Европската комисија го назначи словенечкиот дипломат Марко Маковец за главен советник за помирување и нормализација на Западен Балкан во рамките на Генералниот директорат за проширување и источно соседство, соопшти Европската комисија, а пренесе регионалната телевизија „Н1“.

Генералниот директорат е задолжен за политиката на проширување на Европската Унија и за односите со источните соседи на Унијата, обезбедувајќи поддршка за земјите со перспектива за членство во исполнувањето на критериумите за пристапување.

Маковец до неодамна беше шеф на кабинетот на еврокомесарката за проширување Марта Кос. Претходно беше директор во Европската служба за надворешно дејствување, каде што беше задолжен за Западен Балкан, Турција, земјите од Европската економска област и за односите со Обединетото Кралство по Брегзит, потсетува „Н1“.

Пред тоа Маковец извршувал повеќе високи функции во словенечката дипломатска служба и во Владата на Словенија.

The post ЕУ НАЗНАЧИ ГЛАВЕН СОВЕТНИК ЗА ПОМИРУВАЊЕ И НОРМАЛИЗАЦИЈА НА ЗАПАДЕН БАЛКАН Функцијата ќе ја врши Словенецот Марко Маковец appeared first on plusinfo.mk.

Пратеникот на ВМРО-ДПМНЕ, Бојан Стојаноски, на денешната прес-конференција истакна дека опозициските партии со неусвојувањето на Изборниот законик не ја оштетија само дијаспората, туку и граѓаните што живеат во државата.

– Денеска е 15 јули, последниот рок кога требаше да биде усвоена изборната реформа. Во исто време, додека е закажана оваа прес-конференција во 11 часот, започнува пленарната седница на која има 24 точки, но точката за Изборниот законик нема да биде на дневен ред. Со што станува јасно дека обврската што Македонија имаше, да го усвои Изборниот законик, нема да биде исполнета. Четири месеци преговарање во рамки на Министерството за правда, средби во Собранието, отворена понуда од владиното мнозинство кон опозицијата и повторно, опозицијата не смогна сили да седне, да го договори Изборниот законик, онака како што на нив им одговара и да го поднесеме во Собранието, за да може денес да го усвоиме. Оваа коалиција не ја оштети само дијаспората, ги оштети и граѓаните кои живеат во нашата држава, но покажа и дека изјавите на Кос и Рокас, коишто се европски претставници, не значат ништо пред нивниот политички интерес – рече Стојаноски.

Тој нагласи дека тоа кое што го гледаме денес во јавноста е театар на свесна блокада, која што треба да им служи како алиби за наредниот изборен пораз апсурд.

– Не се сретнаа ниту еднаш, иако кажаа дека тоа ќе го направат. Немаше во рамките на Собранието никакви преговори и тоа директно оди во штета на она што беше и нашиот интерес, тоа што го укажуваа и дипломатите од Европската унија, конкретно амбасадорот Рокас и комесарката Кос. Сето ова што се направи, се направи само за да не гласа дијаспората, како што тие ги нарекуваат, „антидржавниот елемент“, и оваа одговорност, зашто Македонија нема да ги исполни обврските, коишто се десет на број, и нема да го заокружи процесот со исполнети десет од десет обврски и зошто нема да ги земе тие 4,2 милиони евра, кои што доаѓаа со исполнувањето на оваа обврска, има име и презиме, тоа е коалицијата ДУИ, СДСМ и Левица – рече Стојаноски.

Тој истакна дека усвојување на овој закон не беше само за да ги детерминира и реорганизира изборните процеси во Македонија. Со усвојувањето на овој закон, рече тој, граѓаните на државата ќе добиеја 4,2 милиони евра, средства кои требаше да се искористат за подобрување на животните услови во оваа држава.

– Покрај тоа што нема да имаме подобрување на изборниот модел, граѓаните ќе останат без 4,2 милиони евра. Кога ќе поднесуваат амандмани за подобрување на некои животни услови, треба да знаат кои се одговорни зошто 4,2 милиони евра нема да легнат во државниот буџет и да бидат искористени за проекти и за подобрување на животните услови на граѓаните – рече Стојаноски.

Најави дека во наредниот период ќе разговараат за оваа прашање, но потенцира дека опозициските партии не сакаат да се договаарт.

– Секако дека ќе разговаме и останува простор во наредниот период. Важно е она што јас не знам повеќе од ова што да направиме, бидејќи сите услови кои што тие ги имаа ние ги прифативме. Останува уште еднаш да им дадеме можност да се договораат како што нема да се договораат бидејќи не сакаат да се договораат, затоа што се свесни дека им е потребно алиби бидејќи за две години ќе има избори и на нив им е потребно алиби – нагласи пратеникот Стојаноски.

The post ОПОЗИЦИСКИТЕ ПАРТИИ ГИ ОШТЕТИЈА ДИЈАСПОРАТА И ГРАЃАНИТЕ ВО ЗЕМЈАВА Стојаноски за неусвојувањето на Изборниот законик appeared first on plusinfo.mk.

Премиерот Христијан Мицкоски денеска, одговарајќи на новинарско прашање во однос на обвинувањата од СДСМ за тоа дека се лаже за Изборниот законик дека е европски услов, порача дека за тоа опозицонерите може да слушнат изјавата на комесарката Марта Кос.

– Не знам дали понекогаш СДСМ треба да ја коментираме, но ова прашање заслужува коментар, бидејќи е значајно за граѓаните и за државата. Впрочем, сите можеа да ја слушнат комесарката Марта Кос како таа тоа го кажа. Еве мене не мора да ме слушаат, неважен сум јас во случајот, еве нека ја слушаат комесарката Кос, таа го кажа дека тоа е дел од реформите коишто се битни за евро-интеграција – рече Мицкоски.

Според него, некои политичари од опозицијата се контрадикторни во своето однесување.

– Знаете, чудни се некои политичари во опозицијата. Кога станува збор за нивен интерес т.е. да бидам попрецизен, нивен џеб, тогаш полна им е устата со Европа, Европа и само Европа. Кога треба да зборуваме за одговорност и носење потези, а кога се во опозиција, тогаш сѐ прават само за да ние таму не стигнеме каде што треба да стигнеме. Но и со нив и без нив, ние продолжуваме да ги реализираме стратешките цели, а тоа е полноправно членство на земјата во рамките на Европската Унија – рече Мицкоски.

The post ЕВРОКОМЕСАРКАТА КОС ЈАСНО КАЖА ДЕКА ИЗБОРНИОТ ЗАКОНИК Е ДЕЛ ОД РЕФОРМИТЕ Мицкоски за спротивните тврдења на опозицијата appeared first on plusinfo.mk.

Европската комесарка за проширување, Марта Кос, изјави дека денеска е „Супер вторник“ за проширувањето на Европската Унија, поради одржувањето пристапни конференции со четири земји кандидати во ист ден.

Кос на платформата „Икс“ објави дека за првпат по повеќе од 20 години се одржуваат толку пристапни конференции во еден ден. На денешните конференции учествуваат Црна Гора, Украина, Молдавија и Албанија.

– Нашите предводнички Украина, Молдавија, Албанија и Црна Гора прават големи чекори напред – наведе Кос, додавајќи дека Црна Гора е на чело на колоната како најнапредна земја во пристапните преговори.

Еврокомесарката посочи дека Украина и Молдавија го отвораат Кластерот 6, што ги опфаќа областите како одбраната и безбедноста каде, според неа, аргументите за нивното членство во ЕУ се особено силни.

– Албанија ќе ги затвори своите први поглавја, а Црна Гора е цврсто во завршната фаза на формалните преговори, со затворени 18 од вкупно 33 поглавја – додаде таа.

Кос нагласи дека денешниот моментум мора да се претвори во „конкретни резултати на терен“.

– Денеска е ден и за славење и за поглед кон иднината. Ја имаме поддршката од земјите членки, но само доколку земјите кандидати ги исполнат условите – заклучи европската комесарка Кос.

The post ЗА МАРТА КОС ДЕНЕСКА Е „СУПЕР ВТОРНИК“ Четири земји кандидати ќе одржат пристапни конференции со ЕУ appeared first on plusinfo.mk.

На телевизија Алфа во емисијата „За или Против“ гостуваше Миле Лефков член на ИК на ВМРО-ДПМНЕ и пратеник, кој на самиот почеток истакна дека Македонија успешно ја спроведува Реформската агенда, посочувајќи дека, според оценките на Европската Унија, се реализирани девет од десет предвидени точки, а земјата е оценета како најуспешна во нејзината имплементација, соопшти ВМРО-ДПМНЕ. МИА интегрално го пренесува соопштението на партијата.

– Видовме и не само по наши изјави туку и по изјавите на Марта Кос дека девет од десет точки се остварени, Македонија е прогласена за најуспешна држава во спроведување на Реформската агенда и тоа е признаено со средствата коишто ги добива од Европската Унија за спроведување на оваа Реформска агенда, ние рековме дека Реформската агенда не се спроведува само заради средствата коишто се добиваат туку за усогласување со европското законодавство и подигање на стандардите, кога станува збор за управување со јавни финансии, за отчетност, реформи во судството – рече Лефков.

Лефков посочи дека дел од опозициските партии ги менуваат своите ставови во однос на измените на Изборниот законик и се обидуваат да го попречат процесот и истакна дека предложениот модел на гласање веќе функционира во голем број земји членки на Европската Унија и ги обвини СДСМ, ДУИ и Левица дека преку политички спинови се обидуваат да создадат отпор кон предложените решенија.

– Гледаме од опозицијата и од СДСМ и од Левица менување на нивните ставови и обид за блокирање, од 27 земји членки во Европската Унија, околу дваесеттина го имаат истиот систем на гласање, не станува збор за нешто коешто е непроверено, коешто не функционира во светот, апсолутно значи приклучок кон она коешто го работат современите демократи. Секој од овие опозициони партии ДУИ, СДСМ, и Левица почнувајќи од свои сопствени стравови, играјќи за една мала нивна публика, се обидува да ја спинува темата околу Изборниот законик, и да наоѓа безброј различни начини како да го саботира овој процес – дециден е Лефков.

The post МАКЕДОНИЈА Е ЛИДЕР ВО РЕФОРМСКАТА АГЕНДА Левица, СДСМ и ДУИ го попречуваат носењето на Изборниот законик appeared first on plusinfo.mk.

„Работевме посветено неколку месеци на Изборниот законик сите пратенички групи и усогласивме текст. Тој текст беше потпишан од сите партии освен од Левица која се изјасни дека се согласува со содржината на текстот, но не сакаа да се потпишат на предлогот“.

Вака објасни денеска премиерот Христијан Мицкоски во врска со Изборниот законик при средбата со еврокомесарката за проширување Марта Кос.

– Ова што се случува деновиве е политичка гимнастика.Суштината и вистината е оваа: Тогаш се појави втората партија СДСМ која рече ако тие така се однесуваат и ние така ќе се однесуваме и си најдоа причина зошто да биде така. И едните и другите се обидуваат од ова да направат естрада.

Тој потсети дека на вчерашната координација во Собранието, ставот бил јасен – опозицијата да усогласи и да достави текст, кој потоа ќе биде прифатен.

– Нашиот став беше јасен – договорете се вие во опозицијата, направете текст и тоа што ќе се договорите ние ќе го прифатиме. Тоа е нашата позиција. И денеска од оваа прес-конференција ја испраќам истата порака – договорете се, дајте ни текст и ние ќе го прифатиме, нормално, со вклучени препораки на ОБСЕ/ОДИХР и гласање на дијапсората. Еве, како тие ќе кажат, така ние ќе прифатиме. Само нека се усогласат. До денеска немаме усогласен текст, времето си поминува, ќе дојде средина на јули, би било штета да ги изгубиме тие средства, нешто повеќе од четири милиони евра. Зошто да ги изгубиме и да не бидеме стопроцентно комплетни за сите реформи што требаше да ги испорачаме до крајот на јуни. Еве, сега велиме, имаме мала екстензија до средината на јули – подвлече Мицкоски.

Комесарката за проширување Марта Кос на денешната средба со премиерот Мицкоски истакна дека Изборниот законик ќе биде усвоен и оти тоа на земјата ќе ѝ донесе дополнителни четири милиони евра. Таа истакна оти Македонија знае како да испорача резултатии и напредува во реформите според планот на раст.

– Планот на раст е нов начин со кој ЕУ се ангажира со земјите кандидати. Ова не е милосрдие. Ние можеме да даваме заеми и грантови. Овој изборен законик е над 4 милиони евра. За мене ова се многу пари. Тоа не е само да се штиклира туку да се направи нешто добро за луѓето и земјата. Охрабрени сме и среќни во Брисел што Македонија што нашрави скок на првите позиции кога станува збор за исполнувањето на реформите. Ова покажува дека таму каде што има политичка волја владата може да испорача‘. 750 милиони се за земјата и ќе ги добие отако ќе ги испорача рееформите и тие пари може да ги искористи за граѓаните.

The post НАМЕСТО ЕСТРАДА ЗА ИЗБОРНИОТ ЗАКОНИК, ДАЈТЕ ПРЕДЛОГ, ВЕЛИ МИЦКОСКИ Левица и СДСМ ја кочат реформата поради која зависат 4 милиони евра appeared first on plusinfo.mk.

Еврокомесарката Марта Кос по денешната средба со премиерот Христијан Мицкоски во Владата уште еднаш повтори дека земјава мора да ги направи уставните измени со внесување на Бугарите како малцинство, за да го продолжи патот кон Европската Унија. Кос рече дека земјава, иако испорачува многу во реформската агенда, сепак за продолжување на пристапните преговори потребни се уставни измени.

– Гледаме напредок во реформската агенда и токму поради тоа сакаме да ја поздравиме зголемената посветеност на Владата во напредувањето на оваа работа. Членство во ЕУ ќе донесе уште поголеми придобивки. Би сакала да го објаснам ова со случајот на Црна Гора. Знаеме дека Црна Гора е предводник и ќе добијат трипати повеќе средства од финансиска помош на ЕУ кога ќе станат членка. Ќе имаат веднаш придобивки, а ние истото го сакаме и за Северна Македонија. Но, усвојувањето на договорените уставни измени останува неопходниот следен чекор за формално започнување на пристапните преговори и затоа уште еднаш ја охрабрувам Владата да го започне процесот којшто наскоро може да донесе измени во Уставот. Имате ваше место во Европската Унија како полноправна земја членка и дозволете ни да работиме заедно – изјави Кос на прес-конференцијата во Владата.

Одговарајќи на новинарско прашање Кос кажа дека Европската Унија не може да дава гаранции однапред и дека ЕУ се темели на доверба, обврски, посветеност, нивно исполнување и работа. Прашана како Македонија да изгради доверба со Бугарија, кога таа не ги признава македонскиот јазик и идентитет, Кос кажа дека Европската унија е изградена токму на доверба.

– Нема рецепт како ќе ја изградиме довербата. Јас не сум онаа која може да ви дава совети за тоа како да изградите доверба со вашите соседи. Но она што го знам е дека колку повеќе доверба имате, толку полесно ќе напредувате низ пристапниот процес – рече Кос.

По средбата со Мицкоски, Кос ќе разговара и со претседателот на Собранието Африм Гаши, а ќе има средба и со вицепремиерот и министер за европски прашања, Беким Сали.

Комесарката Кос заедно со Сали и со министерката за образование и наука ќе го посети студентскиот дом „Стив Наумов“ во Скопје, реновиран со средства од ЕУ. Таа исто така ќе се сретне со младински организации од земјата за да разговараат за можностите што ги нуди поблиската интеграција со ЕУ на младите луѓе, вклучително и преку програми, како што се „Хоризонт Европа“ и „Еразмус+“. Подоцна во текот на денот, комесарката Кос ќе се сретне со претставници на организациите на граѓанското општество и медиумите за да разговара за спроведувањето на клучните реформи поврзани со ЕУ, особено во областа на владеењето на правото.

The post ЕУ НЕ МОЖЕ ДА ДАДЕ ГАРАНЦИИ ДЕКА НЕМА ДА ИМА ИДНИ ПРОБЛЕМИ НА ПАТОТ КОН ЕУ Марта Кос гледа голем напрадок во реформите, но повтори дека уставните измени се услов за напредок appeared first on plusinfo.mk.

Очекуваме европската интеграција да остане процес кој се темели на јасни критериуми, на вредности и на исполнување на реформските обврски, а не процес кој ќе биде оптоварен со билатерални прашања што создаваат неизвесност кај македонските граѓани – рече премиерот Христијан Мицкоски на прес-конференцијата со еврокомесарката за проширување Марта Кос.

– Денешната средба и посета претставува можност за отворен, искрен и суштински разговор за нашата европската перспектива, за реформите што ги спроведуваме и за потребата процесот на проширување да остане доследен на принципите врз кои е изградена Европската Унија – доверба, предвидливост, еднаков третман и почитување на достоинството на секоја држава кандидат.

Изминатиот период од две години Владата покажа дека реформите не се декларативна определба, туку конкретна работа што се мери преку резултати, преку институционални промени, преку економски показатели и преку создавање подобри услови за живот на граѓани. Нашата цел е изградба на функционални институции, посилно владеење на правото, поефикасна јавна администрација, конкурентна економија и амбиент што ќе ја зајакне довербата на граѓаните кај инвеститорите.

Тоа не го правиме затоа што некој тоа го бара од нас, туку затоа што веруваме дека тоа е единствениот исправен пат за развој на нашата татковина и за создавање стабилни институции кои ќе можат да одговорат на потребите на сегашните и на идните генерации.

Во тој процес ја цениме поддршката што ја добиваме од Европската комисија, како и стручната и финансиската помош што придонесува реформите да се реализираат побрзо и поквалитетно.

Истовремено, очекуваме европската интеграција да остане процес кој се темели на јасни критериуми, на вредности и на исполнување на реформските обврски, а не процес кој ќе биде оптоварен со билатерални прашања што создаваат неизвесност кај македонските граѓани.

Граѓаните со години покажуваат јасна определба за европската идеја. Во тој период беа донесени тешки одлуки, беа преземени сериозни обврски и беа направени значајни чекори со уверување дека секој исполнет критериум ќе биде вреднуван на објективен и предвидлив начин. Затоа денес е важно да постои доверба дека процесот ќе продолжи според истите правила што важат и за сите други кандидати и за сите држави коишто биле кандидати.

Нашата определба останува непроменета. Ќе продолжиме со реформите, ќе ја зајакнуваме економијата, институциите и владеењето на правото, затоа што тоа е во интерес на граѓаните и затоа што европските вредности ги разбираме како вредности што треба да бидат дел од секојдневното функционирање на институциите.

Истовремено, остануваме доследни на ставот дека секое трајно решение треба да биде засновано врз заемно почитување, заштита на националното достоинство и јасна, предвидлива европска перспектива.

Верувам дека денешните разговори ќе придонесат за подобро меѓусебно разбирање и за натамошно зајакнување на партнерството со Европската Унија, засновано врз доверба, почитување и заедничка одговорност за стабилноста и просперитетот на регионот – рече Мицкоски.

The post СЕКОЕ ТРАЈНО РЕШЕНИЕ ПОДРАЗБИРА ПРЕДВИДЛИВА ЕВРОПСКА ПЕРСПЕКТИВА Прецизни оценки на Мицкоски по средбата со Марта Кос appeared first on plusinfo.mk.

Еврокомесарката за проширување и соседска политика Марта Кос оцени дека Македонија е меѓу земјите кои покажале најголем напредок во спроведувањето на Реформската агенда, но порача дека вистинскиот исчекор кон Европската Унија зависи од продолжувањето на пристапниот процес и исполнувањето на преземените обврски.

Во интервју за МИА, во пресрет на денешната посета на Скопје, Кос истакна дека земјата заслужува признание за реформите, поради што може да очекува и поголема европска финансиска поддршка.

– Северна Македонија постигна силен напредок во рамките на Реформската агенда и сега е меѓу водечките земји во Западен Балкан. Колку повеќе една земја ги исполнува реформите, толку повеќе поддршка добива – вели Кос.

Таа нагласува дека денеска во Скопје ќе разговара со премиерот Христијан Мицкоски за европскиот пат на земјата, реформите и спроведувањето на Планот за раст за Западен Балкан. Според најавите од Европската комисија, во фокусот на посетата ќе бидат напредокот во реформите и следните чекори во евроинтегративниот процес.

Осврнувајќи се на застојот во пристапните преговори и барањето на македонската Влада за гаранции пред евентуалните уставни измени, Кос вели дека проширувањето функционира според јасни правила и дека никој не може однапред да гарантира дека нема да се појават нови прашања во текот на процесот.

– Сега имаме можност, што се случува еднаш во генерацијата, да го оствариме проширувањето. Оние што ги исполнуваат своите обврски напредуваат, а оние што не ги исполнуваат – заостануваат. Во моменти на забрзување, застојот значи фактичко назадување – порача еврокомесарката.

Кос смета дека Европската Унија треба побрзо да им ги доближува придобивките од членството на земјите кандидати, наведувајќи ги приклучувањето на Македонија кон SEPA, програмите Erasmus+, EU4Health и Digital Europe како конкретни примери за постепена интеграција уште пред полноправното членство.

Таа предупредува дека предолгото блокирање на евроинтеграциите носи и безбедносни ризици.

– Кога Европа ќе остави вакуум, другите ќе се обидат да го пополнат. Затоа, кога земјите кандидати ги исполнуваат своите обврски, и ние мора да ги исполниме нашите – истакнува Кос.

На крајот од интервјуто, таа упати директен апел до македонските власти.

– Проширувањето е во движење. Северна Македонија припаѓа на европското семејство. Вратата е отворена пошироко отколку кога било во една генерација. Сега е време да се испорача и да не се троши повеќе време на изговори. Искористете го овој прозорец на можност – тоа е во ваши раце – порача Марта Кос во интервјуто за МИА.

За време на еднодневната работна посета на Скопје, еврокомесарката Марта Кос ќе има средба со премиерот Христијан Мицкоски, а според најавите ќе разговара и со претставници на Владата задолжени за европските прашања. Во фокусот на разговорите ќе бидат деблокирањето на пристапниот процес, спроведувањето на Реформската агенда, Планот за раст за Западен Балкан и следните чекори на земјата на патот кон членство во Европската Унија.

The post ПРОЗОРЕЦОТ НА ЕУ ЗА ПРОШИРУВАЊЕ Е ОТВОРЕН КАКО НИКОГАШ ДОСЕГА Марта Кос порачува Македонија да не го пропушта овој момент appeared first on plusinfo.mk.

Покажавте силни перформанси во рамките на реформската агенда. Доаѓам во Скопјe за да ја охрабрам Владата да го стори истото тоа и во пристапните преговори затоа што сега имаме можност која се случува еднаш во генерацијата, да го оствариме проширувањето – вели во интервју за МИА еврокомесарката за преговори за проширување и соседска политика непосредно пред нејзината утрешна посета на Скопје.

– Северна Македонија покажа дека може да испорача резултати кога има политичка волја. Ова јасно го гледаме во нејзините силни перформанси во рамките на реформската агенда. Ќе дојдам во Скопјe за да ја охрабрам Владата да го стори истото тоа и во преговорите за пристапување. Сега имаме можност која се случува еднаш во генерацијата, да го оствариме проширувањето. Ова доаѓа со јасни избори. Оние што ги исполнуваат своите обврски напредуваат. Ова го гледаме најјасно во Црна Гора и Албанија. Оние што не ги исполнуваат своите обврски, заостануваат. Во моменти на забрзување застојот значи фактичко назадување – вели еврокомесарката Кос на прашањето дали има предвид нова иницијатива за деблокада на македонската евроинтеграција.

Според неа, напредокот во преговорите за пристапување бара клучен елемент: доверба меѓу земјите кандидати и земјите членки.

– Според моето искуство, таквата доверба првенствено се гради врз два елемента: исполнување на обврските и ставот на земјите кандидати кон ЕУ и нејзините земји членки. Ова почнува со добрососедски односи. Кога меѓусебната доверба расте, процесот на пристапување станува побезбеден. Убедена сум дека ова би било случај и за Северна Македонија – нагласува Кос.

Таа притоа укажува дека досега нема случај на давање гаранции на земја кандидат дека нема да се појави друг спор за време на пристапниот процес до ратификацијата на договорот за пристапување од последната од 27-те земји членки.

– Вистината е дека ниедна земја кандидат никогаш не добила гаранција дека нема да се појави друг спор за време на процесот на пристапување сè до моментот кога и последната земја членка ќе го ратификува договорот за пристапување. Ова е начинот на кој функционира проширувањето на ЕУ. Важно е да се прифати оваа реалност – нагласува Кос.

Во коментар на германско-францускиот нон пејпер, кој промовира постепена интеграција на Западен Балкан во ЕУ пред полноправно членство, таа вели процесот на пристапување бара време, но оти во денешниот свет Европската Унија не може да си дозволи да чека предолго. И, вели, задоволна е од тоа што гледа како европските лидери ја водат оваа дебата, со цел да се изнајдат начини, вели, „да ја доближиме ЕУ до идните граѓани многу порано“.

– По летото, Комисијата има намера да предложи нови начини на земјите членки да ги доближат земјите кандидатки до ЕУ пред пристапувањето. Но, има една важна точка. Ова ќе бара напредок во преговорите за пристапување. Ова останува приоритет. Без таков напредок, понатамошната постепена интеграција ќе биде ограничена – посочува еврокомесарката Марта Кос во интервјуто за МИА, што целосно ќе биде објавено утре.

Комесарката за проширување Кос ќе пристигне утре во Скопје да разговара за патот на земјата кон ЕУ и напорите за реформи, со фокус на спроведувањето на агендата за реформи во рамките на планот за раст за Западен Балкан. До денес, посочуваат, земјата добила 142,1 милиони евра во рамките на Инструментот за реформи и раст по напредокот во спроведувањето на клучните реформи.

За време на посетата на земјата комесарката Кос ќе се сретне со премиерот Христијан Мицкоски и со вицепремиерот и министер за европски прашања, Беким Сали. Нивните дискусии, се посочува, ќе се фокусираат на напредокот во спроведувањето на агендата за реформи, приоритетите за постепена интеграција во ЕУ и пошироките случувања поврзани со патот на земјата кон ЕУ.

Како што наведуваат од Кабинетот на еврокомесарката, предвидено е Кос и премиерот Мицкоски да одржат заедничка прес-конференција. Таа ќе се сретне и со претседателот на Собранието, Африм Гаши, за да разговараат за важноста на конструктивниот политички дијалог и широката меѓупартиска поддршка за реформите поврзани со ЕУ.

Комесарката Кос ќе посети студентски дом во Скопје, реновиран со средства од ЕУ. Таа исто така ќе се сретне со младински организации од земјата за да разговараат за можностите што ги нуди поблиската интеграција со ЕУ на младите луѓе, вклучително и преку програми, како што се „Хоризонт Европа“ и „Еразмус+“.

Подоцна во текот на денот, комесарката Кос ќе се сретне со претставници на организациите на граѓанското општество и медиумите за да разговара за спроведувањето на клучните реформи поврзани со ЕУ, особено во областа на владеењето на правото – наведуваат од Кабинетот на еврокомесарката Кос.

The post ВИСТИНАТА Е ДЕКА НИТУ ЕДНА ЗЕМЈА КАНДИДАТ НЕ ДОБИЛА ГАРАНЦИИ Еврокомесарката Кос доаѓа во Скопје со порака дека шансата е сега appeared first on plusinfo.mk.