Економисти и даночни експерти, пак, велат дека со мерката треба да бидат опфатени сите вработени, а за утврдување на платата да се земе период од август до октомври за да не можат компаниите да влијаат на успешноста на мерката.

Тие предупредуваат владата да внимава со престанок на претходните мерки за намалување на инфлацијата да се поништат резултатите од новите мерки.

Владата најави дека мерката ќе се применува една година, а ќе стартува од јануари 2024 година. Таа е наменета само за компаниите во кои се исплаќаат ниски плати, а зголемувањето на платите ќе се утврдува во однос на просечната плата на секој работник поединечно за периодот октомври – декември 2023 година. Владата го субвенционира само делот за зголемувањето.

– Ограничувањето е дека оваа мерка можат да ја користат сите вработени кои имаат плата до една и пол просечна плата исплатена последните три месеци. Тоа значи дека доколку во декември, ноември и октомври, просечната исплатена плата на вработен не е поголема од една и пол просечна плата, можат да ја искористат мерката во наредните 12 месеци за зголемување во износ од 3.000 до 10.000 денари, кој ќе се договорат со работодавачот. Притоа ослободувањето го добиваат истиот нареден период – појасни вицепремиерот Фатмир Битиќи.

Битиќи вели дека мерката има цел намалување на даночната евазија и сивата економија, поддршка на приватниот сектор за исплата на повисоки плати.

За дел од бизнисмените е нејасна оваа мерка во услови кога државата се обидува да ја намали инфлацијата, бидејќи, како што велат, таа ќе влијае на зголемување на потрошувачката и инфлацијата и дополнително ќе го стимулира увозот.

– Познато е дека зголемувањето на платите ја поттикнува потрошувачката и инфлацијата, па чуди фактот што се носи таква мерка во услови кога и ние и светот се бориме да ја намалиме инфлацијата. Германија, на пример, е загрижена за стапката на инфлација од 3,2%, а ние правиме обратни потези иако имаме висока инфлација – вели Маријана Перковска, претседателка на текстилниот кластер.

Според неа, мерката нема да можат да ја користат извозниците не затоа што не сакаат, туку поради тоа што странските партнери веќе побараа од нив да ги намалат цените на производите.

– Компаниите извозници веќе добија писма од германските партнери, кај кои завршува 70% од македонскиот извоз, дека треба да ги намалат цените во рамките на намалувањето во светски рамки, а тоа за нас значи дека и сегашните плати нема да можеме да ги покриеме бидејќи 80% од нашите трошоци се однесуваат на платите. Во вакви услови дополнително зголемување на платите на работниците ги зголеми нашите трошоци што треба да ги покриеме преку цените на производите. а тие како што реков треба да ги намалиме за да бидеме конкурентни на пазарот од кој зависиме – вели Перковска.

Таа смета дека со оваа мерка владата ги фаворизира увозните компании кои со растот на потрошувачката дома ќе обезбедат повисоки профити.

Економистот Маријанчо Николов смета дека мерката за субвенционирање на зголемувањето на платите ќе влијае на подобрување на социјалната сигурност на работниците и ќе им се даде можност на компаниите на ваков начин да задржат што поголем број работници, но смета дека компаниите треба да најдат начин како по нејзиното завршување да ги задржат покачените плати.

– Оваа мерка ќе им помогне на компаниите да ги зголемат платите иако Владата ќе го субвенционира само делот на придонесите на зголемувањето, односно околу 22% од придонесите. Тоа значи дека владата ќе го плати само придонесот на покачувањето од 3.000 или 9.000 денари. На овој начин дел од компаниите ќе можат да се приближат на просекот на плати, но што е поважно ќе бидат во состојба да ги задржат работниците кои имаат намера да одат во други дејности или да заминат во странство поради ниските плати. Но за мене е многу поважно тоа дали компаниите ќе бидат успешни да го задржат ова зголемување на платите по декември 2024 година – вели Николов.

Тој смета дека зголемувањето на платите може да влијае на пораст на инфлацијата, но смета дека многу поголема опасност за инфлацијата има завршувањето на мерката на замрзнати цени на прехранбените производи.

– Ова зголемување може да влијае на порастот на потрошувачката и инфлацијата, но многу посериозен удар може да се очекува од престанок на мерката за замрзнување на цените на прехранбените производи. Ако цените од јануари повторно почнат да растат несразмерно од околностите ќе имаме нов инфлаторен бран. Владата мора да внимава на оваа состојба за да не се доведеме во ситуација да ги анулираме ефектите од сите мерки кои се носат за подобрување на социјалната состојба на граѓаните и помош на компаниите – вели Николов.

Даночниот експерт Павел Гацов, пак, забележува дека мерката во која како референтна плата треба да биде просекот од последните 3 месеци од годинава може да влијае на ефектите од мерката бидејќи им дава можност на компаниите заинтересирани да ја користат да ги намалат платите во овој период, за да можат да се ослободат од плаќање на придонесите следната година.

Тој предлага како референтна плата за зголемување да се земе просекот од плати од август, септември и октомври. Тој смета дека мерката треба да се однесува на сите вработени, на сите плати и компании.

„Мерката ќе биде непристрасна и неранета доколку како референтна плата за споредба се користи просекот на платите од месеците август, септември и октомври 2023 година. И второ уште поважно, со оглед дека мерката поттикнува зголемување на плата од 3.000 до 9.000 денари, важно е истата да се однесува на сите вработени, сите плати и сите компании, односно да не се лимитира само за оние со пониски плати. Имено, мерено во проценти, помало субвенционирање (регресивност) ќе добијат токму оние со повисоки плати“, напиша Гацов на Фејсбук.

Ваква мерка Владата имаше во период од 3 години почнувајќи од 2019 година кога се субвенционираше покачување на платите од 600 до 6.000 денари. Според официјалните информации, оваа мерка ја искористиле повеќе од 28.000 компании за околу 170.000 вработени.

The post ИНФЛАЦИЈАТА БЕСНЕЕ НИЗ ЕВРОПА, А НИЕ ДОПОЛНИТЕЛНО ЈА ПРОВОЦИРАМЕ? Субвенционираниот раст на платите во приватниот сектор е меч со две острици appeared first on plusinfo.mk.

Од секторот велат дека моментално на удар се малите фирми, но ако не се забрза процесот на вработување странци, на удар ќе бидат и поголемите фирми бидејќи нив им претстои бран на пензионирање на работниците.

– Неколку помали фирми затворија бидејќи не можат да најдат работници за да ги заменат оние што заминаа на сезонска работа или трајно се иселија во странство. Сега се обидуваат да се испробаат во други дејности. Проблемот со работници во текстилниот сектор трае со години, но во последниот период процесот се забрзува бидејќи дел од работниците ги напуштаат работните места и поради задолженост со кредити чии камати се зголемија како резултат на мерките за намалување на инфлацијата. Нови работници не можат да се најдат и покрај тоа што на бироата има невработени, бидејќи младите не сакаат да работат во текстилот иако и овде може да се земе плата повисока од просекот. Има работнички кои заработуваат и по 30.000 денари, но таа плата треба да се заработи со работа. Нам ни останува да увеземе работници или да ја зголемиме продуктивноста со купување посовремени машини кои ќе заменат неколку работници – вели Ангел Димитров од конфекцијата „Мода“ од Свети Николе.

Тој додава дека дополнителен проблем е и тоа што голем број од работничките кои останале се пред пензионирање и дека нивната замена ќе оди тешко.

– И кај нас во „Мода“ состојбата е слична. Имаме голем број работнички кои треба да се пензионираат во наредните години зависно од годината на вработување. Ни останува прво да се обидеме со преквалификации и доквалификации да обезбедиме работници, а потоа во опција е ангажирање странци или осовременување на производната технологија. Тоа значи една машина да замени неколку работнички – вели Димитров.

Проблем со недостиг на работници има и во другите сектори. Има недостиг од обични работници, па сѐ до високостручен кадар.

– Во Организацијата на работодавачи веќе се подготвуваме за ангажирање странци и очекуваме владата да ги поедностави процедурите кои се доста сложени и скапи за сите странци кои сакаат да дојдат во земјава да работат. Моментално не се подготвени ниту нашите претставништва во странство да го реализираат процесот брзо поради сложеноста на процедурите. На пример, за да дојде работник од Непал или од Индија потребно е тој да поднесе документи во нашите амбасади на македонски јазик и да чека да добие виза за престој, па дури потоа да бара работа овде и ако најде да бара дозвола за работа. Сето тоа чини пари и време, а процесот треба да биде брз. На оваа тема, неодамна имавме дискусија и во Организацијата на работодавачи на која повикавме врвни адвокати и претставници од швајцарската агенција за мигранти кои сакаат да учествуваат во овој процес и да помогнат во олеснување на процедурите – вели тој.

Според него, државата треба да ги укине квотите за вработување странци кои се мали во однос на побарувачката од работници.

– Лани побаравме да се удвојат квотите, но не се прифати тоа, па голем дел од високостручен и управен кадар во странските инвестиции не може да биде ангажиран поради исполнување на квотите. Имаме апсурд, странски инвеститор да изгради погон во земјава, а поради потрошени квоти да не може да работи во својата фирма, односно да ја управува. Мислам дека квотите треба да се укинат, не само од ваквите причини, туку и поради можноста административците кои работат на работните дозволи да бидат подложни на корупција поради големата побарувачка на дозволи за работа – вели Димитров.

И Маријана Перковска од текстилниот кластер вели дека треба брзо да се дејствува и да се овозможи вработување на странци, но пред тоа треба да се донесе посебен закон со кој ќе се регулира ова прашање, а државата не треба да очекува дека ќе се збогати од ангажманот на странски работници.

– Земјите од регионот веќе го направија тоа и овозможија слободен увоз на работници и ние треба да ги следиме. Државата треба да знае и дека економијата не е во состојба дополнително да издвојува за вработување на странците. Ако државата мисли дека странските работници треба да го полнат буџетот, се лаже, бидејќи економијата веќе е во многу лоша состојба. Треба да ги имаме предвид искуствата од другите земји и пред сè да одговориме на прашањето дали нашите работници кои заминуваат во странство работат 8 или најмалку 12 и повеќе часови. Зошто би биле ние поразлични? Тоа треба да се примени и кај нас, за да се добие поголем ефект од ангажманот на странците – изјави за Плусинфо неодамна Перковска.

Дополнителен проблем за текстилната индустрија кој може да резултира и со натамошно затворање на фирмите е и влошената состојба во германската економија и намалувањето на побарувачката таму. Проблемот велат од секторот ќе биде актуелен за 6 до 12 месеци.

– Кај нас проблемите доаѓаат 6 месеци подоцна отколку кај другите сектори бидејќи работиме по сезони. Така беше и во ковид кризата во 2020 година. Кога сета индустрија во 2021 година тргна напред, кај нас се почувствува одгласот на кризата од претходната година. Моментално има работа, бидејќи имаме нарачки од нашите партнери во Германија. Сè зависи од тоа колку состојбата во Европа и посебно Германија ќе биде лоша и како тоа ќе се одрази на потрошувачката на домаќинствата таму – вели Димитров.

Само за три месеци бројот на вработени во преработувачката индустрија, каде што се вбројува и текстилниот сектор, е намален за 2.556 работници.

The post НАШИ РАБОТНИЦИ ВО СТРАНСТВО РАБОТАТ НАЈМАЛКУ ПО 12 ЧАСА И ПАК СИ ЗАМИНУВААТ Бизнисот бара да се забрза процедурата за увоз на работници appeared first on plusinfo.mk.

Сметките за струја и за претходниот месец во одделни сектори се зголемени за најмалку 2,5 пати, а во некои и до 4 пати, а за периодот што следи бизнисмените очекуваат износот да се зголемува бидејќи најавите се дека цената на струјата ќе расте, а може и да нема од каде да се увезе во текот на зимскиот период. Тие очекуваат како одговор на кризата да се овозможи зголемено производство од домашните капацитети и поедноставување на процедурите за поставување фотоволтаични централи, наместо од нив да бара да ги исклучуваат светилките во погоните и да штедат струја која ја штедат со години.

– Лани дел од фирмите во текстилниот сектор затворија поради ударот од високите цени на струјата, а годинава можно е и дополнително да се зголеми бројот на затворени фирми поради истата причина. Состојбата е алармантна бидејќи новите сметки и за малите компании кои добиваат струја од домашен пазар се повеќе од двојно зголемени, кај некои 50 и 100 отсто зависно колку ја користат во процесот на производство, а какви ќе бидат трошоците во зима кога дополнително ќе се користи и загревање на погоните, може да се претпостави – вели Маријана Перковска од Текстилниот кластер.

Според неа, уште поголем проблем ќе биде ако се воведат рестрикции на струјата или има испади на системот што не е невозможно оваа зима бидејќи и поразвиените земји се соочуваат со истиот проблем.

– Не знам каков е планот Б на владата околу ова прашање, но за компаниите тоа ќе биде голем удар. Ние треба да знаеме што планира владата за да се преструктурираме и го испланираме работењето. Секој испад кај нас значи хаварија на технолошкиот процес и машините, а потоа ќе имаме и проблем да го произведеме договореното производство за нашите партнери во странство. Рестрикциите, пак, се друга приказна која ќе предизвика проблеми со организацијата на работа и работниците и плаќањето на нивната работа. И во овој случај треба да бидеме подготвени за реакција. Во секој случај потребна е соработка со институциите, но и помош од владата – вели Перковска.

Според неа, одвишно е од компаниите да се бара да штедат струја, бидејќи тие со години се обидуваат да ја намалат потрошувачката во деловите каде што тоа е можно.

– Штедиме на секој можен процес, но дали ќе можете да не ги вклучувате машините, да не пеглате и слично? Тоа е основниот процес за кој се троши струјата – вели таа.

Голем проблем со сè повисоката цена на струјата има и рударскиот сектор, посебно рудниците на обоени метали каде што потрошувачката на струја во процесот на производство е висока, а цените на нивниот производ на берзите бележи пад.

Поранешниот директор на „Бучим“ Николајчо Николов вели дека рудниците на обоени метали кои  обезбедуваат струја на слободен пазар веќе подготвуваат планови како ќе работат во следните месеци.

– Со оглед на растот на цената на струјата која рудниците ја добиваат од слободен пазар, тие веќе планираат како да го намалат тој трошок преку намалување на производството и затворање на дел од погоните. Тоа ќе повлече и привремено или трајно отпуштање од работа на дел од работниците – вели тој.

За да биде појасно колкави се сметките што ги плаќаат рудниците за обоени метали, тој посочува на рудникот „Бучим“ каде што долги години беше извршен директор.

– Ако „Бучим“ лани месечно плаќал електрична енергија 500.000 евра, сега неговата сметка е 5 милиони евра. Или тоа што го трошел за струја за цела година сега го плаќа за еден месец. Со еден збор електричната енергија има значителна улога во работата на рудниците. Но, за да биде состојбата полоша, во овој период се бележи пад на цените на обоените метали на берзите. Ако лани тон бакар чинеше 10.000 долари, сега цената е намалена на 7.000 до 8.000 долари по тон. Тоа е уште една причина рудниците да размислуваат за намалување на трошоците во производството и кај вработените – вели Николов.

И Перковска и Николов излезот го гледаат во сопствено производство на струја на секоја компанија преку поставување фотоволтаични системи, но проблем според двајцата се долгите и скапи процедури. И незаинтересираноста на владата ова прашање да се затвори побрзо.

– Ние до владата доставивме уште лани писмо во кое говориме за овој проблем и бараме помош од владата за да поставиме фотоволтаици на нашите погони. Но ни беше речено дека идејата е добра и ништо повеќе. Летото помина кога можевме да поставуваме фотоволтаици за да не се грижиме за струјата, а одговор од владата нема. Не знаеме зошто се откажува владата од производство на струја кое би помогнало и за домашното производство или проблемот можеби лежи на друго место – вели Перковска.

Николов забележува на бавната администрација и долгите процедури потребни за поставување вакви системи.

– Единствено решение на секој рудник е сам да си произведува струја со фотоволтаици. Добро ама нашата администрација како и секој пат се покажа бавна и сите рокови за тоа поминаа. Владата сега треба да помогне со олеснувања за да се заврши постапката и да се овозможи компаниите да ги завршат овие инвестиции. Но, никој никого не слуша и не следи, па и оваа година ваквите инвестиции ќе потфрлат, а компаниите ќе имаат проблеми со обезбедување струја – вели тој.

И Стопанската комора денеска ја потсети Владата дека нејзините барања околу надминување на енергетската криза треба веднаш да се реализираат за да нема затворање на фирми и отпуштање на работници во следниот период кога струјата може и нема да може да се набави од регионалните и европскиот пазар. И во барањата на оваа бизнис-заедница се наведуваат административните проблеми со поставувањето фотоволтаици.

Од своја страна Владата деновиве најави дека нема да има рестрикции на струја, а домашните производни капацитети на овој енергенс се подготвуваат да работат со полн капацитет. Во однос на поставувањето на фотоволтаици пред неколку месеци олеснет е дел од процедурите за поставување фотоволтаици за граѓаните и за малите фирми, но фирмите велат дека тоа не е доволно.

The post ВЛАДАТА ПРОМОВИРА ФОТОВОЛТАИЦИ, А ГО КОЧИ ПРОЦЕСОТ Ако сами не произведуваат струја, на бизнисите им следи курцшлус appeared first on plusinfo.mk.

Тие додаваат дека ќе треба да затворат или да земаат кредити за да исплатат плати, но не се сигурни дека ќе можат да ги вртат. Според нив, крајно време е земјава да одлучи дали ќе има пазарна економија во која ќе владеат економските законитости и цената на трудот да се формира на пазарот или ќе се врати во друго време, но потребно е бизнисите да знаат што ги очекува.

Најзагрозени и овој пат, според оценките на бизнисмените ќе биде хотелско-угостителската дејност која не работеше за време на пандемија, како и текстилната индустрија која работи лон производство и не може да ги менува цените на производите поради договорите со странските партнери и односите со конкуренцијата.

– Каков апсурд ни се случи. Ние бараме помош од државата за да ги задржиме работниците иако немаме работа од која ќе обезбедиме пари за нормално функционирање и да исплатиме плати, а владата ни наметна повисока минимална плата. Ваква „шах-мат“ позиција пред сезона да му се наметнуваат повисоки плати на хотелиерството не му се случува прв пат, но време е да профункционира пазарната економија и кај платите – вели Крсто Блажески, претседател на хотелиерската асоцијација ХОТАМ.

Според него, во услови кога немаме авиосообраќај, нема изградени автопатишта и хотелиерско-угостителската дејност не може да остварува приход и да дава повисоки плати.

– Две години ги држиме работниците кои ништо не работат за да не останеме без нив кога ќе се отвори можноста за заработка. И оваа сезона е неизвесна, па кога работниците не работат, а ги држиме и плата од 10.000 е многу за бизнис кој не работи. Сега ќе бидеме принудени да земаме кредити за да исплатиме плата, а дали тој кредит ќе успееме да го вратиме не се знае бидејќи немаме можност да ги зголемиме нашите цени. Само со повисоки цени  од кои 40 отсто ќе одат за плати се решение на состојбава, но тоа тешко дека ќе се случи – додава Блажески.

Тој вели дека во дејноста ќе има затворање на хотели кои никогаш во иднина нема да се отворат, бидејќи сопствениците ќе бараат подобра бизнис клима за да работат некаде во странство.

Поради лон-производството, отсуствата од работа, неповолниот курс на денарот и кризата со енергенсите и транспортот и текстилните компании ќе се најдат во неповолна финансиска положба со повисокиот минималец и потребата соодветно да се вреднува трудот на постручните категории на работници. Тоа, велат од текстилниот кластер ќе доведе не само да се отпуштаат работници туку и да се затвораат фирми.

– Во текстилниот сектор има повеќе ограничувачки фактори кои ќе доведат до уште поевидентни проблеми од оние со претходното зголемување на минималната плата. Поради платите кои ќе бидат скоро изедначени со стручниот дел од работниците ќе имаме намалена продуктивност, бидејќи во сегашни услови текстилна фирма не може да плати 40.000 денари за шивачка, а во овој сектор имаме и голем број боледувања поради пандемијата кои се на товар на работодавачот (тие до 30 дена), месечно поради тоа имаме 20 до 30 отсто отсутни работници. При тоа освен што плаќаме боледување имаме дополнителни трошоци за да најдеме соодветна замена за работникот. И не само тоа, нашето производство е лон и странските партнери не дозволуваат зголемување на цената на производот надвор од договорот. Ако го побараме тоа ќе нè напуштат и ќе работат со поконкурентни во регионот и светот. Значи нема да можеме да посегнеме ни по зголемување на цената а производот за да заработиме за повисоките плати – вели Маријана Перковска од текстилниот кластер.

Перковски вели дека дополнителен проблем се високите цени на енергенсите и транспортот, но и неповолниот курс на денарот.

– Во овој период имаме дополнителни трошоци за енергенсите кои зафаќаат голем дел од трошоците. Дел од компаниите ќе се обидат да преживеат преку отпуштање на работници, кои многу тешко ги обезбедуваме бидејќи никој не сака да работи во текстилот, но ќе има и затворање на фирми. Мислам дека ќе биде потешко од претходното зголемување на минималната плата кога имаше и отпуштања и затворање на фирми – вели таа.

Таа смета дека владата ќе мора да ги помогне извозните компании, преку некаков механизам кој ќе го анулира ефектот од фиксниот курс на денарот, но и со други мерки за да можат да останат на меѓународниот пазар.

Во мелничко-пекарската индустрија каде што покрај енергетската криза проблем им се и замрзнатите цени на производите велат дека владата треба да обезбеди само поволни услови за работа, спроведување на законите и внимателна увозна политика, а платите самите тие ќе ги зголемат.

– Ние немаме проблем со висината на минималната плата. Таа еве како раководител на мелница „Кадино“ предлагам да изнесува 500 евра, но имаме проблем со деловната клима и неекономските механизми кои се преземаат од страна на владата. Поради енергетската криза на пример имаме пад на производството од 60 отсто. Значи не се проблем платите тие ние самите ќе ги зголемиме, проблем е како да работиме за да можеме да вработуваме и да исплаќаме плата – вели Тодор Ѓоргиевски од мелницата „Кадино“.

Предлог измените на Законот за минимална плата на комисиска расправа во Собранието. Денеска за него расправа комисијата за труд и социјална политика. Пратеничката група на ВМРО-ДПМНЕ поднесе амандман со кој покрај зголемувањето на минималната плата се бара и усогласување на другите плати.

– Со овој амандман бараме износот на коефициентите и вредноста на бодовите на колективните договори на сите нивоа и во сите области во јавниот сектор да биде усогласен со порастот на минималната плата т.е. нивно скалесто зголемување во однос на минималната плата – рече на прес-конференција денеска Жаклина Пешевска од ВМРО-ДПМНЕ.

The post КЛУЧ НА ВРАТА, ОТПУШТАЊА И ПО НЕКОЈ КРЕДИТ На бизнисите им згорчи играњето шах со владата со минималната плата appeared first on plusinfo.mk.

– Како и да одлучи владата компаниите се во вонредна состојба – велат стопанствениците.

Тие предупредуваат при донесувањето на мерката рестрикција на струја да се направи анализа и да се соберат мислењата на стопанствениците од различни сектори за да не дојде до чести прекини на производството и можни хаварии на машините. Предлагаат и да се размисли за одредени мерки со кои би се помогнале компаниите како компензирање на загубите или субвенционирање на електричната енергија кај производната индустрија, за да не се доведат во ситуација компаниите да размислуваат за намалено производство или отпуштање на работници.

Маријана Перковска од Текстилниот кластер вели дека рестрикциите, но и зголемувањето на цената на струјата многу неповолно ќе се одразат на производните компании, како и на извозно ориентираните претпријатија. Затоа, вели, таа потребно е добро да се обмисли како ќе се изведуваат рестрикциите.

– Прво најважно е при донесување на мерката да се има предвид товарот на кризата да се распредели на сите чинители. Подеднакво да го понесат државата, работодавците и работниците, а не само да се остави на работодавците. Притоа многу е важно како ќе се прават рестрикциите дневно или во текот на неделата ќе се определат денови во кои одделни индустрии нема да имаат струја. На тој начин компаниите ќе имаат можност да го планираат производството и да ги организираат работниците – вели Перковска.

Според неа, за производните капацитети оптимален начин би биле рестрикции по денови за да немаат празни одови во процесот на работа и ангажирање на работниците.

– Сецкањето на работниот ден во индустријата ќе значи и празни одови, неработење на работниците, но и поголема можност за хаварии на машините. Ние во текстилот моментално имаме најмалку три падови на продуктивноста кај работниците во текот на денот: на почетокот на работниот ден, по двете паузи и пред крајот на работниот ден. Во услови кога би имало рестрикции од еден два или три часа продуктивноста би паднала дополнително. Згора на тоа, што ќе им правиме на работниците во периодот додека нема струја. Во тој период, ако се присутни ќе трошиме за загревање на просториите и за други пропратни работи. Затоа мислам најдобро е рестрикциите во производните капацитети да биде неделно во еден или два дена, односно различни денови за различни индустрии и со најава дека и неделите ќе бидат работни денови. Тогаш и нашите планови ќе се усогласат на тоа, а и работниците ќе бидат слободни – вели Пекоска.

Притоа, вели таа, треба да стане јасно дека во тие услови и законските обврски за исплата на плата за неработен ден да не важи, односно на работниците во тие денови да не им се пресметува плата.

– Не може за неработење да се исплаќа плата. Тоа работодавците нема да можат финансиски да го поднесат. Ситуацијата не ја предизвикале тие и треба товарот да го поднесат работниците но и државата која треба да размислува за субвенционирање на струјата во производните капацитети или во оние капацитети кои извезуваат – додава таа.

Дрилон Исени, извршен директор на Стопанската комора на северозападна Македонија исто така вели дека рестрикциите струја ќе бидат штетни за компаниите.

– Треба да се има предвид дека компаниите се усогласени на тековниот капацитет на работа, и секој фактор којшто влијае негативно врз нивниот капацитет, секако дека ќе им прави големи штети, а пример за тоа е ковид – 19 кризата, каде што поради намалувањето на капацитетите, земјата дојде до економска криза невидена од нејзиното постоење – вели Исени.

Исени додава дека евентуалното натамошно зголемување на цената на струјата дополнително ќе се одрази на цените на производите на компаниите. Поради високите трошоци за енергенсите.

– Нашите прогнози велат дека ќе има зголемување на цените на производите, а тоа го потврдуваат и информациите кои ги имаме од компаниите, кои велат дека се принудени да ги зголемат цените бидејќи има пораст на трошоците во сите области како транспортот, цените на суровините, на увозните производи итн. Ова значи дека првичното покачување доаѓа поради увозни причини, а допрва ќе следи ефектот на зголемувањето на енергенсите во нашата земја, каде оперативните трошоци на компаниите ќе мора да се пресметаат во целокупната стопанствена активност на истите.

Миле Бошков од Конфедерацијата на работодавци вели дека пред да одлучи владата дали ќе набави многу скапа струја или ќе воведе рестрикции ќе треба добро да ги анализира последиците од двете можности.

– Воведувањето на рестрикции како и високата цена на струјата многу лошо ќе се одразат на работењето на компаниите. Верувам дека компаниите ќе имаат можност сето тоа да го искалкулираат и предвидат во плановите за наредната година во кои се надевам нема да има потреба да го вметнат намалувањето на производството или отпуштањето од работа. Посебно критично ќе биде кај микро и малите бизниси како и занаетчиството. И рестрикциите ќе значат шок за компаниите и нивно непланирано преорганизирање за да имаат помалку загуби – вели тој.

Конфедерацијата, додава тој, веќе побара од Министерството за економија и владата да ги помогнат микро, малите фирми и занаетчиите со тоа што ќе им се обезбедува струја од домашното производство по цена како и за домаќинствата.

Бошков вели дека владата и во двата случаи треба да размислува за компензирање на загубата предизвикана од рестрикциите и зголемената цена на струјата.

– Министрите од економските ресори и Владата мора да размислуваат како овој енергетски шок за стопанството да го помогнат. Во спротивно, ќе се соочиме со бран на затворање на фирми и отпуштање од работа. Па пресметките се кај институциите – вели Бошков.

Според него, огромни ќе бидат штетите кај компаниите од сите сектори, и поради отсутноста на системи за сопствено снабдување со струја и затоа им препорачува на компаниите да го обезбедат количеството на струја од сопствено производство со поставување фотоволтаици.

– Мал е бројот на компании кои го решија ова прашање и енергетски се осамостоија, но процесот треба да се забрза. Алармантно е и тоа што дел од компаниите немаат ниту агрегати за сопствено производство на енергија во случаи кога системот за снабдување потфрла – вели Бошков.

The post СТРУЕН УДАР ЗА БИЗНИСИТЕ И СО И БЕЗ РЕСТРИКЦИИ Можно е и затворање на фирми и отпуштање на работници appeared first on plusinfo.mk.

Официјалните податоци на Агенцијата за вработување за февруари покажуваат дека 2.744 работници се пријавени како невработени поради отказ добиен во изминатиот период, но неофицијалните бројки се далеку повисоки ако се знае дека дел од работниците испратени на одмор можеби и нема да се вратат на работа. Агенцијата утврдила и дека заклучно со февруари се евидентирани 18.266 невработени лица по основ на прилив од работен однос, односно како резултат на одбиен отказ од работа од почетокот на здравствената криза на 11.03.2020 година.

За една година, пак, според податоците на Централниот регистар се затворени 6.214 бизниси. Најголем број од нив се микро и мали или вкупно 3.950 кои се во угостителскиот сектор, земјоделството и рударството. Иако, бројката на згаснати бизниси е на ниво од неколку години наназад таа во услови на пандемија е загрижувачка. Дополнително за дел од бизнисите кои не успеаја да преживеат се поведени и стечајни постапки, што значи далеку е поголема бројката на фирми кои нема да ја преживеат кризата и на работници кои остануваат без работа.

Најголем ризик да затворат и да поделат откази има за бизнисите во најпогодените сектори: текстилот, кожарството, угостителство, туризам, транспорт, бидејќи цела година тие веќе немаат приходи, а веќе задоа кредити од државата или се задолжија за плати. За нив веќе течат и роковите за отплата на кредитите и враќање на дел од парите што им ги даде државата за плати.

Според податоците на Управата за јавни приходи, од вкупно 22.195 фирми кои зеле помош 18.851 обврзници поднеле 20.693 барање за враќање на парите за плата односно за користење грант. Од нив 5.296 искажале позитивен финансиски резултат пред оданочување за 2020 година, негативен искажале 11.502 обврзници, а 1.134 обврзници искажале финансиски резултат нула денари.

Дури 6.888 работодавачи не успеале да исплатат плата во месец февруари. Не се знае дали тие ја чекале владината мерка или не успеале да исплатат и плати во изминатите месеци.

Бизнисмените бараат роковите за враќање на парите кон државата од поддршката за плати и придонеси и кредитите да се поместат по истекот на пандемијата.

– Доколку владата не го одложи рокот за враќање на парите дадени за плата, придонеси или кредити на бизнисите до целосна победа над пандемијата, тоа ќе биде погубно за најголем број од компаниите во текстилот, бидејќи покрај немањето работа, финансиски се истоштени и нема да можат да ја подмират и оваа обврска. Дел од фирмите дури ни по победата на пандемијата нема да можат да ги враќаат парите кои им ги позајми државата – вели Маријана Перковска, претседателка на Текстилниот кластер.

Таа смета дека поголемиот дел од фирмите од текстилот во Штип кои ги испратија вработените на двонеделен одмор, ако не се преземе нешт , нема да можат повторно да работат.

– Западот подолг период е затворен. Таму рестрикциите се и за моловите и за другите објекти, а е ограничено и движењето на луѓето. Ако нема зголемена потрошувачка во западните земји, нема ни работа за текстилните компании во Македонија на кои 95 отсто од производството е за извоз. Ако мерките и таму потраат подолго нема работа за нашата текстилна индустрија. Дел од фирмите ќе останат затворени, а 50 отсто од 35.000 работници колку што ги има во текстилот е можно да останат без работа – вели Перковска.

Но, додава таа, не е проблемот што овие работници ќе добијат отказ.

– Проблемот е дали и кога тие ќе можат да се вработат. Ако компаниите затворат трајно тие ќе останат подолг период невработени. Во изминатита година дел од текстилните компании веќе се соочија со неможност да ги подмират обврските, а тоа неминовоно води кон покренување стечај, што во наши прилики значи и крај за една компанија. Знаете отворањето на текстилна компанија не се прави за една недела или месец како во други дејности, на пример во угостителство, туку е потребен подолг период и поголеми инвестиции. Затоа и одлуките на владата поврзани со преживување на фирмите треба да се прават соодветно на ова – вели Перковска.

Угостителите кои од утре повторно целосно ќе бидат затворени најавуваат дека поради хроничниот пад на приходите без плата ќе останат над 30.000 работници, а ако нема помош од државата можни се и откази и затворање на бизнисите.

– Ја разбираме потребната од носењето на нови рестриктивни мерки кои треба да доведат до подобрување на состојбите на здравствен план. Но, во исто време апелираме дека е неопходно паралелно со тоа итно да се додели и посебна финансиска помош за субјектите кои поради одлуката за затворањето ќе останат без какви било приходи. Финансиска поддршка е неопходна за да се обезбеди основна егзистенција и да не се изгубат овие работни места – вели Мартин Анѓеловски од Туристичко-угостителската комора.

Очекувањата на бизнисмените се дека можно подобрување на состојбите ќе има по октомври или ноември кога ќе бидат видливи првите резултати од вакцинирањето на населението во европските земји и дома, а до тогаш, се надеваат дека дел од бизнисите ќе преживеат за да преживеат и работниците.

The post Висат повеќе од 45.000 работни места, се заканува затворање на стотици фирми appeared first on plusinfo.mk.