Министерот  за земјоделство, шумарство и водостопанство, Цветан Трипуновски истакна дека минатата година беше успешна, имаше берба со над 120 милиони килограми македонско грозје. Тој очекува оваа година да биде уште поуспешна година затоа што се работи на системите за наводнување, за да има навремена количина на вода, системите се санираат за да бидат во полна функција.

– Општина Неготино, заедно со Демир Капија, има над 3.850 регистрирани земјоделски стопанства во Регистарот, а располага со повеќе од 8.000 хектари обработлива земјоделска површина. Најголем дел од производството е насочено кон лозарството, по што овој регион е препознатлив – истакна министерот на средба со лозари и земјоделци во рамките на кампањата „Гласот што го слушаме – македонско најдобро“.

Министерот Трипуновски додаде дека целта на посетата е директна комуникација со земјоделците, како и презентирање на актуелните политики на министерството. Тој истакна дека ваквите средби се клучни за креирање на идните политки во агросекторот.

– Знаете дека се наоѓаме во делот на Тиквешијата, регион што е познат по квалитетот на македонското грозје. Регион каде што се произведува македонско квалитетно вино, кое е барано надвор од нашите граници – појасни министерот.

The post ОВАА ГОДИНА ЌЕ ИМАМЕ ПОУСПЕШНА БЕРБА НА ГРОЗЈЕ Владата работи на санирање на системите за наводување appeared first on plusinfo.mk.

Винарската визба „Тиквеш“ традиционално го одбележа празникот Свети Трифун со закројување на лозјата во Лепово, симболично означувајќи го почетокот на новата лозарска сезона.

Свечениот чин го изврши поглаварот на МПЦ-ОА, Неговото Блаженство, Архиепископот Охридски и Македонски г. г. Стефан , заедно со претседателот на Управниот одбор на „Тиквеш“, Светозар Јаневски, во присуство на министри, дипломати, институции, лозари и соработници.

Со традиционалното закројување беше испратена порака за единство, одговорност и визија за одржлива иднина на македонското винарство, особено во услови на климатски промени и засилена конкуренција на глобалниот пазар.

– Иднината на лозарството мора да се гради врз основа на наука, стандарди и економски одржливи насади. Лидерската позиција на „Тиквеш“ е резултат на иновации, дигитализација, алатки базирани на вештачка интелигенција и зелена технологија – изјави Светозар Јаневски.

Тој потенцираше дека за одржлив развој на секторот е неопходна долгорочна стратегија, креирана во партнерство со сите засегнати страни во индустријата.

Од винарницата информираат дека континуирано инвестираат во напредни практики за производство на грозје и вино, во соработка со експерти од Франција, Италија и Словенија, следејќи ги најсовремените светски трендови.

„Тиквеш“ е во процес на целосно елиминирање на фосилните горива од производството и преминување на користење исклучиво обновливи извори на енергија, со цел намалување на јаглеродниот отпечаток.

Компанијата е единствена од регионот со сребрено членство групата „Меѓународни винарници за борба против климатските промени“ (IWCA – Interational Wineries for Climate Action), која ги обединува водечките светски винарници со цел постигнување нулта нето емисија на јаглерод до 2050 година.

The post СВЕТИ ТРИФУН ВО ЗНАКОТ НА ЗЕЛЕНАТА ТРАНЗИЦИЈА „Тиквеш“ го одбележа празникот на лозарите и најави инвестиции со иновации и одржливост appeared first on plusinfo.mk.

Винарската визба „Тиквеш“ оваа година слави голем јубилеј – 140 години организирано производство на вино и жестоки пијалаци. Јубилејот, велат од компанијата, е потврда за континуитетот на македонската винска традиција, но и симбол на модерната визија и лидерството што ја позиционира „Тиквеш“ како регионален лидер и глобално афирмиран бренд.

Во изминатите две децении, компанијата реализираше инвестиции од над 45 милиони евра, насочени кон модернизација, дигитализација и производство на вина со врвен квалитет. Само во 2024 година, извозот достигна 32,7 милиони евра, а повеќе од половина од приходите доаѓаат токму од странските пазари.

„Она што го прави ‘Тиквеш’ уникатен е спојот на 140-годишната традиција со најсовремените светски трендови во енологијата и лозарството. Повеќе од еден век растеме заедно со нашите лозја, нашите луѓе, нашите партнери и потрошувачите, градејќи наследство втемелено во страст, посветеност и доверба“, велат од ВВ „Тиквеш“.

Во рамки на стратешката трансформација, винарницата воведе современи практики во лозјата, партнерираше со лозарите, а со отворањето на бутик-винарницата „Domaine Lepovo“ и аквизицијата на француската „Château de Gourdon“, дополнително го зацврсти интернационалниот карактер на брендот. Вината на „Тиквеш“ денес редовно освојуваат највисоки оценки и награди од реномирани светски вински експерти, меѓу кои и Роберт Паркер.

„Нашата визија за иднината е преку вложувања во обновливи извори на енергија и технологии за намалување на јаглеродниот отпечаток, воведување практики и дигитални решенија за прецизно лозарство, органско производство и заштитени географски ознаки, да бидеме двигател на промените и зелената трансформација на винската индустрија во регионот“, истакнуваат од „Тиквеш“.

Во чест на 140-годишнината, компанијата организираше специјален гроздобер за претставници на медиумите во органски сертифицираните лозови насади на поседот Лепово. Гостите лично учествуваа во бербата на каберне совињон, се запознаа со современите агро-технички практики и дегустираа вина од ексклузивната серија „Domaine Lepovo“.

Со овој настан, „Тиквеш“ уште еднаш ја потврди својата врска со лозјето, изворот на секое добро вино, и ја спои македонската винска историја со глобалните трендови, градeјќи бренд кој е „Бескрајно твој“.

The post „ТИКВЕШ“ СЛАВИ 140 ГОДИНИ ТРАДИЦИЈА Од Лепово до Франција, винаријата станува глобален вински бренд appeared first on plusinfo.mk.

Ајде малку сериозно за тврдењето на еврокомесарката за проширување Марта Кос дека никој не можел да ни ги земе гравчето, ајварот, полнетите пиперките и сличните традиционални специјалитети, кои, според неа, биле обележја на македонскиот идентитет.

Освен што е непристојна и понижувачка оваа изјава на Марта Кос – како израз на нејзиното разбирање на тоа што е тоа македонска традиција и идентитет – таа и не е точна.

Од две причини.

Првата е фактот дека дел од специјалитетите од кои се воодушевила Словенката реално не се идентитетска сопственост на македонската кујна. Тие се не се ничија сопственост, туку се дел од традицијата на поширокиот регион, поврзана главно со ориенталната кујна. Тие специјалитети, во разни варијанти, се усвоени од балканските народи.

Балканските народи, на пример, полемизираат меѓу себе чиј е ајварот. Има тврдења дека е турски специјалитет, Бугарите тврдат дека е нивен, на интернет доминира информацијата дека е српски, а ние Македонците сакаме да мислиме дека е наш. Она што е неспорно и општо потврден факт е дека нашиот македонски ајвар сепак е највкусен.

Втората причина поради која инфантилната теза на Марта Кос и не е така бенигна како што изгледа, е фактот што балканските народи, како и многу други народи во светот, водат многу сериозни полемики и спорови за брендирањето на одредени традиционални производи.

Дали, на пример, Марта Кос би рекла дека покрај ајварот, полнетите пиперки и гравчето, никој не може да ни го украде и нашето македонско вино?

Хм, не ќе да е баш така…

Да потсетам дека по усвојувањето на Преспанскиот договор, Македонија и Грција поведоа жесток спор за тоа кој има право да го „брендира“ своето вино како македонско. Не знам дали таа полемика заврши и ако тоа се случило, каков е исходот.

А Марта Кос и луѓето овде во Македонија кои нејзината изјава ја доживеаја како симпатична, ќе ги потсетам дека во периодот на социјализмот, Словенците со децении виното увезено од Македонија во цистерни го флашираа и го „ребрендираа“ како словенечко, често сурово криејќи го неговото географско потекло. Тоа се вика – крадење.

Затоа, тезите на Словенката треба да се отфрлат и да и се каже отворено, јасно и гласно – Македонија може да ги внесе Бугарите во Уставот, но само ако Европската Унија се согласи истовремено да прекинат сите дискусии на политичко ниво за историјата и за т.н. идентитетски прашања на кои инсистира Софија.

Тоа е еден чесен компромис, што би можел да се прослави со традиционални специјалитети и да се „залее“ со чаша македонско вино.

The post Батали гравчето, драга Марта, ќе ни го крадат ли виното, како што тоа го правеа Словенците со децении? appeared first on plusinfo.mk.

Со капацитет за производство од 30.000 шишиња годишно, Винарија Кукутанов е нова радовишка винска приказна каде за почеток, фокусот е на добропознатото Шардоне, уникатното Розе, добиено од автохтоната сорта на грозје Радовишка (Ж’та) прачка и елегантното Мерло „зачинето“ со радовишки тероар. Природни вина наменети за страсните љубители на винoто.

Климатските услови во Радовишката котлина се идеални за производство на хармонични вина поради изобилството на сончеви денови и постудените ноќи во периодот на зреење на грозјето. Во целокупниот производствен процес во винаријата, од приемот, преку примарната преработка, ферментацијата, до негата и зреењето, се обрнува големо внимание. Се користат исклучиво бочви направени од македонски даб (благун), избран од Готен планина. Од нашето вино не боли глава, можеш да испиеш повеќе и да уживаш со сите сетила, додава г. Кукутанов.

– Не правиме никаков компромис во процесот на создавање вино.  Цврсто се придржуваме кон своите основни принципи: беспрекорност во квалитетot, највисоки производни стандарди во комбинација со традиционални методи и употреба на квалитетно грозје од сончевите радовишки лозови насади. Затоа се и такви нашите вина, вистинско богатство на вкусови, направени за уживање со сите сетила, кои откако еднаш ќе ги пробате, сакате повторно да се вратите на нив! Не правиме компромис со квалитетот, бидејќи за да се успее, па дури и во Македонија, каде постојат огромен број на официјално регистрирани винарии, мора да се креира нешто навистина уникатно, специфично, што ќе се одвои од останатите вина – вели г. Кукутанов.

Станува збор за фамилијарна винарија, во која постои неколку генерациска традиција на производство на вино и други алкохолни пијалоци, каде пред многу години првичното хоби прераснува во силна страст, за денес дa се креира автентична винска приказна, која ја раскажува приказната за “убавината” на македонските вина!

The post КВАЛИТЕТ БЕЗ КОМПРОМИС Од Македонија доаѓаат најубавите вина, едни од нив се вината Кукутанов! appeared first on plusinfo.mk.

– Од 4 до 8 мај се враќа „Вино Скоп“, еден настан којшто ги претставува најпозитивните денови за мене во Скопје, којшто за жал некое време го немаше, но по мала пауза се враќаме пак назад. Можеме да кажеме дека е еден од најголемите настани што се враќа после короната – истакна актерот Столе Мицов на денешната прес-конференција.

Тој најави дека на Фестивалот ќе настапат повеќе уметници, меѓу кои и групите Фолтин, Ласт Експедишн, Фиц и Студени Нозе, Суперхикс, пејачите Нина Јанева, Мики Јовановски Џафер и Игор Џамбазов, како Здружението на Џез музичари „Биг Бенд“.

Во недела, на последниот ден на Фестивалот, Мицов најави дека на сцена ќе бидат македонски блуз музичари и целиот ден ќе биде исполнет со блуз музика.

Даниел Апостоловски од Град Скопје најави дека ќе има десетина настани од ист карактер кои се под покровителство на Град Скопје.

– Меѓу нив се Џез фестивалот што започна на 30 април во паркот Ибни Пајко, којшто е во организација на Здружението Џез Музичари, потоа „Вино Скоп“ како еден од поголемите настани, потоа Скопскиот градски фестивал којшто ќе се одржи на 6 и 7 мај на школка во Градскиот парк, Фјужн фестивал од 29 јуни до 3 јули, Кларифест од 1 до јуни, Десонас – фестивал на електронска музика некаде при крајот на месец јуни, Скопје колинг на 16 јули, Фолк фест „Скопје“ од 23 до 27 јули и концерт на Влатко Лозановски, за кој дополнително ќе ја утврдиме и локацијата и датумот, најави Апостоловски и додаде дека скопјани ова лето ќе имаат можност и да излезат и да прошетаат после долга пауза без забавни настани.

Директорката на „Вина од Македонија“, Елена Младеновска-Јеленковиќ информираше дека македонското вино во последните години бележи голем пораст на квалитетот.

– Се надевам дека овој настан „Вино Скоп 2022“ ќе биде еден од оние настани каде што ќе го славиме виното, особено македонското вино, коешто во минатите години бележи многу голем пораст на квалитетот. Сите винарии во Македонија не само што го подобруваат процесот на производство, туку воедно ги едуцираат и лозарите за да може да имаме еден производ што е на високо ниво којшто заслужува да се најде на полиците на светските пазари, објасни Младеновска-Јеленковиќ.

Таа исто така најави дека за време на Фестивалот љубителите на виното ќе имаат можност да вкусат околу 30 македонски вина од винариите членки на Здружението „Вина од Македонија“, од семејните винарии, како и странските вина коишто ќе бидат претставени во фестивалот.

Организатори на фестивалот се Крафт продукција и здружението „Вина од Македонија“, додека главен покровител на целиот настан е Град Скопје.

The post ПО ПАУЗАТА ПОРАДИ КОВИД-19 Од утре љубителите на вино ќе уживаат на „Вино Скоп“ appeared first on plusinfo.mk.