на матичните книги и процесите во Управата за водење на матичните книги ќе се поедностават и забрзаат услугите за граѓаните, а нивниот квалитет ќе се подобри?

Со ревизијата утврдено е дека Управата нема обезбедено соодветни услови за сместување на матичните книги и чување на архивскиот материјал од трајна вредност и на документарниот материјал за истиот да не се оштети, исчезне или уништи.

Констататирано е дека Управата сѐ уште нема спроведено попис на матичните книги по матични подрачја. Дел од книгите се оштетени, а дел од архивската граѓа од трајна вредност веќе не може да се користи за потврдување на запишаните податоци. Отсуството на упатство за евиденција, чување и спроведување на попис во Управата, не овозможува централизирана евиденција на матични книги и нивна локација, што го зголемува ризикот од нивно оштетување или губење.

– Неусогласеноста на законската и под законската регулатива донесена во 2016 година во делот на обрасците, доведува до издавање на изводи на родени со нецелосни податоци и на не унифицирани обрасци за сите граѓани. Исто така, ревизијата констатира недостаток на искусни и квалификувани ИТ човечки ресурси во Управата, што го зголемува ризикот по безбедноста на нејзиниот информациски систем. Ненавремено и недокументирано управување со корисниците и корисничките привилегии создава можности за неовластен пристап до лични податоци на граѓаните и коруптивни дејствија – предупредува ДЗР.

Ревизорите констатирале дека во Управата недостасува повеќе од 55 искусни и квалификувани човечки ресурси, а намалениот степен на супервизија и контрола на чувствителните работни места, стои во извештајот, дополнително го зголемуваат ризикот од грешки во работењето.

„Отсуствува следење и анализа на логовите од пристапите во системот, како и надзор врз спроведување на политиките и процедурите за пристап во просториите на Управата. Оваа доведува до можност матичарите да пристапуваат во просториите на Управата и електронскиот матичен регистар вон утврденото работно време, за време на викенди и празници.Имено, утврдено е дека дел од вработените вршат внесувања и измени во електронскиот матичен регистар пред 6:30 часот и по 22 часот, без соодветен надзор. Исто така, во повеќе месни канцеларии се печатат и издаваат изводи од матичните книги и за време на викенди и празници“, се наведува во соопштението од ДЗР.

Како што појаснуваат, дигитализацијата на матичната евиденција преку електронските изводи значително ја олеснува пристапноста до административните услуги, овозможувајќи издавање документи преку порталот на Управата. За ова, граѓаните мора да бидат регистрирани на Националниот портал за е-услуги или на порталот на Управата. Анализата на податоците покажува дека 92 проценти од електронските изводи се издаваат во Скопје, додека во поголемите градови како Прилеп, Битола, Охрид и Тетово бројот на издадените изводи е значително помал. Во помалите и рурални средини, како Гевгелија, Делчево и Пехчево, употребата на електронските услуги е речиси занемарлива. Ова, посочува ДЗР, укажува на потребата од засилена поддршка и развој на дигиталните сервиси, со цел обезбедување еднаков пристап за сите граѓани.

Од друга страна, покажала ревизијата, во Управата се доделени 61 сертификат за електронски потпис, кои се распределени меѓу матичарите од сите одделенија и подрачни канцеларии. Со анализа на податоците ревизорите констатирале дека речиси целокупниот број на електронски изводи се потпишува од само три лица од подрачното одделение Скопје, додека 13 матичари воопшто не користеле електронски потпис.

„Во подрачното одделение Скопје, каде е и најголем бројот на издадени изводи, не се користи системот ‘земи бројче’, граѓаните чекаат во редици за поднесување на барања и подигнување на готови документи со што се овозможува настанување на ризик од коруптивно однесување од граѓаните и од вработените на Управата. За надминување на утврдените состојби, дадени се препораки со цел надлежните институции да преземат мерки и активности за обезбедување поефикасни, поквалитетни и подостапни услуги за граѓаните, преку целосна и функционална дигитализација на матичните книги и поврзаните процеси, со што ќе се придонесе кон современа и одржлива јавна администрација, насочена кон потребите на граѓаните“, информира Државниот завод за ревизија (ДЗР).

The post СЀ УШТЕ СЕ ИЗДАВААТ ИЗВОДИ НАПИШАНИ НА МАШИНА ЗА ПИШУВАЊЕ Дигитализацијата на матичните книги е незавршен процес appeared first on plusinfo.mk.

– Во наредниот период ќе разговараме со претставниците на ЕУ во Македонија и со сите наши меѓународни партнери. Има голем број партнери заинтересирани за дигитализацијата во Македонија и мислам дека ќе излеземе со една заедничка национална ИКТ стратегија и национална стратегија за сајбер безбедност што ќе го интегрира и патоказот. Се надевам дека ќе имаме едни и единствени решенија со коишто ќе комуницираме и со Брисел и со ЕУ и со нашите други меѓународни партнери. Програмата на УСАИД, исто така, е заинтересирана во овој дел и мислам дека ќе имаме еден пат и една стратегија по којашто ќе се движиме, а не двојство на планови, стратегии, патокази – рече Андоновски во одговор на прашање по денешната средба со новинарите.

За дигиталната трансформација на земјава добра основа даваат ревизорските извештаи.

– Погледнавме три што се однесуваат на ова Министерство и со должно внимание ги разгледавме. Имаме и препораки за надминување на околностите, но мислам дека има и основи за некоја друга поголема одговорност и се надевам дека и Обвинителството ќе ги разгледа овие ревизорски извештаи, да видиме како се потрошени парите на граѓаните, а не е гарантирана нивната безбедност. Она што ќе работиме во наредниот период е воспоставување минимум стандарди за сајбер безбедност што ќе значи дека секоја институција почитувајќи ги, ќе може да се заштити себе, но преку тоа и граѓаните од сајбер напади – потенцира Андоновски.

Под надлежност на Министерството ќе влезе и Управата за водење матични книги.

– За да постигнеме целосна дигитализација на услугите и сите услуги да бидат достапни преку порталот e-uslugi, но и сите да бидат дигитализирани ќе биде потребна целосна дигитализација на Управата за водење на матичните книги. Сметаме дека надлежноста за Управата треба да ја има онаа институција која што во своја надлежност го има регистарот на населението, а по новиот Закон за организација и работа на органите на државна управа ние ја имаме и надлежноста за раководење и дигитализација на матичните книги. Затоа треба Управата да биде под надлежност на Министерство за дигитална трансформација – прецизира Андоновски.

Министерството ќе дава и идеи околу регулација на медиумите.

– Би бил тежок збор да кажам регулација на медиумите, но наша заложба како Министерство ќе биде на една маса да успееме да ги седнеме претставниците на здруженијата на медиумите, претставниците на сопствениците на медиумите и сите заинтересирани страни во процесот и да донесеме закон или легислатива што ќе одговара на сите овие страни и минимум стандарди што ќе треба да ги исполнуваат електронските медиуми. Не сакаме да наметнуваме решенија во делот на медиумите, сакаме решенијата да произлезат од фелата, од новинарите и секако од радиодифузерите – истакна Андоновски.

Како што кажа, Министерството ќе се заложи и за фриленсерите и за регулација и признавање на работата од далечина, односно од дома, за да немаат проблеми фирмите со инспекциите поради обврската вработените да се регистрираат со електронски картички за присуството на работното место за компаниите со над 50 вработени.

– Во однос на фриленсерите наша заложба и во владината програма е дека ќе ги препознаеме како лица кои работат на дигитални платформи и заработуваат преку тие платформи. Се надевам дека со измените што се подготвуваат во Законот за работни односи токму оваа категорија ќе биде вклучена – посочи Андоновски.

The post МАТИЧНИТЕ КНИГИ ЌЕ СМЕНАТ ГАЗДА Ќе ги преземе Министерството за дигитална трансформација appeared first on plusinfo.mk.

Имено, Судот изрази сомнеж во уставноста на членот 4 став 1 точка 2 во делот националност, членот 11 став 1 точка 1 во делот националност и членот 13 став 1 точка еден во делот националност.

Во следниот период Уставниот суд ќе оценува дали е уставно покрај наведените лични податоци како што се име, презиме, податоци за раѓање и живеалиште, граѓаните да ја наведуваат и својата националност во матичните книги на родените, на венчаните и умрените.

Според Судот припадноста кон одредена нација е приватно и внатрешно чувство на секој поединец и е негово право да одлучи дали ќе биде припадник на одредена нација, дали ќе се изјасни за сопствената националност, но и да се повика на правото да не се изјаснува по ова.

Уставниот суд смета дека овие одредби се во спротивност со неколку членови од Уставот, како што е владеењето на правото, членот 18 кој ја гарантира тајноста на личните податоци.

Од денеска, се додека Судот конечно не се изјасни конечно, не смее од граѓаните да се бараат податоци за националност при впишување во матичните книги на родени, венчани и умрени.

Иницијативата е поденсена на 3 јули 2023 година од страна на политичка партија „Левица”.

Уставниот суд донесе уште две одлуки за укинување на Правилник и Решение за кои од страна на судот беше оценето дека е пречекорен уставниот рок за објавување во Службен весник, а кои беа оспорени со иницијативи поднесени од страна на министерот за правда Кренар Лога.

Со овие одлуки на Уставниот суд, бројот на укинати Правилници за кои беа поднесени 20 иницијативи се зголеми на вкупно 5 Правилници и 1 Решение, односно вкупно 6 прописи кои беа оспорени и за кои од страна на судот е “оценето дека е пречекорен уставниот рок за објавување предвиден во член 52 од Уставот”.

The post ВО МАТИЧНИТЕ КНИГИ ПРИВРЕМЕНО НЕМА ДА СЕ ВПИШУВА НАЦИОНАЛОНОСТ Уставниот суд донесе времена мерка appeared first on plusinfo.mk.

Имено, согласно информациите кои ги споделија државните органи, Управата за водење на матични книги при спроведување на процесот на дигитализација направила низа пропусти кои директно ги загрозува личните податоци на граѓаните. Дел од забелешките се следните:

– Изворниот код за пристап до податоците од матичните книги бил даден на USB,

– Управата нема евиденција за хардверот, серверите и софтверските апликации на кои личните податоци се обработуваат,

– Нема логови за влез во матичната евиденција, личните податоци се складирани на сервер без да може да се идентификува кој има пристап до серверот,

– Економските оператори ги собирале податоците без придружба од службени лица од УВМК,

– Просторијата каде што се скенирале личните записи не била физички обезбедена, не може да се утврди идентитетот на лицето кое пристапило до софтверските модули каде што се внесени скенираните записи и личните податоци, преносните медиуми не биле заштитени,

– Немало докази за превенирање на неавторизиран пристап до личните податоци, не се знае кој пристапил до личните податоци, каде истите биле изнесени, каде завршиле и со каква цел.

Со еден збор, башибозук со податоците на граѓаните! Не се знае ни кој се може да го поседува и за каква цел да бидат злоупотребени. А постојат мал милион начини овие податоци да бидат злоупотребувани за политички, финансиски или за лукративни цели.

Дополнително скандалозна и коруптивна е и самата тендерска постапка за избор на фирмата која го спровела ова дигитализирање на податоците. Тогашниот директор Бујар Дарлишта, кадар на ДУИ, избрал компанија Новатек ИНВ ДООЕЛ Скопје основана месец дена пред тендерот, за што постои и кривична пријава, ама нема никаква конкретна реакција од страна на обвинителството.

Молкот на институциите сега, како и молкот на обвинителството за поднесените пријави само говори дека оваа држава и нејзините институции се киднапирани и се држат во заложништво од страна на една мафија на власт. Кога таа мафија ќе падне и кога институциите ќе бидат ослободени, тогаш ќе следат и конкретни одговори и конкретна одговорност – се вели во реакцијата на ВМРО-ДПМНЕ.

Неодамна Државната комисија за спречување на корупција (ДКСК) на седница отворила сериозни сомнежи за трговија со милиони лични податоци на македонските граѓани. Случајот се однесува на дигитализацијата на матичните книги, со податоци за умрени, родени и венчани, спроведуван преку Управата за водење на матичните книги.

Според антикорупционерите, во две тендерски постапки кои биле спроведени, не биле предвидени соодветни заштитни мерки со цел да се зачува приватноста на личните податоци на граѓаните при скенирањето, контролата, управувањето, преносот и нивната обработка од страна на компанијата која што ја спроведувала дигитализацијата на матичните книги.

Помош за случајот пред неколку месеци била побарана од Агенцијата за заштита на личните податоци, која што извршила супервизија во УВМК, со цел да се провери кој сè имал пристап до скенираните документи за лични податоци, како тие биле чувани и дали биле заштитени.

Институциите засега немаат конкретен одговор дали се тргувало со личните податоци на граѓаните. Сомнежот на антикорупциска за пропусти при дигитализација на матичните книги, поткрепен со документација, ќе оди во обвинителството. Тоа пак, уште пред две години оформило предмет за случајот, по барање на Финансовата полиција, но од Обвинителството нема одговор дали се утврдени неправилности при изборот на фирмата која добила пристап до матичните книги на родени, венчани и починати.

Експертите предупредуваат дека огромни штети може да претрпат граѓаните ако се покажат како точни сомнежите за протек на лични податоци од матичните книги и велат дека дигитализација е процес кој мора да се прави под строги критериуми.

The post НА СЦЕНА Е БАШИБОЗУК СО ЛИЧНИТЕ ПОДАТОЦИ НА ГРАЃАНИТЕ! Опозицијата бара одговори за сомнежите при дигитализацијата на матичните книги appeared first on plusinfo.mk.

Министерот Кренер Лога по ваквата одлука изјави дека Уставниот суд „ја отворил Пандорината кутија“, зашто во многу наврати не бил почитуван уставниот рок за објавување на подзаконски акти во Службен весник.

Против ваквата одлука на Уставниот суд гласаа и судиите Насер Ајдари и Фатмир Скендер.

Професорката по уставно право и поранешната министерка за правда Рената Дескоска оцени дека е „добра вест“ одлуката на Уставниот суд да го преиспитува новото Упатство за изводите од матичните книги во кои има графа за националност.

Според неа, ова упатство треба да се поништи. Таа наведува дека сензитивните податоци за етничката припадност, религијата, политичката припадност, сексуалната ориентација не смеат да се најдат во документ, туку само во матичната книга, затоа што Македонија е потписник на неколку меѓународни документи за заштита на податоците. Во матичните книги го има податокот за етничка припадност, но не смее да го има во изводите кои ги добиваат граѓаните.

„Етничката припадност спаѓа во групата на сензитивни податоци кои подлежат на посебна заштита согласно правилата за заштита на лични податоци. Други такви податоци се податоци за религиозна припадност, политичка определба, здравствена состојба, сексуална ориентација и сл. Нашата држава е потписник на Конвенцијата за заштита на лица во однос на автоматска обработка на лични податоци, а јас лично во декември 2019 го потпишав и Протоколот за нејзина измена со кој дополнително се зајакнува заштитата на овие чувствителни податоци. Тој Протокол е ратификуван во Собранието во јуни 2021 и е задолжителен за нас“, напиша Дескоска на Фејсбук.

The post ИЗВОДИТЕ СО ГРАФА ЗА ЕТНИЧКА ПРИПАДНОСТ ЌЕ ПОЧЕКААТ Уставниот суд ја одложи примената на новото Упатство appeared first on plusinfo.mk.

– Предметот е доделен кај судија известител и наскоро ќе се изработи реферат. Во оваа фаза можам само да кажам дека имаше сомнеж дека е спротивно на Уставот, а своите аргументи ќе ги дадам на седница кога ќе се одлучува за овој предмет. Во оваа фаза Уставниот суд не може да донесе времена мерка за каква што ме прашувате, односно да ја замрзне примената на Упатството, зошто нема такви овластувања според актуелниот Деловник. Таква мерка се носи во моментот кога рефератот со конкретен предлог ќе биде ставен на седница – рече Кацарска.

Таа информираше дека до моментот на одржување на брифингот нема пристигнато иницијатива од страна на една политичка партија, која јавно соопшти дека е подготвена (Левица).

На овие изјави на претседателката на Уставниот суд, од Министерството за правда тврдат дека националноста во изводите е предвидена уште со Законот за матична евиденција од 1995 година.

„Графата за националност е задолжителна. Упатството не се коси со законите, напротив, донесувањето на Упатството и внесувањето на националност во изводите се заснова токму со Законот за матична евиденција. Националност во матичната книга на родените се предвидува во членот 4, на венчаните во членот 11, и на умрените во член 13 од Законот за матична евиденција кој е на сила од 1995 година. Секое непочитување на Законот е кривично дело“ – велат од Министерството за правда.

Останува нејасно зошто, доколку оваа графа за националност била задолжителна уште од 1995 година, неа никогаш ја немало во изводите во изминативе 28 години и зошто никогаш не било донесено Упатството за спроведување на оваа законска обврска.

The post АПСУРД, ГРАФАТА ЗА НАЦИОНАЛНОСТ ЦЕЛО ВРЕМЕ БИЛА ЗАДОЛЖИТЕЛНА, НО „ЗАБОШОТЕНА“!? Министерството за правда контра претседателката на Уставниот суд appeared first on plusinfo.mk.

Како што соопштија денеска од Министерството за правда, ова Упатство ќе стапи на сила по истекот на осум дена од објавувањето во Службен весник за изводите на родените додека за другите изводи поради финансиски импликации, Упатството ќе започне да се применува од 1 јануари 2024 година.

The post НОВИТЕ ИЗВОДИ ОД МАТИЧНО ЌЕ ИМААТ ГРАФА ЗА ЕТНИЧКА ПРИПАДНОСТ Министерот Лога го потпиша Упатството за нивно изменување appeared first on plusinfo.mk.

„Затоа, со вакво основано сомневање, реагираме и бараме од Комисијата за спречување на корупција да го преиспита овој случај, како и од Јавното обвинителство да постапува. Бидејќи ова не е прв пат Управата за матични книги да спроведува вакви сомнителни тендери, очекуваме од горенаведените институции – во име на транспарентноста – да дадат и повеќе детали за аферата, а покрај тоа да ја известат јавноста на чија сметка од функционерите на ДУИ е реализирана оваа зделка. Дали последниот корисник е директорот на оваа институција или таа води до претседателот на ДУИ? Ние како опозиција ќе чекаме одговор и нема да се откажеме од интересот за дознавање на вистината. Во спротивно, ќе мора да заклучиме дека се работи за класична корупција што ја спонзорира Владата“, порачува коалицијата.

Влада која и во време на криза и пандемија си дозволува да зафаќа во народните пари не заслужува да владее, наведуваат Алијанса за Албанците и Алтернатива.

The post Алијанса и Алтернатива: Афера во Управата за матични книги – 480.000 евра за фирма на син на кадар на ДУИ appeared first on plusinfo.mk.

– Ги охрабруваме граѓаните и медиумите да зборуваат јасно и гласно, бидејќи тоа придонесува за ред и дисциплина. Сериозно ги земавме предвид забелешките од последниот извештај на Транспаренси Интернејшнл и ги вградивме во овој план. Ги елиминиравме пречките и ќе имаме функционален систем во борбата против корупцијата. Тие ќе го санкционираат секој тип на корупција без исклучок. Планот има за цел да спречува корупција на власта, но и да ги открива коруптивните инсталации на режимското владеење. Овие го попречуваат функционирањето на системот, вклучувајќи го и правосудството. Дојде време во целост да се ослободиме од режимските остатоци. За ваквите злодела против претходната криминална власт денес се водат судски постапки, а додека тие одговараат, ние продолжуваме со демонтажа на нивните остатоци во системот. Правдата е тука, секој ден по рочиштата и низ судниците. Додека тие се бореа да нема правда, ние почнавме со активна транспарентност. Нема враќање назад, воведовме ред и домаќински однос кон трошењата, го отворивме трезорот, а граѓаните можат да ја следат секоја трансакција. За кус период ги очекуваме и новите веб страни кои ќе бидат услужно ориентирани. Нашата Влада е на прво место во регионот по отвореност и транспарентност – рече премиерот.

Медиумите сега известуваат за случаи за кои порано на власта не ѝ се слушаше, додаде Заев, и посочи дека новинарите треба да продолжат да бидат партнери на граѓаните.

– Граѓаните сведочат дека нема недопирливи. Казната за корупција ги опфаќа сите. Вицепремиерот Николовски и сите надлежни министерства направивме увид во сите точки кои треба да ги поврзат институциите кои се најповикани да ги спречат сите форми на корупција. Ги собравме најважните совети за да изготвиме план кој ќе даде брзи ефекти. Влегуваме во целосна дигитализација на Јавното обвинителство. Дигитализацијата ќе го забрзат процесот на решавање на предметите. Нема веќе предмети во фиоки. Секој предмет мора да има брза разрешница. Се воспоставува електронски систем за инспекција, Е-инспектор, а со овој систем се елиминира субјективниот пристап во водењето на предметите. Воведуваме целосно дигитализиртање на трите книги од Управата за матични книги. Наскоро ќе следува и укинувањето на вадењето изводи. Го подобруваме и системот за укажувачи, со цел да ги заштитиме укажувачите. Ја подигаме свеста кај граѓаните и ги охрабруваме да пријавуваат случаи на корупција. Ако некој граѓанин не е соодветно услужен или е повлечен во корупција, тогаш службеникот ќе биде пријавен и ќе биде казнет. Граѓанинот е секогаш на прво место, а ние сме тука за да служиме – рече Заев.

При склучување брак, посочи вицепремиерот Љупчо Николовски, наместо три пати да се оди до Управата за матични книги, отсега ќе се оди само еднаш.

– Вака значително ќе се скрати времето за чекање и ќе се забрзат постапките што ги водат граѓаните, како и ќе се елиминира евентуалната корупција. Едногласно е усвоен Планот за борбата против корупцијата. Рековме дека оваа година ќе биде антикорупциска и така постапуваме. Ова се храбри политики за враќање на довербата на граѓаните кон институциите и во оваа област граѓаните набрзо ќе ја воочат разликата. Планот е подготвен врз основа на сите совети од јавните институции, од независните регулаторни тела, а содржи нови начини за спречување на корупцијата. Донесовме нов етички кодекс на однесување со кој се одредува начинот на работење на сите носители на извршни функции именувани од Владата. Досега над 300 функционери го имаат потпишано кодексот и спроведена е обука кај дел од функционерите. Транспарентно се објавени имињата и веќе се спроведува тестот за интегритет преку кој ќе се утврди ризикот од корупција. Во функција е новиот национален регистар на вистински сопственици за сите фирми и нема да може да ни се случат нови „белизиња“ и „панами“. Го подигнавме нивото на отчетност и тоа е главна одлика на Владата. Сите министерства и сите општини ги задолживме да ги објавуваат сите информации на своите веб-страници. Тие имаат обврска за објавување на 22 различни типови на документи пред граѓаните. Го подготвивме овој план и очекуваме резултати на краток, но и на долг рок. Содржи системски мерки и конкретни задолженија за министерствата и интитуциите – рече Николовски.

Анализите покажаа, додаде тој, дека подигањето на нивото на дигитализација имаат клучна улога во превенцијата од корупција, па затоа креиравме системски мерки за правична примена на законите.

– Дигитализацијата ќе го забрза процесот на решавање на сите предмети. Тие не смеат да стојат во фиоки. Со целосно дигитализирање на трите книги од Управата за матични книги, граѓаните ќе можат директно да ги добијат документите без да чекаат на шалтери. За да се подобрат услугите за граѓаните и фирмите, во полна функција се става и Централниот регистар за население . Воведуваме и Регистар за службени возила, а на тој начин ќе се спречи злоупотреба на службените возила за приватни цели – посочи вицепремиерот.

The post Заев и Николовски во офанзива против корупцијата: Нема веќе чување предмети по фиоки и чекање на шалтери, воведуваме Е-инспектор appeared first on plusinfo.mk.