Оваа Влада за разлика од претходната и покрај наследените проблеми и предизвици и покрај ограничените ресурси, со голем труд и посветеност напорно работи за подобрување на работите во државата, вели портпаролката на Владата Марија Митева и член на ИК на ВМРО-ДПМНЕ.

– Сè уште се санираат штетите. Од ден за ден низ институциите се појавуваат наследени проблеми и предизвици со коишто се соочуваме. Успеавме навистина да покажеме огромна разлика. Исклучително голем труд и посветеност се потребни за да можете да ги поместите работите – рече Митева во емисијата „Ноќно студио“ на 4ТВ.

Таа посочи дека Владата предводена од ВМРО-ДПМНЕ ја движи државата во правилна насока.

– Сериозни се инвестициите коишто ги направивме во инфраструктурата, во образовни политики… Според индикаторите во економијата од еден слободен пад ние во 6 квартали имаме раст на БДП од 3,5%. Ние имаме сериозни инвестиции во делот на дигитализацијата, која што е тесно поврзана со искоренувањето на корупцијата во институциите или во јавната администрација. Имаме сериозни инвестиции во делот на социјалната политика, во оној регионален развој што го направивме со оние 250 милиони што ги поделивме со цел да се развијат општините. Имавме сериозни инвестиции во делот на бизнис секторот на компаниите – рече Митева.

Успеавме да направиме добра консолидација, додаде таа.

– Успеавме навистина да покажеме едно друго ниво на посветеност и работа во институциите и една сериозност којашто навистина граѓаните мислам дека ја ценат. Незалудно се оние анкети каде што поддршката на владејачката партија има навистина пораст и по две години владеење и верувам дека тоа ќе се одрази и на изборите, затоа што граѓаните одлучуваат дали се задоволни од работата или не – рече Митева.

Таа ја реафирмираше стратешката определба на државата за членство во Европската Унија, но упати сериозни критики за начинот на кој претходната власт на СДСМ и ДУИ ги водела преговорите, оставајќи ја земјата во „вечна чекалница“.

Митева појасни дека новата владина дипломатија се темели на достоинство и заштита на државните интереси, напуштајќи го концептот на постојани отстапки кои не гарантираат резултат.

– Наследивме погрешни политики. Доведени сме во ситуација каде што дијалогот изостанува, а остануваат само условите и ултиматумите. Многу отстапки беа направени во минатото, без да имаме видлив крај. Таков начин на водење надворешна политика мораме да го напуштиме, бидејќи само лошо ни донесе и нè остави пред вратите на ЕУ, иако ни ветуваа дека ќе бидеме рамноправни на масата – истакна Митева.

Наместо апстрактни дебати за Европа, фокусот на Владата сега е ставен на конкретни реформи кои ќе ги донесат европските стандарди дома, додаде Митева и нагласи дека темпото е значително забрзано, а тоа е дел од нивната внатрешна динамика и ветување пред граѓаните.

– Работиме на она што е наша домашна задача. Постојано ни се испорачуваат нови барања, а од другата страна никако да добиеме одговор дека ова е последното. Затоа, наместо да чекаме, ние го забрзуваме темпото на реформите за државата да биде подготвена кога ќе дојде моментот за реален напредок – рече Митева.

Таа рече дека Македонија веќе презема конкретни чекори за деблокирање на дијалогот со Бугарија и ја обвини  опозицијата дека свесно ги кочи реформите кои се клучни за европските фондови.

Владата е подготвена за разговор, рече таа, но под јасни услови кои подразбираат заштита на државните интереси.

– Дијалогот е неопходен, но тој не значи автоматска согласност за сите прашања. Нашиот министер за надворешни работи веќе упати официјална покана до министерката за надворешни работи на Бугарија. Очекувам поканата да биде прифатена, да ги отвориме прашањата и да најдеме решение кое ќе биде во насока на заштита на македонскиот национален идентитет – тоа е нашата прва и најважна обврска“, истакна Митева.

На прашањето дали постои опасност државата да ги изгуби предвидените финансиски средства од ЕУ поради политичките пречки, Митева изрази голем оптимизам.

Портпаролката на Владата ја обвини опозицијата дека работат против интересите на граѓаните само за да издејствуваат неуспех на Владата.

– Опозицијата „од петни жили“ посакува Македонија да не успее. Гледате како во Собранието гласаат против Законот за судски совет, кој е дел од реформската агенда. Ја напуштија работната група за Изборниот закон, барајќи алиби за претстојниот пораз. Тоа е работење директно против интересите на македонските граѓани – изјави таа.

Посочи дека Владата ќе продолжи да инсистира на дијалог и носење одлуки со консензус, изразувајќи надеж дека СДСМ ќе го промени својот деструктивен пристап во име на државниот напредок.

Митева ги демантираше тезите на опозицијата за наводен притисок врз Јавното обвинителство и порача дека обидите на СДСМ да прикажат дека сегашната власт постапува како нивната е залуден, бидејќи јавноста ја препознава разликата помеѓу транспарентна комуникација и политичко диктирање на предмети.

Одговарајќи на прашање за комуникацијата помеѓу премиерот Христјан Мицкоски и државниот јавен обвинител Ненад Давески, Митева нагласи дека институционалниот разговор не е исто што и договарање судски исходи.

– Прашањето не е дали имало разговор – тоа е нормално за јавни функции. Клучното прашање е дали има кривично дело или противзаконско дејство. Овие тези ги пласираат структури на СДСМ, истите кои во минатото преку адвокати договараа предмети по бензински станици – изјави Митева.

Таа потсети на јавните признанија од обвинители кои беа дел од претходниот систем, посочувајќи дека токму високи функционери на СДСМ биле тие кои одредувале приоритети во истрагите.

– Слушнавме обвинител кој јавно кажа дека Оливер Спасовски, Радмила Шекеринска и Зоран Заев во Специјалното јавно обвинителство кажувале на кои предмети да се даде приоритет. Тие луѓе денес тргнуваат од себе и мислат дека сите постапуваат така – вели Митева.

На прашањето дали Владата открила докази за криминал на своите претходници, Митева остана на принципот на немешање во истражните дејствија, но потврди дека се детектирани низа неправилности.

– Не сакам да зборувам за работи надвор од мојата надлежност, особено за истраги. Но, од она што е пласирано во јавноста, евидентно е дека низ институциите се направени низа погрешни постапувања од претходните раководства. Верувам дека надлежните институции ќе постапат соодветно и ќе ги процесираат доказите до Обвинителството – рече таа.

Митева рече дека денес во Обвинителството веќе нема скандали за тоа кој каде треба да биде поставен за шеф или недоразбирања околу делегирањето насоки за постапување, што според неа била секојдневна слика во минатото. Таа изрази надеж дека Обвинителството веќе нема да молчи за случаи кои ја брануваат јавноста со години.

Додаде и дека состојбите во правосудството се резултат на долгогодишни слабости и посочи дека јавноста во изминатиот период сведочи на сериозни случаи, меѓу кои и, како што рече, криминалот со мазут вреден над 160 милиони евра.

Таа оцени дека довербата во правосудниот систем е на многу ниско ниво, но нагласи дека Владата започнала процес на промени, особено преку изборот на новиот државен јавен обвинител, кој поминал без контроверзии и без забелешки за политичка поврзаност, а позитивни реакции дошле и од самата правосудна фела.

– Тоа е клучен показател за начинот на кој Владата е подготвена да ги води процесите и да покаже вистинска политичка волја за независност во работењето на Јавното обвинителство – изјави Митева.

Владината портпаролка рече и дека изборите ќе бидат редовни. Појасни дека доколку ВМРО-ДПМНЕ се води исклучиво од математики и висок рејтинг, изборите би се случиле веднаш, но одговорноста пред граѓаните налага поинаков пристап.

– Ако го гледаме нашиот политички интерес, би можеле веќе утре да одиме на избори согласно анкетите кои покажуваат несомнена доверба. Но, гледајќи го државниот интерес, не смееме да ја вовлекуваме државата во нов циклус кој троши време и пари, а ја запира реализацијата на проектите. Ова е реформска година на сериозни инвестиции и сметаме дека изборите треба да бидат редовни – изјави Митева.

Додаде дека повици за избори од опозицијата се само фасада зад која се крие неподготвеност и внатрешен раздор.

– Не гледам дека СДСМ е подготвена – ниту кадровски, ниту имаат визија или програма. Кај нив владее идентитетска криза. Од една страна велат дека се за ЕУ, а од друга излегуваат од работни групи за реформските закони. Кога ќе се спомнат избори, кај нив се чувствува страв и паника. Верувам дека на следните избори ги очекува уште посериозен пораз од оној пред 2 години – децидна е Митева.

Таа потсети дека опозицијата не поддржала ниту укинување на техничката влада, што според неа е уште еден доказ за политичката какафонија во која се наоѓа левицата.

The post ИЗБОРИТЕ ЌЕ БИДАТ РЕДОВНИ, А СДСМ ГО ОЧЕКУВА УШТЕ ПОСЕРИОЗЕН ПОРАЗ Наследивме проблеми и погрешни политики, работиме со посветеност за државата appeared first on plusinfo.mk.

Портпаролката на Владата Марија Митева денеска во врска со најавите на СДСМ дека ќе се повлечат од работната група за Изборниот законик ако се укине техничката влада истакна дека со ваквите најави лидерот на опозициската партија, Венко Филипче нема да успее да ја скрие реалноста со која се соочува неговата партија и додаде дека сега се против нејзино укинување, иако во минатото биле согласни дека тоа треба да се направи.

– Ваквиот обид на Филипче и на СДСМ нема да ја сокрие реалноста дека тие се соочуваат со нивниот политички крај, а владејачката партија која што ја предводи Владата, ВМРО-ДПМНЕ, е таа која што ја гради иднината на државата. Навистина не можам да разберам како од една страна имаме изјави во кои што се вели дека имаат пораст на гласовите, тоа го кажува токму Венко вчера, а Венко денеска вели дека е против укинување на техничката влада, за која што во минатото беа согласни дека истата треба да се укине – рече Митева, одоварајќи на новинарско прашање на прес-конференција во Владата.

Митева додаде дека ова е само уште еден политички незрел маневар и смета дека постапувањето на ваков начин не носи ништо добро во интерес на граѓаните.

– Институциите мора да бидат демократски. Оваа Влада тоа го покажа дека имаме демократизација, дека навистина можеме и знаеме како да ги водиме институциите и треба да ги напуштиме моделите кои што биле во минатото – рече Митева.

The post ПОЛИТИЧКИ НЕЗРЕЛ МАНЕВАР Митева за барањето на Филипче да не се укинува техничката влада appeared first on plusinfo.mk.

Портпаролката на Владата Марија Митева информираше за постигнатиот резултат од мерките насочени за заштита на стандардот на граѓаните и стабилизирање на пазарот на енергенси, односно за намалувањето на цената на течниот нафтен гас.

– Од полноќ, „Макпетрол“ ја намали малопродажната цена на течен нафтен гас, односно плин за 5 денари по литар, од 59 на 54 денари. Во трговијата на големо е евидентирано намалување од 10 денари по килограм, што во пресметка значи приближно 5 денари по литар – рече Митева.

И останатите компании на пазарот го следат овој тренд. Во малопродажба, цените на течен нафтен гас на бензинските станици веќе се намалени во распон од 5 до 6 денари по литар и се движат од 53 до 54 денари.

– Сакам јасно да потенцирам дека ова намалување не е резултат на краткорочна пазарна случајност, туку е резултат на анализа од страна на Државниот пазарен инспекторат (ДПИ) и преку договор и преземена одговорност од страна на трговците, за намалување на бруто маржите. Постигнавме согласност овие маржи да бидат намалени и да се задржат на тоа ниво и во наредниот период, да немаме осцилации коишто сега ќе ги имаме, оваа недела кон намалување, а следната би имале зголемување, што значи дека за повеќе од 10% во трговијата на големо и за 9 до 10% во малопродажба ќе имаме намалување – рече Митева.

Таа објасни дека мерката е преземена врз основа на детална анализа спроведена од Државниот пазарен инспекторат, дека биле детектирани просторите за корекција во ценовната структура, по што следувале разговори со трговците и постигнување договор за намалување на бруто маржите.

Портпаролката изрази благодарност за општествената одговорност којашто е покажана.

– Ќе продолжиме со истиот пристап, со анализа, со дијалог и со конкретни резултати. Пазарот мора да функционира, но мора да биде и праведен. А интересот на граѓаните ќе остане наш врвен приоритет – рече Митева.

The post ГАСОТ Е НАМАЛЕН ЗА 5 ДЕНАРИ ПО ЛИТАР Митева информираше за резултатите од мерките на Владата appeared first on plusinfo.mk.

Несреќата во Кочани е силен аларм за државата, вели Марија Митева член на ИК на ВМРО-ДПМНЕ и портпаролка на македонската влада.

– Кочани беше една тешка лекција за сите и еден силен аларм за државата, зашто системот беше предолго време во длабок сон. Работата не е завршена. Системот и будењето на системот е една страна, но поважно за мене е функционирањето на системот, којшто кога ќе го изградите треба да продолжи да функционира, да престане да се руши со промените на власта и да биде еден систем којшто кога ќе ги воспоставите принципите, ќе функционира доследно во иднина – рече Митева во гостување на Телма.

Таа посочи дека биле спроведени инспекциски надзори и дека е направена сеопфатна анализа на сите институционални слабости.

Истакна дека контролите и надзорите се клучни за да нема состојби на злоупотреба во државата.

– Со спроведените инспекциски надзори во 2025 година, имаме само 7 активни лиценци, спроведени 4.000 инспекциски надзори, над 1.700 прекршочни платни налози, 162 решенија за забрана за вршење на дејност. Само една година претходно, во 2024 година има драстично помали бројки – рече Митева.

Институциите имаат меѓуресорска координација, додаде таа.

– Овој случај отвори прашања чија е надлежноста, кој го дал соодветниот документ. Контролата е реална затоа што кога бројките го потврдуваат тоа имате намален број на проблеми, ризикот е помал во ваква ситуација затоа што колку повеќе имате контроли и надзори толку е помала веројатноста дека ќе имате состојби на злоупотреба. Новите раководства на институциите направија една сеопфатна анализа на сите тие институционални слабости и не беше реакција само по трагедијата, туку беше еден континуиран пристап којшто го даваме изминативе 365 дена и којшто ќе продолжиме да го даваме – истакна Митева.

The post НЕСРЕЌАТА ВО КОЧАНИ БЕШЕ ТЕШКА ЛЕКЦИЈА И СИЛЕН АЛАРМ ЗА ДРЖАВАТА Изградениот систем треба секогаш да функционира appeared first on plusinfo.mk.

Владата ќе организира меѓународна конференција „Институционални и клинички аспекти и решенија по пожарот во Кочани – една година потоа“, која ќе се одржи на 14 март во Скопје.

Конференцијата ќе обедини претставници на институциите, здравствени експерти, меѓународни организации и хуманитарни партнери. Конференцијата има за цел да се направи една сеопфатна анализа на одговорот на трагедијата, од првичната интервенција и спасувањето животи, до долгорочниот третман, рехабилитацијата и системските решенија за иднината.

– Посебна вредност на оваа конференција е присуството на 37 лекари и медицински експерти од странство, кои во најтешките денови по трагедијата во Кочани директно учествуваа во лекувањето на пациенти. На покана од наша страна како држава, во Скопје ќе пристигнат доктори од клиники и здравствени центри од повеќе европски земји, токму оние институции кои ги отворија своите врати кога беше најпотребно на Македонија. Нивното присуство на оваа конференција претставува можност искуствата од заедничката работа да се претворат во знаење, протоколи и системски решенија кои ќе придонесат за подобра подготвеност на здравствените системи во иднина – рече портпаролката на Владата Марија Митева денеска на прес конференција.

Настанот ќе започне со свечено институционално отворање, по кое ќе следува комеморативен момент како потсетник дека зад секоја трагедија стојат човечки приказни.

Во рамки на конференцијата ќе се одржат повеќе тематски панели посветени на повеќе аспекти.

– Ќе зборуваме за европскиот механизам за цивилна заштита и меѓународниот одговор – координација, солидарност и искуства. На овој панел ќе се дискутира за активирањето на европските механизми за помош, меѓународниот медицински одговор и трансферот на пациенти, како и за координацијата меѓу државата, институциите и здравствениот систем. Посебен фокус ќе биде ставен на логистичките, правните и организациските аспекти на ваквите операции, како и на научените лекции. Понатаму, ќе се фокусираме на национален и меѓународен здравствен одговор и акутен третман на изгорениците. Овој панел ќе се фокусира на медицинскиот аспект на кризата, од првичната тријажа и итниот медицински одговор, до комплексниот третман на тешки изгореници. Ќе се разгледуваат хируршките и пулмолошките аспекти на третманот, како и координацијата меѓу различните клиники и здравствени установи во земјата и регионот – најави Митева.

Третиот панел ќе биде посветен на долгорочниот процес на закрепнување на пациентите. Ќе се зборува за мултидисциплинарната соработка во третманот, рехабилитацијата, физикалната медицина и функционалното враќање на пациентите, како и за психолошката и психијатриската поддршка. Посебно внимание ќе биде посветено на долгорочното следење и подобрувањето на квалитетот на живот на преживеаните. Ќе се зборува како од искуство се стигнува до нови решенија, за улогата на заедницата, институциите и научените лекции. Ќе се дискутира за болничките капацитети во услови на криза, европските стандарди, како и за улогата на хуманитарните организации и несебичната поддршката од страна на заедницата.

На завршна сесија ќе се презентираат идните решенија и системски чекори кои ги преземаат институциите.

– Една година по трагедијата, Владата останува доследна на ветувањето дека поддршката за жртвите, повредените, нивните семејства и за здравствениот систем нема да биде еднократна, туку континуирана и системска. Од првиот ден беше преземена обврска дека државата ќе стои зад процесот на лекување, рехабилитација и закрепнување, но и дека трагедијата ќе биде претворена во поттик за подобрување на институционалните капацитети и подготвеноста на системот. Тоа ветување денес се реализира преку конкретни мерки, соработка со домашни и меѓународни партнери и постојано унапредување на здравствените и кризно-менаџерските механизми – додаде таа.

The post ВЛАДАТА ОРГАНИЗИРА МЕЃУНАРОДНА КОНФЕРЕНЦИЈА ЗА ПОЖАРОТ ВО КОЧАНИ Ќе присуствуваат 37 лекари и медицински експерти од странство appeared first on plusinfo.mk.

На денешната редовна седница Владата го разгледа мислењето на Советот на јавни обвинители во врска со постапката за избор на нов државен јавен обвинител и по сеопфатна, аргументирана и конструктивна дискусија донесе одлука до Собранието да поднесе предлог за избор на Ненад Савески за нов државен јавен обвинител, соопшти владината портпаролка Марија Митева.

– Владата се раководеше од принципите на професионалност, интегритет, стручност и доследна посветеност на владеењето на правото. Ненад Савевски е судија во Кривичниот суд, во текот на својата професионална кариера има изградено репутација на правник со долгогодишно искуство, препознатлив по својата стручност, професионален интегритет и посветеност на принципите на законитост и правда – рече Митева.

Во рамки на своја долгогодишна кариера и образовно портфолио, Ненад Савевски е магистер по правни науки област казнено право на Правниот факултет „Јустинијан Први”, при Универзитетот „Св. Кирил и Методиј” во Скопје, со положен Правосуден испит, додаде таа.

– Неговото професионално искуство е богато, во моментов е судија во Основен кривичен суд Скопје во оддел за организиран криминал и корупција. Бил Јавен обвинител во Основно јавно обвинителство – рече Митева.

Савески поседува и експертски и меѓународни ангажмани како експерт во ОБСЕ Македонија, експерт во Националната конвенција за ЕУ – Поглавје 23, бил член на работни групи за судски и законски реформи, експерт во проекти на Совет на Европа, ОБСЕ, УСАИД, работел на проекти за посебни истражни мерки, притвор и кривична постапка, рече портпаролката на Владата.

Во делот на академската и едукативната работа, додаде, тој е предавач во Академијата за судии и јавни обвинители, национален тутор и обучувач во програмата HELP на Советот на Европа, обучувач е за човекови права и кривично право и има соодветни публикации и е автор и коавтор на повеќе трудови.

– Од сè ова може да се заклучи дека тој има учествувано во различни процеси и активности поврзани со унапредување на функционирањето на правосудниот систем, како и во иницијативи кои биле насочени кон зајакнување на институционалниот капацитет, транспарентноста и ефикасноста на правосудните институции. Покрај домашното професионално искуство, Ненад Савески во својата кариера има остварено соработка со релевантни национални и меѓународни институции, како и организации, придонесувајќи кон размена на добри практики и усогласување на стандардите на правосудниот систем со современи европски принципи на владеење на правото – рече Митева.

Во текот на расправата, додаде Митева, беше нагласено дека изборот на државен јавен обвинител претставува прашање од исклучителна важност за кредибилитетот на целокупниот правосуден систем.

– Токму затоа, пристапуваме кон процесот со особена внимателност и одговорност, имајќи ја предвид потребата од професионализација и зајакнување на независноста на Јавното обвинителство, како и натамошно унапредување на ефикасноста во спроведувањето на законите – кажа портпаролката.

Предлогот кој Владата го упатува до Собранието, додаде, се темели на стручни оценки и мислења доставени од Советот на јавни обвинители, како и на внимателна анализа на професионалниот интегритет, искуство и досегашни резултати на кандидатот.

– Во таа насока, се оцени дека предложениот кандидат ги поседува потребните професионални и лични квалитети. Владата смета дека предложениот кандидат ќе придонесе кон зајакнување на институционалниот капацитет, унапредување на професионалните стандарди и кон зацврстување на довербата на јавноста. Со оваа одлука, Владата уште еднаш ја потврдува својата цврста определба за почитување на институционалните процедури, заштита на независноста на правосудниот систем и доследна поддршка на реформските процеси – рече портпаролката Марија Митева.

The post СУДИЈАТА САВЕСКИ Е ПРЕПОЗНАТЛИВ ПО СТРУЧНОСТА, ИНТЕГРИТЕТОТ И ПО ПРИЦИПИЕЛНОСТА Владата оцени дека ги има потребните квалитети за државен обвинител appeared first on plusinfo.mk.

Пред речиси три месеци е донесено решение со кое тужбата на Андреј Жерновски е отфрлена, а барањето за надомест на штета е одбиено како неосновано. Тоа е правната реалност. Сè друго е свесна манипулација со јавноста.

Ова го напиша портпаролката на Владата Марија Митева денеска на нејзиниот профил на Фејсбук откако Жерновски синоќа во заедничко ТВ гостување ја нападна дека однапред ја знаела пресудата.

„За разлика од СДС, ниту некогаш сум манипулирала, ниту ќе манипулирам со граѓаните. Мојот збор има тежина и е прашање на кредибилитет и личен интегритет. Токму затоа е очигледно дека ваквиот тотално паничен настап произлегува од страв, страв од одговорност, страв од вистината и страв од прашањата на кои сè уште немаат одговор. Нападите дека некој „управува“ со судовите потекнуваат од нивната долгогодишна пракса на такво практицирање, тоа време заврши. Јас нема да учествувам во нивната игра на креирање лажни скандали. Ќе продолжиме да инсистираме на владеење на правото, институционална одговорност и целосна транспарентност. Граѓаните гледаат кој нуди факти. Политиката мора да се води со интегритет, а не со конструкции и лаги!“, напиша Митева.

Таа додаде дека со жалење ја следи, како што вели, паничната и хистерична реакција на Жерновски и СДСМ.

„Интегритетот на Жерновски во македонската политика, кој смени едно чудо партии, е еднаков на една стара витрина со пајажина, заборавена и надмината со времето. Го ставија во партиски тела за да се натпреварува кој ќе фрли повеќе кал, тоа е спорт омилен за мал дел од политичката елита на СДС.
Обидот да конструира наратив за ‘скандал’ претставува класичен пример на политичка дезориентација и дефокус од суштинските прашања. Кога аргументите изостануваат, остануваат инсинуациите. Кога немаат одговори, продуцираат магла. Јас секогаш стојам на кажаното. Фактите се јасни“, нагласува Митева.

The post ПРЕД РЕЧИСИ 3 МЕСЕЦИ Е ОТФРЛЕНА ТУЖБАТА НА ЖЕРНОВСКИ Митева му порача дека „управувањето“ со судовите е пракса од времето на СДСМ appeared first on plusinfo.mk.

Владата ја усвои Програмата за работа за 2026 година, стратешки и реформски документ кој ги утврдува приоритетите, динамиката и визијата за развојот на државата во наредниот период, соопшти портпаролката на Владата, Марија Митева, на денешната прес-конференција по завршувањето на владината седница.

– Владата ја усвои Програмата за работа на Владата за 2026 година која претставува сеопфатен документ од над 400 страници, со јасно дефинирани приоритети и визија за развојот на државата – изјави Митева, нагласувајќи дека станува збор за мапа на реформите кои директно ќе влијаат врз квалитетот на животот на граѓаните и функционалноста на институциите.

Според неа, Програмата е структурирана по области кои ги опфаќаат надлежностите и на законодавната и на извршната власт, а целта е јасно планирање на реформските процеси и нивна реализација во конкретни рокови.

– Ова е документ кој ја отсликува нашата визија за реформи, стабилност и европска перспектива на државата – истакна владината портпаролка.

Фокус на образование и здравство

Во делот што се однесува на законодавната власт, како што појасни Митева, фокусот е ставен на секторите каде државата има најголема одговорност – образованието и здравството.

– Предвидени се нови и современи системски закони кои го уредуваат високото и средното образование, научно-истражувачката дејност и педагошката служба, како и унапредување на статусот и професионалниот развој на наставниот кадар – рече таа, додавајќи дека овие решенија се насочени кон квалитет, достапност и одржливост на образовниот систем.

Дигитализација и даночни реформи

Митева нагласи дека Владата силно ја турка дигиталната трансформација, меѓу другото и преку нов Закон за електронска фактура.

– Со овој закон дигитализацијата на даночните процедури станува клучен столб на даночната реформа. Ќе обезбедиме поголема ефикасност, транспарентност и значително намалување на административниот товар за граѓаните и компаниите – изјави таа.

Реформа на правосудството и изборното законодавство

Реформата на правосудството, како што посочи портпаролката, останува висок приоритет.

– Во надлежност на Министерството за правда се предвидени измени на Изборниот законик, со целосно инкорпорирање на препораките од меѓународните мисии, како јасен сигнал за нашата посветеност кон демократски стандарди, фер избори и владеење на правото – рече Митева.

Единствен систем на плати во јавната администрација

Особено значаен сегмент од Програмата е реформата на јавната администрација.

– За првпат се предвидува воспоставување на единствен систем на плати во јавниот сектор. Станува збор за решавање на долгогодишен проблем, каде платите се уредуваат фрагментирано и неусогласено. Новото решение носи правичност, транспарентност и усогласеност со Реформската агенда – нагласи Митева.

Вработување, економија и национално брендирање

Во вториот дел од Програмата, кој се однесува на одлуките и актите на Владата, предвидени се низа програми насочени кон подобрување на животниот стандард.

– За 2026 година е планиран Оперативен план за активни мерки за вработување, усогласен со реалните потреби на пазарот на трудот, со цел зголемување на опфатот на невработени лица и интеграција на ранливите категории – изјави таа.

Дополнително, се отвора и ново поглавје преку национално брендирање на туризмот, економијата и државата.

– Ова е силна можност Македонија да се позиционира како атрактивна туристичка дестинација и стабилна економија со сериозен инвестиционен потенцијал – посочи Митева.

Поддршка за младите лекари и дигитални вештини

Во здравствениот сектор, најавена е подготовка на Стратегија за млади лекари за периодот 2026–2030 година.

– Целта е задржување и мотивирање на медицинскиот кадар, преку системска поддршка, менторство и континуирана едукација – рече Митева.

Таа најави и формирање Центар за дигитални вештини во јавната администрација.

– Дигитализацијата не е проект, туку долгорочен процес. Центарот ќе биде наменет за сите нивоа во администрацијата – од раководни структури до целокупниот административен кадар – истакна портпаролката.

Програма со јасна визија и одговорности

– Оваа Програма е јасен план со визија, рокови и одговорности. Таа ја отсликува политичката волја на Владата за реформи, стабилност и европска иднина – заклучи Митева, додавајќи дека документот ќе биде објавен на веб-страницата на Владата откако ќе ги помине сите владини процедури.

The post ВЛАДАТА СО ОБЕМЕН ПЛАН ЗА 2026 ГОДИНА Над 400 страници со рокови и одговорности appeared first on plusinfo.mk.

Владата на денешната седница донесе низа значајни и суштински одлуки кои јасно ја потврдуваат нашата определба и конкретната посветеност кон исполнување на обврските од процесот на пристапување во Европската Унија, но и кон заштита на јавниот интерес и демократските вредности, соопшти владината портпатолка Марија Митева.

„Владата направи уште еден силен и долгоочекуван чекор во насока на заштита на слободата на изразување и јавниот интерес. Формиравме работна група за воспоставување механизам за заштита од злоупотребата на т.н. стратешки тужби против јавното учество, тема за која со години зборуваат и бараат новинарите и медиумската заедница. Ова е јасен сигнал дека оваа Влада има слух, храброст и проактивност да се соочи со суштински прашања“, соопшти Митева.

Дополнително, со усвојувањето на Законот за органско земјоделско производство правиме важен исчекор во поддршката на малите земјоделци, додаде таа.

„Овој закон овозможува олеснета сертификација преку намалување на трошоците за инспекција и за сертификација, што директно придонесува за поконкурентен пласман на органските производи на пазарот.
Истовремено, се унапредува и правната рамка со појасни, попрецизни и применливи одредби, усогласени со европските стандарди. Со ова, исполнуваме уште една обврска која произлегува од процесот на пристапување во ЕУ. Делата зборуваат погласно од зборовите. Ние продолжуваме да носиме одлуки кои значат напредок и за граѓаните, и за демократијата, и за европската иднина на државата“, вели Митева.

The post ВЛАДАТА ЌЕ ГО ИСПОЛНИ БАРАЊЕТО НА НОВИНАРИТЕ Ќе се воспостави механизам за заштита од злоупотреба на стратешките тужби против јавното учество appeared first on plusinfo.mk.

Државниот јавен обвинител Љупчо Коцевски е пред разрешување, откако Владата денеска на седница го усвои предлогот и најави дека документот веднаш ќе биде доставен до Собранието.

Портпаролката на Владата, Марија Митева, во обраќање до медиумите објасни дека со оваа одлука се продолжува постапката која била паузирана за време на изборниот процес поради законските ограничувања.

– Причините за иницијативата се јавно познати. Владата досега повеќепати ги образложи – доследно, транспарентно и во интерес на заштита на институционалниот интегритет. Нашата цел е јасна: зајакнување на правната држава и непречено функционирање на органите на прогон – изјави Митева.

Таа појасни дека предлогот за разрешување е поднесен согласно член 88 став 1 од Законот за јавно обвинителство, и по претходно добиено мислење од Советот на јавни обвинители.

Според Митева, причините за разрешување се крупни професионални пропусти направени од Коцевски, кои ја нарушиле ефикасноста и работата на институцијата.

– Станува збор за неовластено изнесување податоци од предмети, со што ја повредил тајноста на постапките. Дополнително, со негови постапки е нарушен угледот на Јавното обвинителство, а не постапувал согласно обврските утврдени со законите и Уставот – нагласи портпаролката.

Како резултат на тоа, додаде Митева, во изминатиот период било евидентно нарушено функционирањето на институцијата, а нејзиниот интегритет бил сериозно доведен во прашање.

– Јавниот обвинител е одговорен за општите состојби и за функционирањето на обвинителството. Со ваквите постапки, Коцевски грубо ја прекрши обврската да го чува угледот на функцијата, предвидена во член 82 став 1 од Законот за јавно обвинителство – додаде Митева.

Одлуката сега е во рацете на Собранието, кое треба да го донесе конечниот став за разрешувањето на Коцевски.

The post ВЛАДАТА ПОБАРА РАЗРЕШУВАЊЕ НА КОЦЕВСКИ Предлогот за смена на јавниот обвинител е испратен во Собрание appeared first on plusinfo.mk.