Познатиот скопски бизнисмен Марјан Јованов (58), во јавноста познат како Мане Левис, е пронајден мртов во дворот од својот дом во скопската населба Карпош, потврдија од Министерството за внатрешни работи.

Според информациите од полицијата, случајот бил пријавен вчера во 18:15 часот, кога во базен во дворот од куќата било пронајдено безживотното тело на Јованов.

„На 28.06.2026 во 18:15 часот во СВР Скопје е пријавено дека на подрачјето на Карпош, во базен во двор од куќа, бил пронајден починат М.Ј.(58) од Скопје. Од страна на лекар од Итна медицинска помош констатирана била смрт без видливи траги на насилство. Извршен е увид, а по насоки од јавен обвинител телото на починатиот е предадено во Судска медицина за обдукција“, соопштија од МВР.

Причините за смртта засега не се познати. Одговорите се очекуваат по обдукцијата што ќе ја изврши Институтот за судска медицина, по што ќе бидат познати повеќе детали за околностите под кои починал Јованов.

Марјан Јованов беше еден од најпознатите македонски бизнисмени и долгогодишен дистрибутер на брендот „Левис“ во Македонија.

The post МАНЕ ЛЕВИС ПРОНАЈДЕН МРТОВ ВО СОПСТВЕНИОТ БАЗЕН Обдукција ќе ја утврди смртта на познатиот бизнисмен appeared first on plusinfo.mk.