29-годишниот Д.С. од Кавадарци е приведен од страна на полицијата, откако синоќа со остар предмет се заканувал на сограѓанин и на малолетно лице, потврдија денеска од Секторот за внатрешни работи – Велес.

Според информациите на полицијата, инцидентот се случил во два наврати. Најпрво, околу 22:30 часот, во централното градско подрачје, осомничениот се обидел да го нападне со остар предмет 29-годишниот А.И. од Кавадарци. Само 40 минути подоцна, околу 23:10 часот, во еден од парковите во градот, пред поголема група малолетници, Д.С. повторно извадил остар предмет и му се заканил на малолетник, соопштуваат од СВР Велес.

„Полициски службеници од ОВР Кавадарци го лишија од слобода Д.С. во 23:25 часот. Кај него беше пронајден и одземен остриот предмет“, наведуваат од полицијата.

Против осомничениот ќе биде поднесена соодветна кривична пријава, а за случајот е известен и Јавен обвинител.

The post КАВАДАРЧАНЕЦ СО НОЖ ТЕРОРИЗИРАЛ НИЗ ГРАДОТ Прво нападнал маж, па се заканувал на дете, уапсен на лице место appeared first on plusinfo.mk.