Претседателот на Движењето ЗНАМ, Максим Димитриевски, гостуваше во емисијата „Топ Тема“ на Телевизија Телма, каде што говореше за реализацијата на владината програма, улогата на ЗНАМ во Владата и клучните политички прашања од интерес за граѓаните, се наведува во соопштението на ЗНАМ.

Осврнувајќи се на причините поради кои ЗНАМ стана дел од владината коалиција, Димитриевски истакна дека главната цел била да се спречат негативните политички сценарија од минатото и да се обезбеди посилна застапеност на македонските национални интереси.

– ЗНАМ влезе во оваа коалиција за да не гледаме реприза на она што се случуваше во минатото. Нашите мотиви да влеземе во Владата беа Македонците повеќе да не се чувствуваат како граѓани од втор ред во сопствената држава – нагласи Димитриевски.

Тој посочи дека ЗНАМ нема потпишано формален коалициски договор со ВМРО-ДПМНЕ и коалицијата ВРЕДИ, но по парламентарните избори била усогласена заедничка владина програма во која се вградени програмските приоритети и заложби на Движењето ЗНАМ.

Димитриевски истакна дека министрите од редовите на ЗНАМ, Горан Минчев и Игор Филков, доследно ја реализираат владината програма во согласност со приоритетите од Реформската агенда. Како потврда за постигнатите резултати, тој потсети на оценките изнесени од претседателот на Европскиот совет, Антонио Кошта, при неговата посета на Македонија, кога беше потенциран напредокот во областите јавна администрација и владеење на правото – ресори предводени од кадри на ЗНАМ.

Како едно од најзначајните политички прашања во изминатиот период, Димитриевски ја посочи непроменливоста на Уставот под услови на нови отстапки и повторно го афирмираше концептот на условени уставни измени, предлог што го застапува веќе неколку години.

– Нашиот став останува непроменет. Концептот на условени уставни измени е решение што ги штити националните интереси и обезбедува јасни гаранции за државата и граѓаните – истакна претседателот на ЗНАМ.

Во своето гостување, Димитриевски порача дека ЗНАМ ќе продолжи да делува како фактор на стабилност, реформи и заштита на државните и националните интереси, останувајќи доследен на ветувањата дадени пред граѓаните.

The post „ЗА МАКЕДОНЦИТЕ ДА НЕ СЕ ЧУВСТВУВААТ КАКО ВО ВТОР РЕД“ Димитриевски откри зошто ЗНАМ влегло во владата appeared first on plusinfo.mk.

Претседателот на Движењето ЗНАМ – за Наша Македонија, Максим Димитриевски, порача дека партијата останува доследна на принципите на владеење на правото, институционална одговорност и почитување на Уставот и законите, при што, како што истакна, целосна поддршка има министерот за правда Игор Филков и неговиот професионален пристап во водењето на ресорот.

Во интервју за неделникот „Фокус“, Димитриевски нагласи дека ЗНАМ не ја гледа Владата низ призмата на партиски надмудрувања, туку како систем на институционална координација и одговорност, каде секој ресор постапува во рамки на своите законски надлежности.

– Министерството за правда, предводено од министерот Игор Филков, има јасен и принципиелен став дека сите решенија мора да бидат во рамки на Уставот и законите. Владеењето на правото мора да биде над политичките или етничките калкулации – посочи Димитриевски.

Тој додаде дека прашањето за правосудниот испит не смее да биде предмет на дневнополитички притисоци или импровизации, туку решенијата мора да бидат системски и правно издржани, во согласност со мислењата на релевантните институции и меѓународните стандарди.

Претседателот на ЗНАМ ги отфрли наводите за маргинализирање на министерот Филков, оценувајќи дека станува збор за политички конструкции без реална основа.

– Министерот за правда Филков е во постојана комуникација и координација со Владата околу сите прашања од надлежност на Министерството. ЗНАМ целосно стои зад неговиот професионален, непристрасен и принципиелен пристап – истакна Димитриевски.

Тој, како што информираат од ЗНАМ, нагласи дека партијата останува фокусирана на реформската агенда и реализацијата на програмските определби, а не на, како што рече, кадровски шпекулации и политички конструкции.

Димитриевски оцени дека ресорите што ги предводи ЗНАМ – Министерството за правда и Министерството за јавна администрација – веќе испорачуваат конкретни резултати преку подготовка и усвојување на значаен број законски решенија, како и преку реформи кои добиваат позитивни оценки и од меѓународниот фактор.

The post ФИЛКОВ РАБОТИ ПРИНЦИПИЕЛНО И ВО ИНТЕРЕС НА ПРАВОТО Димитриевски уверува во конкретни резултати од реформите appeared first on plusinfo.mk.

Претседателот на Движењето ЗНАМ за Наша Македонија, Максим Димитриевски, во интервју за „Фокус“ упати остри критики кон СДСМ, оценувајќи дека партијата продолжува со, како што рече, старата матрица на политички спинови и дефокусирање на јавноста од сопствените проблеми.

Димитриевски изјави дека обидите за создавање приказни за наводни незадоволства и поделби во ЗНАМ се дел од политичка стратегија на раководството на СДСМ.

– Сите овие приказни што периодично се пуштаат во јавноста дека некој бил незадоволен или маргинализиран се дел од старата матрица на политичкиот спин, поттикната од необољшевиците што сега го водат СДСМ и се обидуваат своите внатрешни проблеми да ги рефокусираат кај конкурентните партии – истакна Димитриевски.

Тој нагласи дека ЗНАМ останува стабилен политички субјект со сопствен интегритет и јасна визија, додавајќи дека движењето не функционира како привезок на туѓи политики.

Според него, ЗНАМ гради автентичен политички концепт во Македонија, со јасно поставени принципи и црвени линии.

Осврнувајќи се на прашањето за уставните измени и внесувањето на Бугарите во Уставот, Димитриевски повтори дека неговата партија нема да поддржи решенија што, како што рече, се наметнуваат под диктат и со постојани нови условувања.

– Ако воопшто се отвора Уставот, тоа мора да биде резултат на јасен внатрешен консензус и реални, проверливи гаранции за националните и државните интереси и врз база на реципроцитет. Без тоа, секое инсистирање е само продолжување на политичка несигурност и постојано поместување на условите – нагласи претседателот на ЗНАМ.

Димитриевски порача дека пратениците на ЗНАМ ќе носат одлуки исклучиво во согласност со националниот и државниот интерес, Уставот и програмските принципи на движењето.

Во интервјуто тој посочи дека ЗНАМ ќе продолжи со политиките насочени кон, како што наведе, градење стабилна држава, силни институции и решенија во интерес на граѓаните, со фокус на долгорочен раст и развој на државата.

The post СДСМ СЕ ОБИДУВА ДА ГИ СОКРИЕ СОПСТВЕНИТЕ ПРОБЛЕМИ Необошевици ја водат партијата, тврди Димитриевски appeared first on plusinfo.mk.

Македонија мора да го продолжи европскиот пат, но без откажување од сопствениот идентитет, историја и национално достоинство, порача претседателот на Движењето ЗНАМ за наша Македонија, Максим Димитриевски.

Тој оцени дека континуираниот притисок за уставни измени од страна на актуелното раководство на СДСМ претставува продолжение на, како што рече, бугарофилската агенда која почнала со политиките на претходната власт.

– Таа агенда започна со политиките на Зоран Заев, со она фамозно интервју на БГНЕС, каде што нè изедначи и во јазикот и во нацијата. Дополнително следуваше изјавата на поранешниот претседател на државата Стево Пендаровски, кој што рече дека Гоце Делчев е Бугарин, и на тоа следуваше потпишување на фамозниот француски договор и целосна капитулација на нашата дипломатија предводена од Димитар Ковачевски, за да денеска го гледате истиот Венко Филипче кој што во континуитет инсистира на уставни измени, а сето тоа го потврдува на крајот и неговиот член на централниот одбор, Рубин Земон, кој што вели дека Гоце Делчев нема никаква улога во историјата на Македонија и го минимизира ликот и делото на еден од нашите најголеми револуционери во нашата понова историја – посочи Димитриевски во интервју на Сител.

Денешното инсистирање на уставни измени од страна на раководството на СДСМ, додаде, само го потврдува континуитетот на таквата политика.

– Со право можам да кажам дека Социјалдемократскиот сојуз, некогашната државотворна партија, во континуитет 8 години наназад е предводен од крајно бугарофилско раководство кое работи за туѓи, а не за македонски интереси – истакна Димитриевски.

Според Димитриевски, ЗНАМ останува цврсто на ставот дека Македонија може да биде дел од Европската Унија единствено како достоинствена држава на македонскиот народ и на сите нејзини граѓани, со зачуван историски и национален континуитет.

– Нашата цел е да го сочуваме она што е декларирано во АСНОМ и темелено врз Крушевскиот манифест. Ние можеме да бидеме дел од ЕУ само како Македонци, а не со негирање на нашиот идентитет – порача претседателот на ЗНАМ.

Нагласи дека Декларацијата на ЗНАМ со црвени линии за националните прашања останува отворена за сите политички субјекти и претставува основа за обединување околу државните интереси.

Во врска со тоа како ќе изгледа составот на новата влада рече дека е задоволен од работата на двајцата министри на ЗНАМ.

– Легитимно е од страна на мандатарот да бара промена на одредени имиња во Владата и во составот на Владата, но секако ние како владини партнери имаме свој удел во носењето на конечните одлуки. Ние како ЗНАМ сме апсолутно задоволни од работата на нашите двајца министри, Горан Минчев во ресорот на јавна и државна администрација и на Игор Филков во ресорот правда. И сите резултати што беа сработени. Првично во Извештајот на ЕК не беа споменати сите закони кои беа во постапка на изготвување, но во следниот извештај ние очекуваме позитивни резултати, бидејќи самите закони од Влада ќе поминат на Собрание и мнозинството ќе ги донесе со одредени измени и забелешки доколку ги има – рече тој.

Додаде дека иако немаат конечно разговарано за реконструкцијата, како владин партнер даваат забелешки за одредени ресори кои можат да бидат зајакнати, а премиерот тоа треба да го сумблимира со своите партнери и потоа да излезе со конкретен предлог.

– Кога влеговме во оваа влада бевме растоварени од бројот на ресорите. Баравме ресори каде што ќе се работи. Ресори со најмал буџет, каде што ќе се минимизира можноста од какви било коруптивни дејанија, не само на првите луѓе што ги водат, туку и на самите луѓе кои работат на клучните места во тие ресори. Дали во овој момент ќе ги задржиме ресорите или не, тоа ќе биде предмет и договор на коалицијата – рече Димитриевски.

Според него, за ЗНАМ е поважно како нова опција на политичкиот простор, којашто созрева, да има контиунуиирано политики што се во интерес на граѓаните и на државата.

– Во врска со тоа дали изборите ќе бидат следната година, или пак редовни, ние сме подготвени активно да учествуваме, бидејќи тоа е контрола за нас како нов политички субјект како се движиме на политичкиот простор и колку имаме реализирано од тоа што го имаме ветувано пред граѓаните – рече Димитриевски.

The post НА ЧЕЛО НА СДСМ СЕ БУГАРОФИЛИ КОИ РАБОТАТ ЗА ТУЃИ ИНТЕРЕСИ Сè почна со фамозното интерју на Заев, кој нè изедначи со Бугарите appeared first on plusinfo.mk.

Денеска се навршуваат 11 години од вооружената престрелка во кумановско Диво Насеље, што се случи на 9 и 10 мај 2015 година, во која загинаа 8 припадници на безбедносните сили. Во 28-часовната „мала војна“ животите ги загубија припадниците на безбедносните сили – Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ, кои посмртно се одликувани со медали за храброст. Во престрелката беа ранети 37 полицајци.

Повеќе делегации денеска положија свежо цвеќе пред спомен обележјето во нивна чест во Куманово, меѓу кои министерот за внатрешни работи, Панче Тошковски, директорот на Бирото за јавна безбедност, Александар Јанев, државниот секретар, Сашо Петрушевски, началникот на СВР Куманово, Никица Петрушевски, членови на семејствата на загинатите, претставници од специјалните единци на МВР, АРМ, Царинска управа, синдикатите на полицијата, здруженија на граѓани, претставници од општината Куманово и политички партии.

Во организација на синдикалната организација на Синдикатот на полицијата на Македонија (СПМ) денеска се одржува и меморијален турнир во мал фудбал под мотото „Хероите живеат вечно“, во спортската сала на СОУ „Перо Наков“. Ќе биде спроведена и хуманитарна акција за поддршка на полициски службеник.

Се одржа и панихида во соборниот храм Свети Никола.

– Единаесет години незаборав за хероите кои го дадоа животот за Македонија. Затоа се собираме секоја година да им оддадеме почит, да не ги заборавиме. Никогаш нема да ги заборавиме – рече Предраг Петрушевски, од група бранители.

Со длабока почит и неизмерна благодарност се сеќаваме на македонските херои, објави министерот Тошковски.

„Тие беа храбри припадници на македонската полиција кои во најтешките моменти застанаа во одбрана на државата, безбедноста и мирот на граѓаните. Нивната жртва останува врежана во колективната меморија на македонските граѓани како симбол на чест, достоинство и непоколеблива храброст. Нашата обврска е никогаш да не ги заборавиме и достоинствено да го чуваме споменот за нив. Македонија вечно ќе им биде благодарна.
Хероите живеат вечно! Нека им е вечна слава“, објави Тошкоски.

И градоначалникот на Куманово порача дека со длабока почит се сеќаваме на осуммината припадници на безбедносните сили, чии животи згаснаа на 9 и 10 мај во 2015 година.

„Нивната жртва е вечен симбол на храброст, посветеност и несебично служење за татковината. Единаесет години непребол нè потсетуваат и обврзуваат достоинствено да оддадеме почит, да градиме иднина без вакви трагични последици! Имаме должност да создаваме иднина на мир, стабилност, меѓусебна поддршка и заедништво. Нивниот подвиг е вистински поттик за сите нас, да продолжиме да градиме праведно и безбедно општество. Се поклонуваме пред споменикот на жртвите со неизмерна тага, изразувајќи благодарност до припадниците на македонските безбедносни сили, најискрена почит до нивните семејства, затоа што ги загубија најмилите во борбата за мир, праведност и безбедност на сите граѓани на Македонија“, напиша Димитриевски на Фејсбук.

The post ВЕЧНА ИМ СЛАВА НА МАКЕДОНСКИТЕ ХЕРОИ Одадена почит на загинатите во терористичкиот напад во Диво Насеље appeared first on plusinfo.mk.

Во гостување во емисијата Топ Тема на Телма ТВ, претседателот на Движењето ЗНАМ за Наша Македонија, Максим Димитриевски, се осврна на заминувањето на пратеникот Миле Цеков, оценувајќи дека станува збор за личен чин кој не ја нарушува стабилноста на партијата.

Тој посочи дека оддалечувањето на Цеков било процес кој подолго време бил видлив, нагласувајќи дека ваквиот исход не е изненадување.

– Пратеникот Цеков веќе подолго време не учествуваше во работењето ниту на Централниот, ниту на Извршниот одбор. Беше евидентно дека нешто се случува. Тој не е исклучен од партијата – ЗНАМ не исклучува свои членови, камоли пратеници. Ја донесе оваа одлука и слободен му е патот, секој со свој крст. Но, доколку имате минимум политичка и морална одговорност, треба да го вратите мандатот на граѓаните. Ова е реприза од минатото, но многу е побитен моментот кои се мотивите. Струмичката јавност најдобро го знае тоа – истакна Димитриевски.

Во однос на причините за ваквиот потег, Димитриевски укажа на промена на политичките ставови и отстапување од партиските позиции, поврзувајќи го тоа и со прашањето на политичката одговорност и принципи.

– Гледаме рапидна промена на ставови, вклучително и поддршка на предлози кои никогаш не биле разгледувани во рамки на партијата. Тоа остава простор дека имало намера. Дали е така, времето ќе покаже. Во ЗНАМ нема и нема да има простор за локални шерифи и злоупотреба на функциите, а токму затоа и очекуваме одговорност – мандатот да се врати таму каде што припаѓа – нагласи тој.

Осврнувајќи се на поширокиот политички контекст, Димитриевски повтори дека ставовите на партијата се јасни и непроменети.

– Нашите позиции се јасни, македонски идентитет, јазик, историја и европска интеграција со заштита на националните позиции, вклучително и пристапот кон уставните прашања. Господинот Цеков излезе со дијаметрално спротивни ставови и тука е суштинското разидување – истакна Димитриевски.

ЗНАМ останува цврсто на своите принципи и политички определби, со јасен фокус на одговорно политичко делување, доследност кон ветеното и почитување на довербата дадена од граѓаните.

The post БИ БИЛО ЕТИЧКИ ПРАТЕНИКОТ ЦЕКОВ ДА ГО ВРАТИ МАНДАТОТ Тој им припаѓа на граѓаните, вели лидерот на ЗНАМ appeared first on plusinfo.mk.

Претседателот на Движењето ЗНАМ и актуелен градоначалник на Куманово, Максим Димитриевски, во своето гостување во „Топ Тема“ на Телма ја отвори темата која, како што посочи, со години останува без јасни одговори и е обвиена со политички молк, дилеми и недоследности околу процесите поврзани со екстрадицијата на Никола Груевски.

– Во јавноста, наместо целосна транспарентност и институционална доследност, со години се менуваат ставови, се оставаат недоречени ситуации и се отвора простор за сомнежи околу начинот на кој се воделе клучни политичко-правни процеси – вели Димитриевски.

Лидерот на ЗНАМ истканува дека се поставува прашањето дали во кабинетот на поранешниот претседател Стево Пендаровски, во присуство на Димитар Ковачевски, Али Ахмети, Артан Груби и други претставници на СДСМ се разговарало за сценарија поврзани со враќањето на Никола Груевски во Република Македонија во замена за негова амнестија.

– И дали постојат записи или стенограми од тие средби, кои се кријат од јавноста? Дали помеѓу СДСМ и ДУИ постоеле политички договори за законски измени во Кривичниот законик, по барање на Груевски? Дали сето тоа е нотирано на фамозното УСБ стикче кое патувало на релација Будимпешта-Скопје?

Дополнително, вели Димитриевски, останува отворено прашањето за самото заминување на Груевски од државата и дали за тој институционален пропуст е утврдена конкретна одговорност, имајќи ги предвид тогашните надлежности на властите предводени од СДСМ.

Според лидерот на ЗНАМ, наместо целосно расчистување, јавноста со години сведочи на политички дефокус, обвинувања и недоречени објаснувања, додека суштинските прашања остануваат без конечен одговор.

ЗНАМ соопшти дека не прифаќа политика на фиоки, ниту правда што се темели на селективност.

„Доколку постојат материјали, тие не смеат да останат затворени. Вистината не е сопственост на поединци, туку право на граѓаните“, соопшти партијата.

The post ДАЛИ ВО ВРЕМЕТО НА СДСМ СЕ ПРАВЕЛЕ СЦЕНАРИЈА ЗА ВРАЌАЊЕ НА ГРУЕВСКИ? Димитриевски бара да се отворат картите appeared first on plusinfo.mk.

Mинималната плата треба да се зголеми, но тоа да се направи врз основа на договор меѓу работодавачите и синдикатите, водејќи сметка за реалните економски параметри и за глобалната економска криза, вели претседателот на Движењето ЗНАМ за Наша Македонија, Максим Димитриевски.

– Минималната плата е ниска и треба да оди нагоре, но одлуката мора да биде прагматична – истакна тој.

Говорејќи за надворешната политика, Димитриевски посочи дека Република Македонија треба да остане доследна на своите стратешки партнери, Соединетите Американски Држави, како и на определбите за членство во НАТО и во Европската Унија.

Тој оцени дека конфликтот на Блискиот Исток нема брзо да заврши и дека земјата треба да води прагматична политика.

Во однос на уставните измени, Димитриевски нагласи дека ставот на ЗНАМ останува непроменет – внесувањето на Бугарите во Уставот треба да биде со гаранции и со одложено дејство, по ратификацијата за членство во ЕУ.

– Имаме принципиелен став и додека се почитува, ќе даваме поддршка на владата – рече тој, додавајќи дека решението треба да се бара во дијалогот меѓу Скопје и Софија со посредство на ЕУ.

На прашањето за можноста за предвремени парламентарни избори, Димитриевски истакна дека ЗНАМ е подготвена, но одлуката ја носи премиерот и најголемата парламентарна партија.

Тој нагласи дека ЗНАМ нема да поддржи влада во која ќе учествува, како што рече, „нереформирана ДУИ“.

Додаде дека партијата е задоволна од работата на своите министри, најавувајќи дека за евентуални промени ќе одлучуваат партиските органи.

Димитриевски потенцираше дека Движењето ЗНАМ останува доследно на своите принципи, реформската агенда и заштитата на националните интереси, нагласувајќи дека партијата ќе продолжи да делува одговорно, со јасни позиции и подготвеност за политички одлуки во интерес на граѓаните и државата.

The post БУГАРИТЕ ВО УСТАВ САМО СО ГАРАНЦИИ ОД ЕУ И СО ОДЛОЖЕНО ДЕЈСТВО Сè додека овој став се почитува, ЗНАМ ќе ја поддржува Владата appeared first on plusinfo.mk.

Претседателот на Движењето ЗНАМ за Наша Македонија, Максим Димитриевски, во емисијата „Само интервју“ на Канал 5 ТВ истакна дека очекува новиот обвинител Савевски да работи професионално и во интерес на граѓаните, оценувајќи дека станува збор за личност без дамка во кариерата, на кој Движењето ЗНАМ му даде поддршка и очекува доследно да го применува законот.

Во однос на постапката поврзана со Артан Груби, тој нагласи дека случајот треба да се преиспита, додека за борбата против корупцијата оцени дека актуелната власт води сериозна и реална борба.

Според него, нема попуштање ниту за функционери од сопствените редови и постојат конкретни акции на Министерството за внатрешни работи во координација со Обвинителството.

– Никој никого не се обидел да го заштити и охрабрувам вакво однесување – истакна Димитриевски.

Осврнувајќи се на различните ставови на пратеникот Миле Цеков, лидерот на ЗНАМ потенцираше дека партијата останува отворена за внатрепартиска дебата и различни мислења, но со јасна граница за почитување на програмските определби и довербата на гласачите.

Пратеникот на ЗНАМ Миле Цеков неодамна во интервју за „Студио 10“ на 24 телевизија рече дека „лично нема ништо против“ и би гласал за евентуално внесувањето на Бугарите во Уставот.

Коментирајќи го неговиот став, Димитриевски нагласи дека ЗНАМ се гради како демократска партија која не исклучува, туку ги развива своите демократски капацитети, но истовремено очекува одговорност од секој избран функционер.

– Не направив партија за да исклучуваме членови, туку да привлекуваме и да го градиме демократскиот капацитет. Дебати може да има, сè додека не се злоупотреби довербата на граѓаните – изјави Димитриевски, испраќајќи порака дека различните ставови се дозволени, но не и отстапување од основните принципи.

Димитриевски рече дека пратениците пред сè мандатот го добиваат од граѓаните, а потоа и од политичката партија, поради што секое евентуално отстапување од програмата мора да биде објаснето пред јавноста.

– Не можете никого да држите со сила. Кој сака може да си оди – нагласи претседателот на ЗНАМ, потенцирајќи дека политичката одговорност е лична, а довербата на гласачите клучна.

Движењето ЗНАМ останува цврсто на своите принципи и демократски вредности, подготвено да продолжи со отворена и инклузивна политика, но без компромис кога станува збор за довербата на граѓаните и основните програмски определби на партијата.

The post ВО ЗНАМ НЕ ДРЖИМЕ НИКОГО СО СИЛА, КОЈ САКА МОЖЕ ДА СИ ОДИ Максим Димитриевски за разидувањата со пратеникот Миле Цеков appeared first on plusinfo.mk.

Намалување на бројот на пратеници во Собранието од 120 на 90, јасна заштита на македонскиот идентитет и продолжување на европскиот пат без отстапки по клучните национални прашања, се дел од ставовите што ги изнесе претседателот на Движењето ЗНАМ за Наша Македонија, Максим Димитриевски, осврнувајќи се на изборните реформи, односите со Бугарија и евроинтегративниот процес на државата.

Говорејќи за изборните реформи, Димитриевски посочи дека ЗНАМ предлага намалување на бројот на пратеници во парламентот, оценувајќи дека ваквата промена ќе придонесе за поефикасно функционирање на законодавниот дом, поголема одговорност на избраните претставници и рационализација на трошоците.

– Не постои рационална причина Македонија да има парламент со 120 пратеници кога и држави со слична големина имаат помал број. Намалувањето ќе значи појасна одговорност и поголема отчетност кон граѓаните – изјави Димитриевски.

Тој нагласи дека со ваквата реформа позицијата на пратеникот треба повторно да добие поголема тежина во политичкиот систем, а парламентот да ја врати својата улога како централна институција на демократијата.

Осврнувајќи се на односите со Бугарија, Димитриевски оцени дека одредени политики од Софија испраќаат загрижувачки сигнали и, како што рече, се во спротивност со европските вредности и принципи.

Според него, прашањата поврзани со идентитетот и правата на Македонците не треба да останат само билатерален проблем, туку треба да бидат разгледани и на европско ниво.

– Недозволиво е во 21 век да се оспоруваат идентитетски прашања и да се создаваат пречки за демократско организирање на луѓето кои се идентификуваат како Македонци – истакна Димитриевски.

Врзано за европската перспектива на државата, тој нагласи дека Македонија останува посветена на европскиот пат, но без компромиси кога станува збор за националниот идентитет и достоинството на државата.

– Македонскиот јазик, идентитет, писмо и култура се автентични и имаат свој историски континуитет. Ние сакаме да бидеме дел од Европа, но без да се откажеме од самите себе.

Тој додаде дека паралелно со евроинтеграциите, државата мора да продолжи со зајакнување на институциите и економскиот развој, посочувајќи дека европските вредности треба да се градат дома преку силни институции, економски напредок и почитување на националниот идентитет.

The post ПАРЛАМЕНТ СО 90 ПРАТЕНИЦИ И ЗАШТИТА НА МАКЕДОНСКИОТ ИДЕНТИТЕТ „Да“ за Европа, но без отстапки, вели Димитриевски appeared first on plusinfo.mk.