Опозицијата манипулира и клевети, но граѓаните ја знаат вистината – изјави премиерот Христијан Мицкоски денеска одговарајќи на новинарско прашање во однос на критиките од страна на опозицијата дека власта не прави доволно за граѓаните за справување со претстојната енергетска криза.

– Претседателот на СДСМ се повика на мерките коишто биле преземени за време на Ковид- кризата и пандемијата. И правеше разлика и споредба на оваа мерка со тие мерки и по што тие ќе останеле запомнети. Но заборави да каже дека единственото нешто по коешто ќе бидат, од тогаш запомнети е фактот што како држава, најлошо се справивме со ковид-пандемијата. Односно имавме најголем број смртни случаи по глава на жител, споредено со сите европски земји. Заборави да ја спомне мерката неколку десетици милиони евра уплатени на „Стабри” компанијата од Хонгконг, којашто наместо специјализирана за набавка на вакцини е специјализирана за трговија со јужно овошје. Заборави да каже за бруталниот поткуп на изборите во 2020 година кога со уредби со сила на закон се менуваа закони во пет до дванаесет. Заборави да ја спомне и трагедијата во модуларната болница овде, кога луѓе живи гореа. Бидејќи тие модуларни болници се дел од мерките што Владата на СДСМ и ДУИ ги носеше во тој период. Заборави да каже за сите оние провизии од тендери. Заборави да каже како коленичеа на граница да добијат 5.000 вакцини донација од соседна Србија. Заборави да каже како македонските граѓани во отсуство на грижа од страна на Владата, коленичеа во соседството да добијат и да аплицираат вакцина против ковид. И заборави, три точки, уште многу работи да каже – рече Мицкоски.

Тој ги нарече лажни и клеветнички прес-конференциите на опозицијата, на кои може да се слушнат само конструкции и измислици.

– Тие повторно ги навредуваат граѓаните и мислат дека политиките на СДСМ и ДУИ од минатото, можат да ги споредуваат со политиките од оваа Влада. А граѓаните тоа го гледаат и, впрочем, тоа го кажаа на претходните локални избори, а ќе го кажат и тоа на следните парламентарни избори – рече Мицкоски.

Инаку, реакцијата на премиерот доаѓа по серија критики од страна на Венко Филипче, кој во изминатите денови ја обвини Владата за погрешни политики и оддалечување на земјата од европскиот пат, како и за поврзаност со одредени бизнис интереси.

The post НЕКА НЕ СЕ ФАЛИ СО МЕРКИТЕ ВО КОВИДОТ, БЕА НАЈГОЛЕМА КАТАСТРОФА! Мицкоски вели дека Филипче заборавил многу работи, но граѓаните не appeared first on plusinfo.mk.

Италијанскиот регулатор изрече казна од 4 милиони евра на данската платформа за оценување на компании „Trustpilot“ и нејзините подружници за неправилна проверка на автентичноста на оценките и заведување на потрошувачите во врска со механизмот на услугите.

Регулаторот откри дека системот за собирање прегледи на „Trustpilot“ им овозможува на компаниите да изберат кои потрошувачи да ги поканат да ги оценат. Ова, истакнуваат тие, ја поткопува репрезентативноста на објавените оценки, дури и кога им е доделена ознаката „верификација“.

„Trustpilot“, исто така, користел заведувачки формулари за да ги прикрие клучните информации за работењето на платформата и идентитетот на компаниите што плаќаат за нејзините услуги, кршејќи го италијанскиот закон за заштита на потрошувачите, заклучи регулаторот.

Инвестициската компанија „Grizzly Research“ го обвини „Trustpilot“ пред неколку месеци за создавање лажни профили што негативно ги оценуваат компаниите, а потоа ги прашуваат за претплата.

Данската компанија ги негираше тие обвинувања.

The post ДАНСКА ПЛАТФОРМА ИМ ДАВАЛА НЕГАТИВНИ ОЦЕНКИ НА КОМПАНИИТЕ, ПА ИМ БАРАЛА ПРЕТПЛАТА Италија ја казни со 4 милиони евра appeared first on plusinfo.mk.

Пратеникот на ВМРО-ДПМНЕ вечерва предупреди дека македонските политичари кои ги штитат националните интереси се цел на синхронизиран напад, откако во некои македонски портали беше пренесена информација против него што ја објавија дел од бугарските медиуми.

„Хибридна офанзива во полн ек! Објави насочени против мене и мојата фамилија – објава на 24 часа бг. За минута превземена на страници кај нас. Лаги, вести, дискредитации, стартуваат по нарачка, од ботови, скришни или бугарски страници, а потоа молневито се шират“, реагира Лефков.

Координирана и скапа акција, додаде тој и ја повика СДСМ да го објасни неодамнешното соопштение во кое вели дека „жолтите комбиња се вратија, ВМРО-ДПМНЕ се во параноја и процес за дефокус од реалните проблеми“.

„СДСМ сега да си го објасни соопштението полно со навреди, повикувајќи се на жолти комбиња и параноја – додека реално, Македонија и македонските политичари кои ги штитат националните интереси се цел на синхронизиран напад. Ова не е параноја, туку организирана операција против секој што се бори за македонските интереси. СДСМ да одбере страна! Рацете подалеку од фамилијата! Рацете подалеку од Македонија“, напиша Лефков.

Пратеникот Лефков во гостување на ТВ Алфа претходно денеска ги искажа своите ставови дека СДСМ има непримерно, антимакедонско и симптоматично пробугарско дејствување, кое делува синхронизирано со бугарската страна и целосно одговара на наративот на службите од Софија.

The post „РАЦЕТЕ ПОДАЛЕКУ ОД ФАМИЛИЈАТА“ Лефков предупредува на синхронизиран напад кон македонските политичари appeared first on plusinfo.mk.

Во јавноста протекоа видео-снимки од онлајн-сесија преку платформата Зум, кои укажуваат на сериозен обид за политичка манипулација и злоупотреба на трагедијата во Кочани.

Порталот Нетпрес објави една таква снимка, објаснувајќи дека станува збор за координирани обуки, во кои учествуваат граѓани од Македонија, како и обучувачи и активисти од Србија, каде веќе подолг период се одвиваат протести и улични движења со дестабилизирачки карактер. На снимките се слушаат совети за тоа како да се организира привидно спонтан револт, како да се избегне секој институционален дијалог, да се креира медиумска драма и да се манипулира јавното мислење преку лажни профили на социјалните мрежи и фабрикувани пораки.

Особено загрижувачки е фактот дека во еден дел од разговорите, српскиот обучувач користи неприфатлива и навредлива терминологија за албанската заедница со терминот „Шиптари“, што претставува говор на омраза и дополнително го потврдува деструктивниот пристап кон мултиетничкиот соживот во Македонија.

Ова е снимката што ја објави Нетпрес:

Радио Лидер тврди дека Сташа Цветковиќ е името на „инструкторката“ за правење дестабилизација и злоупотребување на трагедијата од Кочани. Студира архитектура во Белград.

„Можно е да е поврзана со тајни служби кои имаат за цел да го прелеат српското сценарио во Македонија. Од информациите кои пристигнаа до нашиот медиум, Сташа заедно со членовите на Левица имала повеќе состаноци чија цел е српско сценарио во Македонија. Ваквите состаноци се случувале во текот на претходната недела, а според нашите информации, тие започнале само два дена по трагедијата“, тврди Лидер.

„Дополнителни извори посочуваат дека зад организацијата стојат добро познати имиња од политичката сцена и од медиумскиот свет во Македонија. Како неформални координатори и инспиратори на ваквите процеси се споменуваат Марјан Забрчанец, Џабир Дерала, Љубомир Фрчкоски, Сашо Орданоски и структури блиски до неформалната група Инфомакс, која, според истите извори, е поврзана со бизнисменот Палчо. Станува збор за сојуз на ретроградни елементи од СДСМ и од ДУИ – групации кои, наместо да извлечат поука и да ја почитуваат болката на народот, се обидуваат да се вратат на сцена преку манипулација и злоупотреба на трагедијата“, тврди Нетпрес.

Кои се вистинските морони?

Дел од познатите јавни личности на кои посочува Нетпрес деновиве интензивно ги коментираат трагедијата во Кочани и последиците. Така, во еден од своите настапи, професорот Љубомир Фрчкоски, природната потреба на луѓето во овие денови на жалост за да искажат почит кон жртвите ја нарекува „лингвистичка борба“ чија цел била, наводно, да се убедела јавноста дека луѓето не протестираат, туку се собираат. Фрчкоски тврди дека тоа е обид за замолчување на студентите, а оние кои не му се по волја ги нарекува „морончиња студенти“.

Суштината е дека Фрчкоски и луѓето на кои посочува Нетпрес тврдат дека на дело е обид на власта да ја отфрли одговорноста од себе. Со слични тези настапува и новинарот Сашо Орданоски, кој во поткастот „Политиканти“ ги коментира настаните на платформата Инфомакс.

Мечка и Зајче – заедно?!

Интересно е дека деновиве на социјалните мрежи осамна и видео-снимка од средба на Александар Митовски – Мечка, лидерот на порталот Инфомакс, со Зоран Заев, поранешниот лидер на СДСМ, за кој подолго време се тврди дека е во Дубаи. Според описот на снимката, станува збор за понова координација меѓу Митовски и Заев.

Новинарот Митовски ја пренесе таа снимка на својот профил на Фејсбук, а Инфомакс го сподели тој пост, со тврдење дека станувало збор за средба од 2023 или 2024 година и со духовит коментар: „Зборевме на англиски јазик, за да не може да не разбере Бојан Христовски од АНБ“. Но, многумина видоа суштинска нелогичност во оваа објава – Христовски не бил директор на АНБ во 2023 и 2024 година, од што неминовно произлегува заклучокот дека или АНБ нема врска со снимката, или таа сепак е актуелна. Ова е таа видео-снимка:

„Не ни треба акција за туркање на власта“

Но, покрај фактот дека дел од структурите ангажирани во револуцијата против режимот на Никола Груевски ги поттикнуваат студентите преку пленуми и собири да ги „освојат“ студентските организации и да покренат протести за рушење на власта, истакнати интелектуалци и поранешни директни учесници во отпорот против власта во тоа време, имаат поинакви погледи за тоа во која насока треба да се насочи граѓанскиот активизам.

Така, во својата последна колумна за Дојче веле под наслов „За да не заборавиме – мораме да се промениме“, граѓанскиот активист Ивор Мицковски вели: „Нам не ни треба акција за туркање власт, зашто промената на власт кај нас никогаш не донела подобро – едни казнуваме за други да дојдат и пак тие да нѐ казнат. Нам ни треба акција на подолг период“.

„Ни треба тотален, апсолутен и искрен морал и тотално почитување на законите и Уставот, на јавното добро. Постоењето и сакањето ред и систем е прашање на цивилизациска, културна и морална амбиција, на созреана свест, на колективен напор. Мора повеќето да го посакуваат тоа, да го прават тоа, да го бараат тоа и да го одржуваат тоа. Само од себе не доаѓа, само од политика не се раѓа, па конечно и тие во политика од народ извираат. Ама треба и некој доблесен што стигнал погоре, да се обиде тоа да го наметне, ама треба да има и некој што тоа ќе го следи и почитува“, додава Мицковски.

Гордан Георгиев: „Власта е во ран мандат, а немаме втор подобар“

Забележителен и многу цитиран пост на Фејсбук деновиве објави и професорот Гордан Георгиев, поранешен потпретседател на СДСМ од деновите на Отпорот.

„На истекот на седумте дена тага по кошмарот кој ни се случи, додека роднините, пријателите, комшиите, соучениците уште не можат да се соземат од болка поради ужасната смрт на нивните најблиски, ние останатите, живи мртовци, мораме да почнеме да делуваме. А ќе можеме ефективно да делуваме само ако прво делуваме индивидуално, а потоа колективно. Тоа значи најпрво, секој од нас да си ги преброи личните ‘дуќанчиња’ (јас ги избројав за себе, имам 5-6 такви дуќанчиња) и да си ги затвори, со катанец. Тоа значи дека секоја врска, врскичка, имам братучед таму, ќе подмачкам, не се секирај, имаш ли бе чоек таму, абе слушнав си бил близок со неа… сето тоа ќе си го закопате два метри под земја, ќе го погребете. Без тоа нема напред, шансите ни се речиси никакви“, пишува Георгиев и прецизира:

„Под дуќанчиња не мислам само на софт и хард корупција и фаќање врски, туку мислам и на разно-разни идеолошки дуќанчиња, персонални преференци, можности за позиции и поголема плата или проект, тага за минатото, можеби и неправда или грев што претходно ви ги направиле овие или оние… Не, не, се’ ќе тргнете на страна“.

„Откако тоа ќе го направиме, ќе треба да им дадеме полна поддршка на овие што се сега во позиција да го направат тоа за нас. А во позиција се да го направат тоа затоа што и тие се преплашени, и тие се пеплосани, претпоставувам дека се согласувате дека и тие се луѓе. Верувајте, сурово политички кажано, никој не сака ваква хаварија на 9 месеци од почетокот на силен мандат. Преплашени и треба да бидат, и за себе и од нас, но ние мораме да видиме дали се всушност прекршени. Прекршени дека сега или никогаш треба да се средат работите. Искрено, делуваат прекршено, но наша работа е да ги следиме на секој чекор, во секој миг, на секоја кривина. Се разбира, откако претходно сме си ги затвориле дуќанчињата, нели?“, пишува Георгиев.

Тој забележува дека „опозицијата доста внимателно се однесува, и тоа е добро, грчот е голем, влогот е државата и целокупниот опстанок на ова општество“.

„Добро знаете дека сите тоа го шепкаме: ова не е држава, не не’ бива, пак исто ќе биде. Со оваа, би рекол здрава доза на скепса и неверица, треба до крај да ги поддржиме овие кои сега се во можност тоа да го направат. Бидејќи, реално, немаме second best. Власта е во ран мандат, на опозицијата ѝ треба време да се консолидира, немаме секонд бест“, заклучува Георгиев.

Блокадата на институциите значи запирање на истрагата за трагедијата – тоа некој го посакува?!

По утрешниот протест ќе биде појасно дали постои цврсто сценарио за злоупотреба на трагедијата во Кочани за неартикулирани протести и блокади, чија цел е да се парализираат власта и институциите и да се предизвика хаос во земјата.

Став на авторот на овој текст е дека зрелата македонска јавност мора енергично да ги отфрли и да ги осуди тврдењата дека биле „морони“ луѓето кои спонтаните собири и протести ги разбираат и како свој личен израз на тага и очај поради трагедијата, но и како облик на јавен притисок за „тотален, апсолутен и искрен морал и тотално почитување на законите и Уставот, на јавното добро“, како што вели Мицковски. Спонтаната потреба на луѓето да се собираат во тешки моменти не е никакво „моронство“, како што навредливо обвинува професорот Фрчкоски, оправдувајќи ја својата лажна теза дека некој сакал да ги замолчи студентите.

Најостро, пред се, од самите учесници на протестот, но и од целата јавност, треба да се осудат инструктажите од типот „блокирајте улици, тоа ќе изгледа како знак на жалост“, „треба да смениме идентитет, да тргнеме постови и да имаме 3-4 барања за да изгледаме пореални“ и слични, какви што се слушаат на објавената снимка. Јасно е дека тука гледаме инструкции да се избегне било каков институционален дијалог и да се дестабилизира земјата. А дестабилизирањето на институциуите ќе значи и компромитирање или целосно запирање на истрагата и блокирање на сите обиди за рестарт на системот.

Кој има полза од блокада и парализа на земјата?

Овие сценарија се неприфатливи. Не само затоа што се „увозни“ и во таа смисла препознатливи. И не само затоа што актуелната власт е избрана пред девет месеци, со мандат и обврска да се бори против криминалот, корупцијата и сите слабости на системот, наталожени со децении. И не  поради неспорниот факт дека оваа власт покажа волја за промени, тоа никој не може да го негира. Заедничкиот именител на овие инструктажи и на манипулантските тези на некои ликови од јавната сцена е идејата да се создаде криза на институциите со избегнување дијалог со нив, со креирање алиби барања и со блокада и парализа на системот. Тоа, всушност, е идеја да се парализира земјата во целост. Суштината на овие сценарија е моронската желба Македонија буквално да запре.

Кој ќе има полза од такво нешто?

Опозицијата? Не.

Граѓаните? Не.

Ќар од овие сценарија имаат само луѓе на кои ваквите проекти им се „лични дуќанчиња“, како што вели Георгиев. Затоа, да се придружиме кон неговиот апел: „Сите џавкања кои доаѓаат од зачадената смрдлива внатрешност на нашите лични дуќанчиња, треба да ги игнорираме и да ги осудиме. Сите добронамерни поддршки треба да ги охрабриме“.

Да додадам само едно: наместо да ги разбуди паликуќите, луѓето кои сакаат да ја злоупотребат трагедијата за да предизвикаат политички пожар, пораката што ни ја испраќа судбината е да се сплотиме во напорот злото никогаш веќе да не ни се повтори – затоа Македонија во овој момент не смее да запре и да падне во бездната на хаосот.

Едит (15:30): Марјан Забрчанец реагираше откако во одредени медиуми се појавија, како што вели, клевети дека тој стои зад протестите. „Запрете со клеветењето и хушкањето, вашите лаги нема да го угасат гневот кај граѓаните кои бараат одговорност. Јавно се обраќам до сите медиуми и т.н. ‘медиуми’ кои ги објавија или ќе ги објават ваквите клеветења, навреди, хушкања, етикетирања и дезинформации и барам да го повлечат моето име од објавите и да се извинат за намерното предизвикување и ширење омраза и гнев и тоа во време на национална трагедија“, вели Забрчанец.
Појаснување од Плусинфо: „Во делот од текстот преземен од Нетпрес Марјан Забрчанец се спомнува како дел од „неформалните координатори и инспиратори на ваквите процеси“, а не како некој што „стои за протестите“. Го нотираме демантот на г-н Забрчанец, но не можеме да го доведеме во контекст на било какво хушкање, ширење омраза и гнев, бидејќи такво нешто во оваа статија нема.

The post СЦЕНАРИО ОД ДУЌАНЧИЊАТА НА ИНСТРУКТОРИТЕ И НА ПАЛИКУЌИТЕ? Истрагите да се компромитираат, институциите да се распаднат и Македонија да запре appeared first on plusinfo.mk.

Студентите се изманипулирани, а трагедијата во Кочани се користи за лични и за партиски цели, остро реагира Факултетско студентско собрание (ФСС) на Правниот факултет „Јустинијан Први“, при УКИМ.

Реакцијата се однесува на потегот на Факултетското студентско собрание на Филозофскиот факултет, чии претставници пред неколку дена изгласаа недоверба на Универзитетското студентско собрание (УСС) на Универзитетот „Св. Кирил и Методиј“. По ова на социјалните мрежи почнаа да се шират видеа од студенти кои ги предупредуваат другите студенти дека опозициска партија им прави поделба за да ја злоупотреби трагедијата на Кочани за да дојде на власт преку протести.

ФСС на Правен предупредува дека тој потег е незаконски и бара извинување од ФСС на Филозофски.

„Наши колеги, но пред сè, пријатели и сограѓани кои длабоко ја чувствуваме болката која ни ја всади трагедијата во Кочани. Сите сме изреволтирани, вознемирени и растревожени од континуираното потфрлање на системот и институциите. Како студенти на Правен, како никогаш досега се соочуваме со тоа дека правдата е само концепт и дека ништо нема да ни ги врати тие прекрасни, млади и надежни животи. Изразуваме големо жалење и негодување што нашите колеги – студентски претставници на Филозофскиот факултет, кои видено не ги познаваат своите надлежности, ниту одговорности (а се бирани од своите студенти), ја узурпираа ситуацијата да изманипулираат искрени и чесни студентски грла во трагедијата која нè снајде“, соопшти ФСС на Правниот факултет.

Согласно член 36 став 3 од Законот за високо образование, објаснуваат тие, студентско собрание на одреден факултет може да именува само двајца делегати во редовите на УСС. Законот остава простор истите делегати да се променат или отповикаат од страна на факултетското собрание кое ги избрало. Дополнително, додаваат, единствен механизам за изразување револт во случај на несогласување на ФСС со работата на УСС е отповикување на избраните претставници и да не именува нови.

„Уште повеќе, ФСС на Филозофскиот факултет, сè уште ги нема отповикано делегатите кои се претходно избрани, иако веќе ги преплавија медиумите за мало внимание „како изгласале недоверба“, туку напротив, истите делегати активно учествуваа на последната седница на УСС. Бараме јавно извинување од страна на членовите на студентското собрание на Филозофскиот факултет, не кон ФСС на Правен, кон УСС или кон УКИМ – туку кон сите нас, студентите, бидејќи го злоупотребуваат просторот со ширење лажни информации, кои за жал, се базираат на нивна правна лаичност“, соопштија студентите од ФСС на Правниот факултет.

Една од причините зад таа лаичност, се додава, е токму и партиската припадност на дел од членовите на тоа собрание, кои впрочем први ја споделија таа вест – не само по студентските канали на комуникација, туку и медиумите.

Тие нагласуваат дека легитимниот студентски гнев треба да биде насочен кон институционални промени и подобрување на системот, а не кон политички агенди кои немаат никаква врска со интересите на студентите.

„Неправото не продуцира право. Партизираните деца не најавуваат непартизираност. Неинформираноста не поттикнува просперитет и здраворазумно дејствување во едно општество. Трагедијата не е политички капитал. Во моменти кога болката нè разорува, а неправдата нè гуши, единственото и рационалното размислување се потребни повеќе од било кога. Тагата ни е заедничка. Гневот ни гори во градите. Но, не смееме да дозволиме да нè поделат токму сега, кога најмногу ни треба сплотеност. Ова не е време за лични агенди и индивидуално профитирање – ова е време за борба, за студентска солидарност и заеднички отпор против корупцијата и нефункционалниот систем. Животот е едноставен и нагло се менува. Видовме…“, соопшти ФСС на „Јустинијан Први“.

Организација потпишана како Независно студенско собрание на 18 март соопшти дека ФСС на Филозофскиот факултет изгласа недоверба на делегатите на УСС на УКИМ.

„Овој модел на студентско претставување е истрошен. Експериментот со УСС заврши, студентите на УКИМ ќе се самоорганизираат пленумски. Тоа за кое пред деценија студентите се бореа, никогаш не го добија. Наместо автентично претставување на студентскиот интерес, го добивме зависниот бирократски лавиринт наречен УСС на УКИМ. Студентите дека не можат да имаат претставнички тела контролирани од властите и партиите. Ова се наши универзитети“, соопшти Независното студентско собрание на УКИМ.“

The post СРАМНА ЗЛОУПОТРЕБА И ПОДЕЛБА НА СТУДЕНТИТЕ, ТРАГЕДИЈАТА НЕ Е ПОЛИТИЧКИ КАПИТАЛ Студентското собрание на Правен бара извинување од колегите од Филозофски appeared first on plusinfo.mk.

Македонија е мала земја, ама со големо срце. Народот во оваа земја е добар, емпатичен, кроток. Има еден збор кој ги опишува овие особини заедно – убав. Да, ние сме убав народ. Сите го велат тоа.

Но, кога е потребно – а во овие години на мачна и сè уште незавршена транзиција од претполитичко во демократско општество, навистина тоа често беше потребно – тој ист убав народ знае да го крене гласот, да се бунтува и громко да бара промени.

Сведок сум на сите тие настани цели четири децении. Можам слободно да кажам дека во моментите на големи тензии и превирања, кога народот на улица бараше мир, ама и војна, правда, но и смрт за некого, во тие клучни моменти кај убавите луѓе во мојата земја сепак се будеа разумот и свеста дека улицата не смее да не одведе во бездна и така да го запре макотрпниот процес на изградба на едно цивилизирано, праведно, демократско и организирано општество.

Да не бидеме водени од злонамерници и недоветници

Вознемиреноста, гневот и огоречноста поради трагедијата што се случи во дискотеката на смртта во Кочани се чувства што ги споделуваме сите. Тие поттикнуваат на акција, на протест. Та не би биле луѓе да не е така. Но, не би биле ни тоа што сме, одговорни и стамени луѓе, ако дозволиме нашиот револт да биде изманипулиран од злонамерници или недоветници, кои сакаат правдата да ја земат во свои раце, кои поттикнуваат линч и хаос и кои имаат скриени политички агенди.

Од сопственото искуство знаеме дека уличната „правда“ е неправда. Ширењето дифузен гнев и неартикулирана негативна енергија води само кон блокада на институциите, од чии перформанси ионака не сме задоволни и во „мирнодопски“ услови. Во овие три ипол децении имавме такви ситуации, на кои не сме горди. Се сеќаваме на моментите кога некои луѓе, во име на некое свое разбирање на правдата и на оправданоста на револтот, правеа многу грозни нешта за кои немаше оправдување – демолираа дуќани и цели улици, линчуваа луѓе, палеа цркви и џамии …

Да да, треба да сме свесни дека и тие тажни и срамни моменти се дел од историјата на овој убав народ.

Не постои „колективна одговорност“, тоа е замајување!

Овој пат не смее да ни се случи такво нешто. Не смееме нашите емоции да бидат изманипулирани од луѓе кои сакаат да ни кажат дека сега е време да се бара некаква „колективна одговорност“, да се казнат „сите“ и дека само така секој еден немало да биде следен.

Не, не и не!

Токму обратното е – ако дозволиме улицата да создава свои „закони“ и да дели „правда“ по некои свои мерила, обеснажувајќи ги така кревките институции, тогаш е речиси сигурно дека во една таква хаотична ситуација секој еден навистина може да биде следен – следна жртва на манипулаторите.

Институциите мора да добијат шанса

Четири клучни факти укажуваат дека народот овој пат мора да им даде шанса на институциите.

Прво, здравствениот систем – таков каков што е, тромав, можеби и корумпиран и во секој случај несовршен – успеа од себе да го извлече најдоброто и на унесреќените да им пружи итна и квалитетна медицинска помош, во здравствените институции во земјата, но и во странство.

Второ, органите на кривичниот прогон поведоа масивна операција за утврдување на кривичната одговорност на сите лица инволвирани во случајот. Таа акција опфаќа повеќе од 20 лица и засега се води строго по правилата на игра, одговорно а не одмазднички, точно така како што треба да биде во едно општество во кое граѓаните би требало да имаат многу поголема доверба во правосудството од сегашните 2 отсто.

Трето, постои јасно изразена политичка волја да се спроведе жестока акција за инспектирање на сите локали во земјава и конечно да се воведе ред и поредок. Таа акција заслужува јавна поддршка.

И четврто, имам впечаток дека постои некакво премолчано разбирање меѓу владејачките партии и опозицискиот СДСМ да се избегнуваат погубните политички манипулации, кои можат да доведат само до хаотична состојба. Тоа меѓусебно разбирање, за кое се надевам дека навистина постои и дека ќе потрае, е многу важно за враќање на мирот и на спокојството во земјата.

И ние сме дел од системот што не ни чини

Па сепак, наспроти сè, сите сме со чувството дека нешто недостасува, дека секој од нас треба да направи уште нешто.

И јас го имам тоа чувство, се разбира, не само како родител на дете на онаа возраст за која велиме дека е „критична“ и изложена на вакви предизвици, туку и како новинар кој има одговорност кон своите читатели.

Од каде тоа чувство?

Еден од нашите понови колумнисти (Методија Анѓелкоски) тоа убаво го објасни во својата колумна со наслов „Кога гневот не е доволен“. Ние сме сепак добри, одговорни, стамени луѓе и чувствуваме дека одмаздата не е правда и не може да биде никаква утеха за ненадоместливите загуби. Системот се состои од закони, од правила, од институции, но ништо од сето тоа не постои без нас, без секој од нас поединечно. Затоа, чувството на вина кај секој од нас ги надвладува чувството на огорченост и потребата да се излезе на улица и да се дели улична „правда“.

Да повторам, не постои таква правда. Таквата правда е – неправда.

Не постои „колективна одговорност“. Тоа беше измислица на поранешниот систем, во кој живеевме со децении. Одговорноста секогаш е индивидуална, таа секогаш има име и презиме.

Секој протест против „системот“ како апстрактен ентитет е манипулација и ширење дифузен страв и гнев меѓу луѓето.

Како да се биде подобар и похрабар

Во овие мигови на голема тага и вознемиреност, навистина секој треба да се сврти кон самиот себе. И да собере храброст да биде подобар и похрабар член на ова општество.

Читам, многу добри и доблесни луѓе веќе го демонстрираат тоа. Нудат секаква помош за унесреќените. Нудат утеха. Нудат почит за жртвите, добра мисла и апели за сплотување. Има многу такви луѓе и во Македонија, но и во соседството. И тие живеат во овој лош „систем“, огорчени и разочќарани. Но, наоѓаат во себе сила да демонстрираат општественост. Искрено им се восхитувам.

Мојот апел до вас, почитувани читатели, е да ги поттикнеме институциите на системот да се ангажираат уште повеќе, да им пружат на унесреќените помош и поддршка, да спроведат енергична и сеопфатна истрага за да ги откријат сите виновници, но и веднаш да воведат ред и поредок таму каде што со години и со децении владеел хаос.

Знам дека ќе речете дека тоа не е лесно. И не е. Знам дека вашата, како и моја доверба во институциите, е прилично истрошена. Но, јас не гледам друг начин освен да им дадеме шанса овој пат да се надраснат себеси, во процес што ќе се одвива под будното око на јавноста и на секој од нас поединечно.

Кога земаме камен в рака, правиме најголема неправда

За актуелната власт ова е пресуден тест на интегритетот, на решителноста во борбата против криминалот и на политичката волја за обнова на институциите. На тој тест може да се положи или да се падне, трето нема. Но, на власта, која го презеде кормилото на државата со огромно мнозинство гласови на избирачите пред само осум месеци, мора да ѝ се даде шанса да го полага тој тест.

И ако утре, не дај боже, се покаже дека народот повторно мора да дојде „по своето“, ќе протестираме. Улиците никаде нема да ни избегаат. Протестот е легитимно демократско право на граѓаните.

Но, да се разбереме добро – ништо не значи тоа кога протестираме против „систем“. Или против каков било „колектив“. Ништо не значи кога бараме „колективна одговорност“, така само ја криеме индивидуалната одговорност, така ги криеме виновниците за трагедијата и за состојбите. Кога земаме камен в рака за да истераме „правда“, всушност, правиме најголема неправда.

Кога протестираме без јасна цел и без јасна артикулација, влегуваме во канџите на злобници и некадарници и тогаш секој од нас навистина може да биде следен – следна жртва на политичките манипулатори.

The post Кога улицата ни прави „систем“ и дели „правда“, секој еден навистина може да е следен – следна жртва на манипулатори и некадарници appeared first on plusinfo.mk.

И со снимањето на филмот „Сенки“, Милчо Манчевски фрла дебела сенка врз законското работење со парите добиени од државата – ја изиграл владата на Груевски, а колегите останале финансиски соголени до коска.

Ова го тврди Друштвото на филмски работници на Македонија (ДФРМ), прецизирајќи дека Филмскиот фонд „замижал“ пред смената на фирмите на режисерот, додека 1 милион евра пари на граѓаните завршиле во неговиот џеб, кој очигледно нема дно. Имено, Милчо Манчевски, во манир на транзициски тајкун, со дубари ја згаснал „Сенки“ со долгови, си ја отворил „Банана филм“ како негова  нова златна кокошка за милионски сомнителни трансакции со народни пари, обвинува ДФРМ.

Сенката врз филмот „Сенки“ е долга 2 милиони евра!   

Кон серијата јавни обвинувања кои укажуваат на сериозни финансиски криминали од страна на продукцијата „Банана филм“ на Милчо Манчевски, се надоврзува уште еден невиден корупциски скандал, кој според фактите за кои македонските филмаџии велат дека се поткрепени со документација, евидентно го позиционираат Манчевски во редот на „класичните транзициски тајкуни“.

Имено, криминалната проверена шема со која некои транзициски бизнисмени преку ноќ се стекнуваа со богатство, преку намерно водење на фирми во стечај за да ги избегнат долговите, а откако веќе ги наплатиле побарувањата, Манчевски ја употребил во 2009 година, кога е продуциран неговиот филм „Сенки“.

Откако на неговата фирма „Сенка филм“ легнале фантастични 2 милиони евра државни пари, од долговите Манчевски експресно се ослободил, така што ја згаснал „Сенка филм“ и си ја отворил новата фирма „Банана филм“. Како што сведочат дел од филмаџиите, негови соработници на проектот, Манчевски им останал должен за услуги и хонорари. За тоа во едно интервју говори и продуцентот Иво Антов. Додека тој правдата ја барал по судови, Манчевски од државните 2 милиони евра, за себе наплатил половина, или феноменални 1 милион евра! И тој не е единствен, кој покрај судските одлуки, не можел да ги наплати долговите, бидејќи компанијата „Сенка“ оди во стечај.

И така, „Банана филм“ уште од самото основање ја почнува својата криминална приказна, за денес, финансиската историја на нејзината сметка, низ која се прелеани милиони евра пари на граѓаните, да биде предмет на постапување на надлежните органи.

Како вртела центрифугата со „отвори – затвори“ фирми и како Манчевски од Груевски бесправно успеал да се офајди со нови пари

Освен тајкунската дубиоза со фирмите, во случајот со филмот „Сенки“, Манчевски, како и за други проекти, на име на промоција и дистрибуција за филмот, ќарил двократно, тврди ДФРМ, повикувајќи се и на напис од медиумите од декември 2007 година. Владата на Никиола Груевски на фирмата „Сенка“ на Манчевски ѝ доделува енормна сума од 200.000 долари за промоција и за дистрибуција на филмот „Сенки“, наводно да се бори за пласман во најтесната селекција за наградата Оскар за филм од странско говорно подрачје. Само за споредба, останатите македонски филмови за истата намена од државата добиваат помеѓу 5.000 и 10.000 долари!

Не само што филмот во обидот за номинација доживува очекувано фијаско, туку Манчевски бесрамно, повторно во 2009 година, три години од почетокот на снимањето (17 август 2006 година), врши притисок врз Филмскиот фонд за дополнителни средства за промоција и за дистрибуција на истиот филм, но овој пат на новата фирма „Банана филм“.

Според постоечката документација, Филмскиот фонд во мај 2009 година склучил договор за финансирање Проекти од национален интерес со „Сенка Милчо Манчевски ДООЕЛ“, за поддршка, дистрибуција и за реклама на играниот филм „Сенки“ во износ од  уште 1.197.667 денари (19.500 евра).

Во член 4 од договорот се вели дека корисникот е должен да направи наративен и финансиски извештај, извештај за готовинските парични текови на проектот со спецификација за вкупните трошоци со прилог документација за потрошените средства (фактури и договори), со рок од 15 дена по завршетокот на дистрибуција и реклама на филмот.

Овој договор е склучен на 12 мај 2009 година, а е заведен во Филмскиот фонд на 27 мај 2009 година. Само два дена подоцна,  на 29 мај 2009 година, е направен анекс на претходниот договор и парите, наместо на „Сенка Милчо Манчевски“, се префрлат на „Банана продукција“.

Компанијата „Сенка“ згаснува, парите потрошени, отчет нема, колегите на Манчевски нецелосно или воопшто неисплатени

Не пости запис кој објаснува која е причината за ваквата промена, а исто така нема ниту финансиски извештај за што и како биле потрошени овие пари од претходната фирма, тврди ДФРМ.

Од документите заведени во Централниот регистар, се гледа дерка Милчо Манчевски е сопственик на „Сенка Милчо Манчевски“, но фигурира како американски државјанин, додека пак компанијата, покрај приоритетната дејност филмска продукција, има регистрирана дејност за надворешна трговија со прехранбени и непрехранбени производи.

До денес, дел од оштетените учесници во македонската екипа, иако добиле на суд, не можеле да ги добијат побарувањата, поради криминалното згаснување на фирмата „Сенка“.

Клиентелизмот на Милчо Манчевски и на неговите заштитници – прочитана книга

Манчевски е веќе прочитана книга, велат негови колеги филмаџии. Секогаш кога институциите на правдата ќе му затропаат на врата за милионските сомнителни трансакции со државните пари со кои располагаат неговите фирми, тој веднаш се прогласува за жртва, менува страна па , па се шалта кон „шарените“, или ги мобилизира неговите, како што веќе беше објавено во медиумите „заштитници“, блиски пријателски контакти, во институциите, Владата или невладините организации.

– Политичките времиња се менуваат, но кој постојано „го вади“ Манчевски пред Законот? – прашуваат од ДФРМ.

Институциите интензивно водат истраги за „Банана филм“?

На несигурниот политички терен, филмскиот олигарх Манчевски, како што го нарекуваат колеги филмаџии, неодамна се излизга и на нему по народните пари сличната доскорешна министерка за култура, Бисера Костадиновска Стојчевска.

Вака, прочитан од властите и критичката јавност, нашиот „филмски олигарх“ со последните шурувања со Костадиновска Стојчевска, се лизна кон длабокото, а институциите интензивно постапуваат и водат истраги за сите сомнителни дејствија на „Банана филм“ и на Манчевски.

– Вистинската жртва на сите овие скандалозни дејствија предизвикани од Манчевски денес се македонскиот филм и македонската кинематографија. Ние во Друштвото на филмските работници на Македонија, во името на македонскиот филм, на неговото вонредно успешно минато и на неговите актуелни креативни филмски потенцијали, сме уверени дека нашите надлежни институции ќе ја истуркаат правдата, за конечно македонската кинематографија да продолжи да дише во духот на вредностите, на вистинските вредноста на седмата уметност – велат од ДФРМ.

The post УШТЕ ЕДЕН СКАНДАЛ НА ФИЛМСКИОТ ОЛИГАРХ Како Милчо Манчевски за филмот „Сенки“ ја изиграл владата на Груевски и лапнал 1 милион евра appeared first on plusinfo.mk.

Гордана Димитриеска Кочоска во моментот е најнеомилената министерка во владата на Христијан Мицкоски. Таа е чувар на државната каса и судејќи според изгласаниот ребаланс на Буџетот, наспроти фактот дека државната сметка е зголемена и на расходната и на приходната страна, таа се обидува сериозно да ги намали трошоците во прекубројната и лошо организирана јавна администрација.

Тоа е една од темите за кои министерката за финансии Димитриеска Кочоска отворено со конкретни примери говори во поткастот на Плусинфо.

Во интервјуто со новинарот Бранко Героски таа зборува најмногу за својот ресор, во кој, како што вели, работат 550 луѓе, а според исказите на самите вработени, може без проблеми да функционира со 300. Таа отворено сведочи и за манипулации со платите и со трошоците во проектната единица на Светска банка во ова нејзиното министерство.

Во буџетските проекции таа го скрати буџетот на Владата за околу 20 милиони евра.

– Kога добро се анализираа работите, навистина доаѓаме, а и во иднина ќе доаѓаме до многу големи заштеди. Да, ми ја отежнуваат сите работата. Веројатно не сум омилена и меѓу моите. Ама, мора еднаш засекогаш да воспоставиме правила. Напорно ми е, тешко ми е, се трудам да дадам се од себе. Најважно ми е дека ја имам поддршката од премиерот, бидејќи ние така функциониравме и во ВМРО-ДПМНЕ и кога бевме во ЕЛЕМ. Ние велиме, не треба никому да му ускратиме ништо, но секој треба да го добие она што му следува по законот. Не може некој од нас, народски кажано, да прави будали – вели таа.

Димитриеска Кочоска укажува и на превработеноста, но и на големите неправди во платите во разни институции. Во здравството, на пример, област во која ситуацијата е очајна, секретарката на една институција со години земала плата од 98.000 денари. Во Министерството за одбрана, на пример, имате правник којшто има дупло поголема плата од правникот во Министерството за финансии. Во Министерството за култура, пак, имате ненормално високи плати, а многу луѓе не идат на работа. Имаме, на пример, актери со плати над 120.000 денари. Во МНТ половина актери работат а половина не, а платите се од 60.000 денари па нагоре нагоре. Кустос на музејот во Кавадарци има плата од 72.000 денари, а библиотекарката повеќе од 65.000 денари.

Министерката се подготвува за сериозен и принципиелен разговор со синдикатите од јавниот сектор, кога ќе дојдат на дневен ред платите.

– Пред да разговараме за платите, ние со нив треба да се договориме една друга работа – што ќе правиме со оној дел од администрацијата којшто не работи. Тие луѓе мора да станат свесни дека мора да работат. Има еден дел од администрацијата којшто е многу оптоварен и којшто, за жал, има многу мали примања, но има и такви коишто ништо не работат. За мене е неприфатливо да разговарам топтан за сите заедно. Од друга страна, состојбата во економијата е алармантна од секој аспект. Компаниите се соочуваат со сериозни проблеми, а ние без нив не можеме да функционираме. Ако во администрацијата зголемуваме плати без да водиме сметка за овие нешта, прашањето е до кога ќе одиме така. Со ваквиот начин на однесување како до сега, ние можеме да тераме уште година до две и потоа ќе ни се случи грчко сценарио, а тоа значи принудна управа и намалување на платите и на пензиите – вели таа.

Гордана Димитриеска Кочоска отворено зборува и за тоа како се манипулира со парите за капиталните инвестиции. Таа го брани и својот личен став линеарното зголемување на пензиите да стане постојан метод. Со министерката за финансии разговараме и за идеите за ангажирање на т.н. мртов капитал на граѓаните, за сивата економија, идеите за фискална амнестија на парите кои сега се „под перница“ или во странски банки, за укинување на кешот и за дигитализација на финансиските услуги и за други важни прашања.

The post 🎥 НЕ СМЕЕМЕ ДА ВЛЕЗЕМЕ ВО ГРЧКО СЦЕНАРИО Година или две можеме само да ги дуваме платите во администрацијата, ама после ќе нема ни за плати ни за пензии appeared first on plusinfo.mk.

„Во однос на обвинувањата изнесени од Богданка Кузеска од СДСМ, сакам јавно да ги демантирам и да ја информирам јавноста дека уште на 4 јули 2024 година, во законски утврдениот рок, до Државната комисија за спречување на корупцијата доставив изјава за имотна состојба. Сите податоци за мојот имот се јавно достапни на следниот линк: https://registar.dksk.mk/appointed-person/22221.

Одговорно тврдам дека надвор од она што е наведено во изјавата за имотната состојба, не поседувам ништо друго. Ги повикувам институциите детално да го проверат мојот имот, но и имотот на секој актуелен и поранешен функционер, особено на оние кои целиот свој живот се на товар на државниот буџет“.

Ова на Фејсбук го објави министерот за внатрешни работи Панче Тошковски, откако СДСМ го поврза со наводно „подарениот имот“ на генералниот секретар Игор Јанушев. Во меѓувреме, Јанушев објасни дека не постои „подарен имот“, туку погрешно внесени пдатоци во анкетниот лист, кои во меѓувреме се коригуирани.

Министерот Тошковски упати порака до СДСМ да престане со лаги и манипулации.

„Транспарентноста и одговорноста се клучни за градење на доверба меѓу институциите и граѓаните. Време е вистината да излезе на виделина“, се вели во неговата објава на Фејсбук.

„НЕ ПОСТОИ ПОДАРЕНО ЗЕМЈИШТЕ, ИМА ГРЕШКА ВО ВНЕСУВАЊЕТО ПОДАТОЦИ, КОЈА Е КОРИГИРАНА“ Јанушев го пуштил СДСМ да се излизга со лажни обвинувања

The post „ЦЕЛИОТ МОЈ ИМОТ Е ПРИЈАВЕН, СЕКОЈ МОЖЕ ДА ПРОВЕРИ“ Министерот Панче Тошковски го повика СДСМ да престане со лаги и манипулации appeared first on plusinfo.mk.

Ако ја следите реториката на претседателот на СДСМ, Димитар Ковачевски, тој постојано повторува дека доколку СДСМ биде повторно избран на власт, до 2030 година. Македонија ќе стане полноправна членка на Европската унија, а дека со евентуален избор на ВМРО-ДПМНЕ и коалицијата на власт, земјата немало никогаш да стане членка на Унијата!

Но, фактите го говорат токму спротивното.

Криминалното владеење на СДСМ и ДУИ и ужасното досие во борбата против организираниот криминал и корупцијата и владеењето на правото, забележано во последниот извештај на Брисел за напредокот на Македонија кон Унијата, е гаранција дека старо-нова влада на СДСМ и ДУИ само дополнително ќе го закочи и ќе го урниса евроинтеграцискиот процес на Македонија, дури и ако тој формално-правно почне.

Сепак, главен аргумент дека СДСМ не може ниту теоретски да ја внесе државата во ЕУ, е тоа што со едностраното прифаќање на т.н. Француски предлог, Владата на Ковачевски покажа дека нема политичка сила, знаење и моќ ниту да ги почне преговорите на Македонија со ЕУ, односно да ги отвори поглавјата од преговарачкиот процес, а не пак да ги заврши за четири години!?

Што ќе се смени доколку СДСМ на некаков спектакуларен начин повторно успее да формира Влада по изборите на 8 мај?

Условите кои ги прифати Владата на СДСМ за отворање на преговорите со Унијата се неприфатливи за двотретинското мнозинство од Македонците, односно за над 70 отсто од сите граѓани на државата. Ако минатата година, на мнозинството на СДСМ и ДУИ му фалеа 8 пратеници да изгласа уставни измени за внесување Бугари во Уставот, прифаќајќи идентитетски условувања за членство на Македонија во ЕУ, во идниот парламент ќе им недостигаат барем уште 15 пратеници повеќе!

Како тогаш Ковачевски мисли Македонија да ги почне преговорите со ЕУ и да ги заврши до 2028 година?

Очигледно е дека само ВМРО-ДПМНЕ и коалицијата, кои ќе бидат доминантна политичка сила по изборите на 8 мај, може да создадат услови Македонија да ги отвори преговарачките поглавја со ЕУ и да ги исполни условите за полноправно членство во Унијата. Без ВМРО-ДПМНЕ и коалицијата, во Собранието никогаш нема да има 80 пратеници за измена на Уставот.

А единствениот начин да се отворат преговарачките поглавја е идната Влада на ВМРО-ДПМНЕ и коалицијата, преку дијалог помеѓу Скопје и Софија (кој го поддржува и специјалниот пратеник на САД за Западен Балкан, Габриел Ескобар во својата последна изјава), како и со помош на нашите геостратешки партнери, САД и највлијателните земји членки на ЕУ, да создаде услови без идентитетски условувања Македонија да ги отвори преговорите, да го изоди европскиот пат и да стане полноправна членка на Унијата.

Се друго е само лажна политичка пропаганда на претседателот на СДСМ!

(Фејсбук статус на авторот)

The post Старо-нова влада на СДСМ ниту теоретски не може да ја внесе државата во ЕУ! appeared first on plusinfo.mk.