„Ова е класична американска игра“.

Вака портпаролот на Синодот на Македонската православна црква (МПЦ-ОА), г. Тимотеј, во изјава за Плусинфо ги коментира вчерашните тврдења на професорот Марјан Ѓуровски од Институтот за безбедност на Филозофскиот факултет, кој на дебатата „Улогата и влијанието на религијата во современото општество“, рече дека македонски владици „се вмешани во шпионажа за незападни разузнавачки служби, а тоа претставува безбедносен ризик и закана и за македонската црква внатре, но и за државата, бидејќи поттикнува раздор, ја нарушува социеталната, идентитетската безбедност и е дополнителен товар и за признавањето на МПЦ-ОА“.

Ова е класична американска игра. Гледате, кога тие еднаш ќе кажат нешто, нашите не чекаат да им се каже двапати.

г. Тимотеј Портпарол на Синодот на МПЦ-ОА

Ваквото тврдење Ѓуровски го поткрепи со цитат на претседателот на државата Стево Пендаровски, кој изнел информации дека „членови на Синодот се соработници на руската разузнавачка служба врз основа на сознанија кои се строго доверливи“.

Митрополитот дебарско-кичевски и портпарол на Синодот на МПЦ-ОА, г. Тимотеј, нема информација дали некој македонски владика е повикан на разговор во однос на обвинувањата за шпионажа.

– За себе можам да тврдам дека не се занимавам со такви работи, а искрено, не мислам дека ниту другите владици и членови на Синодот се занимаваат со шпионажа. Има една српска поговорка која гласи: „у страху су велике очи“. Ова е класична американска игра. Гледате, кога тие еднаш ќе кажат нешто, нашите не чекаат да им се каже двапати. Немам информација дали некој македонски владика и член на Синодот е повикан на разговор поради обвинувања за шпионажа. На крајот на краиштата, секој владика си има име и презиме, па нека излезе претседателот на државата и нека каже дека конкретно тој и тој човек соработува со странски служби на штета на Македонија. Оти, вака, и ние би можеле да излеземе и да кажеме, на пример, дека шефот на државата е предавник на својот народ. Но, како ќе го докажеме тоа што го кажуваме? Затоа, и претседателот е должен да ги докаже тврдењата, а не само да ги каже – ни изјави г. Тимотеј.

Професорот Ѓуровски вчера посочи и дека има информации оти македонски владици одржуваат тајни средби во Белград со луѓе кои држеле литургии во македонските цркви, а кои се прогласени за непожелни личности од речиси сите земји-членки на НАТО.

– Верувам дека архиепископот на МПЦ-ОА е запознат и сѐ зависи од нив. Добронамерно и сериозно треба да се сфатат укажувањата од државата и да не се потценуваат затоа што оние кои ни шетаа во Архиепископијата и држеа литургии во македонските цркви денеска имаат забрана и се прогласени за непожелни личности од речиси сите земји членки на НАТО. Со нив се остваруваат контакти на тајни средби во Белград. Тоа е голем безбедносен ризик, можеби не сега веднаш, но долгорочно ќе ги имаме последиците – изјави Ѓуровски.

Плусинфо денеска испрати прашања до Кабинетот на претседателот Стево Пендаровски:

„Како претседателот Стево Пендаровски ги коментира тврдењата на професорот Марјан Ѓуровски? Каде и во која прилика шефот на државата го искажал тврдењето дека членови на Синодот на МПЦ-ОА соработуваат со странски безбедносни служби? Дали претседателот Стево Пендаровски, доколку навистина тврди дека членови на Синодот на МПЦ-ОА се вмешани во шпионажа, го информирал Основното јавно обвинителство и поттикнал започнување постапка?“.

Оттаму ни одговорија дека претседателот смета оти нема потреба од дополнително произнесување од тоа што веќе го кажал јавно за оваа тема.

„ЧЛЕНОВИ НА СИНОДОТ НА МПЦ-ОА СЕ ВМЕШАНИ ВО ШПИОНАЖА“ Професорот Марјан Ѓуровски предупредува за голем безбедносен ризик

The post „НИКОЈ ОД НАС НЕ СЕ ЗАНИМАВА СО ШПИОНАЖА, ОВА Е КЛАСИЧНА АМЕРИКАНСКА ИГРА“ Владиците на МПЦ-ОА бараат објаснување од Пендаровски appeared first on plusinfo.mk.

Ѓуровски рече дека не тврди за вмешаност на владици во шпионски активности туку го цитира тоа што го кажале претседателот на државата Стево Пендаровски, директорот на Агенцијата за разузнавање и членови на македонската Влада кои, како што рече, „изнесоа информации дека членови на Синодот се соработници на руската разузнавачка служба врз основа на сознанија кои се строго доверливи“.

– Верувам дека архиепископот на МПЦ-ОА е запознат и сѐ зависи од нив. Добронамерно и сериозно треба да се сфатат укажувањата од државата и да не се потценуваат затоа што оние кои ни шетаа во Архиепископијата и држеа литургии во македонските цркви денеска имаат забрана и се прогласени за непожелни личности од речиси сите земји членки на НАТО. Со нив се остваруваат контакти на тајни средби во Белград. Тоа е голем безбедносен ризик, можеби не сега веднаш, но долгорочно ќе ги имаме последиците – изјави Ѓуровски.

Во однос на улогата и влијанието на религијата во современото општество, тој смета дека е неопходен дијалог меѓу државата и црквата кои се „во брак од интерес и имаат заеднички предизвици и вредности што треба да ги градат“.

Професорот смета дека пред двојните избори во државава МПЦ-ОА „ја пропуштила историската шанса да учествува во процесот на помирување помеѓу десницата и левицата“ и за воспоставување дијалог меѓу власта и опозицијата во, како што рече, значајната поделба на македонското национално ткиво.

Според него, архиепископот требало „на заедничка маса да ги седне лидерите и на власта и на опозицијата и за некои теми конечно да постигнат заеднички договор и да ги знаеме црвените линии“.

Наместо тоа, рече Ѓуровски, некои членови на Синодот поттикнуваат поделба и раздор со лажни дилеми и вести во јавноста пласирани преку портали и од прашањето на името на црквата и нејзиното признавање се прави безбедносен проблем, поделба и манипулирање на населението. Обвини и дека МПЦ „се приватизира од двајца до тројца владици“ и соопшти дека пленарниот Синод на МПЦ не заседавал неколку месеци и клучни одлуки за Црквата „се носат во тесен круг меѓу двајца до тројца владици“.

Професорот од Институтот за социологија Зоран Матевски истакна дека интензитетот на влијание на МПЦ-ОА е исклучително висок во македонското општество, а македонското население е меѓу најрелигиозните во светот и оттука се видливи и реакциите кон некои општествени појави и процеси, како на пример Законот за родова еднаквост, статусот на трансродовите лица, прашањето за легализирањето на истополовите бракови, абортусот, евтаназијата…

За овие прашања, рече тој, се судираат ставовите на Црквата и основните граѓански права и слободи. Тоа што во Грција – прва православна земја каде што неодамна беа легализирани истополовите бракови, според Матевски е мерило дека интензитетот на влијанието на Грчката црква не е толку висок.

– Не верувам дека во догледно време тоа ќе се направи во Македонија, токму поради силното влијание на Македонската православна црква. Слично на Полска, каде што случајот е обратен – огромно е влијанието на Полската католичка црква и таму се донесе закон за забрана на абортус. Во таа насока МПЦ е прилично конзервативна, ригидна по тие прашања и има право на тоа, влијае силно на политичката елита која делува испреплетено со религиската елита – рече Матевски.

Тој додаде дека МПЦ е прилично толерантна кон Исламската верска заедница и дека двете верски заедници се во одличен однос.

– МПЦ е сензитивна ако чепнете во нејзиното име и идентитет. Бидејќи ИВЗ не го прави тоа, тие се во извонреден однос и затоа во Македонија има висок степен на мултикултурализам и сега веќе интеркултурализам, идеја за едно општество. Во Европа и на Балканот, по Албанија, сме најтолерантна земја во однос на етничката  и религиската толеранција – додаде социологот Матевски.

Според отец Бобан Митевски, поранешен шеф на Кабинетот на архиепископот, верските заедници се важен чинител во општеството и порача дека тие секогаш треба да бидат „на висина на задачата“ и да ги согледуваат заедничките интереси на општеството, а не само интересите и личните потреби на поединци или групи.

– Она што ние како свештеници што одиме во мантија ќе го покажеме пред другите, на тоа и ќе ги научиме другите. Многу е важно нашето однесување, зборот што ќе излезе од нашата уста, моралните начела кои самите ќе ги живееме, а потоа сакаме да им ги проповедаме и да бидат прифатени од поширокото население – изјави Митевски.

Тој порача и дека народот треба да го вреднува гласот на црквата како институција, зашто тоа е нејзиниот официјален став, а сѐ што доаѓа од поединец, рече, треба да биде земено се резерва и да се вреднува според неговите претходни постапки, зборови и дела.

Ја потенцираше и кохезијата меѓу државата и МПЦ-ОА во однос на решавањето на автокефалниот статус на МПЦ, прашање што, рече, досега сите политички номенклатури го имале во своите заложби.

– Тој пат сѐ уште го одиме, тој пат сѐ уште не е завршен и сите знаеме добро каде тој завршува – тоа е во Вселенската патријаршија. Секој просечно образован богослов, секој просечен теолог, го знае обичајното право во православната црква и она што е предание во годините наназад – ако Вселенската патријаршија ги даде сите автокефалии од Руската православна црква некаде во 16 век, и тоа цепкајќи од својата територија, сѐ до најновата во Украина, тогаш таа треба да биде адресата каде што и ние треба да се упатиме, да разговараме и да преговараме на едно достоинствено ниво – рече отец Бобан.

Деканот на Филозофскиот факултет професорот Ратко Дуев изјави дека има голем пад на етичките вредности.

– Сите настани, промени, кризата што го зафати нашето општество и пошироко, влијаат многу на падот на моралот и на вредностите. Затоа религијата, на некој начин, е клучна, зашто целта на секоја религија е верба во човекот и животот – рече Дуев.

The post „ЧЛЕНОВИ НА СИНОДОТ НА МПЦ-ОА СЕ ВМЕШАНИ ВО ШПИОНАЖА“ Професорот Марјан Ѓуровски предупредува за голем безбедносен ризик appeared first on plusinfo.mk.

Нашата држава со воената донација за Украина остварува најмалку три стратешки цели за што постои консензус меѓу сите релевантни парламентарни политички партии во земјата, изјави за МИА проф.д-р Марјан Ѓуровски, универзитетски професор на Институтот за безбедност, одбрана и мир при Филозофскиот факултет на Универзитетот „Св.Кирил и Методиј”.

– Мaкедонија се потврдува како сериозен партнер, земја членка на НАТО преку манифестирање на реална поддршка и воена помош на Украина, е првата цел – појаснува Ѓуровски.

Тој наведува дека ваков тип на воени донации направија и други помали земји како Словачка, која донираше авиони МИГ и тенкови Т-72 за украинските вооружени сили.

– Со овој потег, Армијата се ослободува од вооружувањето и од опремата кои не се од западно производство и не се дел од новата формација на Армијата согласно НАТО стандардите, а може да се користи. Воените донации воопшто не ја нарушуваат борбената готовност на Армијата која е на највисоко ниво и официјално високо оценета и од НАТО на последната вежба во Криволак – вели универзитетски професор на Институтот за безбедност, одбрана и мир при Филозофскиот факултет на Универзитетот “Св.Кирил и Методиј”.

Истовремено, нагласува, треба да се истакне дека се реализира долгогодишниот план за модернизација на Армијата. САД, истакнува Ѓуровски, директно помогна за модернизација на македонската армија со финансиска помош од 40 милиони долари што е особено значајно за нејзината опременост и готовност за идниот период.

Опремата за која зборуваме, потсетува тој, Македонија ја набави од Украина за време на воениот конфликт во 2001 година. Согласно Стратегискиот одбранбен преглед и со новата формација на вооружените сили, појаснува Ѓуровски, авионите Сухои 25 не се користат долг период во македонското воено воздухопловство зошто за нив по членството во НАТО воопшто и нема потреба.

Како трета стратешка цел, што се постигнува според Ѓуровски, нашиот народ и држава преку донацијата на воена опрема и вооружување за Украина искажува благодарност до Украина и до украинскиот народ кои беа меѓу ретките кои во најтешката 2001 година ни помогна со вооружување и опрема за Армијата и тоа во услови кога бевме под ембарго и под будното око на меѓународната заедница.

– Одлуката на Владата  се темели и на резолуцијата на Собранието на Република Северна Македонија за осуда на воената агресија на Русија врз Украина. Оттука, целосно се несериозни обидите да се девалвира нашата Армија заради овој чекор пред се од структури кои служат на проруските елементи во регионот. Политиката на Путин за промена на курсот на државите во регионот ќе биде поразена и на Балканот – изјави  Ѓуровски.

Уште еднаш нагласи дека со употреба на новата опрема и системи во приоритетните единици, нужно е Армијата да се ослободува од постарите системи и опрема. Посочува дека процесот на аквизиција со новото вооружување и опрема, односно опремувањето и модернизација е предвиден и во Долгорочниот план за развој на одбранбените способности поддржан со посебна резолуција од Парламентот.

– Да потсетам, согласно законската регулатива се имплементираат осум проекти за модернизација на Армијата преку склучување договори за набавка на стоки, услуги и работи во областа на одбраната и безбедноста со влади на земји членки на НАТО – додаде тој.

Со планот за модернизација на Армијата предвидени се набавки на лесни оклопни возила на тркала (проект во континуитет), специјални возила за посебни намени, артилериски системи 105 мм и муниција 105 мм, ПВО-систем на многу мали височини, ремонт на транспортни хеликоптери, опрема за извидување и разузнавање, комплет за контрола на здружен оган Joint Terminal Attack Controler (JTAC) и лесни оклопни борбени возила за специјални сили. Со новата опрема дополнително ќе се зголеми подготвеноста на Армијата и нејзината интероперабилност со армиите на сојузничките земји, нагласува во изјавата за МИА професорот Ѓуровски.

The post СО ВОЕНАТА ДОНАЦИЈА НА УКРАИНА ОСТВАРИВМЕ НАЈМАЛКУ ТРИ СТРАТЕШКИ ЦЕЛИ Не е нарушена борбената готовност на армијата appeared first on plusinfo.mk.

Како што објаснуваат нашите соговорници, дури и да започне војната во Украина, Македонија нема да се соочи со безбедносни ризици, но како што велат, секако дека е неопходна поголема будност на домашните безбедносни структури.

Во поглед на евентуален бегалски бран од Украина, безбедносните експерти сметаат дека тој бран ќе ја заобиколи Македонија, оти, како што потенцираат: „нашата земја не е една од посакуваните дестинации каде што човек би сакал да се пресели“.

Сума сумарум, Македонија ќе се соочи со тешка економска криза, особено по најавата на заменик-претседателот на Советот за безбедност на Русија, Дмитриј Медведев, дека отсега Европа ќе купува гас по цена од 2.000 евра. Очигледно, во таа група спаѓа и Македонија, ако се земе предвид денешната изјава на министерот за надворешни работи Бујар Османи дека земјава ќе биде дел од санкциите на ЕУ против Русија.

Економска криза не ни бега

Националниот координатор за гранично управување, Владимир Пивоваров, во разговор за Плусинфо вели дека Македонија би можела да се соочи со огромни економски штети доколку започне војната во Украина, додека, пак, како што посочува, не се очекува голем број бегалци од Украина да пребегнат во земјава.

Најбогатите европски држави би можеле да бидат крајната дестинација на бегалците, а нормално е и ние да очекуваме мигрантски бран, иако географски гледано Македонија не се наоѓа на рутата по којашто би пребегувале бегалците од Украина.

Владимир Пивоваров Национален координатор за гранично управување

– Цените на многу продукти на светската берза ќе бидат качени и тоа директно ќе влијае на економската ситуација не само кај нас, туку во цела Европа. Заменик-претседателот на Советот за безбедност на Русија, Дмитриј Медведев, кој е многу близок соработник на рускиот претседател Владимир Путин, вчера најави дека Европа отсега ќе купува гас по цена од 2.000 евра за одредена количина. Тоа значи дека Москва ја зголемува цената на гасот за околу 1.000 проценти. Тоа е таа енергетска зависност што ја имаат европските држави, а ние сме мала земја со мал буџет и таквите поскапувања многу тешко ќе ги поднесеме. Затоа, потребно ќе биде Европската Унија да ни помогне во тие моменти. Во поглед на бегалците коишто би можеле да пребегнуваат од Украина, нашата земја не е една од посакуваните дестинации каде што човек би сакал да се пресели. Најбогатите европски држави би можеле да бидат крајната дестинација на бегалците, а нормално е и ние да очекуваме мигрантски бран, иако географски гледано Македонија не се наоѓа на рутата по којашто би пребегувале бегалците од Украина. Сепак, јас сум убеден дека на дипломатски начин ќе се решат проблемите и верувам дека и самиот Путин е свесен за притисоците и за последиците што би следувале по евентуална војна – објаснува Пивоваров.

Тој апелира до македонските граѓани воопшто да не се грижат и да не се плашат за својата безбедност, без разлика на конфликтот што ќе се случи или нема да се случи во Украина.

– Апсолутно, Македонците треба да спијат мирно. Деновиве се појавија некои информации и претскажувања дека Русија би посегнала и врз оној дел што порано се нарекуваше Источна Европа. Но, тоа се само претпоставки кои во денешно време и од денешна гледна точка се неостварливи. Ние сме про-НАТО и про-европски ориентирана држава, па невозможно е Русија да се прошири на овие простори. Нашиот северен сосед, Србија, на пример, јасно е дека си го избра другиот пат, па воено, економски и безбедносно е блиска со Русија. Вчера српскиот претседател Алексадар Вучиќ рече дека е загрижен и дека се плаши оти врз Србија ќе биде извршен силен притисок доколку започне конфликтот во Украина. Можеби и Србија ќе почувствува големи економски штети, ама во дел на воена интервенција не треба ни да се размислува. Вучиќ ѝ издаде наредба на српската армија да биде на готовс, но таквата негова одлука сметам дека нема друга логика, освен политичка – рече Пивоваров.

Универзитетскиот професор Марјан Ѓуровски во вестите на Канал 5 истакна дека лично тој не очекува голем воен конфликт во Украина, но од друга страна, пак, очекува санкциите врз Русија негативно да се одразат и врз Македонија.

– Помеѓу изборот дали да го повлече чкрапалото или да го стави својот потпис за признавање на областа Донбас, рускиот претседател Владимир Путин се одлучи за второто и на тој начин извојува пирова победа, но ги прекрши сите мировни договори. Овој конфликт во којшто се вклучени Русија, Украина и НАТО индиректно ќе влијае и на загрозување на економската безбедност, бидејќи македонската влада ќе го поддржи трговското и економското ембарго за Русија. Но, неизбежен ќе биде и домино-ефектот на случувањата во Западен Балкан, особено ако се земат предвид хибридните закани од Русија преку невладиниот сектор и дел од помалите политички партии во земјава – изјави Ѓуровски.

Очи ширум отворени

Во овој момент, безбедносните ризици за нашата земја и за регионот не се многу големи, вели деканот на Факултетот за безбедност, Никола Дујовски, во интервју за Гласот на Америка.

Но, тој смета дека сега неопходна е поголема будност на домашните безбедносни структури.

– Мислам дека решението се наоѓа во договорот за тоа што ќе се случува со украинската потреба за членство во НАТО. Алијансата треба да размисли дали можеби постои некој друг начин на зајакната соработка помеѓу НАТО и Украина. Дали можеби ќе биде поисплатливо за некој временски период да се одложат таквите дејствија и да се најде некое стратешко партнерство кое ќе биде задоволително и за НАТО и за Русија. Како и да е, безбедносните ризици во овој момент за нашата земја и за регионот не се многу големи. Особено не се големи оние ризици што би се сметале за директни безбедносни ризици. Тука не би го ставил сајбер просторот на којшто треба секогаш да бидеме внимателни. Повеќе од една деценија, а особено во периодот пред пристапувањето кон НАТО, ние сме многу подложно тло за источните служби коишто овде не само што прибираат информации, туку се обидуваат и да влијаат на некакви неформални текови – објаснува Дујовски.

Воените последици не се бројат само во жртви, туку и во економија, просперитет и во сите други аспекти.

Лидија Георгиева, професор Институт за безбедност

Професорката од Институтот за безбедност, Лидија Георгиева, пак, укажува дека и нашиот регион може да биде засегнат од конфликтот во Украина.

– Многу е важно како НАТО ќе продолжи да се движи и дали ќе го прифати ултиматумот на Русија за натамошно проширување и за враќање на позициите од 1997 година. Исто така, прашање е дали ќе има приближување на релација Русија-Кина. Сметам дека и нашиот регион може да биде засегнат од конфликтот во Украина. Истото важеше и за Сирија и за Авганистан, па бегалските бранови секако нѐ засегнаа и нас, а секако и најголем дел од Европа – објаснува Георгиева.

Таа вели дека не се исклучуваат и радикални појави.

– Тука веќе влегуваат и други сериозни прашања. И радикализација во нашиот регион, учество на странски борци во Украина, поддршка на некоја од про-руските или про-украинските страни. Воените последици не се бројат само во жртви, туку и во економија, просперитет и во сите други аспекти. Тоа го покажа и целиот период на Студената војна. Во 21 век не ни е потребна нова Студена војна – порачува Георгиева.

The post ВЛАКНО НЕМА ДА НИ ФАЛИ, АМА ЌЕ ЧЕКОРИМЕ ПО РАБОТ НА ЕГЗИСТЕНЦИЈАТА Какви ризици ѝ се закануваат на Македонија по евентуалниот конфликт во Украина? appeared first on plusinfo.mk.